༧གོང་ས་རྒྱལ་བ་རིན་པོ་མཆོག་ནས་ཉེ་ལམ་ཧི་མ་ཅལ་མངའ་སྡེ་རུ་ཆར་ཞོད་ཀྱི་རྐྱེན་གྱིས་ཆུ་ལོག་དང་རི་ཉིལ་གྱི་གནོད་འཚེ་ཕོག་མཁན་ཡོངས་ལ་ཐུགས་གསོའི་གསུང་འཕྲིན་སྩལ་འདུག
ཟླ་འདིའི་ཕྱི་ཚེས ༢༠ ཉིན་རྒྱ་གར་བྱང་ཕྱོགས་ཧི་མ་ཅལ་མངའ་སྡེའི་ནང་ཆར་ཞོད་ཀྱི་རྐྱེན་གྱིས་ས་རུད་དང་ཆུ་ལོག་གི་གནོད་འཚེ་བྱུང་སྟེ། མི་གྲངས་ ༢༢ འདས་གྲོངས་སུ་ཕྱིན་ཡོད་སྟབས། དེ་རིང་༧གོང་ས་རྒྱལ་བ་རིན་པོ་མཆོག་ནས་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་རྗེ་རམ་ཐ་གོར་མཆོག་གི་མཚན་ཐོག་ཏུ། ས་རུད་དང་ཆུ་ལོག་རྒྱུག་ནས་གནོད་འཚེ་ཐེབས་པ་དང་རྐྱེན་འདས་སུ་གྱུར་བའི་ཤུལ་ལུས་ནང་མི་ཡོངས་ལ་ཐུགས་གསོ་དང་འདས་པོ་རྣམས་ལ་བསྔོ་སྨོན་གསུང་འཕྲིན་སྩལ་ཡོད་འདུག
དེ་ཡང་༧གོང་ས་རྒྱལ་བ་རིན་པོ་ཆེ་མཆོག་གིས་ཐུགས་གསོའི་གསུང་འཕྲིན་ནང་། ངོས་ནས་རྐྱེན་འདས་སུ་འགྱུར་མཁན་གྱི་ནང་མི་དང་གནོད་འཚེ་ཕོག་མཁན་ཡོངས་ལ་སེམས་གསོ་བྱེད་ཀྱི་ཡོད་པ་མ་ཟད། ངོས་ནས་ཁོང་ཅག་ལ་སྨོན་ལམ་རྒྱག་གི་ཡོད། ཧི་མ་ཅལ་མངའ་སྡེ་གཞུང་དང་ཚོགས་སྡེ་ཁག་གིས་གནོད་འཚེ་ཕོག་པའི་མི་མང་རྣམས་ལ་ངལ་སེལ་རོགས་རམ་གནང་བར་བསྔགས་བརྗོད་བྱེད་ཀྱི་ཡོད། ཅེས་གསུངས་འདུག
ཡང་མགོན་པོ་མཆོག་གིས། ཁྱེད་རྣམས་ཀྱིས་ཤེས་གསལ་བཞིན་ངོས་ཀྱི་མི་ལོ་དྲུག་ཅུ་ལྷག་གི་ཁྱིམ་གཞིས་སུ་གྱུར་བའི་ཧི་མ་ཅལ་མངའ་སྡེའི་མི་མང་ལ་དམིགས་བསལ་གྱི་མཛའ་བརྩེ་ཟབ་མོ་ཡོད་པས། ངོས་ནས་ཧི་མ་ཅལ་མངའ་སྡེའི་གྲོགས་པོ་གྲོགས་མོ་དང་ཁྱིམ་མཚེས་ཡོངས་ལ་གདུང་སེམས་མཉམ་སྐྱེད་མཚོན་སླད། ཏཱ་ལའི་བླ་མའི་ཐེབས་རྩ་ནས་ངལ་སེལ་དང་རོགས་རམ་གྱི་ཞལ་འདེབས་ཤིག་དབུལ་རྒྱུ་ཡིན། ཞེས་གསུངས་འདུག
ཟླ་འདིའི་ཕྱི་ཚེས་ ༢༠ ཉིན་ཧི་མ་ཅལ་མངའ་སྡེ་གཅིག་པུའི་ནང་ས་རུད་དང་ཆུ་ལོག་གི་རྐྱེན་པས་གཞུང་ལམ་ ༩༦ འགགས་ཏེ། མི་གྲངས་ ༢༢ རྐྱེན་འདས་སུ་ཕྱིན་པ་དང་མི་གྲངས་ ༦ གར་སོང་ཆ་མེད་དུ་གྱུར། མི་གྲངས་ ༡༠ ལ་རྨས་སྐྱོན་ཕོག་ནས་ད་ལྟ་སྨན་བཅོས་བྱེད་མུས་ཡིན་འདུག་ལ། དེ་བཞིན་ཧི་མ་ཅལ་མངའ་སྡེའི་ཀང་རཱ་རྫོང་དང་། སོ་ལན། མན་ཌི། ཅམ་བྷ་རྫོང་སོགས་སུ་དྲག་ཆར་ཡུན་རིང་བབས་པའི་རྐྱེན་གྱིས། ས་རུད་པ་དང་། ཆུ་ལོག་རྒྱུག་པ། གཞུང་ལམ་འགག་པ་སོགས་ཀྱི་དོན་རྐྱེན་མང་པོ་ཞིག་འབྱུང་མུས་ཡིན་འདུག་ལ། རྒྱ་གར་གྱི་གནམ་གཤིས་ལྟ་ཞིབ་ཁང་ཁག་གིས་ཟླ་འདིའི་ཕྱི་ཚེས་ ༢༥ བར་ཧི་མ་ཅལ་མངའ་སྡེར་ཆར་ཞོད་དྲག་པོ་འབབ་རྒྱུ་ཡིན་པའི་ཉེན་བརྡའང་བཏང་ཡོད་འདུག
གསར་འགོད་པ། དཔལ་ལྡན།
