བོད་ལྕགས་ཟམ་རྫོང་གི་གྲོང་ཚོ་གསུམ་གཙོ་བོར་གྱུར་བའི་དར་རྩེ་མདོ་སོགས་སུ་ཚད་རིམ་མཐོ་ཤོས་ ༦.༨ ཅན་གྱི་ས་ཡོམ་བརྒྱབ་སྟེ་ད་ལྟའི་བར་དུ་ཉུང་མཐར་མི་ ༦༦ རྐྱེན་འདས་དང་མི་ ༧༨་ལྷག་ལ་རྨས་སྐྱོན་ཕོག་ཡོད་འདུག
བོད་ལྕགས་ཟམ་རྫོང་དང་དར་རྩེ་མདོ་སོགས་སུ་ས་ཡོམ་གནོད་འཚེ་ཐེབས།
ཁ་སང་ཕྱི་ཚེས་ ༥ ཡི་ཉིན་གུང་བོད་ནང་གི་ཆུ་ཚོད་ ༡༢།༥༢ ཙམ་ལ་བོད་དཀར་མཛེས་ཁུལ་ལྕགས་ཟམ་རྫོང་ཁོངས་སུ་ཚད་རིམ་ ༦།༨ ཅན་གྱི་ས་ཡོམ་ཤུགས་ཆེན་བརྒྱབ་ཡོད་པ་དང་། རྫོང་དེའི་ཁོངས་གཏོགས་གྲོང་ཚོ་ཁག་གསུམ་གཙོ་བོར་གྱུར་བའི་བྱང་ཤར་གྱི་དར་རྩེ་མདོ་སོགས་རྫོང་ཁག་བཞི་ལྔ་ཞིག་ནང་ཤུགས་རྐྱེན་ཐེབས་ཡོད་པ་དང་། ད་ལྟའི་ཆར་ཉུང་མཐར་མི་ ༤༦ ཞིག་རྐྱེན་འདས་དང་མི་ ༥༠ ལྷག་ལ་རྨས་སྐྱོན་བྱུང་ཡོད་འདུག
ད་ལྟའི་ཆར་ས་ཡོམ་ཁྲོད་མི་ལ་གནོད་འཚེ་ག་ཚོད་ཐེབས་ཡོད་མེད་གསལ་ཁ་མི་འདུག་ཀྱང་། མི་མང་གི་སྡོད་ཁང་དང་། གཞུང་ལམ། གློག་ཁང་སོགས་སུ་གཏོར་སྐྱོན་ཚབས་ཆེན་བཏང་ཡོད་པའི་ཚོད་དཔག་བྱེད་བཞིན་འདུག་ལ། རྒྱ་ནག་གཞུང་གི་ས་ཡོམ་དང་གནམ་གཤིས་བརྟག་དཔྱད་ཁང་གིས་སྔོན་བརྡ་བཏང་བ་ལྟར་ན། འབྱུང་འགྱུར་གྱི་ཆུ་ཚོད་༧༢ ནང་དུ་དཀར་མཛེས་ཁུལ་དར་རྩེ་མདོ་དང་། ལྕགས་ཟམ་རྫོང་། བརྒྱད་ཟིལ་རྫོང་། ཉག་ཆུ། གཡག་རྔ་སོགས་རྫོང་ཁག་ ༡༠ ཡི་ས་ཁུལ་ནང་དུ་རང་བྱུང་གོད་ཆག་འབྱུང་ཉེན་ཡོད་པའི་ཉེན་བརྡ་བཏང་ཡོད་འདུག
ས་ཡོམ་གཙོ་བོ་འབྱུང་ཡུལ་ལྕགས་ཟམ་རྫོང་གི་ཉེ་འགྲམ་་གཞུང་ལམ་དུ་རྡོ་ལྷུང་བ། ༢༠༢༢།༠༩།༠༥ དྲ་ལམ་གྱི་པར།
སི་ཁྲོན་ཞིང་ཆེན་ནང་ཉེ་བའི་ལོ་འགའི་ནང་ས་ཡོམ་གྱི་གནོད་སྐྱོན་རིམ་པ་ཞིག་ཐེབས་ཡོད་པ་རེད། དེ་ཡང་ཕྱི་ལོ་༢༠༠༨ ཟླ་༥ ཚེས ༡༢ ཉིན་ཝན་ཁྲིན་དུ་ས་ཡོམ་ཚད་རིམ་༨.༢ ཅན་ཞིག་བརྒྱབ་སྟེ་མི་གྲངས་ ༦༩.༢༢༧ ལྷག་རྐྱེན་འདས་དང་། མི་གྲངས་ ༡༨༠༠༠ གར་སོང་ཆ་མེད་དུ་གྱུར་བ་སོགས་གནོད་འཚེ་བསམ་ཡུལ་ལས་འདས་པ་བྱུང་། ཡང་ཕྱི་ལོ་ ༢༠༡༣ ཟླ་ ༤ ཚེས་ ༢༠ ཉིན་བོད་ཀྱི་ཡཱ་ཨན་ཁུལ་དུ་ཚད་རིམ་ ༧.༠ གྱི་ས་ཡོམ་བྱུང་ནས་མི་གྲངས་ ༡༩༦ རྐྱེན་འདས་དང་། མི་གྲངས་ ༡༡༤༧༠ ལ་རྨས་སྐྱོན་བྱུང་། ཡང་ཕྱི་ལོ་༢༠༡༧ ཟླ་༨ ཚེས་༨ ཉིན་གཟི་ཚ་སྡེ་དགུ་ཁུལ་དུ་ཚད་རིམ ༧.༠ ཅན་གྱི་ས་ཡོམ་བརྒྱབ་སྟེ་མི་གྲངས ་༢༤ རྐྱེན་འདས་དང་། མི་གྲངས་ ༤༩༣ ལ་རྨས་སྐྱོན་ཕོག ཕྱི་ལོ་ ༢༠༢༡ ཟླ་ ༩ ཚེས་༡༦ ཉིན་ལུའུ་རྫོང་དུ་ཚད་རིམ་ ༦ ཅན་གྱི་ས་ཡོམ་བརྒྱབ་སྟེ་ཉུང་མཐར་མི་གྲངས་༣ རྐྱེན་འདས་ཕྱིན་པ་དང་། མི་གྲངས་༨༥ ལྷག་ལ་རྨས་སྐྱོན་ཕོགས་པ་སོགས་གནོད་སྐྱོན་བསྟུད་མར་བྱུང་དང་འབྱུང་མུས་ཡིན་པ་རེད།
དེ་རིང་ཕྱི་ཚེས་ ༦ ཉིན་བོད་ཀྱི་ལྕགས་ཟམ་རྫོང་ལ་ཚད་རིམ་༦.༨ ཅན་གྱི་ས་ཡོམ་བརྒྱབ་ནས་བོད་ནང་གི་དེ་རིང་ཉིན་གུང་བར་དུ་མི་གྲངས་ ༦༦ རྐྱེན་འདས་སུ་ཕྱིན་འདུག དེའི་ནང་ནས་དཀར་མཛེས་ཁུལ་ལྕགས་ཟམ་རྫོང་གི་མི་གྲངས་ ༣༧ རྐྱེན་འདས་དང་མི་གྲངས་ ༡༢ གར་སོང་ཆ་མེད་དུ་གྱུར་ཡོད་འདུག་ལ། དེ་བཞིན་གཡག་རྔ་ཁུལ་གྱི་མི་ ༢༨ རྐྱེན་འདས་སུ་ཕྱིན་ཡོད་པ་དང་མི་གྲངས་ ༧༨ ལ་རྨས་སྐྱོན་ཕོག་ཡོད་འདུག ད་ལྟའི་ཆར་ལྕགས་ཟམ་རྫོང་དང་གཡག་རྔ་ཁུལ་གྱི་མི་མང་ཁྲི་ ༥ ལྷག་གི་འཚོ་གནས་ལ་གནོད་སྐྱོན་ཐེབས་ནས་གནས་སྤོ་བྱེད་མུས་ཡིན་འདུག
