ཉེ་སྔོན་ཁེ་ན་ཌའི་གྲོང་ཁྱེར་ཊོ་རན་ཊོའི་ནང་གནས་སྡོད་བྱེད་བཞིན་པའི་བསྟན་འཛིན་ནོར་བུ་ཞེས་པ་ཞིག་གིས་སྣུམ་བླུགས་ཏེ་མེར་སྲེག་བཏང་བའི་བུ་མོ་གཞོན་ནུ་མ་དེར་ཉིན་གྲངས་ ༡༩ ཙམ་རིང་མྱུར་སྐྱོབ་སྨན་བཅོས་བྱས་ཀྱང་ཕན་ཐོགས་མ་བྱུང་བར་འདས་གྲོངས་སུ་ཕྱིན་ཡོད་འདུག
འདི་ལོའི་ཕྱི་ཟླ་ ༦ ཚེས་ ༡༧ ཉིན་ཁེ་ན་ཌའི་གྲོང་ཁྱེར་ཊོ་རན་ཊོའི་གེབ་གླིང་རླངས་འཁོར་འབབ་ཚིགས་ཀྱི་སྤྱི་སྤྱོད་རླངས་འཁོར་ཞིག་ཏུ། བསྟན་འཛིན་ནོར་བུ་ཞེས་པའི་སྐྱེས་པ་ཞིག་གིས་རང་ལོ་ ༢༠ ཙམ་ཡིན་པའི་བུ་མོ་ཞིག་གི་ལུས་སྟེང་དུ་སྣུམ་བླུགས་ཏེ་མེར་སྲེག་བཏང་ཡོད་པ་དང་། དེ་མ་ཐག་སྨན་ཁང་དུ་བསྐྱར་ཏེ་མྱུར་སྐྱོབ་བྱས་ཡོད་ཀྱང་། ཁེ་ན་ཊའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཟླ་འདིའི་ཕྱི་ཚེས ༦ ཉིན་བུད་མེད་དེ་འདས་གྲོངས་སུ་ཕྱིན་ཡོད་པ་དང་། གསར་འགྱུར་ཁག་ཅིག་ན་བུ་མོ་དེའང་བོད་རིགས་ཤིག་ཡིན་སྐོར་བཀོད་འདུག
ཟླ་སྔ་མའི་ཕྱི་ཚེས ༡༧ ཉིན་ས་གནས་ཉེན་རྟོག་པས་བསྟན་འཛིན་ནོར་བུ་ཞེས་པ་དེ་མི་གསོད་རྩིས་བྱས་པའི་ནག་ཉེས་འོག་འཛིན་བཟུང་བྱས་ཏེ་གྱོད་དོན་ཞིབ་བཤེར་ཁང་ལ་རྩིས་སྤྲོད་བྱས་ཟིན་ཡོད་འདུག འོན་ཀྱང་། སི་ཊི་ཝི་ (CTV NEWS TORONDO) གསར་ཁང་གིས་དེ་འབྲེལ་གྱི་གནས་ཚུལ་སྤེལ་བའི་ནང་། གྱོད་དོན་བརྟག་དཔྱད་བྱེད་སྐབས་བསྟན་འཛིན་ནོར་བུ་དང་བུ་མོ་དེ་གཉིས་ཕན་ཚུན་ངོ་ཤེས་ཀྱི་མེད་སྟབས།
བསྟན་འཛིན་ནོར་བུ་ཟེར་བས་མི་གསོད་ནག་ཉེས་དེ་ཞིབ་དཔྱོད་བྱེད་མུས་ཡིན་ཡང་། ད་ལྟའི་ཆར་ཁྲིམས་ཁང་སོགས་ནས་གནད་དོན་ཐག་གཅོད་བྱས་མེད་ཅིང་། ཞིབ་དཔྱོད་པ་རྣམས་ཀྱིས་བརྟག་དཔྱད་བྱས་པ་བརྒྱུད། ཁོང་གཉིས་ཕན་ཚུན་ངོ་མི་ཤེས་སྟབས་དེ་ནི་ཁེར་རྐྱང་གི་དོན་རྐྱེན (isolated incident)ཡིན་པའི་ཚོད་དཔག་བྱེད་ཀྱི་ཡོད་པ་ལས། ཡིད་ཆེས་འཕེར་བའི་བདེན་དཔང་གསལ་པོ་ཞིག་གཏན་ནས་རག་མེད་པ་རེད་འདུག
གྲོང་ཁྱེར་ཉེན་རྟོག་པས་རྩད་ཞིབ་བྱས་ཏེ་ཤེས་རྟོགས་བྱུང་བའི་གནས་ཚུལ་ལྟར་ན། བསྟན་འཛིན་ནོར་བུས་བུ་མོ་དེར་སྡང་ཟུག་ཆེན་པོ་བཟུང་ཡོད་པ་མ་ཟད། མོ་གསོད་རྒྱུའི་དམིགས་ཡུལ་ཡང་བཟུང་ཡོད་པར་བརྟེན། ཁྲིམས་ཁང་གིས་བསྟན་འཛིན་ནོར་བུར་མཚོན་ཆ་བཟུང་བ་དང་མི་གསོད་ཀྱི་དམིགས་ཡུལ་བཟུང་སྟེ། བྱ་སྤྱོད་ངན་པ་སྤེལ་བ་སོགས་ཀྱི་ནག་ཉེས་བསགས་ཡོད་སྐོར་བརྗོད་འདུག་པ་དང་། ད་སྔ་བར་ཐོན་པའི་གནས་ཚུལ་དག་གི་ནང་བསྟན་འཛིན་ནོར་བུ་ཞེས་བཀོད་ཡོད་པ་ལས་བོད་རིགས་ཞེས་གཅིག་ཀྱང་མེད་ནའང་། ཊོ་རན་ཊོའི་ (Thestar.com) ཞེས་པའི་གསར་ཁང་གི་གནས་ཚུལ་ནང་བསྟན་འཛིན་ནོར་བུར་འདྲི་རྩད་གཏོང་སྐབས་བོད་མི་སྐད་བསྒྱུར་བ་ཞིག་འཁྲིད་ཡོད་སྐོར་བྲིས་འདུག་སྟབས། ཁོ་བོད་རིགས་ཤིག་ཡིན་པ་དང་བུ་མོ་དེ་ཡང་བོད་རིགས་ཤིག་ཡིན་སྐོར་བརྗོད་བཞིན་འདུག་ནའང་། བུ་མོའི་ཁྱིམ་ཚང་གི་རེ་སྐུལ་དང་ཁྲིམས་སྒྲིག་གཞིའི་འོག ད་སྔ་བར་ས་གནས་ཀྱི་གསར་འགྱུར་བརྒྱུད་ལམ་ཁག་ཏུ་བུ་མོ་དེའི་མིང་དང་རྒྱབ་ལྗོངས་ཀྱི་གནས་ཚུལ་གཅིག་ཀྱང་བཀོད་མི་འདུག
གསར་འགོད་པ། དཔལ་ལྡན།
