བོད་ཀྱི་གློག་བརྙན་གཅིག་དང་བཞི་ལ་གཟེངས་བསྟོད་བྱ་དགའ་ཐོབ།

བོད་ཀྱི་གློག་བརྙན་གཅིག་དང་བཞི་ཞེས་པར་གློག་བརྙན་ཡག་ཤོས་ཀྱི་བྱ་དགའ་ཐོབ་ཡོད་པ་དང་དེ་ཡི་འཁྲབ་འཁྲིད་པ་འཇིགས་མེད་འཕྲིན་ལས་ལགས་དང་འཁྲབ་སྟོན་པ་སྦྱིན་པ་ལགས་གཉིས་ལའང་བྱ་དགའ་ཐོབ་ཡོད་འདུག

ཁ་སང་དགོང་མོར་གནའ་མཁར་ཟི་ལིང་དུ་འཚོགས་པའི་འདི་ལོའི་རྒྱ་ནག་རྒྱལ་ཡོངས་རང་བཞིན་གྱི་ཧྥར་སི་ན་གཞོན་གློག་བརྙན་དུས་སྟོན་སྐབས་ ༡༦ (16th FIRST Youth Film Festival) པའི་མཇུག་སྡོམ་མཛད་སྒོའི་ཐོག ཕྱི་ལོ ༢༠༢༢ ལོའི་ཧྥ་སི་ན་གཞོན་གློག་བརྙན་དུས་སྟོན་སྐབས་ ༡༦ པའི་བོད་ཀྱི་གློག་བརྙན་གཅིག་དང་བཞི་ཡི་འཁྲབ་ཁྲིད་པ་འཇིགས་མེད་འཕྲིན་ལས་ལགས་སུ་འཁྲབ་ཁྲིད་པ་ཡག་ཤོས་དང་།  སྦྱིན་པ་ལགས་སུ་འཁྲབ་སྟོན་པ་ཡག་ཤོས་ཀྱི་གཟེངས་བསྟོད་བྱ་དགའ། དེ་བཞིན་བོད་ཀྱི་གློག་བརྙན་གཅིག་དང་བཞི་ལ་འཁྲབ་གཞུང་གི་འགྲེལ་བརྗོད་ཡག་ཤོས་དང་། གློག་བརྙན་ཡག་ཤོས་ཀྱི་བྱ་དགའ་ཡང་ཐོབ་ཡོད་འདུག

བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་པདྨ་ཚེ་བརྟན་ལགས་ཀྱི་བུ་འཇིགས་མེད་འཕྲིན་ལས་ལགས་ཀྱིས་འཁྲབ་ཁྲིད་པ་ཡག་ཤོས་ཀྱི་བྱ་དགའ་ལེན་སྐབས། ཁོང་གིས། ལོ་ལྟར་ཧྥ་སི་གློག་བརྙན་དུས་སྟོན་སྟེང་ནས་ཧ་ཅང་འདོད་བློ་ཚིམ་པའི་གྲུབ་འབྲས་ཤིག་དང་སྤྲོ་སྣང་གིས་ཁེངས་ཀྱི་འདུག ཚང་མས་མུ་མཐུད་ནས་གློག་བརྙན་བཟོ་སྐྲུན་གྱི་ལམ་བུ་རུ་སྤྲོ་སྣང་གི་ཐོག་ནས་མདུན་སྐྱོད་བྱས་ཏེ། གློག་བརྙན་མང་དག་ཅིག་བཟོ་སྐྲུན་བྱ་རྒྱུའི་རེ་བ་ཡོད་སྐོར་འགྲེལ་བརྗོད་བྱས་ཡོད་འདུག

ཡང་གཅིག་དང་བཞི་ཡི་གློག་བརྙན་འཁྲབ་སྟོན་པ་སྦྱིན་པ་ལགས་ཀྱིས། ངས་འདི་ནས་རྒན་པདྨ་ཚེ་བརྟན་གཙོ་བོར་གྱུར་བའི་ལས་རོགས་ཡོངས་ལ་བཀྲིན་ཆེ་ཞུ། ཁྱེད་ཅག་གི་རོགས་འདེགས་མེད་ཚེ། ང་ལ་དེ་རིང་གི་གཡུར་དུ་ཟ་བའི་གྲུབ་འབྲས་ཤིག་ཐོན་ཐབས་བྲལ་བ་རེད། ང་ནི་སུས་ཀྱང་ངོ་མི་ཤེས་པའི་འཁྲབ་སྟོན་པ་ཞིག་ཡིན་ལ།  ང་ནི་གློག་བརྙན་འཁྲབ་སྟོན་པ་ཁོ་ན་ཙམ་ལས། ཆེད་ལས་རང་བཞིན་ཅན་དང་སྐད་གྲགས་ཡོད་མཁན་ཞིག་གཏན་ནས་མིན་པར། ལུག་རྫི་ཕལ་བ་ཞིག་ཡིན་པས། ཁྱེད་ཅག་གིས་ང་ལ་གློག་བརྙན་འཁྲབ་སྟོན་གྱི་གོ་སྐབས་རེ་སྟེར་ཚེ། ངས་དཀའ་ཚེགས་འཛེམས་མེད་ཀྱིས་གློག་བརྙན་འཁྲབ་སྟོན་གྱི་ལས་ལ་གཞོལ་ངེས་ཡིན། ཞེས་འགྲེལ་བརྗོད་བྱས་ཡོད་འདུག

གཅིག་དང་བཞི་ཞེས་པའི་གློག་བརྙན་དེ་ནི་བོད་ཀྱི་གློག་བརྙན་འཁྲབ་འཁྲིད་པས་ཕབ་སྐྲུན་བྱས་པའི་གློག་བརྙན་གཞན་དག་ལས། སྒྱུ་རྩལ་གསལ་སྟོན་གྱི་ནུས་པ་གཅིག་པུར་དམིགས་པ་ཙམ་མ་ཡིན་པར་གློག་བརྙན་བརྩམས་ཆོས་ཀྱི་ཕྱོགས་ཡོངས་ལ་འཕེལ་རྒྱས་ཆེན་པོ་ཕྱིན་ཡོད་པ་མ་ཟད། གློག་བརྙན་དེའི་ནང་བོད་ནས་བྱུང་བའི་ཁུངས་མེད་དང་། དོགས་གཞི་རང་བཞིན་ཅན་གྱི་དོན་རྐྱེན་ཞིག་གཏམ་རྒྱུད་ཀྱི་ལམ་ནས་བརྗོད་ཐབས་བྱས་ཡོད་དེ། ནགས་ཚལ་སྤྱི་གླིང་ཞིག་གི་ནང་དུ་གར་ཡོང་མི་ཤེས་པའི་མི་གསུམ་བསླེབས་ཡོད་པ་དང་། ནགས་ཚལ་སྤྱི་གླིང་དེའི་ལྟ་སྲུང་བ་དེའང་ཅི་ཡིན་འདི་ཡིན་མེད་པར་ཇག་པའི་ལས་ལ་ཞུགས་པའི་འཇིགས་རུང་གི་གཏམ་རྒྱུད་ཅིག་ཡིན་འདུག

གཞན་ཡང་། གཅིག་དང་བཞི་ཅེས་པའི་གློག་བརྙན་དེ་འདས་ལོའི་ཟླ ༡༠ ཚེས ༣༠ ནས་ཟླ ༡༡ ཚེས ༨ བར་ཉི་ཧོང་དུ་འཚོགས་པའི་ཊོག་ཡོའི་རྒྱལ་སྤྱིའི་གློག་བརྙན་དུས་སྟོན་ཐེངས་སོ་བཞི་པའི་( 34th  Tokyo International Film Festival ) སྟེང་དང་།  འདི་ལོའི་ཕྱི་ཟླ་ ༧ ཚེས ༡༦ ཉིན་གྱི་དགོང་མོར་ ༢༠༢༢ ལོའི་ནེའུ་ཡོག་གློག་བརྙན་དུས་སྟོན་ཐེངས་ཉི་ཤུ་པ་ ( 20th Anniversary New York Film Festival) ཐོག་ཏུའང་བསྟན་ཡོད་པ་རེད།

བོད་ཀྱི་ན་གཞོན་གློག་བརྙན་འཁྲབ་འཁྲིད་པ་འཇིགས་མེད་འཕྲིན་ལས་ལགས་ནི་བོད་ཀྱི་གློག་བརྙན་འཁྲབ་འཁྲིད་པ་གྲགས་ཅན་པདྨ་ཚེ་བརྟན་གྱི་བུ་ཡིན་ཞིང་། ཁོང་གིས་པེ་ཅིན་གློག་བརྙན་སློབ་གླིང་གི་འཁྲབ་ཁྲིད་སྡེ་ཚན་ནང་ཆེད་ལས་སློབ་སྦྱོང་བྱས།  དེ་སྔོན་ཁོང་གིས་སློབ་གྲྭའི་གུང་སེང་དང་བསྟུན་ནས་བོད་ཀྱི་གློག་བརྙན་དབུགས་ལྒང་དང་། རྒྱ་ནག་གི་གློག་བརྙན་འཁྲབ་ཁྲིད་པ་ཀོམ་ཧོའི་འཁྱག་པ་སོགས་ཀྱི་གློག་བརྙན་ཕབ་སྐྲུན་གྱི་ལས་གཞིར་མཉམ་ཞུགས་བྱས་མྱོང་ཡོད་པ་དང་། ཁོང་གིས་ ༢༠༡༧ ལོར་ཁོང་ཚོས་མཐོ་སྒང་ན་གློག་བརྙན་ལས་བཞིན་འདུག་ཅེས་པའི་དངོས་བྱུང་གློག་བརྙན་ཐུང་གྲས་ཤིག་ཕབ་སྐྲུན་བྱས་ཡོད།

གསར་འགོད་པ། དཔལ་ལྡན།