དེ་རིང་༧གོང་ས་རྒྱལ་རིན་པོ་ཆེ་མཆོག་གིས། ངས་བོད་རྒྱ་ཆེ་མི་མང་ལ་དྲག་པོའི་ཐོག་ནས་འཛིང་དགོས་རེད་ནམ་ཡང་ཟེར་གྱི་མ་རེད། སེམས་པ་བཟང་པོ་བྱ་རྒྱུ་དང་དེའི་མདུན་དུ་སྙིང་སྟོབས་ཡོད་པས། ང་ཚོར་དཀའ་ངལ་ག་ཚོད་ཡོད་ཀྱང་སེམས་པ་བཟང་པོ་དང་འབྲེལ་བའི་སྙིང་སྟོབས་དེ་སྡོད་ཐུབ་པ་ཡིན་ན་འགྱུར་བ་གཏན་གཏན་འགྲོ་ཡི་རེད་ཅེས་གསུངས། 
དེ་རིང་སྔ་དྲོ་ཆུ་ཚོད་ ༨ སྟེང་༧གོང་ས་རྒྱལ་བ་རིན་པོ་ཆེ་མཆོག་གིས། ལ་དྭགས་ལྕོག་ལམ་སར་ཞི་བའི་ཚལ་གསུང་ཆོས་རྭ་བའི་ནང། ཉིན་གྲངས་གཉིས་རིང་རྒྱལ་སྲས་ཞི་བ་ལྷས་མཛད་པའི་བཀའ་ཆོས་འཕྲོ་སྐྱོང་དང་ཉིན་གསུམ་པར་ཐུགས་རྗེ་ཆེན་པོའི་དབང་བཅས་ཀྱི་བཀའ་ཆོས་དབུ་འཛུགས་མཛད་སོང་བ་དང་། སྐབས་དེར་མགོན་པོ་གང་ཉིད་མཆོག་གིས། དེ་རིང་འདིར་ཆོས་གྲོགས་ཚོར་ཆོས་འབྲེལ་བྱ་རྒྱུ་དང་། ད་གིན་བུ་གུ་ཚོས་རྩོད་པ་བརྩད་པར་ངོས་རང་དགའ་པོ་ཞེ་དྲགས་བྱུང་། དེ་སྔ་ནས་རིག་ལམ་སྦྱང་རྒྱུ་ནི་བློ་གྲོས་ཀྱི་མིག་འབྱེད་པའི་ལྡེ་མིག་ལྟ་བུ་ཡིན་པས། དེ་དཔེ་གལ་ཆེན་པོ་རེད་ད། ཁྱེད་རང་ཚོ་ཕྲུ་གུ་ཚོས་རྟགས་གསལ་གཏོང་བའི་རྨང་གཞི་བཙུགས། སངས་རྒྱས་ཀྱི་ཆོས་ཟེར་བ་དེ་རིག་པའི་ལམ་ནས་དཔྱད་པ་བྱས་ཏེ་གཏན་ལ་ཕབ་པ་ཞིག་རེད་མ་གཏོགས། དཀོན་མཆོག་དང་སངས་རྒྱས་ཀྱིས་གསུངས་པ་རེད་ཟེར་ནས་ཡིད་ཆེས་བྱས་ནས་འགྲོ་བསྡད་པ་ཞིག་མ་རེད། ང་ཚོ་སངས་རྒྱས་ཀྱི་ཆོས་སྤྱི་དང་ལྷག་པར་དཔལ་ན་ལཎ་ཌའི་ཆོས་བརྒྱུད་ཀྱི་སངས་རྒྱས་པའི་ཆོས་དེ་དཔྱད་པ་བྱས་ཏེ་འགྲོ་བསྡད་པ་ཞིག་ཡིན་དུས། ཁྱེད་ཚོ་ཕྲུ་གུ་ཚོས་རྟགས་གསལ་གཏོང་བ་ནི་ཐོག་མར་རིག་པའི་སྒོ་འབྱེད་བྱེད་ཀྱི་ཡོད། ཞེ་དྲགས་ཡག་པོ་རེད། དེར་བརྟེན། རྟགས་གསལ་གཏོང་མཁན་གྱི་ཕྲུ་གུ་རྣམས་ལ་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་སོང་།
དེ་རྗེས་ཤེས་རབ་སྙིང་བོ་གསུང་འདོན་གྲུབ་མཚམས་༧སྐུ་ཉིད་མཆོག་གིས། མི་ཚེ་དོན་དང་ལྡན་པ་དང་སེམས་བག་འཕེལ་པོ་ཡོང་བར་སེམས་པ་བཟང་པོ་བྱ་རྒྱུ་དེ་ཞེ་དྲགས་གལ་ཆེན་པོ་རེད། ཆོས་ལུགས་མི་འདྲ་བར་རང་རང་གི་ལྟ་གྲུབ་མི་འདྲ་བར་ཡོད་ཀྱང་། ཚང་མས་སྙིང་རྗེ་གསུང་གི་ཡོད། དེར་བརྟེན། ང་རང་ཚོར་སྙིང་རྗེའི་ཉམས་ལེན་དེ་གལ་ཆེ་ཤོས་ཆགས་བསྡད་ཡོད་པ་རེད། ང་ཚོའི་མི་ཚེ་འདི་མ་ཡི་བརྩེ་བའི་འོག་ནས་མགོ་བརྩམས་ཡོད་པ་དང་འཆི་བའི་ཁ་ཐུག་ལ་རང་གི་མཐའ་སྐོར་ལ་བརྩེ་སེམས་ཡོད་པའི་གྲོགས་པོ་ཚོས་བསྐོར་བསྡད་པ་ཡིན་ན། ཤི་བའི་ཁ་ཐུག་ལ་སེམས་སྐྱིད་པ་ཡོང་གི་རེད། དེར་བརྟེན། སེམས་པ་བཟང་པོ་དང་བརྩེ་བ་བྱ་རྒྱུ་ནི་མི་ཚེའི་ཐོག་མཐའ་བར་གསུམ་དུ་ཞེ་པོ་གལ་ཆེན་པོ་རེད་འདུག
གཉིས་ནས་མིའི་སྤྱི་ཚོགས་ཟེར་བ་སྤྱི་ཚོགས་ལ་བརྟེན་བསྡད་པ་ཞིག་ཡིན་སྟབས། མི་ཟེར་བ་དེ་ཁེར་རྐྱང་བྱས་ནས་སྡོད་ཐུབ་ཀྱི་མ་རེད། དེར་བརྟེན། སྤྱི་ཚོགས་དེ་ལ་སེམས་བཟང་དང་ཚང་མར་འཆམ་མཐུན་བྱས་ནས་བསྡད་པ་ཡིན་ན་མི་ཚེ་སྐྱིད་པོ་ཡོང་གི་རེད། མིའི་རང་བཞིན་ལྷན་སྐྱེས་དེ་སྤྱི་ཚོགས་ལ་བརྟེན་བསྡད་པ་ཞིག་རེད་དེ། སྤྱི་ཚོགས་ལ་དོ་སྣང་མེད་པར་སོ་སོ་གཅིག་པོར་བསམ་བློ་བཏང་བསྡད་ཚེ། དངོས་ཡོད་གནས་ཚུལ་ལ་རན་གྱི་མེད་པ་རེད། ཚང་མར་འཆམ་པོ་བྱ་རྒྱུ་ཞེ་པོ་གལ་ཆེན་པོ་རེད། ལུང་དེ་འདྲའི་ནང་དུ། སེམས་པ་བཟང་ན་ས་དང་ལམ་ཡང་བཟང་། སེམས་པ་ངན་ན་ས་དང་ལམ་ཡང་ངན། ཐམས་ཅད་སེམས་པ་དག་ལ་རག་ལས་པས། ཞེས་གསུངས་དུས། ང་ཚོའི་སེམས་པ་བཟང་པོ་བྱ་རྒྱུ་དེ་ཞེ་པོ་གལ་ཆེན་པོ་རེད། ཞེས་གསུངས།
ངོས་རང་ལ་ཆ་མཚོན་ན་བྱང་ཆུབ་ཀྱི་སེམས་ཉམས་ལེན་གལ་ཆེན་པོ་ཞེ་པོར་བརྩི་ཡི་ཡོད། དེས་སེམས་ལྷོད་ལྷོད་ཆགས་ཀྱི་འདུག སོ་སོར་གནོད་པ་སྐྱེལ་མཁན་གྱི་དགྲ་བོ་དེ་དག་བཤེས་གཉེན་ལ་བསྟེན་པ་དང་ལྷག་པར་དུ་དེ་དག་ལ་བརྩེ་སེམས་སྒོམ། ངོས་ལ་ཆ་བཞག་ན་བོད་ནང་ལ་དཀའ་ངལ་ཞེ་དྲགས་ཡོད་པ་རེད། རྒྱ་མི་གུང་ཁྲན་གྱིས་དཀའ་ངལ་ཞེ་དྲགས་སྤྲོད་ཀྱི་ཡོད། ཐོག་མ་ནས་སེམས་ལ་གཙོ་བོ་དེར་ཕན་ཞིག་ཐོགས་ན་བསམས་པ་མ་གཏོགས། དེར་ཁོ་ཁྲོང་དང་ང་རྒྱལ། ཕྲག་དོག་སོགས་ཡོང་གི་མི་འདུག དེའི་འབྲས་བུར་ང་རང་སེམས་པ་བཟང་བ་དང་སྐྱིད་པ། སོ་སོ་སེམས་པ་རྣམ་དག་བྱས་ནས་བསྡད་ཡོད་དུས་ག་ལེར་རྒྱ་རིགས་ནང་ལའང་མང་པོ་ཞིག་གིས་དགའ་པོ་བྱས་ཡོང་གི་འདུག མིས་ཚུར་གནོད་པ་བྱས་པ་དང་གཅིག་གིས་གཅིག་ལ་གནོད་པར་གནོད་ལན་མཇལ་ནས་ཕྱིན་པ་ཡིན་ན། དཀའ་ངལ་རྫོགས་རྒྱུ་ཡོད་པ་མ་རེད། དེར་བརྟེན་སེམས་པ་བཟང་པོ་བྱ་རྒྱུ་ཞེ་པོ་གལ་ཆེན་པོ་རེད་འདུག
ང་རང་ཆུང་དུས་ནོར་བུ་གླིང་ཁའི་ནང་མངའ་རིའི་ཁམ་སྡོང་གང་འཚམ་ཡོད་པ་རེད། དབྱར་ཁ་ཁམ་བུ་སྨིན་ཡོང་དུས། ཁམ་སྡོང་འཁྲིས་ནས་ཆུང་དུས་ནས་ཁམ་བུ་ཟ་ཡི་ཡོད། ད་ལྟ་ལོ་རྒན་ ༨༧ ལ་བསླེབས་བསྡད་ཡོད། སོ་ཡག་པོ་ཞེ་དྲགས་ཡོད། བོད་དུ་བུ་གུ་ཆུང་ཆུང་གི་སོ་དང་པོ་བརྗེ་བའི་ཁ་ཐུག་ལ། རྟ་སོ་མ་སྐྱེས། བོང་སོ་མ་སྐྱེས། གཡང་དཀར་ལུག་གུའི་སོ་ཡོང་བར་ཤོག་ཅེས་ལབ་སྲོལ་ཡོད་པ་རེད། དེར་བརྟེན། ང་ལ་ཡང་རྟ་སོ་དང་བོང་སོ་མེད། གཡང་དཀར་ལུག་གུའི་སོ་ཡོད་ཅེས་བཞད་མོ་བཞད་སོང་།
དེ་ནས་ལ་དྭགས་ཀྱི་ས་ཁུལ་འདི་བོད་དང་ས་འབྲེལ་ཆགས་ཀྱི་ཡོད། ཧི་མ་ལ་ཡའི་རི་བརྒྱུད་ཀྱི་ཆོས་གྲོགས་ཚོ་སེམས་པ་བཟང་པོ་བྱ་རྒྱུ་བྱུང་ན། བོད་ཀྱི་བསྟན་སྲིད་དོན་དག་ལ་ཕན་གྱི་རེད། ང་ལ་བོད་རྒྱ་ཆེ་མི་མང་གིས་རེ་བ་དང་བློ་སྐྱེད་ཀྱི་ཡོད་པ་རེད། ངས་བོད་རྒྱ་ཆེ་མི་མང་ལ་དྲག་པོའི་ཐོག་ནས་འཛིང་དགོས་རེད་ནམ་ཡང་ཟེར་གྱི་མ་རེད། སེམས་པ་བཟང་པོ་བྱ་རྒྱུ་དང་དེའི་མདུན་དུ་སྙིང་སྟོབས་ཡོད་པས། ང་ཚོར་དཀའ་ངལ་ག་ཚོད་ཡོད་ཀྱང་སེམས་པ་བཟང་པོ་དང་འབྲེལ་བའི་སྙིང་སྟོབས་དེ་སྡོད་ཐུབ་པ་ཡིན་ན་འགྱུར་བ་ཏན་ཏན་འགྲོ་ཡི་རེད། དཔེར་ན། འདས་པའི་ལོ་ཁ་ཤས་ནང་རྒྱ་ནག་ནང་འགྱུར་བ་ཆེན་པོ་འགྲོ་བསྡད་འདུག དངོས་ཡོད་གནས་ཚུལ་ལ་གུང་ཁྲན་རིང་ལུགས་ཀྱི་གཅིག་སྡུད་ཟེར་བའི་དུས་ཚོད་ཡོལ་ཚར་བ་རེད། སི་ཏ་ལིའི་སྐབས་ནས་བཟུང་བའི་དེ་ཚོ་འགྱུར་བ་ཕྱིན་ཟིན་པ་རེད། དེང་སང་འཛམ་གླིང་གི་ཤར་ནུབ་གང་སར་རིམ་པས་མང་གཙོ་ཡོང་བསྡད་ཡོད་པ་རེད། དོན་དམ་གྱི་མང་གཙོ་ཡག་པོ་ཞིག་ཡོང་བར་སེམས་པ་བཟང་པོ་དང་མི་ཀུན་ལ་ཕན་སེམས་བྱས། གནག་སེམས་གནོད་སེམས་དང་རེ་དོགས་བྱས་ནས་མ་བསྡད་པར་ཀུན་ལ་བརྩེ་སེམས་བྱས་ནས་བསྡད་པ་ཡིན་ན། དངོས་གནས་འཛམ་གླིང་ཞི་བདེ་ཟེར་བ་ཡོང་གི་རེད། འཛམ་བུ་གླིང་ལ་མི་དུང་ཕྱུར་བདུན་ཅུ་ཡོད་པ་དང་དུང་ཕྱུར་བདུན་ཅུ་དེ་དག་གཅིག་གིས་གཅིག་ལ་བརྩེ་སེམས་བྱས་ནས་ཡོད་པ་ཡིན་ན། དངོས་གནས་དྲང་གནས་ཞི་བདེ་ལྡན་པའི་འཛམ་གླིང་ཞིག་བཟོ་ཐུབ་ཀྱི་རེད། གཅིག་གིས་གཅིག་ལ་དོགས་པ་དང་ཕྲག་དོགས། སྒོ་གསུམ་ལ་དམ་དོ་བྱས་ནས་བསྡད་པ་ཡིན་ན། འཛམ་གླིང་ཞི་བདེ་ཟེར་བ་ནི་ཁ་དང་ཚིག་ཙམ་ལས་ཡོང་གི་མ་རེད། ཅེས་གསུངས།
གསར་འགོད་པ། སྐལ་བཟང་སྦྱིན་པ།
