བོད་ཀྱི་ལོ་རྒྱུས་སྐོར་གྱི་འགུལ་རིས་གློག་བརྙན་ཞིག་བཟོ་སྐྲུན་བྱ་རྒྱུ་ཡིན་འདུག

ཨ་རིའི་གློག་བརྙན་བཟོ་སྐྲུན་ཁང་ཞིག་གིས་མང་ཚོགས་ནས་ཞལ་འདེབས་བསྡུས་ཏེ་བོད་ཀྱི་ལོ་རྒྱུས་སྐོར་གྱི་འགུལ་རིས་གློག་བརྙན་ཚན་པ་བརྒྱད་ཅན་ཞིག་ཕབ་སྐྲུན་བྱ་རྒྱུ་ཡིན་འདུག

ཨ་རིར་རྟེན་གཞི་བྱས་པའི་རང་དབང་གློག་བརྙན་བཟོ་སྐྲུན་ཁང་ཨཱམ་ཅེར་ཨེ་ཁེ་ཌེ་མིག་ (Armchair Academics) ཅེས་པ་ཞིག་གིས་ལོ་རྒྱུས་ཆེད་མཁས་པར་བཅར་འདྲི་སོགས་བརྒྱུད་ནས། བོད་བཙན་པོའི་དུས་སྐབས་ནས་བཟུང་ད་ལྟའི་བཙན་བྱོལ་བོད་མིའི་སྒྲིག་འཛུགས་དབར་གྱི་ལོ་ངོ་ ༡༣༠༠ ལྷག་རིང་གི་བོད་ཀྱི་ལོ་རྒྱུས་དང་རིག་གཞུང་སྐོར་གྱི་དངོས་བཤུས་འགུལ་རིས་གློག་བརྙན་ཚན་པ་བརྒྱད་ཅན་ཞིག་ཕབ་སྐྲུན་བྱས་ཏེ། མི་རིང་བར་ཡུ་ཊུབ་ནང་རིན་མེད་ཐོག་ཤར་གཏོང་བྱ་རྒྱུ་ཡིན་པ་རེད་འདུག

ཁེ་ཉིན་ཕྱི་ཚེས་ ༡ ཉིན་གློག་བརྙན་བཟོ་སྐྲུན་ཁང་གིས་འགུལ་རིས་གློག་བརྙན་བཟོ་རྒྱུའི་གསལ་བསྒྲགས་ཤིག་སྤེལ་བའི་ནང་། འགུལ་རིས་ཀྱི་ལམ་ནས་བོད་ཀྱི་ལོ་རྒྱུས་བཤད་པ་ (The Animated History of Tibet) ཞེས་པའི་དངོས་བཤུས་གློག་བརྙན་ནང་། བོད་བཙན་པོའི་རྒྱལ་རབས་ཀྱི་དར་རྒུད་དང་དུས་རབས་བདུན་པའི་ནང་བོད་དུ་ནང་ཆོས་དར་འཕེལ་བྱུང་ཚུལ་ནས། བོད་ཀྱི་ཆོས་བརྒྱུད་ཁག་གི་བྱུང་རབས་དང་། ༧གོང་ས་རྒྱལ་དབང་སྐུ་ཕྲེང་རིམ་བྱོན་གྱི་བོད་གཞུང་དགའ་ལྡན་ཕོ་བྲང་གི་ཆབ་སྲིད་འཛིན་སྐྱོང་། རྒྱ་ནག་གི་ཡོན་དང་མིང་། ཆིང་བཅས་ཀྱི་དུས་སྐབས་སུ་རྒྱ་ནག་དང་བོད་དབར་གྱི་འབྲེལ་བ། ཡུ་རོབ་ནང་གི་ཨེ་ཤ་ཡའི་རིག་པ་སྨྲ་བ་རྣམས་དང་དབྱིན་ཇིས་བོད་ལ་ལྟ་ཕྱོགས། དེའི་རྗེས་ཕྱི་ལོ་ ༡༩༥༠ ནང་རྒྱ་ནག་གིས་བོད་བཙན་བཟུང་བྱས་ཚུལ་དང། ད་ལྟའི་བཙན་བྱོལ་བོད་མིའི་སྤྱི་ཚོགས་ཀྱི་བྱུང་རབས་བཅས་ཀྱི་སྐོར་གྱི་གནས་ཚུལ་འགོད་རྒྱུ་ཡིན་འདུག

འགུལ་རིས་གློག་བརྙན་དེའི་གཞུང་རྩོམ་མཁན་དང་འཁྲབ་ཁྲིད་པ་ནི། པེ་རི་སི་གཙུག་ལག་སློབ་གྲྭ་ཆེན་མོ་ནས་བོད་དང་ཧི་མ་ལ་ཡའི་རིག་པ་ཐོག་ལ་འབུམ་རམས་པའི་ལག་འཁྱེར་དང་། དབྱིན་ཇིའི་ཨོག་སི་ཕོར་ཌི་སློབ་གྲྭ་ཆེན་མོ་ནས་བོད་རིག་པའི་ཐོག་ལ་གཙུག་ལག་རབ་འབྱམས་པའི་ལག་འཁྱེར་ཐོབ་པའི་སྐུ་ཞབས་ཨེ་ལེག་ཛན་ཌར་སི་མི་ཐི་ (Alexander K. Smith) ཞེས་པ་ཁོང་ཡིན་ཞིང་། ལེ་ཚན་དེའི་ནང་འགུལ་རིས་གཙོ་བོར་བྱས་པའི་དཔེ་རིས་དང་ས་ཁྲ་ཁུངས་འཕེར། དེ་བཞིན་ཨུ་རོབ་དང་ཨ་རིའི་གཙུག་ལག་སློབ་གྲྭ་ཆེན་མོ་ཁག་ནང་ཡོད་པའི་བོད་ཀྱི་ལོ་རྒྱུས་དང་རིག་གནས་སྐོར་གྱི་ཆེད་མཁས་པ་རྣམས་ལ་བཅར་འདྲི་བྱས་པའི་རྒྱུ་ཆ་རྣམས་བཀོལ་སྤྱོད་བྱ་རྒྱུ་ཡིན་འདུག

གློག་བརྙན་བཟོ་སྐྲུན་ཁང་དེས་ད་ལན་བོད་ཀྱི་ལོ་རྒྱུས་སྐོར་གྱི་འགུལ་རིས་གློག་བརྙན་དེ་ཉིད་དཔལ་འབྱོར་གྱི་ཁེ་ཕན་སྒྲུབ་ཆེད་ཕབ་སྐྲུན་བྱེད་ཀྱི་མེད་པར། གཙོ་བོ་ཁོང་ཚོ་བོད་ཀྱི་ལོ་རྒྱུས་ལ་དགའ་མོས་ཆེན་པོ་ཡོད་པའི་ཐོག བོད་མི་དང་བོད་ཀྱི་ལྟེ་གནས་ཁང་དང་འབྲེལ་འདྲིས་བྱུང་བ་བརྒྱུད་ནས་ཁོང་རྣམ་པར་ཕན་ཐོགས་ཆེན་པོ་བྱུང་ཡོད་པ་དང་། ད་ལན་གྱི་གློག་བརྙན་དེ་དྲིན་ལན་འཇལ་བའི་ཚུལ་དུ་ཕབ་སྐྲུན་བྱེད་ཀྱི་ཡོད་སྐོར་འགྲེལ་བརྗོད་བྱས་འདུག

ད་ལྟའི་ཆར་གློག་བརྙན་བཟོ་སྐྲུན་ཁང་དེས་བོད་ཀྱི་ལོ་རྒྱུས་གློག་བརྙན་ཕབ་སྐྲུན་གྱི་ཆེད་དུ། Indiegogo ཞེས་པའི་དྲ་ཚིགས་བརྒྱུད་ནས་མི་མང་ནས་ཞལ་འདེབས་སྡུད་མུས་ཡིན་འདུག་ལ། འགྲོ་གྲོན་གྱི་ཆ་ནས་སྐར་མ་ ༢༠ ཅན་གྱི་གློག་བརྙན་ཚན་པ་རེར་ཨ་སྒོར་ ༨༠༠༠ གནས་ཀྱི་ཡོད་ཅིང་། ལེ་ཚན་བརྒྱད་ཆ་ཚང་ལ་ཁྱོན་ཨ་སྒོར་ ༦༤༠༠༠ གནས་ཀྱི་ཡོད་འདུག ཡང་གལ་ཏེ་ལས་གཞི་དེའི་ཆེད་ཞལ་འདེབས་ཨ་སྒོར་ ༩༠༠༠༠ བྱུང་ཚེ། ལེ་ཚན་ཚང་མ་བོད་སྐད་ཐོག་བསྐྱར་དུ་འགྲེམས་སྤེལ་བྱེད་ཐུབ་ཀྱི་ཡོད་པ་རེད་འདུག ད་ལྟའི་ཆར་གློག་བརྙན་ལས་གཞི་དེར་ཁྱོན་ཧིན་སྒོར་འབུམ་ ༥༠ ཙམ་དགོས་མཁོ་ཡོད་པའི་ཁྲོད་ནས་འབུམ་ ༡ དང་ཕྱེད་ཀ་མ་ཟིན་ཙམ་ཐོབ་ཚར་ཡོད་འདུག

གསར་འགོད་པ། པ་སངས་ཚེ་རིང་།