རྒྱ་གར་གྱི་བདམས་ཐོན་སྲིད་འཛིན་གསར་པར་འཚམས་འདྲི་མཛད།

རྒྱ་གར་གྱི་གདོད་མའི་མི་རིགས་ཀྱི་རྒྱུད་པ་ལྕམ་སྐུ་ཤྲི་མ་ཏི་(Shrimati Droupadi Murmu)མཆོག་རྒྱ་གར་གྱི་སྲིད་འཛིན་དུ་བདམས་ཐོན་བྱུང་བར་༧གོང་ས་མཆོག་གི་དབུས་སྲིད་སྐྱོང་མཆོག་དང་སྤྱི་འཐུས་ཚོགས་གཙོ་མཆོག་ནས་འཚམས་འདྲི་གནང་འདུག

༧གོང་ས་རྒྱལ་བ་རིན་པོ་ཆེ་མཆོག་ནས་སྩལ་བའི་གསུང་འཕྲིན་ནང་། རྒྱལ་སྤྱིའི་སྤྱི་ཚོགས་ཀྱིས་རྒྱ་གར་ནི་འཛམ་གླིང་ཞི་བདེ་གོང་མཐོར་གཏོང་བར་གལ་ཆེན་ཡིན་པའི་ངོས་འཛིན་བྱེད་བཞིན་པའི་དུས་འདིར། ཁྱེད་རང་གིས་ཕྱི་ཟླ་ ༨ པའི་ནང་སྲིད་འཛིན་གྱི་ལས་འཁུར་ཞུ་རྒྱུ་ཡིན་པ་རེད། ངོས་རང་རྒྱ་གར་ནང་དུས་ཡུན་རིང་པོར་གནས་སྡོད་བྱེད་མཁན་གྱི་མགྲོན་པོ་ཞིག་ཡིན་ཞིང་། རྒྱ་གར་གྱི་ས་ཕྱོགས་གང་སར་འགྲོ་སྐྱོད་བྱེད་པའི་གོ་སྐབས་བྱུང་བར་བརྟེན། ངོས་རང་རྒྱ་གར་ལ་གུས་བརྩི་ཆེན་པོ་ཡོད། ལོ་ངོ་སྟོང་ཕྲག་རིང་རྒྱ་གར་གྱིས་ཀ་རུ་ནཱ་ (Karuna) དང་ཨ་ཧིམ་སཱ་ (Ahimsa) ཡི་ལྟ་གྲུབ་གོང་འཕེལ་བཏང་བ་དང་། བདག་ཉིད་ཆེན་པོ་གྷན་དྷི་ (Mahatma Gandhi) མཆོག་གིས་འཛམ་གླིང་སྤྱི་ཡོངས་ལ་འཚེ་མེད་ཞི་བའི་ལྟ་གྲུབ་དར་ཁྱབ་ཏུ་བཏང་གནང་ཡོད་པ་རེད། དེར་མི་སྒེར་དང་གོ་ལ་ཡོངས་སུ་ཞི་བདེ་བསྐྲུན་ཐུབ་པའི་ནུས་པ་ཡོད་པ་རེད། རྒྱ་གར་ནང་ཆོས་ལུགས་མི་འདྲ་བ་རྣམས་མཉམ་དུ་འཚོ་གནས་ཀྱིས་ཆོས་ལུགས་མཐུན་སྒྲིལ་ཡོད་པའི་གནས་ཤིག་རེད། ཅེས་གསུངས་འདུག

ཡང་༧གོང་ས་མཆོག་གིས། ངོས་རང་གི་བསམ་བློ་གཏོང་ཕྱོགས་དེ་ད་བར་ཐོབ་པའི་ནང་ཆོས་ཀྱི་ཉམས་ལེན་ནས་ཐོབ་པ་ཞིག་ཡིན་པར་བརྟེན། ངོས་ནས་རྒྱུན་དུ་ངོས་རང་རྒྱ་གར་གྱི་བུ་ཞིག་ལ་ངོས་འཛིན་བྱེད་ཀྱི་ཡོད། ཁྱེད་ཀྱིས་མཁྱེན་གསལ་ལྟར། བོད་ཀྱི་ནང་པའི་ཆོས་ལུགས་ཀྱི་ལྟ་གྲུབ་ནི་དཔལ་ན་ལེནྜའི་མཁས་པ་རྣམས་ཀྱིས་རྒྱུ་མཚན་དང་དཔྱད་ཞིབ་ཀྱི་རྒྱུན་སྲོལ་གོང་འཕེལ་གཏོང་བ་དེ་བརྟན་པོར་བཟུང་ཡོད་པ་རེད། དེང་དུས་ཀྱི་ཤེས་ཡོན་རིན་ཐང་ཆེན་པོ་ཡིན་ནའང་། ཕྱིའི་དངོས་པོ་གཙོ་བོ་ཆགས་ཀྱི་ཡོད་པར་བརྟེན། རྒྱ་གར་གྱི་གནའ་རབས་སེམས་ཁམས་རིག་པར་དོ་སྣང་དང་གོ་རྟོགས་སྤེལ་ནས་སྙོམས་སྒྲིག་བྱ་དགོས། མི་མང་རྣམས་ཀྱིས་ཉོན་མོངས་ཀྱི་སེམས་ལ་གདོང་ལེན་བྱས་ཏེ། ནང་སེམས་ཀྱི་ཞི་བདེ་འཚོལ་སྒྲུབ་བྱ་དགོས་པ་དང་། ངོས་ནས་མུ་མཐུད་དུ་རྒྱ་གར་དང་འཛམ་གླིང་སྤྱི་ཡོངས་ལ་བྱམས་བརྩེའི་ནུས་སྟོབས་གོང་མཐོར་གཏོང་བར་ཤུགས་སྣོན་དང་དམ་བཅའ་བརྟན་པོ་ཡོད་སྐོར་གསུངས་འདུག

མཇུག་ཏུ། རྒྱ་གར་གཞུང་མང་གཉིས་ཀྱིས་ང་ཚོའི་ངོ་བོ་དང་། ནང་པ་སངས་རྒྱས་པའི་ཆོས་ལུགས་སྲུང་སྐྱོབ་དང་མི་ཉམས་རྒྱུད་འཛིན་བྱེད་པར་ངོས་རང་དང་བོད་མི་ཡོངས་ལ་རྒྱབ་སྐྱོར་གནང་བར་ཡི་རང་བྱེད་ཀྱི་ཡོད། ངོས་རང་གིས་བསྐྱར་དུ་གོ་སྐབས་འདི་བཟུང་བའི་ཐོག་ནས། རྒྱ་གར་གྱི་གཞུང་མང་གཉིས་ཀྱིས་ང་ཚོར་མི་ལོ་དྲུག་ཅུ་ལྷག་གི་རིང་ལ་སྣེ་ལེན་ཟབ་རྒྱས་དང་རྒྱབ་སྐྱོར་གནང་བར་བཀའ་དྲིན་ཆེ་ཞུ་འདོད་བྱུང་། ཞེས་ཐུགས་སྨོན་གནང་འདུག

དེ་རིང་སྲིད་སྐྱོང་སྤེན་པ་ཚེ་རིང་མཆོག་ནས་འཚམས་འདྲི་གནང་བའི་ནང་། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ། ལྕམ་སྐུ་ཤྲི་མ་ཏི་མཆོག་རྒྱ་གར་སྤྱི་མཐུན་རྒྱལ་ཁབ་ཀྱི་སྲིད་འཛིན་ཐེངས་བཅོ་ལྔ་པར་བདམས་ཐོན་བྱུང་བར་འཚམས་འདྲི་ཞུ་ཡི་ཡིན། ང་ཚོས་རྒྱ་གར་མི་མང་དང་ལྷན་དུ་སྤོབས་པ་དང་སྤྲོ་སེམས་ཀྱི་ཐོག་ནས་དུས་ཚིགས་འདི་སྲུང་གཙི་ཞུ་ཡི་ཡིན། སྐུ་ཉིད་ཀྱིས་ལོ་ངོ་བཅུ་ཕྲག་མང་པོའི་རིང་སོ་སོའི་རྒྱལ་ཁབ་ལ་ཞབས་འདེགས་བསྒྲུབས་ཡོད་པས། ཁྱེད་རྒྱ་གར་གྱི་སྲིད་འཛིན་དུ་བདམས་ཐོན་བྱུང་བ་ནི་འོས་ཤིང་འཚམ་པ་ཞིག་ཡིན་ལ། ཁྱེད་རང་གི་དབུ་ཁྲིད་པའི་ཐོག་ནས་རྒྱ་གར་གྱི་དམངས་གཙོ་ཡར་རྒྱས་དང་། རྒྱལ་ཁབ་གོང་འཕེལ་གཏང་ཐུབ་པའི་ཡིད་ཆེས་ཡོད། ཅེས་གསུངས་འདུག

དེ་རིང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་འཚམས་འཕྲིན་གནང་བའི་ནང། ངས་གཞིས་བྱེས་བོད་མི་ཡོངས་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ། ལྕམ་སྐུ་ཤྲི་མ་ཏི་ཌོ་པཱ་ཏི་ (Shrimati Droupadi Murmu) མཆོག་ཐེངས་བཅོ་ལྔ་པའི་རྒྱ་གར་གྱི་སྲིད་འཛིན་དུ་བདམས་ཐོན་བྱུང་བ་དང་རྒྱ་གར་གྱི་ལོ་རྒྱུས་ཁྲོད་གདོད་མའི་མི་རིགས་ཀྱི་བུད་མེད་སྲིད་འཛིན་ཐོག་མ་ཆགས་པར་འཚམས་འདྲི་གནང་འདུག

ཡང་ཚོགས་གཙོ་མཆོག་གིས། རྒྱ་གར་གཞུང་མང་གཉིས་ཀྱིས་བོད་མི་དང་བོད་ཀྱི་འཚེ་མེད་ཞི་བའི་འཐབ་རྩོད་ལ་རྒྱབ་སྐྱོར་གནང་བར་བཀའ་དྲིན་ཆེན་པོ་ཡིན། རྒྱ་གར་ནི་བོད་མི་རྣམས་ཀྱི་ལོ་ངོ་དྲུག་ཅུ་ལྷག་གི་རིང་ཁྱིམ་གཞིས་གཉིས་པ་ལྟ་བུ་ཡིན་ཞིང་། རྒྱ་གར་གཞུང་མང་གཉིས་ནས་བོད་མི་རྣམས་ལ་རྒྱབ་སྐྱོར་གནང་བ་བཀའ་དྲིན་ཆེན་པོ་ཡིན། ཁྱེད་རང་གིས་མ་འོངས་པའི་ལས་དོན་མཐའ་དག་ལམ་ལྷོངས་ཡོང་བའི་ཐོག རྒྱ་གར་མི་མང་གི་མངོན་འདོད་བསྒྲུབ་ཐུབ་པའི་སྨོན་འདུན་ཡོད། ད་དུང་ཁྱེད་རང་གི་མ་འོངས་པའི་ལས་དོན་གལ་གནད་ཆེ་ཤོས་སུ་འཛམ་གླིང་ནང་ཞི་བདེ་བསྐྲུན་རྒྱུ་དེ་ཡོད་པའི་ཡིད་ཆེས་ཆེན་པོ་ཡོད། ཅེས་བཀོད་འདུག

ཁ་སང་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གི་སྒེར་གྱི་ངོ་དེབ་སྟེང་དུ། ལྕམ་སྐུ་ཤྲི་མ་ཏི་མཆོག་རྒྱ་གར་སྤྱི་མཐུན་རྒྱལ་ཁབ་ཀྱི་སྲིད་འཛིན་ཐེངས་ ༡༥ པར་བདམས་ཐོན་བྱུང་བར་འཚམས་འདྲི་དང་སྦྲགས། ཁོང་མོ་ཇར་ཁན་ཌི་མངའ་སྡེའི་སྤྱི་ཁྱབ་ (Governor of Jharkhand) ཡིན་སྐབས་མཇལ་བའི་གོ་སྐབས་བྱུང་བ་དང་། ལྕམ་སྐུ་ཤྲི་མ་ཏི་མཆོག་ནི་རྒྱ་གར་རང་བཙན་ཐོབ་རྗེས་རྒྱ་གར་ནང་སྐྱེས་པའི་སྲིད་འཛིན་ཐོག་མ་དང་། རྒྱ་གར་གྱི་སྲིད་འཛིན་དགུང་ལོ་ཆུང་ཤོས་དེ་ཡིན་པ་རེད། དེ་བཞིན་ཁོང་མོ་ནི་རྒྱ་གར་གདོད་མའི་སྤྱི་ཚོགས་( Tribal Community) ཁྲོད་ནས་རྒྱ་གར་གྱི་སྲིད་འཛིན་ལ་བདམས་ཐོན་བྱུང་བ་ཐོག་མ་དེ་ཆགས་ཀྱི་ཡོད་སྐོར་གསུངས་འདུག

རྒྱ་གར་གྱི་བདམས་ཐོན་སྲིད་འཛིན་ལྕམ་སྐུ་ཤྲི་མ་ཏི་མཆོག་ནི་ཕྱི་ལོ་ ༡༩༥༨ ཟླ་ ༦ ཚེས་ ༢༠ ཉིན་རྒྱ་གར་ཨོ་ཌི་ཤ་མངའ་སྡེ་རུ་སྐྱེས་ཤིང་། རཱ་མ་ཌེ་ཝི་བུད་མེད་ཀྱི་མཐོ་རིམ་སློབ་གྲྭ་ (Rama Devi Women’s College) ནས་སྒྱུ་རྩལ་གྱི་བསླབ་པ་མཐར་སོན་རྗེས། དགེ་རྒན་གྱི་ཕྱག་ལས་གནང་ཡོད་པ་དང་སློབ་དཔོན་ཆེན་མོའི་ཕྱག་རོགས་ཀྱི་ཕྱག་ལས་གནང་ཡོད་པ་རེད། ཕྱི་ལོ་ ༡༩༩༧ ལོར་བྷི་ཇེ་པི་ (BJP) ཆབ་སྲིད་ཚོགས་པའི་ནང་ཞུགས་ཡོད་པ་དང་། (Rairangpur Nagar Panchayat) ཚོགས་པའི་ཚོགས་མིར་བདམས་ཐོན་བྱུང་ཡོད་པ་རེད། ཕྱི་ལོ་ ༢༠༠༠ ལོར་ཚོགས་པ་དེའི་ཚོགས་གཙོ་དང་། བྷི་ཇེ་པིའི་ཚོགས་གཙོ་གཞོན་པའི་ཕྱག་ལས་གནང་ཡོད་པ་རེད། ཕྱི་ལོ་ ༢༠༡༥ ལོར་རྒྱ་གར་ཤར་ཕྱོགས་ཇར་ཁན་ཌི་ (Jharkhand) མངའ་སྡེའི་སྤྱི་ཁྱབ་ཀྱི་ཕྱག་ལས་གནང་། ཉེ་སྔོན་བྷི་ཇེ་པི་ཚོགས་པའི་ངོས་ནས་ལྕམ་སྐུ་ཤྲི་མ་ཏི་མཆོག་ཕྱི་ལོ་ ༢༠༢༢ ལོའི་སྲིད་འཛིན་གྱི་འོས་མིར་བདམས་ཏེ།  ཁ་སང་ཕྱི་ཚེས་ ༢༡ ཉིན་སྲིད་འཛིན་གྱི་རྒྱལ་ཁ་ཐོབ་ཡོད་པ་རེད། ཁོང་མོ་ནི་གདོད་མའི་མི་རིགས་ཀྱི་རིགས་རྒྱུད་ཅིག་ཡིན་ཞིང་། གདོད་མའི་མི་རིགས་ཀྱི་ཆབ་སྲིད་མི་སྣ་ཐོག་མ་དང་རྒྱ་གར་གྱི་བུད་མེད་སྲིད་འཛིན་ཐེངས་གཉིས་པ་དེ་ཆགས་ཀྱི་ཡོད་པ་རེད།

གསར་འགོད་པ། བསྟན་འཛིན་ཕུར་བུ།