ཨ་རིའི་ནང་གནས་སྡོད་བོད་ཀྱི་སྲོལ་རྒྱུན་གཞས་མ་ས་མཐོ་ཚེ་རིང་དབང་མོ་ལགས་སུ་ཨ་རིའི་དམངས་ཁྲོད་དང་སྲོལ་རྒྱུན་སྒྱུ་རྩལ་ཐད་ཀྱི་ཆེས་མཐོའི་གཟེངས་བསྟོད་(National Heritage Fellowships) ཐོབ་ཡོད་འདུག
2022 NEA National Heritage Fellowships: Michael Cleveland (photo by Amy Richmond)
ཉེ་ཆར་ཨ་རིའི་རྒྱལ་ཡོངས་སྒྱུ་རྩལ་གོང་འཕེལ་ལྟེ་གནས་ཁང་གིས། བོད་ཀྱི་ཟློས་གར་ཚོགས་མི་ཟུར་པ་དང་ལྕགས་ཟམ་བོད་ཀྱི་ལྷ་མོ་གླུ་གར་ཚོགས་པ་གསར་འཛུགས་གནང་མཁན་གྲས་སུ་ཡོད་པའི་གཞས་མ་ས་མཐོ་ཚེ་རིང་དབང་མོ་ལགས་ཀྱིས་བོད་ཀྱི་སྲོལ་རྒྱུན་ཟློས་གར་རིག་གཞུང་ཐད་ཕྱག་ལས་གཟེངས་སུ་ཐོན་པ་གནང་བའི་ངོས་འཛིན་དུ། འདི་ལོའི་ཨ་རིའི་དམངས་ཁྲོད་དང་སྲོལ་རྒྱུན་སྒྱུ་རྩལ་ཐད་ཀྱི་ཆེས་མཐོའི་གཟེངས་བསྟོད་ National Heritage Fellowships ཞེས་པ་གནང་ཡོད་འདུག་ལ། གཟེངས་བསྟོད་དེ་བོད་མི་ཞིག་ལ་ཐོབ་པ་ཐེངས་དང་པོ་ཆགས་ཡོད་འདུག
འདི་ལོར་ཨ་རིའི་གཞུང་གི་རང་དབང་ཅན་གྱི་སྡེ་ཚན་དེས་ས་མཐོ་ཚེ་རིང་དབང་མོ་ཚུད་པའི་དམངས་ཁྲོད་དང་སྲོལ་རྒྱུན་རིག་རྩལ་ཐད་ལ་བྱས་པ་ཅན་གྱི་མི་སྣ་ ༡༠ ལ་ཆེ་བསྟོད་གནང་ཡོད་ཅིང་། ས་མཐོ་ཚེ་རིང་དབང་མོ་ལགས་ཀྱིས་རང་གི་ངོ་དེབ་སྟེང་། རང་ཉིད་ལ་སྲོལ་རྒྱུན་སྒྱུ་རྩལ་གྱི་ཆེས་མཐོའི་གཟེངས་བསྟོད་ཐོབ་པ་དེར་དགའ་སྤོབས་ཆེན་པོ་བྱུང་ཡོད་སྐོར་བརྗོད་པ་དང་འབྲེལ། ང་རང་བོད་ཀྱི་ཟློས་གར་ཚོགས་པའི་ནང་ཐོག་མར་ཞུགས་དུས་འདི་ལྟ་བུའི་གཟེངས་བསྟོད་འཐོབ་རྒྱུའི་བསམ་བློ་འཁོར་མྱོང་མེད། ངའི་འདུན་པ་དང་དམིགས་ཡུལ་ནི་དུས་རྒྱུན་དུ་ང་ཚོའི་རིག་གཞུང་ཉར་ཚགས་དང་དར་སྤེལ་ཆེད་དུ་གང་ཐུབ་ཅི་ཐུབ་བྱ་རྒྱུ་དེ་ཡིན། གཟེངས་བསྟོད་འདི་ནི་ངས་འདས་པའི་ལོ་ངོ་ ༣༠ ལས་མང་བ་(བོད་ཀྱི་ཟློས་གར་རིག་གནས་ལ་)ཞབས་འདེགས་ཞུས་པར་ངོས་འཛིན་བྱས་པ་ཞིག་ལ་ཡིད་ཆེས་བྱེད་ཀྱི་ཡོད་ལ། འདིས་ང་ཚོའི་སྒྱུ་རྩལ་བ་གཞོན་པ་རྣམས་ལ་སེམས་ཤུགས་དང་ཡིད་འགུལ་ཐེབས་རྒྱུ་དང་། བོད་ཀྱི་རིག་གཞུང་ལ་དོ་སྣང་གསར་པ་བསླེབ་རྒྱུའི་རེ་བ་བྱེད་ཀྱི་ཡོད། ཅེས་བརྗོད་ཡོད་འདུག
Tsering Wangmo Satho awarded National Heritage Fellowship 2022. Photo: NEA
ཨ་རིའི་རྒྱལ་ཡོངས་སྒྱུ་རྩལ་གོང་འཕེལ་ལྟེ་གནས་ཁང་དེ་བཞིན་ཕྱི་ལོ་ ༡༩༦༥ ལོར་ཐོག་མར་ཨ་རིའི་གྲོས་ཚོགས་ཀྱིས་གསར་འཛུགས་གནང་སྟེ། ད་བར་ཨ་རིའི་གཞུང་གི་རང་དབང་ཅན་གྱི་སྡེ་ཚན་གྱི་ངོ་བོའི་ཐོག་ནས་ཨ་རིའི་རྒྱལ་ཡོངས་ཀྱི་སྒྱུ་རྩལ་དང་ལྷག་པར་དུ་སྲོལ་རྒྱུན་དང་དམངས་ཁྲོད་སྒྱུ་རྩལ་ཉར་ཚགས་དང་གོང་འཕེལ་ཐད་ལ་ཕྱག་ལས་གནང་གི་ཡོད་པ་མ་ཟད། ཨ་རིའི་ནང་གཞུང་འབྲེལ་མ་ཡིན་པའི་སྒྱུ་རྩལ་གྱི་ཚོགས་སྡེ་ཁག་ལའང་མ་དངུལ་མཁོ་སྤྲོད་སོགས་བརྒྱུད་ནས་རམ་འདེགས་བྱེད་ཀྱི་ཡོད་པ་རེད། ད་ལན་བོད་ཀྱི་ཟློས་གར་ཚོགས་མི་ཟུར་པ་དང་གཞན་མ་ཚེ་རིང་དབང་མོ་ལགས་སུ་ཐོབ་པའི་རྒྱལ་ཡོངས་ཀྱི་དམངས་ཁྲོད་དང་སྲོལ་རྒྱུན་སྒྱུ་རྩལ་གྱི་ཆེས་མཐོའི་གཟེངས་བསྟོད་དེ་ནི་ཕྱི་ལོ་ ༡༩༨༢ ལོར་འགོ་བཙུགས་པ་ཞིག་ཡིན་ཞིང་། གཟེངས་བསྟོད་དེ་ཉིད་སྒྱུ་རྩལ་ཐད་ཕུལ་བྱུང་གི་བྱེད་ནུས་ཐོན་པ་དང་། ཨ་རིའི་སྲོལ་རྒྱུན་སྒྱུ་རྩལ་ཐད་ལ་ཞབས་འདེགས་རླབས་ཆེན་འཇོག་མཁན་གྱི་མི་སྣར་སྤྲོད་ཀྱི་ཡོད་འདུག
ས་མཐོ་ཚེ་རིང་དབང་མོ་ལགས་ནི་ཕྱི་ལོ་ ༡༩༦༧ ལོར་རྒྱ་གར་གྱི་ལྷོ་ཕྱོགས་བོད་མིའི་གཞིས་ཆགས་སྦེལ་ཀོབ་ཏུ་སྐྱེས་ཤིང་། ཕྱི་ལོ་ ༡༩༨༣ ལོར་རང་ལོ་ ༡༦ ཐོག་བོད་ཀྱི་ཟློས་གར་ནང་ཞུགས། ཕྱི་ལོ་ ༡༩༨༩ ལོར་བོད་ཀྱི་གཞས་པ་གཞན་དང་ལྷན་དུ་ལྕགས་ཟམ་པ་བོད་ཀྱི་གླུ་གར་ཚོགས་པ་གསར་འཛུགས་གནང་ཞིང་། ཟློས་གར་དུ་ཡོད་རིང་ཕྱི་ལོ་ ༡༩༨༩༦ དང་ ༡༩༨༩ ལོར་ཡུ་རོབ་དང་ཨ་རིར་ཟློས་གར་འཁྲབ་སྟོན་དུ་ཕྱིན་ཡོད་ཅིང་། ཨ་རིའི་མངའ་སྡེ་ཀེ་ལི་ཧྥོར་ནི་ཡར་གནས་སྤོས་བྱས་རྗེས་ཟློས་གར་འཁྲབ་སྟོན་མུ་མཐུད་གནང་མུས་ཐོག བོད་ཀྱི་མི་རབས་གཞོན་པ་རྣམས་ལ་བོད་ཀྱི་སྐད་ཡིག་དང་གླུ་གར་བསླབས་ཡོད་འདུག ཁོང་མོས་ཕྱི་ལོ་ ༢༠༢༠ ལོར་བོད་ཀྱི་ཟློས་གར་དབུ་བརྙེས་ནས་ལོ་ངོ་ ༦༠ འཁོར་བའི་དུས་དྲན་དང་བསྟུན་ནས། རང་གི་ཨ་མ་གཙོས་པའི་ཀོང་པོའི་མི་རབས་རྒན་པ་རྣམས་ལ་ཁུངས་གཏུགས་ཏེ་ཀོང་པོའི་གླུ་གཞས་ཕྱོགས་བསྒྲིགས་ཀྱི་དེབ་ཅིག་ཀྱང་པར་སྐྲུན་འགྲེམས་སྤེལ་བྱས་ཡོད་པ་རེད་འདུག
གསར་འགོད་པ། པ་སངས་ཚེ་རིང་།
