དེ་རིང་༧གོང་ས་མཆོག་གིས་༧སྐུ་ཉིད་མཆོག་འབྱུང་འགྱུར་ལོ་ཉུ་ཤུ་རྩ་གྲངས་རིང་བཞུགས་རྒྱུའི་ཞལ་བཞེས་བཟང་མོ་སྩལ་བ་དང་བསྟུན། བོད་གཞིས་བྱེས་གཉིས་ཀྱི་རྒྱ་ཆེ་མི་མང་གིས་ད་ལྟ་ནང་བཞིན་དད་པ་དང་དམ་ཚིག་གཡོ་བ་མེད་པར་སེམས་ཤུགས་སྐྱེ་དགོས་པ་དང་བོད་གཞིས་བྱེས་མི་མང་མཉམ་དུ་འཛོམས་ནས་བཀྲ་ཤིས་ལོ་ལེགས་ཀྱི་དགའ་སྟོན་བྱ་རྒྱུའི་དུས་ཚོད་ཅིག་ཡོང་རྒྱུ་ཡིན་སྐོར་གསུངས་སོང་།
དེ་རིང་སྔ་དྲོ་ཆུ་ཚོད་ ༨ སྟེང་༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་ལྕོག་ལམ་སར་རྟེན་གཞི་བྱས་པའི་ལ་དྭགས་བོད་ཁྱིམ་དུ་ཆིབས་སྒྱུར་བཀའ་དྲིན་བསྐྱངས་གནང་མཛད་དེ་ལ་དྭགས་བྱང་ཐང་གི་བོད་རིགས་འབྲོག་མི་རྣམས་དང་ལ་དྭགས་བསོད་ནམས་གླིང་གི་ཁོངས་གཏོགས་གཞིས་གྲོང་བཅུ་གཉིས་བཅས་ཀྱི་མང་ཚོགས་བཞི་སྟོང་ལྷག་ལ་བཀའ་སློབ་སྩལ་གནང་བ་མ་ཟད། སྐབས་དེར་༧མགོན་པོ་གང་ཉིད་མཆོག་འབྱུང་འགྱུར་ལོ་ཉུ་ཤུ་རྩ་གྲངས་རིང་བཞུགས་རྒྱུའི་ཞལ་བཞེས་བཟང་མོ་སྩལ་བ་དང་བསྟུན། བོད་ཕྱི་ནང་གཉིས་ཀྱི་རྒྱ་ཆེ་མི་མང་གིས་ད་ལྟ་ནང་བཞིན་དད་པ་དང་དམ་ཚིག་གཡོ་བ་མེད་པར་སེམས་ཤུགས་སྐྱེ་དགོས་པ་དང་བོད་གཞིས་བྱེས་མི་མང་མཉམ་དུ་འཛོམས་ནས་བཀྲ་ཤིས་ལོ་ལེགས་ཀྱི་དགའ་སྟོན་བྱ་རྒྱུའི་དུས་ཚོད་ཅིག་ཡོང་རྒྱུ་ཡིན་སྐོར་གསུངས་སོང་།
སྐབས་དེར་༧གོང་ས་མཆོག་གིས། དེ་རིང་འདི་ག་ས་གནས་ཀྱི་སློབ་ཕྲུག་དང་རྒན་གཞོན་ཕོ་མོ་མང་པོ་ཞིག་ཆེད་མངགས་སླེབས་ཡོད་པ་རེད། ལྷག་པར་དུ་བྱང་ཐང་བོད་མི་མང་པོ་ཞིག་དེ་རིང་འདིར་ཆེད་མངགས་སླེབས་པ་རེད། ཕྱི་ལོ་ ༡༩༥༩ ལོར་ཐོག་མའི་རྐྱེན་ནི་བཅིངས་གྲོལ་དམག་སྒར་གྱིས་ཟློས་གར་ཚོགས་པ་གསར་པ་ཞིག་བསླེབས་ཡོད་ཟེར་བའི་རྐྱེན་དང་པོ་དེ་རེད། ངོས་ནས་དེ་ག་རང་འགྲིག་གི་རེད་ལབ་ནས་འགྲོ་རྒྱུ་གཏན་འཁེལ་བྱས་པ་ཡིན། དེ་དུས་ཕ་གི་རྒྱ་མིའི་ལས་ཁུངས་ནས་༧ཏཱ་ལའི་བླ་མ་གཅིག་པོ་མ་གཏོགས་སྐུ་སྲུང་དམག་མི་ཡོང་ན་འགྲིག་གི་མ་རེད། བོད་པའི་དམག་མིའི་ཚོར་གོ་ལག་ཅིག་ཡོད་པ་དེ་འཁྱེར་ཡོང་ན་འགྲིག་གི་མེད་པ་དེ་འདྲ་བཤད་པ་རེད། དེ་དུས་ཧོབ་ཏུ་སྒང་ལ་༧རྒྱལ་བ་རིན་པོ་ཆེ་བཅིངས་གྲོལ་དམག་སྒར་ལ་ཕེབས་རྒྱུ་ཡིན་པའི་སྐད་ཆ་གོ་བ་དང་ལྷ་སའི་མི་མང་གིས་འུར་བརྒྱབ་སྟེ་མར་ནོར་བུ་གླིང་ཁར་ཡོང་བ་རེད། ངོས་རང་ནོར་བུ་གླིང་ཁ་ནས་ཕྱིན་ན་འགྲིག་གི་མ་རེད་ཅེས་ཞེ་དྲགས་འུར་བརྒྱབ་སོང་། བོད་པ་ཚོས་རྒྱ་མི་ལ་ཡིད་ཆེས་དང་རེ་འདུན་ཁྱོན་ནས་བྱེད་ཀྱི་མེད་པ་རེད། ཕལ་ཆེར་མི་ཁྲི་གཅིག་གཉིས་ཤིག་ཡོད་པ་འདྲ། ནོར་བུ་གླིང་ཁར་འུར་བསྐྱོན་ནས་ཡོང་བ་རེད། ད་ལན་ཙམ་མ་ཡིན་པར་མ་འོངས་པར་ཡང་ངོས་རྒྱ་མིའི་དམག་སྒར་ལ་མ་འགྲོ་རོགས་ཞེས་འབོད་སྐུལ་ཞེ་དྲགས་བྱས་སོང་།
དེ་དང་ཆབས་ཅིག་ཏུ་ལྷ་སའི་བཅིངས་གྲོལ་དམག་སྒར་ཁོངས་ནས་ངོས་ལ་ལན་ཞིག་འབྱོར་ཏེ། བོད་པ་ཚོས་ཟིང་ངེ་ཟིང་ངུ་བྱེད་ཀྱི་ཡོད་དུས། ང་ཚོས་དྲག་གནོན་བྱེད་ཀྱི་ཡིན། ༧རྒྱལ་བ་རིན་པོ་ཆེ་ནོར་བུ་གླིང་ཁར་བཞུགས་སའི་ཕོ་བྲང་དེར་རྟགས་བརྒྱག་རོགས། དེ་ལ་ང་ཚོས་དོ་ཕོག་མ་འགྲོ་བ་ཞིག་བྱེད་ཀྱི་ཡིན་ཟེར་གྱི་འདུག དེ་ལ་གོ་བ་ག་འདྲ་བླངས་ན་ལེན་རྒྱུ་འདུག ངོས་རང་སྡོད་ས་དེ་ཤེས་པ་ཡིན་ན། དེ་ལ་མེ་ཤུགས་འཕུར་མདེལ་དང་མེ་སྒྱོགས་གཞུ་རྒྱུའི་འཆར་གཞི་ཡོད་བསྡད་པ་ཞིག་རེད། དེའི་རྟགས་མཚན་གཅིག་ནི་རྗེས་སུ་བྲོས་བྱོལ་ལ་ཡོང་མཁན་ནོར་བུ་གླིང་ཁའི་སྐོར་སྲུང་དམག་མི་ཁག་ཅིག་གིས། ངོས་རང་སྡོད་སའི་ནོར་བུ་གླིང་ཁའི་ཕོ་བྲང་གསར་བའི་སྟེང་དུ། བགད་ཐོར་དུ་མ་ཕྱིན་པའི་རྒྱ་མིའི་མེ་ཤུགས་འབར་མདེལ་ཁ་ཤས་ཤིག་འདུག་ལབ་བྱུང་། དེར་བརྟེན་ངོས་སྡོད་སའི་ཕོ་བྲང་ལ་རྟགས་བརྒྱག་རོགས་ཟེར་བར་གོ་བ་གཉིས་འདུག ཆེད་མངགས་དེ་ལ་དམིགས་ནས་མེ་ཤུགས་འབར་མདེལ་འཕང་རྒྱུ་དང་གཡོ་རྒྱུ་ཡིན་གང་ཡིན་ཚོད་མི་ཐིག་པ་ཞིག་འདུག ཕྱོགས་མང་པོ་ཞིག་ནས་བལྟས་ཡོང་དུས་གནས་ཚུལ་ཡག་པོ་ཁྱོན་ནས་མི་འདུག མ་གཞི་ནས་ལྷ་དང་བླ་མ་ལ་མོ་འཆར་ཅན་རྒྱག་གི་ཡོད་པ་རེད། དེ་འདྲ་བྱས་ནས་ནོར་བུ་གླིང་ཁ་ནས་ཐོན་ཤིག་ཟེར་ནས་གཟའ་ཟླ་ལ་བབས་པ་རེད། དེ་ནས་སེམས་ཐག་བཅད་དེ་དགོང་མོའི་ཆུ་ཚོད་ ༡༠ སྟེང་ནོར་བུ་གླིང་ཁ་ནས་ཐོན་ཡོང་ཁར། ནོར་བུ་གླིང་ཁའི་རྟེན་གཙོ་བོ་མགོན་ཁང་དུ་ཕྱིན་ནས་གྱེས་ཕྱག་ཕུལ་རྗེས་ཐོན་ཡོང་བ་ཡིན། དེ་དུས་ང་ཚོའི་བསམ་བློའི་ནང་མ་འོངས་པར་ག་འདྲ་ཞིག་ཡོང་ངམ་སྙམ་པ་མ་གཏོགས་ཚོད་ཐིག་པོ་གང་ཡང་ཡོད་པ་མ་རེད།
དེ་ནས་རྒྱ་གར་ལ་ཁ་གཏད་ནས་ཐོག་མར་འབྲུག་ལ་འགྲོ་དགོས་སམ་ཡང་ན་རྒྱ་གར་ལ་འགྲོ་དགོས་ཡོད་དམ་བསམ་བསྡད་ཡོད་དུས། རྒྱ་གར་གྱི་ལན་འབྱོར་ཏེ་དགའ་བསུ་ཡོད་ཟེར་གྱི་འདུག རྒྱ་གར་གྱི་ས་མཚམས་ལ་འབྱོར་བ་དང་ངོས་ཀྱི་གྲོགས་པོ་རྙིང་པ་ཚོ་འཛུམ་ཤིག་ཤིག་བསྡད་འདུག དེ་ནས་དགའ་པོ་ཞེ་དྲགས་བྱུང་། རྒྱ་གར་ལ་འབྱོར་ནས་དུས་ད་ལྟའི་བར་དུ་རྒྱ་གར་གཞུང་གི་སྐུ་མགྲོན་བྱས་ནས་བསྡད་ཡོད། ཁ་ཐུག་དེར་ཐན་ཀོན་སན་དང་ཁོ་ཚོའི་གྲས་དེ་སེམས་པ་མཁྲེགས་པོ་དང་ནག་པོ་ཅུང་ཙམ་ཡོད་པ་རེད། ཁོ་ཚོའི་བསམ་ཐོག་ཏུ་ཡོང་སོང་བ་རེད་དེ། ངོས་རང་རྒྱ་གར་ལ་འབྱོར་བ་ནས་མིང་སྐྱབས་བཅོལ་བ་ཡིན་པ་དང་དོན་དུ་སྐུ་མགྲོན་བྱས་ནས་བསྡད་ཡོད་པ་རེད། དེ་ནས་ནོར་བུ་གླིང་ཁ་ནས་མ་འཐོན་པའི་གོང་དེར་ང་ཚོས་རྐང་གསོལ་བཏང་བ་སོགས་ཞེ་དྲགས་བྱས་པ་ཡིན། དགོང་དག་ཅིག་རྨི་ལམ་ལའང་། གང་ཚེ་ཐེག་པ་མཆོག་ལ་ཆོས་སྤྱོད་བཅུས།། ཚུལ་བཞིན་སྒྲུབ་ལ་བརྩོན་པ་དེ་ཡི་ཚེ།། མཐུ་ལྡན་རྣམས་ཀྱིས་རྟག་ཏུ་གྲོགས་བྱེད་ཅིང་།། བཀྲ་ཤིས་རྒྱལ་མཚོས་ཕྱོགས་ཀུན་ཁྱབ་གྱུར་ཅིག །ཅེས་པའི་ཚིག་བཅད་དེ་ངོས་ཀྱི་མདུན་དུ་མཁན་པོ་ཁག་ཅིག་གིས་སྐྱོར་གྱི་འདུག དེ་ནས་ཉིན་མ་གཅིག་གཉིས་ཀྱི་ནང་ནས་ངོས་རང་ནོར་བུ་གླིང་ཁ་ནས་ཐོན་ཡོང་བ་ཡིན། ཕྱི་ལོ་ ༡༩༥༦ ནས་ངོས་རང་རྒྱ་གར་གྱི་དཔོན་རིགས་ཚོ་དང་ངོ་ཤེས་ཆགས་བསྡད་ཡོད། ཕྱི་ལོ་ ༡༩༥༩ ལོར་རྒྱ་གར་ནང་ཡོང་དུས། རྒྱ་གར་གཞུང་གིས་དགའ་བསུ་གཟབ་རྒྱས་གནང་སྟེ་མི་ཚེ་གསར་པ་ཞིག་དབུ་ཚུགས་པ་རེད། རྒྱ་གར་ལ་བསླེབས་ནས་དངོས་གནས་དྲང་གནས་བཀྲ་ཤིས་རྒྱ་མཚོ་མཆོག་གི་ཁྱབ་གྱུར་ཅིག་ཅེས་གསུངས་པ་ལྟར། ངོས་རང་རྒྱ་གར་ལ་བསྡད་ནས་ཁ་ཡོད་ལག་ཡོད་ཀྱིས་རྒྱལ་སྤྱིའི་སྒང་བོད་དོན་ལ་དོ་སྣང་བྱེད་མཁན་དང་། གཉིས་ནས་ལྟ་སྒོམ་སྤྱོད་གསུམ་གང་གི་ཆ་ནས་བོད་ཀྱི་དཔལ་ནཱ་ལེནྡཱའི་ཆོས་བརྒྱུད་ཟབ་མོ་ཡོད་བསྡད་པ་དེ་འཛམ་གླིང་འདིའི་སྒང་གསལ་བོ་ཆགས་པ་དང་མི་མང་པོས་དགའ་བོ་བྱེད་ཡུལ་ཞིག་བྱུང་བ་རེད།
དེར་བརྟེན། ཕྱི་ལོ་ ༡༩༥༩ ལོར་ཐན་ཀོན་སན་ཁོ་ཚོ་དྲག་གནོན་བྱེད་མཁན་ཚོའི་བློ་ཡུལ་ལས་འདས་པ་ཞིག་ལ། ད་ཆ་ང་ཚོ་བཙན་བྱོལ་དུ་གཞིས་ཆགས་ཏེ། བོད་ཀྱི་སངས་རྒྱས་ཀྱི་བསྟན་པ་ཉམས་པ་གསོ་བཅོས་དང་མི་ཉམས་གོང་སྤེལ་སོགས་ཀྱི་ཐོག་ནས་འཛམ་གླིང་འདིའི་སྒང་སངས་རྒྱས་ཀྱི་བསྟན་པར་དོ་སྣང་གསར་པ་ཆགས་པ་འདི་བྱུང་བ་རེད། ཕྱོགས་གཅིག་ནས་བསམ་བློ་གཏང་ན་རྐྱེན་ངན་གྲོགས་ལ་ཤར་བ་ཞིག་རེད། ང་ཚོ་ལྷ་སར་བསྡད་ཡོད་ཚེ་ན་ཟུག་གཏང་རྒྱུ་མ་གཏོགས་གང་ཡང་མེད་པ་རེད། ང་ཚོ་ཐག་སེ་ནོར་བུ་གླིང་ཁ་ནས་ཐོན་ཏེ་རྒྱ་གར་ལ་བསླེབས་པ་དང་། ད་འཛམ་གླིང་འདིའི་སྒང་། བསྟན་པ་རིན་ཆེན་མཆོག་གི་མ་ཁྱབ་པའམ།། ཁྱབ་ཀྱང་ཉམས་པར་གྱུར་བའི་ཕྱོགས་དེ་ནི།། སྙིང་རྗེ་ཆེན་པོའི་ཡིད་རབས་བསྐྱེད་པ་ཡི།། ཕན་བདེ་གཏེར་དུ་གསལ་བར་བྱེད་པར་ཤོག ། ཅེས་གསུངས་པའི་དོན་དག་དེ་ངོས་ནས་ལག་ལེན་བསྟར་གྱི་ཡོད།
ལ་དྭགས་གཙོ་བྱས་པའི་ཧི་མ་ལ་ཡའི་རི་རྒྱུད་དག་ལ་བོད་གངས་ཅན་གྱི་ལྗོངས་ཀྱི་སངས་རྒྱས་ཀྱི་བསྟན་པ་དེ་སྔ་ནས་ཡོད་ཡོད་པ་ཆགས་ཏེ། ཁྱབ་ཀྱང་ཉམས་པར་གྱུར་བའི་གནས་ཤིག་ཆགས་བསྡད་ཡོད་པ་རེད། ནུབ་ཕྱོགས་ཡུལ་གྲུ་གཙོས་པའི་མང་པོ་ཞིག་ལ་བསྟན་པ་རིན་ཆེན་མཆོག་གི་མ་ཁྱབ་པའི་གནས་རེད། བསྟན་པ་རིན་ཆེན་མཆོག་གི་མ་ཁྱབ་པའམ།། ཁྱབ་ཀྱང་ཉམས་པར་གྱུར་བའི་ཕྱོགས་དེ་ནི།། སྙིང་རྗེ་ཆེན་པོའི་ཡིད་རབས་བསྐྱེད་པ་ཡི།། ཕན་བདེ་གཏེར་དུ་གསལ་བར་བྱེད་པར་ཤོག ། ཅེས་ཐུགས་སྨོན་གནང་བ་ནང་བཞིན་འདས་པའི་ལོ་བཅུ་ཕྲག་འགའ་ཤས་ཕྱིན་པ་རེད། ད་ལྟའི་སྐབས་སུ་བོད་གངས་ཅན་གྱི་ལྗོངས་ཀྱི་གཙོ་བོ་རྒྱ་ཆེ་མི་མང་གི་ལྷག་བསམ་དང་དད་པ་གཡོ་བ་མེད་པར་བརྟན་པོ་བྱས་ནས་བསྡད་འདུག དད་པ་དང་འདུན་པ་གཡོ་བ་མེད་པར་ཆིག་སྒྲིལ་བྱས་ནས་བསྡད་པ་དེ་ཁོ་ནའི་ཐོག་ནས་ནུས་པ་ཞིག་ཐོན་ཡོང་གི་ཡོད། རྒྱ་མི་གུང་ཁྲན་གྱི་ནང་ལ་རྩུབ་པོ་བྱེད་མཁན་གྱི་རིགས་གཅིག་ཡོད་པ་དང་། ཁོ་ཚོས་རྩུབ་སྤྱོད་མཐར་ཐུག་པ་བྱས་ཡོད་པ་རེད་དེ། བོད་རྒྱ་ཆེ་མི་མང་གི་ལྷག་བསམ་དང་དད་པ་འགུལ་བསྐྱོད་ཐེབས་མེད། དངོས་གནས་དྲང་གནས་ཧ་ལས་པའི་བརྟན་པོ་བྱས་ནས་བསྡད་པ་རེད་ད། ཁྱེད་རང་ཚོ་འདིར་བྱང་ཐང་ནས་བསླེབས་བསྡད་པ་ཚོས་གང་ལ་གང་འཚམ་ཤེས་ཀྱི་རེད། བོད་རྒྱ་ཆེ་མི་མང་གིས་༧རྒྱལ་བ་བསྟན་འཛིན་རྒྱ་མཚོ་ལབ་དུས་དད་པ་དང་འདུན་པ་ཞེ་དྲགས་རྩེ་གཅིག་ཏུ་ཡོད་པ་ཞིག་རེད་འདུག དེ་འདྲ་ཡིན་དུས། ང་ཚོ་འདིར་བཙན་བྱོལ་བ་བྱས་ནས་བསྡད་ཡོད་པ་རེད་དེ། བོད་པའི་ཆོས་དང་རིག་གཞུང་གི་ཚོར་བ་དེ་ཧི་མ་ལ་ཡའི་རི་རྒྱུད་ལ་སྔར་ནས་ང་ཚོ་རིག་གཞུང་གཅིག་པ་ཡིན་པའི་ཆ་ནས་ཡོད་པ་དང་། བྱང་ཐང་ནས་ཡོང་མཁན་ཁྱེད་རང་ཚོས་ཤེས་ཀྱི་རེད། བོད་ཆོལ་ཁ་གསུམ་གྱི་རྒྱ་ཆེ་མི་མང་གི་སེམས་ཤུགས་གཡོ་བ་མེད་པར་བསྡད་ཡོད། དེའི་རྐྱེན་གྱིས་རྒྱ་ནག་གི་མགོ་ཁྲིད་ཚོར་བསམ་བློ་གསར་པ་ཞིག་ཡོང་གི་ཡོད། ངོས་ལ་རྒྱ་མིས་དམག་གི་ཐོག་ནས་བོད་དབང་བ་རེད་དེ། རིམ་བཞིན་དུས་ཀྱི་འགྱུར་བ་དང་བདེན་པའི་མཐའ་ལ་གསལ་ཡོང་དུས། བོད་ཀྱི་ཆོས་དང་རིག་གཞུང་གིས་རྒྱ་ནག་མར་དབང་གི་རེད་ཅེས་ངོས་ལ་བོད་པའི་ཤེས་ཡོན་པ་ཁ་ཤས་བཤད་མཁན་བྱུང་། དེ་གང་འཚམ་བདེན་པའི་ཡིན་པ་འདྲ་པོ་འདུག
དེ་རིང་ཁ་སང་རྒྱ་ནག་ནང་ནང་པའི་ཆོས་ལ་དོ་སྣང་བྱེད་མཁན་ཇེ་མང་དུ་འགྲོ་ཡི་འདུག ད་རིམ་པས་ལོ་ཁ་ཤས་ནང་ལ་འགྱུར་བ་ཆེན་པོ་ཡོང་བའི་བཟོ་འདུག ངོས་རང་བཙན་བྱོལ་བ་བྱས་ནས་རྒྱ་གར་ནང་བསྡད་པའི་རིང་ལ་འཛམ་གླིང་ནང་དེ་སྔ་བོད་ཀྱི་སངས་རྒྱས་པའི་ཆོས་ལ་རྒྱུས་མངའ་ཁྱོན་ནས་མེད་པ་དེ་འདྲའི་ནང་དུའང་དོ་སྣང་གསར་པ་ཞིག་བསླེབས་ཡོད། ལྷག་པར་དུ་ཚན་རིག་པའི་ནང་ནས་ཁོན་ཊོམ་དངོས་ཁམས་(Quantum Physics)ཚན་པའི་དོ་སྣང་གསར་པ་ཞིག་ཀྱང་བསླེབ་ཀྱི་ཡོད། ནུབ་ཕྱོགས་ཀྱི་ཚན་རིག་པ་དང་སེམས་ཁམས་རིག་པ་བ་ཚོར་སེམས་ཁམས་རིག་པའི་སྐོར་དེ་གཞི་ནས་གསར་པ་རེད་མ་གཏོགས་གང་ཡང་མེད། སྤྱིར་རྒྱ་གར་གྱི་དཔལ་ནཱ་ལེནྡཱའི་ཆོས་བརྒྱུད་དེ་བར་སྐབས་རྒྱ་གར་ནང་ཉམས་བསྡད་ཡོད་པ་རེད་དེ། བོད་གངས་ཅན་གྱི་ལྗོངས་ལ་རྒྱ་གར་གནའ་རབས་ཀྱི་རིག་གཞུང་དེ་དག་བརྟན་པོ་བྱས་ནས་བཟུང་བསྡད་ཡོད་པ་རེད། དེ་འདྲ་ཡིན་དུས། ནུབ་ཕྱོགས་པའི་སེམས་ཁམས་རིག་པའི་ཚན་རིག་པ་མང་པོས་དོ་སྣང་བྱེད་ཀྱི་ཡོད།
བསྟན་པ་རིན་ཆེན་མཆོག་གི་མ་ཁྱབ་པའམ།། ཁྱབ་ཀྱང་ཉམས་པར་གྱུར་བའི་ཕྱོགས་དེ་ནི།། སྙིང་རྗེ་ཆེན་པོའི་ཡིད་རབས་བསྐྱེད་པ་ཡི།། ཕན་བདེ་གཏེར་དུ་གསལ་བར་བྱེད་པར་ཤོག ། ཅེས་གསུངས་པ་དེས། གཙོ་བོ་སེམས་ཅན་ལ་ཕན་སེམས་རང་གི་ཐོག་ནས་བསམ་བློ་གཏང་གི་ཡོད། དེ་དང་ཆབས་ཅིག་ཏུ། བོད་དོན་བདེན་མཐའ་ཇེ་གསལ་ཇེ་གསལ་དུ་འགྲོ་བཞིན་པ་ཞིག་ཡོང་གི་འདུག ང་ཚོ་བཙན་བྱོལ་བ་ཆགས་ནས་འདི་ལ་ཚུར་ལུས་པ་དག་གིས་དགོས་དོན་གང་ལ་གང་འཚམ་འགྲུབ་བསྡད་ཡོད་པ་རེད། དེ་ནས་གཙོ་ཆེར་བོད་རྒྱ་ཆེ་མི་མང་གི་ལྷག་བསམ་དང་སྙིང་སྟོབས་ཞུམ་པ་མེད་པར་ངོས་ལ་ཡིད་ཆེས་རྩེ་གཅིག་བྱས་ཏེ། ང་རང་ཚོར་གོང་བུ་གཅིག་གྱུར་གྱི་ནུས་པ་ཡག་ཐག་ཆོད་ཡོད་པ་རེད། དེར་བརྟེན་ཚང་མ་ལ་ཐུགས་རྗེ་ཞུ་རྒྱུ་ཡིན། ད་ལྟ་བར་དུ་ཚང་མས་ལྷག་བསམ་རྡོག་རྩ་གཅིག་སྒྲིལ་བྱས་ནས་བསྡད་པ་རེད། ངོས་ད་དུང་ཡང་ཕལ་ཆེར་ལོ་ཉུ་ཤུ་རྩ་གྲངས་གཏན་གཏན་སྡོད་ཀྱི་རེད། དེའི་རིང་ལ་ཁྱེད་རང་ཚོ་ཚང་མས་སྔར་བཞིན་དུ་སེམས་ཤུགས་སྐྱེས་ཏེ། བོད་རྒྱ་ཆེ་མི་མང་ཚང་མ་དད་པ་དང་དམ་ཚིག་གཡོ་བ་མེད་པར་ད་ལྟ་ནང་བཞིན་བཞུགས་ཨ། འཛམ་གླིང་ལ་འགྱུར་བ་གཏན་གཏན་འགྲོ་ཡི་རེད། ང་ཚོ་བོད་གཞིས་བྱེས་མི་མང་མཉམ་དུ་འཛོམས་ནས་བཀྲ་ཤིས་ལོ་ལེགས་ཀྱི་དགའ་སྟོན་བྱ་རྒྱུའི་དུས་ཚོད་ཅིག་ཕལ་ཆེ་ཡོང་གི་རེད། ཅེས་གསུངས།
གསར་འགོད་པ་སྐལ་བཟང་སྦྱིན་པས་ལ་དྭགས་ལྕོག་ལམ་སར་ཞི་བའི་ཚལ་ཕོ་བྲང་གི་ཉེ་འགྲམ་ནས་སྤེལ།
