༧གོང་ས་རྒྱལ་བ་རིན་པོ་ཆེ་མཆོག་ནས་བྱང་ཨེ་རི་ལན་ཌིའི་སྲིད་བློན་དང་པོ་ནོ་སྦེལ་ཞི་བདེའི་གཟེངས་རྟགས་བཞེས་མཁན་སྐུ་ཞབས་ཁྲེམ་སྦེལ་མཆོག་སྐུ་གྲོངས་བར་ཐུགས་གསོའི་གསུང་འཕྲིན་སྩལ་འདུག
His Holiness the Dalai Lama greets then Northern Ireland First Minister David Trimble and Deputy First Minister Seamus Mallon at Belfast in 2000.
ཁ་སང་ཕྱི་ཚེས་ ༢༦ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ཁྲེམ་སྦེལ་ (lord David Trimble )ལགས་སྙུང་གཞིའི་རྐྱེན་པས་ཟླ་འདིའི་ཕྱི་ཚེས་ ༢༥ ཉིན་སྐུ་གྲོངས་ཡོད་སྟབས། དམ་པ་ཁོང་གི་སྐུ་ཟླ་ལྕམ་ཁྲེམ་སྦེལ་(lady Trimble) གྱི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་སྩལ་ཏེ། ང་ཚོས་ཕན་ཚུན་བསམ་ཤེས་དང་གུ་ཡངས་སོགས་ཀྱི་ཐབས་ལམ་ལ་བརྟེན་ནས་དཀའ་ངལ་སེལ་ཐབས་བྱེད་པ་ནི་དམ་པ་ཁོང་ལ་འོས་ཤིང་འཚམ་པའི་རྗེས་དྲན་ཞུ་ཕྱོགས་ཤིག་ཡིན་སྐོར་གསུངས་འདུག
དེ་ཡང་མགོན་པོ་མཆོག་ནས་སྩལ་བའི་ཐུགས་གསོའི་གསུང་འཕྲིན་ནང་། ཁྱེད་ཀྱི་སྐུ་ཟླ་ཁྲེམ་སྦེལ་ལགས་ནི་མངོན་གསལ་དོད་པོ་དང་དོན་དངོས་ཀྱི་ཐོག་ནས་བརྩོན་པ་ཆེར་བསྐྱེད་ཀྱིས་ཕན་ཚུན་གཉིས་ཕན་གྱི་གྲོས་ཆོད་བརྒྱུད་བྱང་ཨེ་རི་ལན་ཌི(Northern Ireland) ནང་དུ་ཞི་བདེ་སྐྲུན་མཁན་ཞིག་ཡིན། ཕྱོགས་འགལ་ཚོགས་པ་ཁག་ལ་ཡིད་ཆེས་བརྟན་པོས་གྲོས་མོལ་གྱི་ལམ་ནས་ཐག་གཅོད་མཐའ་སྐྱེལ་བྱེད་ཐུབ་མཁན་ཞིག་ཀྱང་ཡིན། ཁོང་གི་རེས་གཟའ་པ་སངས་ཀྱི་གྲོས་ཆོད་(Good friday Agreement) ནི་དེང་གི་དུས་འདིར་ང་ཚོས་ཞི་བདེ་བསྐྲུན་པར་མིག་དཔེར་ལྟ་ས་ཞིག་ཏུ་ངོས་འཛིན་བྱས་ན་འགྲིག་གི་ཡོད་པ་རེད། ངོས་རང་ལའང་བྱང་ཨེ་རི་ལན་ཌིའི་ནང་ཐེངས་ཁ་ཤས་ལ་ཁྱེད་ཀྱི་སྐུ་ཟླ་དང་མཇལ་བའི་གོ་སྐབས་བཟང་པོ་བྱུང་སོང་ལ། སྐབས་དེར་ཁོང་ལ་ཨེ་རི་ལན་ཌིའི་ནང་དུ་ཞི་བདེ་བསྐྲུན་པར་བསྟོད་བསྔགས་ཞུས་པ་ཡིན། ཞེས་གསུངས་འདུག
གསུང་འཕྲིན་གྱི་མཇུག་ཏུ། གལ་སྲིད་ང་ཚོས་འགྲོ་བ་མི་གཅིག་གྱུར་གྱི་འདུ་ཤེས་ཐོག་ནས་བསམ་ཤེས་དང་གུ་ཡངས། བརྩི་བཀུར་གྱིས་ལས་དོན་བྱེད་ཕྱོགས་རྒྱུན་འཁྱོངས་བྱས་ཏེ་དཀའ་ངལ་གསེད་དཀྲོལ་བྱེད་ཐུབ་པ་ཡིན་ན། དེ་ནི་སྐུ་ཞབས་ཁྲེམ་སྦེལ་མཆོག་ལ་འོས་ཞིང་འཚམ་པའི་རྗེས་དྲན་ཞིག་རེད། ཅེས་གསུངས་འདུག
སྐུ་ཞབས་ཁྲེམ་སྦེལ་མཆོག་ནི་ཕྱི་ལོ་ ༡༩༤༤ ཟླ་ ༡༠ ཚེས་ ༡༥ ཉིན་བྱང་ཨེ་རི་ལན་ཌིའི་སྦན་གོར་(Bangor)ས་ཆ་ནས་སྐྱེས་ཞིང་། ཁུན་སི་གཙུག་ལག་སློབ་གླིང་ནས་བསླབ་པ་མཐན་ཕྱིན། ཕྱི་ལོ་ ༡༩༦༨ ལོར་སྦེལ་ཧྥ་སི་ཊི་(belfast)ནས་ཁྲིམས་ལུགས་རིག་པའི་བསླབ་གནས་དང་པོ་ཐོབ། ཕྱི་ལོ་༡༩༧༥ ནས་ ༡༩༧༦ བར་མདུན་སྐྱོད་མཐུན་གྲོགས་སྲིད་དོན་ཚོགས་པ(Vanguard Unionist Party)་ཡི་ཚོགས་ཁོངས་སུ་ཞུགས་ཏེ་ཚོགས་པའི་སྐུ་ཚབ་ཀྱི་ལས་འགན་འཁུར། ཕྱི་ལོ་ ༡༩༩༧ ནས་ ༢༠༠༢ བར་བྱང་ཨེ་རི་ལན་ཌིའི་སྲིད་བློན་དང་པོ་རུ་བདམས་ཐོན་བྱུང་།
དམ་པ་ཁོང་གིས་རེས་གཟའ་པ་སངས་ཀྱི་གྲོས་ཆོད་(Good Friday Agreament) ཀྱིས་དབྱིན་ཡུལ་དང་འབྲེལ་བའི་དམག་འཁྲུག་དེ་ཞི་བའི་ལམ་ནས་གྲོས་མོལ་གནང་ཡོད་པ་མ་ཟད། དེ་འབྲེལ་དཀའ་ངལ་མང་པོ་ཞིག་སེལ་ཐུབ་པ་བྱུང་ཡོད་པར་བརྟེན། ཁོང་གི་སྲིད་ཇུས་དེ་ནི་ཞི་བདེ་བསྐྲུན་པའི་ཐབས་ལམ་ཕུལ་དུ་བྱུང་བ་ཞིག་ཡིན་པར་ངོས་འཛིན་བྱས་ཏེ། ཕྱི་ལོ་ ༡༩༩༨ ལོར་སྐུ་ཞབས་ཁོང་ལ་ནོ་སྦེལ་ཞི་བདེའི་གཟེངས་རྟགས་ཐོབ་ཡོད་པ་རེད།
བྱམས་པ་ཚེ་རིང་།
