མདང་དགོང་མཚན་གུང་ཙམ་ལ་ཨབ་གྷ་ནི་སི་ཐན་གྱི་ལྷོ་ཤར་ཁུལ་དུ་ས་ཡོམ་ཤུགས་ཆེན་བརྒྱབ་སྟེ་ཉུང་མཐར་མི་གྲངས་ ༩༢༠ ལྷག་རྐྱེན་འདས་དང་མི་ ༦༠༠ ལྷག་ལ་རྨས་སྐྱོན་བཟོས་ཡོད་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། མདང་དགོང་ཨབ་གྷ་ནི་སི་ཐན་གྱི་གྲོང་ཁྱེར་ (Khost) ཡི་ལྷོ་ཤར་ཁུལ་དུ་ས་ཡོམ་ཚད་རིམ་ ༦།༡ བརྒྱབ་སྟེ། གྲོང་ཁྱེར་དེའི་རྫོང་ཁག་ (Barmala) དང་ (Ziruk)། (Naka)། (Gayan) བཅས་ཀྱི་ནང་གནོད་འཚེ་ཚབས་ཆེ་ཤོས་ཐེབས་ཡོད་པ་མ་ཟད། ད་ལྟའི་བར་དུ་ཉུང་མཐར་མི་གྲངས་ ༩༢༠ ལྷག་རྐྱེན་འདས་དང་། མི་གྲངས་ ༦༠༠ ལྷག་ལ་རྨས་སྐྱོན་ཕོག་ཡོད་འདུག
ཨབ་གྷ་ནི་སི་ཐན་གཞུང་གི་མགྲིན་ཚབ་པ་ (Bilal Karimi) ཡི་སྒེར་གྱི་ཊུ་ཝི་ཊར་སྟེང་། ཁ་སང་ཨབ་གྷན་གྱི་མངའ་སྡེ་ (Paktika) ཡི་རྫོང་བཞིའི་ནང་ས་ཡོམ་ཚབས་ཆེན་བརྒྱབ་སྟེ་ཡུལ་མི་མང་པོ་རྐྱེན་འདས་དང་། རྨས་སྐྱོན་ཕོག་ཡོད་ཅིང་། ཁང་པ་མང་པོ་གཏོར་བཤིག་བཏང་ཡོད་འདུག དེར་བརྟེན་རྐྱེན་ངན་བྱུང་བའི་ཁུལ་དུ་མྱུར་སྐྱོབ་ཚན་པ་རྣམས་གང་མགྱོགས་བསླེབས་ནས་མཐུན་འགྱུར་རོགས་རམ་གནང་དགོས་སྐོར་བརྗོད་ཡོད་འདུག
ད་དུང་པ་ཀི་སི་ཐན་གྱི་ཕྱི་སྲིད་བློན་ཆེན་གྱིས་བསྒྲགས་གཏམ་སྤེལ་བའི་ནང་། པ་ཀི་སི་ཐན་གཞུང་གིས་ཨབ་གྷན་གྱི་མི་མང་ལ་རོགས་སྐྱོར་བྱེད་ཀྱི་ཡོད་ལ། དུས་ནམ་ཡང་ཨབ་གྷན་མི་རིགས་དང་སྐྱིད་སྡུག་མཉམ་མྱོང་བྱ་རྒྱུ་ཡིན་སྐོར་བསྒྲགས་འདུག་ལ། གཞུང་གི་མགྲིན་ཚབ་པས་གནོད་སྐྱོན་ཕོག་ཡུལ་དུ་མཐུན་འགྱུར་རོགས་རམ་བྱེད་བཞིན་ཡོད་སྐོར་བརྗོད་ཡོད་པ་རེད།
ཨབ་གྷན་གཞུང་གིས་མྱུར་སྐྱོབ་ཚན་པ་མངག་གཏོང་བྱས་ཏེ། རྨས་སྐྱོན་ཕོག་པའི་ཡུལ་མི་དེ་དག་ཐད་འཕུར་གནམ་གྲུ་ནས་སྨན་ཁང་དུ་སྐྱེལ་བཞིན་ཡོད་པ་དང་། བོར་བརླག་ཏུ་ཕྱིན་པའི་མི་རྣམས་འཚོལ་བཞིན་ཡོད་འདུག ད་ལན་གྱི་ས་ཡོམ་དེའི་ཤུགས་རྐྱེན་ཡུལ་དེའི་རྒྱལ་ས་ཁཱ་བྷོལ་(Kabul) དང་པ་ཀི་སི་ཐན། རྒྱ་གར་གྱི་མཐའ་མཚམས་སོགས་སུའང་བསླེབས་ཡོད་ཀྱང་སྐྱོན་ཆག་ཆེན་པོ་བྱུང་མེད་འདུག
ཨབ་གྷ་ནི་སི་ཐན་ནི་ས་ཡོམ་འབྱུང་སླ་བའི་ས་ཁུལ་ཞིག་ཡིན་ཞིང་། འདས་པའི་ལོ་ངོ་བཅུའི་ནང་ཨབ་གྷན་དུ་ས་ཡོམ་བརྒྱབ་སྟེ་ཡུལ་མི་ ༧༠༠༠ ལྷག་རྐྱེན་འདས་ཕྱིན་ཡོད་པ་རེད། ཕྱི་ལོ་ ༢༠༠༥ ལོར་ཨབ་གྷན་སོགས་སུ་ཚད་རིམ་ ༧.༥ ཅན་གྱི་ས་ཡོམ་བརྒྱབ་སྟེ་མི་གྲངས་ ༧༤ ལྷག་འདས་གྲོངས་སུ་ཕྱིན་པ་དང་། མི་གྲངས་ཁྲི་ ༧ ལྷག་ལ་རྨས་སྐྱོན་བཟོས་ཡོད་ཅིང་། དེ་ནི་ཉེ་བའི་དུས་སུ་བྱུང་བའི་ས་ཡོམ་གོད་ཆག་ཚབས་ཆེ་ཤོས་ཤིག་ཏུ་གྱུར་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
