རྒྱ་གཞུང་ཉེན་རྟོག་པས་ཁྲིན་འདུ་གྲོང་ཁྱེར་ནས་འཛིན་བཟུང་བྱས་པའི་བོད་མི་ཚེ་བརྟན་ལགས་གར་སོང་ཆ་མེད་དུ་གྱུར་ནས་ཟླ་བ་གཅིག་ལྷག་འགྲོ་མུས་ཡིན་འདུག
རྒྱ་གཞུང་ཉེན་རྟོག་པས་བོད་ནང་གི་བོད་མི་མང་པོ་ཞིག་ལ་ནག་ཉེས་འདྲ་མིན་གཡོགས་ནས། གང་བྱུང་འཛིན་བཟུང་བཀག་ཉར་བྱེད་ཀྱི་ཡོད་པ་ལྟར། འདི་ལོའི་ཕྱི་ཟླ ༨ ནང་སྐྱེ་རྒུ་མདོ་ཁུལ་འབྲི་སྟོད་རྫོང་གི་བོད་མི་ཚེ་བརྟན་ལགས་ཁྲི་འདུ་རྫོང་ཉེན་རྟོག་པས་འཛིན་བཟུང་བྱས་ཏེ་ཟླ་གཅིག་ལྷག་འགྲོ་མུས་ཡིན་ཡང་། ད་ལྟ་ཁོང་གང་དུ་ཡོད་མེད་ཀྱི་གནས་ཚུལ་ཙམ་ཡང་གོ་རྒྱུ་མེད་སྟབས། ཁོང་གི་ནང་མི་ཚོས་སེམས་ཁྲལ་བྱེད་མུས་ཡིན་པ་རེད།
འདི་གའི་གསར་འགོད་པར་བོད་ནང་གི་འབྲེལ་ཡོད་བོད་མི་ཞིག་གིས་གནས་ཚུལ་མཁོ་སྤྲོད་བྱས་པ་ལྟར། ཟླ་བ་གཅིག་ཙམ་གྱི་གོང་དུ་བོད་མི་ཚེ་བརྟན་ལགས། ཆུ་དམར་ལེབ་རྫོང་དུ་ནང་མི་དང་ཉེ་འབྲེལ་སོགས་ཐུག་འཕྲད་བྱེད་དུ་སོང་ནས་ཕྱིར་ལོག་སྐབས། ཁྲིན་འདུ་ཉེན་རྟོག་པས་གློ་བུར་རྒྱུ་མཚན་གང་ཡང་མི་བཤད་པར་བོད་མི་ཁོང་འཛིན་བཟུང་བཀག་ཉར་བྱས་ཡོད་པ་དང་། ཁོང་གི་ནང་མི་ཚོས་ད་ལྟའང་རྒྱ་གཞུང་ཉེན་རྟོག་པས་ཚེ་བརྟན་ལགས་འཛིན་བཟུང་བྱེད་དགོས་པའི་རྒྱུ་མཚན་གང་ཡང་ཤེས་ཀྱི་མེད་སྐོར་འགྲེལ་བརྗོད་བྱས་སོང་།
ཡང་ཁོང་གིས། ཚེ་བརྟན་གྱི་ནང་མི་ཚོས་རྒྱ་ནག་གཞུང་གི་ཉེན་རྟོག་ལས་ཁུངས་སོགས་སུ་བཅར་ནས། ཁོང་གིས་ནག་ཉེས་ཅི་ཞིག་ཞིག་བསགས་ཡོད་པ་དང་། ཁོང་འཛིན་བཟུང་བྱས་ནས་ཟླ་བ་གཅིག་ལྷག་འགྲོ་མུས་ཡིན་ཡང་། ཁོང་གི་སྐོར་གྱི་གནས་ཚུལ་ཅི་ཡང་གོ་རྒྱུ་མི་འདུག་པས། ནང་མི་དང་ཉེ་འབྲེལ་སོགས་ཀྱིས་ཁོང་ཉིད་ཐུག་རྒྱུར་རེ་སྐུལ་ལན་མང་བྱས་ཀྱང་། རྒྱ་ནག་གཞུང་གི་ཉེན་རྟོག་པས་ཁོང་གི་སྐོར་ལ་ཚིག་གཅིག་ཀྱང་བཤད་ཀྱི་མེད་པ་མ་ཟད། ནང་མི་རྣམས་ལ་རྗེས་ཕྱོགས་ཉེན་རྟོག་ལས་ཁུངས་སུ་ཡོང་མི་ཆོག་སྐོར་བཤད་ནས་འཇིགས་སྐུལ་བྱས་ཏེ། ཕྱིར་རང་གནས་སུ་ལོག་བཏང་ཡོད་སྐོར་སོགས་འགྲེལ་བརྗོད་བྱས་སོང་།
འདས་པའི་ལོ་ཤས་རིང་རྒྱ་ནག་གཞུང་གིས་མཚོ་སྔོན་ཞིང་ཆེན་མངའ་ཁུལ་གྱི་གཞུང་འབྲེལ་སློབ་གྲྭ་ཁག་ཏུ་རྒྱ་སྒྱུར་སློབ་གསོ་ཤུགས་ཆེན་སྤེལ་བ་དང་། བོད་ཡིག་ཁོ་ན་སློབ་སའི་སློབ་གྲྭ་ཁག་བཙན་གྱིས་སྒོ་བརྒྱབ་ཏུ་བཅུག་པ། བོད་ནང་གི་ཤེས་ཡོན་པ་དང་བསམ་བློ་བ། བོད་ཀྱི་སྤྱི་ཚོགས་སུ་ཞབས་འདེགས་སྒྲུབ་མཁན་རྣམས་ལ་ནག་ཉེས་སྣ་ཚོགས་གཡོགས་ནས་འཛིན་བཟུང་བཀག་ཉར་བྱེད་ཀྱི་ཡོད་ལ། གཞན་ཡང་། འདི་ལོའི་ཕྱི་ཟླ ༨ ཚེས ༢༤ ཉིན་རྒྱ་ནག་གཞུང་གི་ཉེན་རྟོག་པས་བོད་མི་ཚོས་བསང་གསོལ་དང་ལབ་རྩེ་བསྟད་པ། ཞབས་རིམ་བསྒྲུབས་པ་སོགས་ཆོས་ཕྱོགས་ཀྱི་བྱེད་སྒོ་ཁག་བྱས་པའི་ཉེས་མིང་གི་འོག་ནས། བོད་གསེར་རྟ་རྫོང་གི་ཁེས་སྐོར་ཡུལ་ཚོའི་ཨ་བོས་དཀྱིལ་རི་མགོ་སྡེ་བའི་་བོད་མི་ལྔ་འཛིན་བཟུང་བྱས་ཏེ། བོད་མི་གཅིག་གཅར་རྡུང་བྱས་ནས་བསད་ཡོད་འདུག བོད་མི་ཚེ་བརྟན་ནི་ད་ལོ་རང་ལོ་༣༠ནང་ཡིན་པ་དང་ཁོང་གི་ཕ་མ་གཉིས་དང་སྤུན་མཆེད་གསུམ་ཡོད་པ་རེད་འདུག
