ལྕམ་སྐུ་ནེན་སི་པེ་ལོ་སི་མཆོག་གིས་ཐའེ་ཝན་གྱི་སྲིད་འཛིན་ཚེ་ཡེན་ཝུན་མཆོག་ལ་མཇལ་མོལ་གནང་།

མི་ལོ་ ༢༥ ལྷག་གི་རྗེས་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནན་སི་པེ་ལོ་སི་ (Nancy Pelosi) མཆོག་ཐའེ་ཝན་ནང་དངོས་སུ་ཕེབས་ཏེ་ཡུལ་དེའི་སྲིད་འཛིན་ཚེ་ཡེན་ཝུན་མཆོག་དང་མཇལ་མོལ་གནང་ཡོད་པར་བརྟེན་རྒྱ་ནག་གཞུང་གིས་ཐའེ་ཝན་ལ་ཚོང་འབྲེལ་ཁག་ཅིག་མཚམས་འཇོག་བྱས་ཏེ་དཔལ་འབྱོར་གྱི་གནོན་ཤུགས་སྤྲོད་ཀྱི་ཡོད་འདུག

U.S. House Speaker Nancy Pelosi, left, and Taiwanese President President Tsai Ing-wen wave during a meeting in Taipei, Taiwan, Wednesday, Aug. 3, 2022(Photo | AP)

མདང་དགོང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནན་སི་པེ་ལོ་སི་མཆོག་ཐའེ་ཝན་ནང་བདེ་འབྱོར་བྱུང་སྟེ་ཞག་བཞུགས་གནང་ཡོད་པ་ལྟར། དེ་རིང་སྔ་དྲོར་ཐའེ་ཝན་གྱི་སྲིད་འཛིན་ལྕམ་ཚའེ་ཡེན་ཝུན་མཆོག་གིས་དབུ་འཁྲིད་པའི་ཆེས་མཐོའི་དཔོན་རིགས་ལྷན་ཚོགས་ཐོག་དབུ་འཁྲིད་རྣམས་ནས་མཇལ་མོལ་དང་། རྒྱལ་ཁབ་ཕྱི་ནང་གི་གསར་འགོད་པ་ཚོའི་དྲི་བར་ལན་འདེབས་གནང་། དེ་བཞིན་ཐའེ་ཝན་གྲོས་ཚོགས་ཀྱི་ཚོགས་གཞོན་དང་གྲོས་ཚོགས་འཐུས་མི་རྣམ་པར་ཟུར་མཇལ་གྱིས་ཨ་རིས་མུ་མཐུད་ཐའེ་ཝན་ལ་རྒྱབ་སྐྱོར་ཡོད་པ་དང་། རྒྱལ་ཁབ་གཉིས་ཀྱི་འབྲེལ་ལམ་ཡར་རྒྱས་དང་། རྒྱལ་ཁབ་ཀྱི་བདེ་འཇགས་སྲུང་སྐྱོབ། དེ་བཞིན་འཛམ་གླིང་གི་གནམ་གཤིས་འགྱུར་ལྡོག་སོགས་ཀྱི་སྐོར་ལ་གླེང་སློང་གནང་ཡོད་འདུག

སྲིད་འཛིན་རྣམ་གཉིས་ཀྱི་མཇལ་མོལ་སྐབས་ཐའེ་ཝན་གྱི་སྲིད་འཛིན་ལྕམ་ཚའེ་ཡེན་ཝུན་མཆོག་གིས། རྒྱ་ནག་གིས་ཨ་རིར་ཉེན་བརྡ་བཏང་བ་སོགས་གནས་སྟངས་ཛ་དྲག་པོ་ཡོད་རུང་། ཨ་རིའི་གྲོས་ཚོགས་འོག་མའི་ཚོགས་གཙོ་མཆོག་དང་གྲོས་ཚོགས་འཐུས་མི་རྣམས་ནས་ཐའེ་ཝན་ལ་རྒྱབ་སྐྱོར་མཚོན་ཆེད་དུ་ཆེད་ཕེབས་གནང་བར་བཀའ་དྲིན་ཆེ་ཞུས་པ་དང་། ཐའེ་ཝན་ལ་དམག་གི་འཇིགས་སྐུལ་ཤུགས་ཆེན་བྱུང་ཡོད་ཀྱང་། ཐའེ་ཝན་ནས་རང་ཉིད་ཀྱི་རྒྱལ་ཁབ་སྲུང་སྐྱོབ་དང་། རྒྱལ་ཁབ་ཀྱི་བདེ་འཇགས་ཡར་རྒྱས་མུ་མཐུད་གཏང་རྒྱུ་ཡིན་སྐོར་གསུངས་སོང་།

ལྕམ་སྐུ་སྐུ་ནེན་སི་པེ་ལོ་སི་མཆོག་ནས་ད་ལན་གྱི་གཟིགས་སྐོར་ལ་དམིགས་ཡུལ་གསུམ་ཡོད་པའི་དང་པོ་ནི། བདེ་འཇགས་ཡིན་ཞིང་། ཨ་རིའི་མི་མང་དང་འཛམ་གླིང་མི་མང་ཚུད་པའི་མི་མང་གི་བདེ་འཇགས་སྲུང་སྐྱོབ་གལ་ཆེན་ཡིན་པ་དང་། གཉིས་པ་དཔལ་འབྱོར་ཡར་རྒྱས་འཛམ་གླིང་ས་ཕྱོགས་གང་སར་གཏོང་ཐུབ་པ། གསུམ་པ་དབང་འཛིན་འཐུས་ཚང་དུ་གཏོང་ཆེད་ཡིན་སྐོར་གསུངས་པ་དང་འབྲེལ། ཐའེ་ཝན་ནི་འཛམ་གླིང་སྟེང་གི་རང་དབང་ཆེ་ཤོས་ཀྱི་སྤྱི་ཚོགས་ཤིག་ཡིན་ལ། ཨ་རིས་རྒྱ་ནག་གཅིག་གི་སྲིད་ཇུས་ལ་གུས་བཀུར་བྱས་པའི་ཐོག་ནས་ཐའེ་ཝན་ལ་རྒྱབ་སྐྱོར་བྱ་རྒྱུ་ནི་གལ་ཆེན་པོ་ཞིག་ཆགས་ཀྱི་ཡོད་ལ། དུས་རྒྱུན་དུ་ཐའེ་ཝན་ནང་རང་དབང་དང་བདེ་འཇགས་དགོས་པ་དང་། ལོ་ངོ་ ༤༣ གྱི་གོང་ལ་ཨ་རིས་ཐའེ་ཝན་ལ་རྒྱབ་སྐྱོར་བྱ་རྒྱུ་ཡིན་པའི་ཁས་ལེན་བྱས་ཡོད་པ་ལྟར། ཐའེ་ཝན་ལ་ཨ་རིའི་གྲོས་ཚོགས་འཐུས་མི་སོགས་ཡོང་སྟེ། ཐའེ་ཝན་ལ་ཁས་ལེན་བྱས་པ་དེ་ནམ་ཡང་འདོར་གྱི་མེད་པ་གསལ་པོ་སྟོན་གྱི་ཡོད། ང་ཚོས་ཕྱོགས་གཉིས་ཀྱི་འབྲེལ་ལམ་ལ་རྒྱབ་སྐྱོར་ཡོད་པ་དང་། ཐའེ་ཝན་ནི་རང་དབང་ལ་དགའ་མོས་བྱེད་མཁན་ཡོངས་ཀྱིས་བསྔགས་བརྗོད་བྱ་ཡུལ་ཞིག་ཆགས་ཀྱི་ཡོད་ཅིང་། ཨ་རིའི་གཞུང་ནས་ཐའེ་ཝན་དང་འཛམ་གླིང་ཡོངས་ལ་དམངས་གཙོའི་ལམ་ལུགས་གོང་སྤེལ་དུ་གཏོང་ཐབས་གནང་རྒྱུ་ཡིན་སྐོར་གསུངས་འདུག

Pelosi speaks at the presidential office in Taipei. Photograph: Taiwan Presidential Office/Reuters

རྒྱ་ནག་ཕྱི་འབྲེལ་ལས་ཁུངས་སོགས་ནས་ལྕམ་སྐུ་མཆོག་གི་སྐོར་ལ་མཐའ་གཅིག་ཏུ་ངོ་རྒོལ་ཡོད་པའི་བསྒྲགས་གཏམ་སྤེལ་འདུག་ལ། ཁ་སང་རྒྱ་ནག་གི་ཕྱི་སྲིད་བློན་ཆེན་ཝང་ཡས་ (Wang Yi) ཀྱིས། ཨ་རིས་དམངས་གཙོའི་ལམ་ལུགས་སྤེལ་གྱི་ཡོད་ཁུལ་གྱིས་རྒྱ་ནག་གཅིག་གི་སྲིད་ཇུས་ལ་རྒྱབ་འགལ་བྱས་ཡོད་སྐོར་དང་། ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནན་སི་པེ་ལོ་སི་མཆོག་གིས་ངོ་ཚ་མེད་པའི་ཐོག་ནས་ཐའེ་ཝན་ལ་ཕེབས་པའི་སྐྱོན་བརྗོད་དང་། རྒྱ་ནག་གི་ཁྲིམས་ལ་མི་བརྩི་བར་ངན་སེམས་བཅངས་ཤིང་། ཆབ་སྲིད་འཁྲུག་རྐྱེན་གྱི་བྱ་སྤྱོད་སྤེལ་ཡོད་ཚུལ་བརྗོད་འདུག

དེ་བཞིན། དེ་རིང་ཨ་རིའི་རྒྱལ་སྲིད་དྲུང་ཆེ་ཟུར་པ་མེག་ཕོམ་པེ་ (Mike Pompeo) མཆོག་གིས་སྒེར་གྱི་ཊུ་ཝི་ཊར་སྟེང་། ཨ་རིའི་གྲོས་ཚོགས་འོག་མའི་ཚོགས་གཙོ་ནེན་སི་པེ་ལོ་སི་མཆོག་ཐའེ་ཝན་ལ་ཕེབས་པར་དགའ་པོ་བྱུང་། ཨ་རིས་རྒྱ་ནག་དམར་ཤོག་ཚོགས་པ་ནས་བཀའ་ཁྱབ་དྭང་ལེན་ནམ་ཡང་བྱེད་ཀྱི་མེད་པ་དང་། ང་ཚོས་ཐའེ་ཝན་དང་ཐའེ་ཝན་གྱི་མི་མང་ལ་རྒྱབ་སྐྱོར་མུ་མཐུད་བྱེད་ཀྱི་ཡིན། ཞེས་གསུངས་ཡོད་པ་དང་། ཉེ་སྔོན་ཕྱི་ཟླ་ ༧ ཚེས་ ༢༥ ཉིན་ཁོང་གིས། ཁོང་རྒྱ་ནག་ནང་ཡོང་བར་བཀག་སྡོམ་བྱས་ཡོད་ཀྱང་། རང་དབང་ལ་དགའ་བའི་ཐའེ་ཝན་ནང་ཡོང་བར་བཀག་སྡོམ་བྱེད་ཀྱི་མེད་སྐོར་གསུངས་ཡོད་པ་མ་ཟད། ལྕམ་སྐུ་ནེན་སི་མཆོག་དང་ལྷན་དུ་ཁོང་ཡང་ཐའེ་ཝན་ནང་འགྲོ་རྒྱུ་ཡིན་ཞེས་གསུངས་ཡོད་ཀྱང་། ཁོང་ལྷན་དུ་ཕེབས་ཡོད་པའི་གནས་ཚུལ་གང་ཡང་མཐོང་ཐོས་མི་འདུག

ཨ་རིའི་སི་ཨན་ཨན་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་རྒྱ་ནག་གཞུང་གིས་ཐའེ་ཝན་གྱི་མཁའ་ལམ་དུ་དམག་འཐབ་གནམ་གྲུ་ ༢༠ ལྷག་ཆེད་གཏོང་བྱས་ཏེ་འཇིགས་སྐུལ་བྱས་ཡོད་པ་དང་། དེ་རིང་རྒྱ་ནག་གཞུང་གིས་ཐའེ་ཝན་ནས་ཚོང་འདྲེན་བྱེད་བཞིན་པའི་ཚ་ལུ་མ་དང་སྐྱུར་བུ། རྒུན་འབྲུམ། ཀུ་ཤུའི་རིགས་སོགས་ཤིང་འབྲས་རིགས་ཁག་ཅིག་མཚམས་འཇོག་བྱས་ཡོད་འདུག དེ་བཞིན་རྒྱ་ནག་ནས་རང་བྱུང་བྱེ་མ་ཉ་ཤ་དང་། སྨན་རྫས་རིགས་སོགས་ཐའེ་ཝན་ནང་ཕྱིར་ཚོང་བྱེད་ཀྱི་ཡོད་པ་ཁག་ཅིག་མཚམས་འཇོག་བྱས་ཡོད་སྟབས། ཐའེ་ཝན་གྱི་ཚོང་པ་ཚོར་ཚོང་ལས་ཐད་ཤུགས་རྐྱེན་ཆེན་པོ་ཐེབས་རྒྱུ་ཡིན་པའི་སེམས་འཚབ་ཡོང་གི་ཡོད་འདུག

Nancy Pelosi waves as she boards a plane before leaving Taipei Songshan Airport in Taipei, Taiwan August 3, 2022. Credit: ANI Photo

ལྕམ་སྐུ་མཆོག་གི་ཐའེ་ཝན་ནང་གི་གཟིགས་སྐོར་གྲུབ་རྗེས། ཡུལ་དེའི་ཉིན་རྒྱབ་ཆུ་ཚོད་ ༣ པ་ཡོལ་ཙམ་ལ་ལྕམ་སྐུ་མཆོག་གིས་དབུ་འཁྲིད་པའི་སྐུ་ཚབ་ཚོགས་ཆུང་དེ་ལྷོ་ཀོ་རི་ཡའི་ནང་ཕེབས་ཡོད་འདུག

གསར་འགོད་པ། བསྟན་འཛིན་ཕུར་བུ།