ཟླ་འདིའི་ཕྱི་ཚེས་ ༧ ནས་ཕྱི་ཟླ་ ༧ ཚེས་ ༦ བར་སོག་ཡུལ་དུ་རྟེན་གཞི་བྱས་པའི་དགའ་ལྡན་ཐེག་ཆེན་གླིང་དགོན་པ་ (Diuva Hutugtu Foundation)དང་རུ་སོག་སྐུ་ཚབ་དོན་གཅོད་ཁང་གི་གོ་སྒྲིག་འོག སོག་ཡུལ་དགའ་ལྡན་ཐེག་ཆེན་གླིང་དགོན་པའི་ཚོགས་ཁང་དུ་༧གོང་ས་མཆོག་གི་མཛད་པ་འཕྲིན་ལས་སྐོར་གྱི་སྐུ་པར་འགྲེམས་སྟོན་གནང་བཞིན་ཡོད་འདུག
འདི་གའི་གསར་འགོད་པས་ཁ་པར་བརྒྱུད་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་མཆོག་ལ་༧གོང་ས་རྒྱལ་བ་རིན་པོ་མཆོག་གི་མཛད་པ་འཕྲིན་ལས་སྐོར་གྱི་སྐུ་པར་འགྲེམས་སྟོན་སྐོར་བཀའ་འདྲི་ཞུས་པར་ཁོང་གིས། ཟླ་འདིའི་ཕྱི་ཚེས་ ༧ ནས་ཕྱི་ཟླ་ ༧ ཚེས་ ༦ ༧གོང་ས་མཆོག་གི་འཁྲུངས་སྐར་བར་དགའ་ལྡན་ཐེག་ཆེན་གླིང་དགོན་པའི་ཚོགས་ཁང་ནང་དུ་༧གོང་ས་མཆོག་གི་མཛད་རྣམ་སྐོར་ལ་སྐུ་པར་འགྲེམས་སྟོན་གནང་གི་ཡོད་པ་དང་། སྐུ་པར་འདིའི་ནང་༧གོང་ས་མཆོག་བོད་ལ་བཞུགས་པའི་སྐབས་དང་། བཙན་བྱོལ་དུ་ཕེབས་སྐབས། དེ་བཞིན་བཙན་བྱོལ་དུ་ཕེབས་རྗེས་འཛམ་གླིང་སྤྱི་ལ་མཛད་འཕྲིན་བསྐྱངས་དང་སྐྱོང་བཞིན་ཡོད་པའི་སྐུ་པར་གྱི་འགྲེམས་སྟོན་ཞིག་ཆགས་ཀྱི་ཡོད་པ་རེད། ༧གོང་ས་མཆོག་གི་སྐུ་པར་གྱི་འགྲེམས་སྟོན་གོ་སྒྲིག་ཞུས་པའི་རྒྱུ་མཚན་གཙོ་བོ་ནི། སྤྱིར་སོག་པོའི་མང་ཚོགས་ནང་དུ་༧གོང་ས་མཆོག་གི་མཛད་པ་དང་། ལོ་རྒྱུས་དེ་དག་གོ་རྟོགས་ཤུགས་ཆེ་རུ་གཏོང་ཐུབ་རྒྱུའི་དམིགས་ཡུལ་ཡོད། སོག་པོའི་ནང་དུ་ང་ཚོས་༧གོང་ས་མཆོག་སོ་སོའི་རྩ་བའི་བླ་མར་བརྩིས་པ་མ་ཟད། ཆོས་ཕྱོགས་ཀྱི་དབུ་ཁྲིད་ལའང་བརྩི་ཡི་ཡོད་པ་རེད། འོན་ཀྱང་། མི་མང་པོ་ཞིག་གིས་ཆོས་ཕྱོགས་ཀྱི་དབུ་ཁྲིད་དུ་རྩིས་པ་ཙམ་མ་གཏོགས་༧གོང་ས་མཆོག་གིས་སྤྱིར་འཛམ་གླིང་ལ་མཛད་པ་གང་འདྲ་བསྐྱངས་ཡོད་མེད་ཤེས་མཁན་དཀོན་པོ་རེད། འཛམ་གླིང་སྤྱི་ལ་ཆིབས་སྒྱུར་གནང་གི་ཡོད་པ་ཤེས་ཀྱི་ཡོད་པ་རེད་དེ། རྒྱལ་ཁབ་གཞན་ལ་ཕེབས་པའི་སྐབས་སུ་མཛད་འཕྲིན་གང་བསྐྱངས་ཡོད་མེད། དཔེར་ན་དཔོན་རིགས་ཁག་ལ་མཇལ་འཕྲད་གནང་གི་ཡོད་པ་དང་ཕྱི་རྒྱལ་ཡུལ་གྲུ་ཁག་གི་མང་ཚོགས་ལ་བཀའ་ཆོས་ཡང་ནས་ཡང་དུ་གནང་གི་ཡོད་པ་རེད། ཚན་རིག་པ་དང་ལྷན་དུ་བགྲོ་གླེང་གནང་གི་ཡོད་རེད། ནོ་སྦེལ་ཞི་བདེའི་གཟེངས་རྟགས་ཙམ་མིན་པར་གཟེངས་རྟགས་མང་པོ་འབུལ་མཁན་བྱུང་ཡོད་རེད། དེ་འདྲའི་ཐོག་ལ་མི་མང་པོ་ཞིག་གིས་མཁྱེན་གྱི་མེད་པར་བརྟེན། སྐུ་པར་གྱི་འགྲེམས་སྟོན་འདི་བརྒྱུད་ནས་༧གོང་ས་མཆོག་གི་མཛད་པ་ག་རེ་བསྐྱངས་ཡོད་མེད་དང་། ༧གོང་ས་མཆོག་གི་ཐུགས་སྐྱེད་དམ་བཅའ་བཞིའི་སྐོར་ལ་གོ་རྟོགས་སྤེལ་རྒྱུའི་དམིགས་ཡུལ་ཡོད། ཅེས་གསུངས་བྱུང་།
ད་དུང་རིན་པོ་ཆེ་མཆོག་གིས། དབུ་འབྱེད་མཛད་སྒོའི་ཐོག་སོག་ཡུལ་ནང་པ་ཡོངས་ཀྱི་དབུ་ཁྲིད་མཁན་པོ་ནོ་མི་ཁཱན་(Khambo Nomun Khan) དང་། ཨ་རི་དང་རྒྱ་གར་གཞུང་ཚབ་ཁང་གི་འཐུས་མི། རྩོམ་པ་པོ། གློག་བརྙན་འཁྲབ་སྟོན་པ། གཞས་པ། མཁས་དབང་། དེ་བཞིན་སོག་པོའི་བླ་སྤྲུལ་དང་ས་གནས་ཀྱི་གཞུང་གི་མི་སྣ་ཁག གྲོང་སྡེ་སྤྱི་ཁྱབ་ལས་ཁུངས་ཀྱི་འཐུས་མི་སོགས་ཁྱོན་སྐུ་མགྲོན་ ༧༤ ཙམ་ཕེབས་པ་དང་། སོག་ཡུལ་གྱི་གཞས་པ་གྲགས་ཅན་ (Ariun Bataar) ལགས་དང་། (Dolgor) ལགས་གཉིས་ནས་༧གོང་ས་རྒྱལ་བ་རིན་པོ་ཆེ་ལ་བསྟོད་གཞས་ཕུལ་སོང་ལ། སྐུ་པར་འགྲེམས་སྟོན་གྱི་དབུ་འབྱེད་མཛད་སྒོ་ཡག་པོ་བྱུང་ཡོད་སྐོར་སོགས་གསུངས་བྱུང་།
གསར་འགོད་པ། བསྟན་འཛིན་ཕུར་བུ།
