བོད་མི་ཚེ་དབང་རིན་ཆེན་ལགས་སུ་ཁྲིམས་ཐག་བཅད།

དེ་རིང་འདི་གར་བོད་ནས་གནས་ཚུལ་འབྱོར་བ་ལྟར་ན། ཟླ་འདིའི་ཕྱི་ཚེས་༡༦ ཉིན་གཞིས་ཀ་རྩེ་མི་མང་ཁྲིམས་ཁང་ཟེར་བས། བོད་རང་སྐྱོང་ལྗོངས་གཞིས་ཀ་རྩེ་རིན་སྤུངས་རྫོང་ནས་ཡིན་པའི་བོད་མི་ཚེ་དབང་རིན་ཆེན་ཞེས་པ་ཞིག་ལ། རྒྱལ་ཁབ་ཀྱི་ལས་དོན་འཐུས་ཤོར་དང་ཕྱོགས་ཞེན་གྱིས་དབང་ཆ་ལོག་སྤྱོད་བྱས་པའི་ཉེས་མིང་འོག  ལོ་གཅིག་དང་ཟླ་དྲུག་གི་ཁྲིམས་ཆད་དང་། རྒྱ་སྒོར་ ༣༥༠༠༠ ཉེས་ཆད་དང་དབང་ཆ་ཕྱིར་བསྡུ་བྱས་ཡོད་འདུག་ལ། ད་ལྟའི་ཆར་བཙོན་ཁང་གང་དུ་ཡོད་མེད་སོགས་ཁ་གསལ་མི་འདུག

གནས་ཚུལ་མཁོ་སྤྲོད་པས་བརྗོད་པ་ལྟར་ན། ཚེ་དབང་རིན་ཆེན་ལགས་འདི་ལོའི་ཕྱི་ཟླ་ལྔ་པའི་ནང་གོང་རིམ་གྱི་ལམ་སྟོན་ལ་སྣང་མེད་དང་དབང་ཆ་ལོག་སྤྱོད་ཀྱིས་ཚོགས་ཁག་ཕྱོགས་ཞེན་བྱས་པའི་དོགས་གཞིའི་འོག་འཛིན་བཟུང་བྱས་ཡོད་པ་དང་། ཟླ་གཉིས་ཙམ་རིང་འདྲི་རྩད་བཀག་ཉར་བྱས་རྗེས། ཉེ་སྔོན་ནང་མི་དང་གཉེན་ཉེ་ཁག་ཅིག་སྐད་བཏང་སྟེ་ཁྲིམས་ཐག་བཅད་ཡོད་འདུག

ཚེ་དབང་རིན་ཆེན་ལགས་ནི་ཕྱི་ལོ་ ༢༠༠༢ ནས་བཟུང་རིན་སྤུངས་རྫོང་ཁོངས་ཀྱི་གྲོང་རྡལ་ཞིག་གི་དྲུང་ཡིག་གི་ལས་ཀ་བྱས་ཡོད་པ་དང་། ཁོང་ནི་ས་གནས་ཡུལ་མི་དང་བོད་པའི་རིག་གཞུང་སོགས་ལ་ཧ་ཅང་དགའ་ཞེན་ཆེན་པོ་ཡོད་མཁན་ཞིག་ཡིན་པ་མ་ཟད། དམིགས་བསལ་ཕྱི་ལོ་ ༢༠༡༣ ་ལོར་ས་གནས་འབྲོག་པ་མང་པོ་གྲོང་རྡལ་དུ་ཕབ་སྐབས། ས་གནས་གཞུང་ལ་མང་ཚོགས་གྲོང་རྡལ་དུ་ཕབ་ན། མ་འོངས་པར་དཀའ་ངལ་ཆེན་པོ་འཕྲད་ཉེན་ཡོད་པས་སྔོན་མ་ནང་བཞིན་སོ་སོའི་ས་ཐོག་ཏུ་འཚོ་བ་བསྐྱལ་ན་ཡག་པོ་ཡོད་ལུགས་སོགས་ཀྱི་སྙན་ཞུ་ཐོག་མ་དེ་ཕུལ་ཡོད་འདུག