ཚོགས་སྡེ་ཁག་ལྔ་ཡིས་༧གོང་ས་མཆོག་ལ་བརྟན་བཞུགས་འབུལ་གཏན་ཁེལ་འདུག

འདི་ལོའི་ཕྱི་ཟླ་ ༩ ཚེས་ ༧ ཉིན་༧མོན་ཡུལ་ལྷ་སྡེ་མི་སྡེ་དང་། གཞིས་བྱེས་ཇོ་ནང་པ། བལ་ཡུལ་རྣམ་རྒྱལ་མཐོ་འབྲིང་སློབ་ཁག་གཉིས་ཀྱི་དགེ་ལས་སློབ་ཟུར་ཐུན་མོང་། སིཌ་ནི་བོད་རིགས་མཐུན་ཚོགས། མདོ་སྨད་མང་འབའ་བྱ་གསུམ་བཅས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་འབུལ་གཏན་ཁེལ་ཡོད་པ་རེད།

ཕྱི་ཟླ་ ༥ ཚེས་ ༢༡ ཉིན་དཔལ་ལྡན་དགའ་ལྡན་ཕོ་བྲང་ཡིག་ཚང་གིས། འདི་ལོའི་ཕྱི་ཟླ་༩ ཚེས་ ༧ རེས་གཟའ་ལྷག་པའི་ཉིན་མོན་ཡུལ་ལྷ་སྡེ་མི་སྡེ་དང་གཞིས་བྱེས་ཇོ་ནང་པ། བལ་ཡུལ་རྣམ་རྒྱལ་མཐོ་འབྲིང་སློབ་ཁག་གཉིས་ཀྱི་དགེ་ལས་སློབ་ཟུར་ཐུན་མོང་། སིཌ་ནི་བོད་རིགས་མཐུན་ཚོགས། མདོ་སྨད་མང་འབའ་བྱ་གསུམ་བཅས་ཀྱིས་༧གོང་ས་མཆོག་ལ་མཉམ་སྡེབ་བརྟན་བཞུགས་འབུལ་གཏན་ཁེལ་བ་ཡོངས་བསྒྲགས་གནང་བ་དང་བསྟུན། ཚོགས་སྡེ་དེ་དག་གིས་བརྟན་བཞུགས་འབུལ་ཕྱོགས་ཀྱི་ལས་དོན་ཐོག་ནང་ཁུལ་གྲོས་བསྡུར་དགོས་པའི་འབོད་སྐུལ་དང་ལམ་སྟོན་ཡང་གནང་འདུག

དེ་རིང་འདི་གའི་གསར་འགོད་པས་ཁ་པར་བརྒྱུད་མང་འབའ་བྱ་གསུམ་གྱི་བརྟན་བཞུགས་གོ་སྒྲིག་ཚོགས་ཆུང་གི་ཚོགས་མི་དགེ་བཤེས་བསམ་འགྲུབ་ལགས་སུ། བརྟན་བཞུགས་བསྟར་འབུལ་གྱི་གྲ་སྒྲིག་དང་རྒྱབ་ལྗོངས་གནས་ཚུལ་སོགས་ཀྱི་སྐོར་ནས་བཀའ་འདྲི་ཞུས་པར་ཁོང་གིས། ཉེ་ཆར་དཔལ་ལྡན་དགའ་ལྡན་ཕོ་བྲང་ཡིག་ཚང་གིས་བཀའ་ལན་འབྱོར་མ་ཐག ཚོགས་པ་ཁག་ཚང་མ་དྲ་ལམ་བརྒྱུད་ཚོགས་འདུ་འཚོགས་ཏེ་བརྟན་བཞུགས་སྐབས་ཀྱི་འབུལ་བ་ཕུད་པའི་ཐུན་མོང་གི་བསྒྲུབ་དགོས་པའི་ལས་ཀ་སོགས་ཀྱི་སྐོར་ནས་གྲོས་བསྡུར་བྱས་ཡོད་པ་དང་། མང་འབའ་བྱ་གསུམ་གྱི་ངོས་ནས། འདས་པའི་ལོ་ངོ་གསུམ་ཙམ་གྱི་རིང་༧རྒྱལ་བའི་སྐུ་ཕྱའི་ཞབས་བརྟན་དང་འབྲེལ་ནས། ས་དགེ་བཀའ་རྙིང་གི་གཙོས་བོན་པོ་སོགས་བོད་ཀྱི་ཆོས་བརྒྱུད་ཁག་ཡོངས་ནས་ཞབས་རིམ་གསུང་འདོན་དང་། དེ་བཞིན་བཙན་བྱོལ་བོད་མིའི་རྒན་གསོ་ཁང་ཡོངས་ལ་ཞལ་ལག་ཕུལ་བ་དང་མ་ཎི་གསོག་སྒྲུབ་སོགས་ཀྱི་ཞབས་བརྟན་བསྒྲུབས་ཡོད་པ། ཏོག་དབྱིབས་གཉན་རིམས་སྐབས། བོད་མིའི་སྒྲིག་འཛུགས་ནས་ཏོག་དབྱིབས་འགོག་ཁབ་བསྐྱོན་པར་ཞལ་འདེབས་ཕུལ་ཐུབ་པ་སོགས་བྱུང་ཡོད་བརྗོད་བྱུང་།

སྤྱིར་བཏང་མང་འབའ་བྱ་གསུམ་ངོས་ནས་ཕྱི་ལོ་ ༢༠༡༩ ཟླ་ ༤ ཡས་མས་ནང་དགའ་ལྡན་ཕོ་བྲང་ལ་བོད་གཞིས་བྱེས་གཉིས་ཀྱི་མང་འབའ་བྱ་གསུམ་གྱི་མི་མང་གི་ཚབ་བྱས་ནས། ༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་བའི་སྙན་ཞུ་ཕུལ་བ་དང་། ཕྱི་ལོ་ ༢༠༢༠ ལོར་དགའ་ལྡན་ཕོ་བྲང་ཡིག་ཚང་གིས་མང་འབའ་བྱ་གསུམ་ནས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་གཏན་ཁེལ་ཡོད་ཀྱང་། ཏོག་དབྱིབས་གཉན་རིམས་ཀྱི་རྐྱེན་གྱིས་ད་བར་བརྟན་བཞུགས་བསྟར་འབུལ་ཞུ་མ་ཐུབ་པར་ལྷག་ཡོད་འདུག་ལ། ད་རེས་བརྟན་བཞུགས་བསྟར་འབུལ་ཞུ་རྒྱུའི་བཀའ་བཞེས་ཐོབ་པའི་ཐད་དགེ་བཤེས་བསམ་འགྲུབ་ལགས་ཀྱིས། ད་རེས་༧གོང་ས་མཆོག་ལ་བརྟན་བཞུགས་འབུལ་རྒྱུའི་གོ་སྐབས་ཐོབ་པར་སེམས་པ་ཧ་ཅང་དགའ་པོ་བྱུང་ཡོད་སྐོར་བརྗོད་བྱུང་།

གསར་འགོད་པ། སྐལ་བཟང་སྦྱིན་པ།