སྐྱབས་བཅོལ་དུ་ཧོང་ཀོང་གི་དམངས་གཙོ་དང་འགྲོ་བ་མིའི་ཐོབ་ཐང་གི་ལས་འགུལ་བ་ཚོས་རྒྱ་ནག་གཞུང་ལ་སྐྱོན་བརྗོད་དང་སྦྲགས། ཧོང་ཀོང་གི་རང་དབང་དང་ཁྲིམས་ཀྱི་དབང་སྒྱུར་ཤི་ཟིན་པ་ཡིན་སྐོར་བརྗོད་འདུག
དེ་རིང་དབྱིན་ཇིའི་གཞུང་གིས་ཧོང་ཀོང་རྒྱ་ནག་ལ་རྩིས་སྤྲོད་བྱས་ཏེ་ལོ་ངོ་ཉེར་ལྔ་འཁོར་གྱི་ཡོད་པ་ལྟར། ཁ་སང་རྒྱ་ནག་གི་སྲིད་འཛིན་ཞི་ཅིན་ཕིན་ཕྱི་ལོ་ ༢༠༡༧ རྗེས་ཏེ། ལོ་ལྔའི་རྗེས་སུ་བསྐྱར་དུ་ཧོང་ཀོང་ནང་ཐོག་མར་ཡོང་ཡོད་པ་དང་། ཕྱི་ལོ་ ༢༠༢༠ ནས་རྒྱ་ནག་གི་ཕྱིར་ལོགས་སུ་བསྐྱོད་པ་ཐོག་མ་དེ་ཆགས་ཀྱི་ཡོད་ཅིང་། དེ་རིང་འཚོགས་པའི་ལོ་ངོ་ཉེར་ལྔའི་གཞུང་འབྲེལ་མཛད་སྒོའི་སྟེང་ཞི་ཅིན་ཕིན་གྱི་མདུན་སྔར། ཉེ་ལམ་འདེམས་ཐོན་བྱུང་བའི་ཧོང་ཀོང་གི་སྤྱི་ཁྱབ་སྐབས་དྲུག་པ་ཇོ་ཧན་ལི་(John Lee)ཡི་གཙོས་ཧོང་ཀོང་གི་གནད་ཡོད་མི་སྣ་ ༣༠ ལྷག་གིས་འགན་ཁུར་དམ་འབུལ་ཞུས་ཡོད་པ་རེད།
སྐབས་དེར་རྒྱ་ནག་གི་སྲིད་འཛིན་ཞི་ཅིན་ཕིན་གྱིས། ཧོང་ཀོང་གི་མགོ་ཁྲིད་ཚོས། རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྒྲོམ་གཞི་དང་། ཁྲིམས་ཀྱི་དབང་སྒྱུར་སོགས་གཙོ་བཟུང་གིས་ལྷག་བསམ་ལྡན་པའི་ལས་བྱེད་པ་སྐྱེད་བསྲིང་དང་ཧོང་ཀོང་གི་སྲིད་གཞུང་འཕེལ་རྒྱས་གོང་མཐོར་བཏང་སྟེ། ཧོང་ཀོང་རྒྱ་ནག་གི་རྒྱུད་གཅིག་ལམ་གཅིག་དང་སྐབས་བཅུ་བཞི་བའི་ལོ་ལྔའི་འཆར་གཞི། ཧོང་ཀོང་དང་ཀོང་ཏུང་། ཨོ་མན་བཅས་མཐུད་ཐབས་སོགས་ཀྱི་ལས་གཞིའི་ནང་མཉམ་ཞུགས། མི་མང་ལ་ལས་ཀའི་གོ་སྐབས་བསྐྲུན་ཏེ་འཚོ་བ་ཡར་རྒྱས་དང་སློབ་གསོ་གོང་སྤེལ། ཧོང་ཀོང་གི་མཐུན་སྒྲིལ་དང་བརྟན་ལྷིང་གཙོ་བོར་བཟུང་སྟེ། ཟིང་འཁྲུག་དང་ཐེ་ཇུས་རིགས་མཚམས་འཇོག་དགོས་པ་མ་ཟད། ཕྱི་ལོ་ ༡༩༩༧ ལོར་ཧོང་ཀོང་རྒྱ་ནག་ལ་རྩིས་སྤྲོད་བྱས་པ་ནས་བཟུང་ཧོང་ཀོང་ནང་དམངས་གཙོ་དངོས་སུ་མགོ་བརྩམས་ཡོད་སྐོར་སོགས་བརྗོད་ཡོད་འདུག
འོན་ཀྱང་། དབྱེ་ཞིབ་པ་མང་པོས། ཕྱི་ལོ་ ༢༠༡༩ ལོ་ནས་རྒྱ་ནག་གཞུང་གིས་ཧོང་ཀོང་ནང་ཉེས་ཅན་རྩིས་སྤྲོད་ཀྱི་ཁྲིམས་དང་ཕྱི་ལོ་ ༢༠༢༠ ལོར་རྒྱལ་ཁབ་བདེ་འཇགས་ཀྱི་ཁྲིམས་སོགས་དམ་དྲག་གི་ཁྲིམས་སྒྲིག་མང་པོ་ལག་བསྟར་བྱས་ཏེ། ཧོང་ཀོང་གི་དམངས་གཙོའི་རང་དབང་དང་འགྲོ་བ་མིའི་ཐོབ་ཐང་འཕྲོག་ཡོད་པ་སྟེ། ད་ལྟ་ཧོང་ཀོང་གི་དམངས་གཙོའི་གྲོས་ཚོགས་འཐུས་མི་དང་དམངས་གཙོ་དང་འགྲོ་བ་མིའི་ཐོབ་ཐང་གི་ལས་འགུལ་བ་ཡོངས་ལས་ཁག་ཅིག་ཡུལ་བྱོལ་དུ་ཕྱིན་ཡོད་པ་དང་། ཧོང་ཀོང་གི་དམངས་གཙོའི་ལས་འགུལ་གྱི་ངོ་གདོང་ལྟ་བུར་གྱུར་བའི་ཇོ་ཧྲ་བོང་ (Joshua Wong) གི་གཙོས་གྲོས་ཚོགས་འཐུས་མི་དང་རྫོང་དཔོན། སློབ་གསོ་བ་དང་དམངས་གཙོའི་ལས་འགུལ་བ་ཁྱོན་ ༤༧ ལ་སྲིད་གཞུང་མགོ་རྟིང་སློག་རྩིས་བྱས་པའི་ཉེས་མིང་འོག ལོ་ཚོད་འདྲ་མིན་གྱི་བཙོན་འཇུག་ཁྲིམས་ཐག་བཅད་ཡོད་ཅིང་། ད་ལྟ་ཆར་ཧོང་ཀོང་གི་གྲོས་ཚོགས་ནང་དམངས་གཙོ་དང་འགྲོ་བ་མིའི་ཐོབ་ཐང་གི་འཐུས་ཚབ་མེད་པ་མ་ཟད། སྲིད་གཞུང་གི་དམ་དྲག་འོག་ཧོང་ཀོང་ཁྱོན་ཡོངས་སུ་དམངས་ཀྱི་ཚོགས་སྡེ་ཁག་ཁ་འཐོར་དུ་ཕྱིན་པ་དང་དམངས་གཙོ་དང་རང་དབང་ལ་དགའ་བའི་གསར་ཁང་མེད་པར་བཟོས་ཏེ། ཕྱོགས་ཡོངས་ནས་ཧོང་ཀོང་རྒྱ་ནག་དམར་ཤོག་ཚོགས་པའི་ལག་འོག་ཏུ་ཤོར་ཞིང་། ཞི་ཅིན་ཕིན་ལ་མཚོན་ན་དྲག་གནོན་འོག་ནས་ཧོང་ཀོང་ལ་སྟངས་འཛིན་ནན་མོ་བྱེད་ཐུབ་པ་ནི། རང་ཉིད་ཀྱི་ཕྱི་སྲིད་དང་འབྲེལ་བའི་ཆབ་སྲིད་ཀྱི་རྒྱལ་ཁ་གལ་ཆེན་ཞིག་ལ་ངོས་འཛིན་བྱེད་ཀྱི་ཡོད་སྐོར་སོགས་བརྗོད་འདུག
ཡང་དེ་རིང་གི་མཛད་སྒོའི་སྟེང་ཞི་ཅིན་ཕིན་གྱིས། ཆབ་སྲིད་ཀྱི་དབང་ཆ་ནི་རྒྱལ་ཞེན་པ་དག་ལ་བདག་པ་ནི་འཛམ་གླིང་ཀུན་ལ་ཁྱབ་པའི་ལམ་སྲོལ་ཞིག་ཡིན།། འཛམ་གླིང་རྒྱལ་ཁབ་གཅིག་གིས་ཀྱང་རྒྱལ་ཁབ་ལ་དུང་བ་མེད་མཁན་དང་ཐ་ན་རྒྱལ་འཚོང་བར་ཆབ་སྲིད་ཀྱི་དབང་ཆ་སྤྲོད་ཀྱི་མེད། ཅེས་དང་། ཧོང་ཀོང་གི་ཆབ་སྲིད་ཀྱི་དབང་ཆ་རྒྱལ་ཞེན་པ་དག་གི་ལག་ཏུ་ཡོད་དགོས་པ་ནི་ཧོང་ཀོང་གི་ཕུགས་རྒྱང་རིང་བའི་བརྟན་ལྷིང་དང་ཞི་བདེར་མེད་དུ་མི་རུང་བ་ཞིག་ཡིན་པ་མ་ཟད། དེ་ལ་ནམ་ཡང་གཏོར་བརླག་ཤོར་མི་ཉན། ཞེས་བརྗོད་ཡོད་པ་དང་། གནད་དོན་དེའི་དབྱེ་ཞིབ་པས། དོན་དངོས་ཐོག་ཞི་ཅིན་ཕིན་གྱིས་ཧོང་ཀོང་གི་མགོ་འཁྲིད་ཚོ་ཧོང་ཀོང་ལ་དུང་བ་ཙམ་མ་ཡིན་པར་རྒྱ་ནག་དམར་ཤོག་ཚོགས་པར་དུང་ཞེན་དགོས་སྐོར་གསལ་བོར་བཤད་པ་ཙམ་ཡིན་སྐོར་བརྗོད་འདུག
ད་ལྟ་ཨོ་གླིང་དུ་སྐྱབས་བཅོལ་བ་ཡིན་ཞིང་དེ་སྔ་ཧོང་ཀོང་གི་དམངས་གཙོའི་སྲིད་དོན་ཚོགས་པའི་གྲོས་ཚོགས་འཐུས་མི་སྐུ་ཞབས་ཊའེ་ཌི་ཧྥོ་ (Ted Hui)་ཡིས་རང་གི་ངོ་དེབ་སྟེང་དུ། ཧོང་ཀོང་གི་ཁྲིམས་ཀྱི་དབང་སྒྱུར་དང་རང་དབང་ཤི་ཟིན་པ་རེད། ང་ལ་རང་ཉིད་ཧོང་ཀོང་དང་ཁ་བྲལ་མེད་པའི་ཚོར་ཤུགས་ཆེན་པོ་ཡོང་གི་འདུག ངས་རང་ཉིད་དགའ་སའི་ས་ཆ་དེ་བློས་གཏོང་ཐུབ་ཀྱི་མི་འདུག ངས་བཙོན་ཁང་དུ་ཡོད་པའི་རང་གི་འཐབ་གྲོགས་རྣམ་པ་བློས་གཏོང་ཐུབ་ཀྱི་མི་འདུག ཅེས་དང་། ད་ལྟ་ཧོང་ཀོང་ནང་ཆབ་སྲིད་བཙོན་པ་ཁྱོན་ ༡༠༠༠ ལྷག་ཡོད་པ་དང་། ཧོང་ཀོང་གི་དྲང་བདེན་གྱི་ཁྲིམས་སྒྲིག་དང་གསར་འགོད་རང་དབང་། དེ་བཞིན་དམངས་གཙོའི་སྤྱི་ཚོགས་བཅས་རྒྱལ་ཁབ་བདེ་འཇགས་ཟེར་བའི་ཁྲིམས་ཀྱིས་གཏོར་བཅོམ་བཏང་ཡོད་སྐོར་བརྗོད་འདུག
ཡང་ཧོང་ཀོང་གི་སྤྱི་ཁྱབ་གསར་པ་ཇོ་ཧན་ལི་ཟེར་བ་ཁོས། ད་ལྟའི་ཧོང་ཀོང་གི་ཁྲིམས་སྒྲིག་ཁག་ནི་ཡུ་རོབ་དང་ཨ་རི་སོགས་ཀྱིས་མིག་སེར་བྱེད་ཡུལ་ཞིག་ཆགས་ཡོད་པ་དང་། དེ་རིང་ནས་ཧོང་ཀོང་གི་ལེའུ་གསར་པ་ཞིག་མགོ་བརྩམས་པ་མ་ཟད། ཧོང་ཀོང་གི་སྲིད་གཞུང་གསར་བའི་ངོས་ནས་རྒྱ་ནག་དང་འཛམ་གླིང་བར་ཟམ་པ་ལྟ་བུ་བྱས་ཏེ། ཧོང་ཀོང་གི་ཚོང་ལས་དཔལ་འབྱོར་གོང་འཕེལ་དང་། ཧོང་ཀོང་བ་རྣམས་ཀོང་ཏུང་དང་ཨོ་མན་བཅས་མཐུད་པ་བརྒྱུད་རྒྱ་ནག་ནང་བསྐྱོད་ཆོག་པ། དེ་བཞིན། ཧོང་ཀོང་གི་གཞོན་སྐྱེས་རྣམས་ལ་རེ་བཟང་ཕུགས་བཅོལ་གྱི་སློབ་གསོ་སྤྲད་དེ། རྒྱ་ནག་དང་འཛམ་གླིང་གི་གནས་སྟངས་ཤེས་རྟོགས་ཐུབ་པ་བཟོ་རྒྱུ་ཡིན་སྐོར་སོགས་བརྗོད་ཡོད་ཀྱང་། ཕྱི་ལོ་ ༢༠༢༠ ལོ་ནས་རྒྱ་ནག་གཞུང་གི་བཀོད་ཁྱབ་འོག ཧོང་ཀོང་སྲིད་གཞུང་གིས། ཧོང་ཀོང་གི་ཡེ་ཤུ་ཆོས་ལུགས་དང་འབྲེལ་ཞིང་རྒྱལ་སྤྱིའི་རང་བཞིན་གྱི་སློབ་གྲྭ་ཁག་གི་སློབ་མ་རྣམས་དམངས་གཙོའི་ངོ་རྒོལ་ལས་འགུལ་ནང་མཉམ་ཞུགས་བྱས་པའི་ཉེས་མིང་སློབ་གྲྭ་སྒོ་བརྒྱབ་པ་དང་། སློབ་གྲྭའི་སློབ་ཚན་བསྒྱུར་བཅོས་བཏང་སྟེ། རྒྱ་ནག་དམར་ཤོག་ཚོགས་པའི་ལྟ་གྲུབ་གཞི་བཞག་བྱས་པའི་རྒྱ་སྐད་རྒྱ་ཡིག་སློབ་འཁྲིད་བྱས་ཡོད་པ་དང་། རྒྱ་ནག་བཅོས་སྒྱུར་དེར་འདོད་བློ་མེད་མཁན་གྱི་དགེ་རྒན་དང་སློབ་མ་ཚོར་ཕྱིར་ཕུད་གཏོང་བ་དང་བཙོན་འཇུག་སོགས་བྱེད་ཀྱི་ཡོད་པ་རེད་ལ། གནད་དོན་དེའི་ཐད་ཧོང་ཀོང་གི་དགེ་རྒན་མཐུན་ཚོགས་ཀྱིས་སྲིད་གཞུང་ལ་ཡར་ཞུ་དང་ངོ་རྒོལ་བྱས་ཡོད་ཀྱང་ཕན་འབྲས་སོན་མེད་པ་རེད།
ད་རེས་ཞི་ཅིན་ཕིན་ཧོང་ཀོང་ནང་མ་ཡོང་གོང་ལ་ཧོང་ཀོང་གི་སྲང་ལམ་ཡོངས་སུ་ཉེན་རྟོག་པ་འབོར་ཆེན་འགྲེམས་འཇོག་གིས། མི་མང་གི་འགུལ་སྐྱོད་ལ་དམ་དྲག་དང་། དམིགས་བསལ་མི་མང་གི་འགྲིམས་འགྲུལ་དང་འདུ་འཛོམས། མེ་འཁོར་ས་ཚིགས་སོགས་རྦད་དེ་སྒོ་གཏད་ཡོད་པ་དང་། ཁ་སང་དང་དེ་རིང་ཉིན་གཉིས་ཀྱི་རིང་ཧོང་ཀོང་གི་མཚོ་འགྲམ་ཡོངས་སུ་ཌོ་རོན་གནམ་གྲུ་གཏོང་ཆོག་གི་མེད་པ་དང་། ཧོང་ཀོང་གི་གསར་འགོད་མཐུན་ཚོགས་ཀྱི་གནས་ཚུལ་ལྟར་ན། ས་གནས་དང་རྒྱལ་སྤྱིའི་གསར་འགོད་པ་ ༡༠ ལྷག་ལ་གཞུང་འབྲེལ་མཛད་སྒོའི་གནས་ཚུལ་འགོད་པར་ཆོག་མཆན་སྤྲད་མེད་པ་རེད།
ཕྱི་ལོ་ ༡༩༩༧ ལོའི་ཟླ་ ༧ ཚེས་ ༡ ཉིན་དབྱིན་ཡུལ་གྱིས་ཧོང་ཀོང་རྒྱ་ནག་ལ་རྩིས་སྤྲོད་བྱས་ཏེ་ལོ་ངོ་ཉེར་ལྔ་འཁོར་བ་དང་། དམ་འབུལ་ཞུས་པའི་ཧོང་ཀོང་གི་སྤྱི་ཁྱབ་སྐབས་དྲུག་པ་ཇོ་ཧན་ལི་ནི་དེ་སྔ་ཧོང་ཀོང་གི་སྤྱི་ཁྱབ་ཉེན་རྟོག་དཔོན་ཡིན་པ་དང་། ཕྱི་ལོ་ ༢༠༡༩ ལོར་ཧོང་ཀོང་ནང་ཉེས་ཅན་རྩིས་སྤྲོད་ཀྱི་ཁྲིམས་དང་འབྲེལ་ནས་མང་ཚོགས་ཀྱིས་ངོ་རྒོལ་བྱེད་སྐབས། ད་ལྟའི་སྤྱི་ཁྱབ་པ་ཁོས་དམངས་གཙོ་དང་འགྲོ་བ་མིའི་ཐོབ་ཐང་གི་ལས་འགུལ་བ་རྣམས་ལ་རྡུང་རྡེག་ཚ་ནན་བཏང་ཡོད་ཅིང་། ཡང་ཕྱི་ལོ་ ༢༠༢༠ ལོར་རྒྱལ་ཁབ་བདེ་འཇགས་ཀྱི་ཁྲིམས་ལག་བསྟར་བྱེད་སྐབས། ཧོང་ཀོང་མི་མང་གི་སྟེང་དྲག་ཤུགས་བཀོལ་ཏེ་ཞི་བའི་ལས་འགུལ་རྡོག་རོལ་ཚབས་ཆེན་བཏང་ཡོད་པར་བརྟེན།་ཇོ་ཧན་ལི་ནི་རྒྱ་ནག་དམར་ཤོག་ཚོགས་པའི་ཁ་ལན་ཚིག་བརྩི་བྱེད་མཁན་ཡིན་པར་ངོས་འཛིན་བྱེད་པ་མ་ཟད། མི་ཁག་ཅིག་གིས་ཁོ་ནི་རྒྱ་ནག་གི་རྒྱུགས་ཁྱི་ཞིག་ཡིན་པའི་སྐྱོན་བརྗོད་ཀྱང་བྱེད་མུས་ཡིན་པ་རེད་ལ། དབྱིན་ཡུལ་དུ་སྐྱབས་བཅོལ་བ་ཡིན་པའི་ཧོང་ཀོང་གི་འགྲོ་བ་མིའི་ཐོབ་ཐང་གི་ལས་འགུལ་བ་ནཱ་ཐན་ལའོ་ལགས་ཀྱིས། ཇོ་ཧན་ལི་ཧོང་ཀོང་སྤྱི་ཁྱབ་ལ་བསྐོ་གཞག་བྱེད་དོན་ནི་མངོན་གསལ་དོད་པོ་རེད། ཅེས་ཇོ་ཧན་ལི་ཡིས་རྒྱལ་ཁབ་བདེ་འཇགས་ཀྱི་ཁྲིམས་ལག་བསྟར་སྐབས། ལས་འགུལ་བའི་ཐོག་དྲག་གནོན་གྱི་བྱ་སྤྱོད་སྤེལ་ཏེ་ཧོང་ཀོང་ལ་དབང་སྒྱུར་ཐུབ་ཡོད་པས་ཡིན་སྐོར་བརྗོད་འདུག
གསར་འགོད་པ། སྐལ་བཟང་སྦྱིན་པ།
