རྒྱ་ནག་གཞུང་གིས་བོད་ནག་ཆུ་རྫོང་གསེར་རྙེད་ནས་ཡིན་པའི་ཀརྨ་བསམ་འགྲུབ་ཞེས་པ་ཞིག་ལ་ཁ་བྲལ་རིང་ལུགས་པར་ངན་འབྲེལ་བྱས་པའི་ཉེས་མིང་གཡོགས་ཏེ་འཛིན་བཟུང་བྱས་ཡོད་འདུག
ཉེ་ལམ་ནས་རྒྱ་ནག་གཞུང་གིས་བོད་ཡུལ་གང་སར་ཉིན་བརྒྱ་ཡི་རྡུང་རྡེག་ཚ་གནོན་གཏོང་བའི་ལས་འགུལ་ཟེར་བ་ཞིག་ཚ་ཚ་འུར་འུར་གྱིས་སྤེལ་ཏེ། བོད་མི་མང་པོར་གང་བྱུང་འདྲི་རྩད་རྡུང་རྡེག་དང་འཛིན་བཟུང་བཙོན་འཇུག་བྱེད་བཞིན་ཡོད་པའི་གནས་ཚུལ་བསྟུད་མར་ཐོན་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༡༢ ཉིན་བོད་ནག་ཆུ་རྫོང་གསེར་རྙེད་ནས་ཡིན་པའི་བོད་མི་ཀརྨ་བསམ་འགྲུབ་ཞེས་པ་ཞིག་འཛིན་བཟུང་བྱས་ཡོད་པ་དང་། ད་ལྟའི་ཆར་ཁོང་གི་གནས་སྟངས་གསལ་ཆ་གང་ཡང་གོ་ཐོས་མེད་པར་གྱུར་ཡོད་སྟབས། ནང་མི་ཚོས་ཁོང་ལ་སེམས་ཁྲལ་ཆེན་པོ་བྱེད་བཞིན་ཡོད་འདུག
འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས། རྒྱ་གཞུང་ཉེན་རྟོག་པས་ཞིབ་བཤེར་སོགས་བྱས་པ་བརྒྱུད། བོད་མི་ཀརྨ་བསམ་འགྲུབ་ལགས་ཀྱིས་རླངས་འཁོར་ནང་དུ་༧གོང་ས་རྒྱལ་བ་རིན་པོ་མཆོག་གི་སྐུ་པར་བཤམས་ཡོད་པ་དང་། ཁོ་རང་གི་སྐེ་རུའང་༧གོང་ས་རྒྱལ་བ་རིན་པོ་མཆོག་གི་སྐུ་པར་བཏགས་སྟེ། ཁ་བྲལ་རིང་ལུགས་པར་ངན་འབྲེལ་བྱས་ཡོད་ཚུལ་གྱི་ཉེས་མིང་འོག་འཛིན་བཟུང་བྱས་ཡོད་པ་མ་ཟད། ཁོང་གི་རླངས་འཁོར་དང་སྐེ་རུ་ཡོད་པའི་སྐུ་པར་སོགས་བཙན་འཕྲོག་བྱས་ཡོད་སྐོར་དང་། ད་ལྟའི་ཆར་བོད་ཀྱི་རྒྱལ་ས་ལྷ་ས་སོགས་སུ་ཏོག་དབྱིབས་རིམས་ནད་བཀག་སྡོམ་ཆེ་བའི་རྐྱེན་སོགས་ཀྱིས། ཁོང་གི་ད་ལྟའི་གནས་སྟངས་གང་ཡང་གོ་ཐོས་བྱུང་མེད་པར་གྱུར་ཡོད་སྐོར་བརྗོད་བྱུང་།
ཉིན་བརྒྱའི་རྡུང་རྡེག་ཚ་ནན་གཏོང་བའི་འགུལ་སྐྱོད་དམ། ཉིན་བརྒྱའི་ལས་འགུལ་ཞེས་པའི་བཙན་གནོན་གཅར་རྡུང་གཏོང་བའི་བྱ་འགུལ་དེ་ནི་བོད་ཁུལ་དུ་སྔོན་མ་ནས་ལག་བསྟར་བྱེད་བཞིན་པའི་ལས་འགུལ་ཞིག་ཡིན་ལ། འདི་ལོའི་ཕྱི་ཟླ་ ༦ ཚེས་ ༢༥ ཉིན་རྒྱ་ནག་རྒྱལ་ཡོངས་ཉེན་རྟོག་ཚན་པས་”དབྱར་དུས་ཀྱི་བདེ་འཇགས་བཅོས་སྐྱོང་རྡུང་རྡེག་གི་ཉིན་བརྒྱའི་བྱ་སྤྱོད“སྤེལ་དགོས་ལུགས་བཤད་ནས། བོད་མི་རྣམས་གང་བྱུང་འཛིན་བཟུང་དང་བཀག་ཉར་བྱེད་ཀྱི་ཡོད་པ་ལྟར། ཟླ་འདིའི་ཟླ་མགོར་བོད་རང་སྐྱོང་ལྗོངས་ཟེར་བའི་ཁོངས་ནས་རྒྱུ་མཚན་ཅི་ཡིན་གསལ་ཁ་མེད་པར་བོད་མི་ ༦ བཙན་འཁྲིད་བྱས་ཏེ། ད་ལྟའང་བཀར་ཉར་འོག་ཏུ་ཡོད་པ་རེད་འདུག
བོད་མི་ཀརྨ་བསམ་འགྲུབ་ལགས་ནི་བོད་ནག་ཆུ་རྫོང་གསེར་རྙེད་ནས་ཡིན་ཞིང་། ཁྱིམ་དུ་ཨ་མ་དང་སྲིང་མོ་གཅིག་ལས་མེད་འདུག
གསར་འགོད་པ། དཔལ་ལྡན།
