ཕྱི་ལོ་ ༢༠༡༡ ནས་བོད་དང་ཐའེ་ཝན། ཧོང་ཀོང་དང་ཡུ་གུར། དེ་བཞིན་རྒྱ་རིགས་དམངས་གཙོ་དོན་གཉེར་བ་སོགས་ཀྱི་གནས་ཚུལ་རྒྱ་ནག་གཞུང་ལ་རྩིས་སྤྲོད་བྱེད་མཁན་གྱི་གསང་ཉུལ་བ་གཅིག་འཛིན་བཟུང་དང་གཞན་བཞི་བྲོས་བྱོལ་དུ་ཕྱིན་ཡོད་འདུག
རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཨ་རིའི་ནང་རྒྱ་རིགས་དམངས་གཙོ་དོན་གཉེར་བ་རྣམས་གཙོ་བྱས་པའི་བོད་དོན་ལས་འགུལ་བ་དང་། ཐའེ་ཝན་རང་བཙན་འཐབ་རྩོད་པ། ཡུ་གུར་དང་ཧོང་ཀོང་གི་རང་དབང་འཐབ་རྩོད་པ་རྣམས་ཀྱི་གནས་ཚུལ་རྒྱ་ནག་གཞུང་ལ་རྩིས་སྤྲོད་བྱེད་མཁན་རྒྱ་རིགས་བཞི་དང་ཨ་རིའི་མི་སེར་གཅིག་བཅས་ཁྱོན་རྒྱའི་གསང་ཉུལ་བ་ ༥ ཡི་ཁྲོད་ཀྱི་མི་གཅིག་ཨ་རིའི་གཞུང་གིས་འཛིན་བཟུང་བྱས་ཏེ། ད་ལྟ་འདྲི་རྩད་གཏོང་གི་ཡོད་འདུག
དེ་འབྲེལ་རོའུ་ཊར་གསར་ཁང་གི་གནས་ཚུལ་ནང་། ལོ་ན་ ༧༣ ཡིན་པའི་རྒྱ་རིགས་ཝང་ཧྲོ་ཇིན་(Wang Shujun) གྱིས་ཨ་རིའི་གྲོང་ཁྱེར་ནེའུ་ཡོག་དང་ཁུ་སིན་(Queens)ནང་རྒྱ་ནག་གཞུང་ལ་ཁ་གཏད་གཅོག་མཁན་གྱི་རྒྱ་རིགས་གཙོ་བྱས་པའི་ཚོགས་སྡེ་ཁག་གཞན་གྱི་གནས་ཚུལ་རྒྱ་ནག་དབུས་བདེ་སྲུང་ལྷན་ཁང་ལ་རྩིས་སྤྲོད་བྱེད་ཀྱི་ཡོད་པའི་ནག་ཉེས་འོག འདི་ལོའི་ཕྱི་ཟླ་ ༣ ཚེས་ ༡༦ ཉིན་འཛིན་བཟུང་བྱས་ཡོད་པ་དང་། ཁོ་ལ་འདྲི་རྩད་བྱས་པ་བརྒྱུད་ད་དུང་རྒྱ་རིགས་ཧྥན་ཧེ་(Feng He)། ཅའེ་ཇི་(Jie Ji)། མེན་ལི་(Ming Li)། ཁུ་ཆིན་ལའོ་(Keqing Lu)བཅས་ཀྱིས་གསང་ཉུལ་བའི་ལས་དོན་སྒྲུབ་ཀྱི་ཡོད་པ་ཤེས་རྟོགས་ཐུབ་ཡོད་ཀྱང་། ད་ལྟ་ཁོ་ཚོ་བྲོས་ཕྱིན་ཡོད་སྐོར་སོགས་བརྗོད་འདུག
ཨ་རིའི་ཁྲིམས་དཔྱོད་ལས་ཁུངས་ཀྱིས་ཤེས་རྟོགས་བྱུང་བ་ལྟར་ན། ཝང་ཟེར་བའི་རྒྱ་རིགས་དེས། ཕྱི་ལོ་ ༢༠༡༡ ཙམ་ནས་རྒྱ་ནག་དབུས་བདེ་སྲུང་ལྷན་ཁང་གསང་བའི་གནས་ཚུལ་མཁོ་སྤྲོད་བྱས་ཡོད་པ་མ་ཟད། རྒྱ་ནག་བདེ་སྲུང་ལྷན་ཁང་གིས། ཝང་ལ་བོད་དོན་ལས་འགུལ་བ་དང་ཐའེ་ཝན་རང་བཙན་འཐབ་རྩོད་པ། དེ་བཞིན། ཧོང་ཀོང་གི་དམངས་གཙོ་དོན་གཉེར་བ་དང་ཡུ་གུར་ལས་འགུལ་བ་སོགས་ཀྱི་གནས་ཚུལ་མཁོ་སྤྲོད་བྱ་དགོས་པའི་བཀོད་མངགས་བྱས་ཡོད་འདུག
ད་ལྟ་རྒྱ་ནག་གཞུང་གི་གསང་ཉུལ་བ་དེ་དག་ལ་ཨ་རིའི་མངའ་སྡེ་ནེའུ་ཡོག་གི་གྲོང་ཁྱེར་(Brooklyn) གྱི་ཁྲིམས་ཁང་ཞིག་གིས་འདྲི་གཅོད་གཏོང་གི་ཡོད་པ་དང་། ཟླ་འདིའི་ཕྱི་ཚེས་ ༡༨ ཉིན་ཨ་རིའི་ཁྲིམས་དཔྱོད་ལས་ཁུངས་དེའི་ཁྲིམས་རྩོད་པ་ (Breon Peace) ལགས་ཀྱིས། རྒྱ་རིགས་དེ་དག་གི་བྱ་སྤྱོད་ལས། རྒྱ་ནག་དམར་ཤོག་ཚོགས་པས་ཨ་རིའི་ནང་གནས་སྡོད་བྱེད་མཁན་གྱི་རྒྱ་རིགས་མི་མང་གི་བདེ་འཇགས་དང་རང་དབང་ལ་འཇིགས་སྐུལ་གཏོང་གི་ཡོད་པའི་རྐུབ་རྡོལ་ཡོད། ཅེས་བརྗོད་ཡོད་པ་རེད། འོན་ཀྱང་། དེ་འབྲེལ་ཐད། ཨ་རིའི་རྒྱལ་ས་ཝང་ཤི་ཊོན་གྱི་རྒྱ་ནག་གཞུང་ཚབ་ཁང་གིས། ཨ་རིའི་ཕྱོགས་ནས་རྒྱ་རིགས་མི་སེར་གྱི་ཁྲིམས་མཐུན་ཁེ་དབང་སྲུང་སྐྱོབ་བྱས་པའི་ཐོག་ནས་བདེན་པ་དང་ཁྲིམས་མཐུན་གྱིས་ཞིབ་འཇུག་བྱ་དགོས་པ་ནན་སྐུལ་བྱེད་བཞིན་ཡོད། ཅེས་དང་། རྒྱ་རིགས་དེ་དག་གི་ནག་ཉེས་ནི་ཆེད་དུ་ཨ་རིས་བཟོས་པ་ཞིག་ཡིན་པའི་སྐྱོན་འཛུགས་བྱས་ཡོད་འདུག
ཡང་དེ་འབྲེལ་རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་གསར་ཁང་གི་གནས་ཚུལ་ནང་། རྒྱ་ནག་གཞུང་གི་གསང་ཉུལ་བ་དེ་དག་གིས། ཨ་རིའི་མི་སེར་ཡིན་པའི་ཝང་ཟེར་བ་དང་མཉམ་འབྲེལ་བྱས་ཏེ། ཝང་གི་ལས་འགན་གཙོ་བོ་ནི་ཨ་རིའི་ནང་ཡོད་པའི་རྒྱ་རིགས་དམངས་གཙོ་དོན་གཉེར་བ་དང་འགྲོ་བ་མིའི་ཐོབ་ཐང་གི་ལས་འགུལ་བ། དེ་བཞིན་བོད་དང་ཐའེ་ཝན། ཧོང་ཀོང་དང་ཡུ་གུར་བཅས་ཀྱི་རང་དབང་འཐབ་རྩོད་ལས་འགུལ་བ་རྣམས་དང་འབྲེལ་འདྲིས་བྱ་རྒྱུ་དེ་ཡིན་ཞིང་། ཁོ་ཚོས་བྱེད་ཐབས་སྣ་ཚོགས་སྤྱད་པ་བརྒྱུད་རང་དབང་ལུང་པའི་ནང་གི་རྒྱ་རིགས་དང་བོད་མི། ཐའེ་ཝན་དང་ཧོང་ཀོང་། ཡུ་གུར་མི་མང་བཅས་ལ་འཇིགས་སྐུལ་བྱེད་ཀྱི་ཡོད་སྐོར་སོགས་བརྗོད་འདུག
ཨ་རིའི་གཞུང་ཕྱོགས་ཀྱི་གནས་ཚུལ་ལྟར་ན། ཕྱི་ལོ་ ༢༠༡༨ ནས་ཨ་རིའི་ནང་རྒྱ་ནག་གི་གསང་ཉུལ་གྱི་ལས་དོན་སྒྲུབ་མཁན་ཇེ་མང་དུ་ཕྱིན་ཡོད་པའི་ངོས་འཛིན་འོག ལོ་དེར་ཨ་རིའི་རྒྱལ་སྲིད་བདེ་འཇགས་ལས་ཁུངས་དང་ཨ་རིའི་དབུས་ཞིབ་དཔྱོད་ལས་ཁུངས་(FBI)། གཞན་ཡང་རྒྱལ་ཡོངས་ཀྱི་ཁྲིམས་དཔྱོད་ལས་ཁུངས་ཁག་གིས། རྒྱ་ནག་མགོ་འཛུགས (China Initiative) ཞེས་རྒྱ་ནག་གིས་ཨ་རིའི་ཚོང་ལས་དང་ཚན་ལས་འཕྲུལ་རིགས་སོགས་ཀྱི་གནས་ཚུལ་རྐུ་འཁྱེར་བྱ་རྒྱུ་མཚམས་འཇོག་ཐབས་ཀྱི་སྲིད་ཇུས་ཤིག་གཏན་འབེབས་བྱས་ཏེ། ད་ལྟའང་ལག་བསྟར་བྱེད་མུས་ཡིན་ཡང་། ཨ་རིའི་ནང་རྒྱ་ནག་གི་གསང་ཉུལ་གྱི་ལས་དོན་དང་འབྲེལ་བའི་དཀའ་ངལ་མུ་མཐུད་འཕྲད་ཀྱི་ཡོད་འདུག
གསར་འགོད་པ། སྐལ་བཟང་སྦྱིན་པ།
