དེ་རིང་བོད་ཀྱི་སྙན་ངག་པ་གྲགས་ཅན་གཅན་མེ་སྟག་ལགས་ཟི་ལིང་གྲོང་ཁྱེར་དུ་འདས་གྲོངས་སུ་ཕྱིན་ཡོད་འདུག
དེ་རིང་བོད་ཀྱི་སྙན་ངག་པ་གྲགས་ཅན་གཅན་མེ་སྟག་ལགས་སྙུང་གཞི་ཡི་རྐྱེན་པས་ཟི་ལིང་གྲོང་ཁྱེར་དུ་དགུང་ལོ་ ༥༢ ཐོག་འདས་གྲོངས་སུ་གྱུར་ཡོད་ཅིང་། བོད་ནང་གི་སྙན་ངག་པ་གྲགས་ཅན་སྐྱབས་ཆེན་བདེ་གྲོལ་དང་། སྙན་བུ་སོགས་གཙོས་བོད་ཕྱི་ནང་གཉིས་ཀྱི་སྙན་ངག་པ་དང་། རྩོམ་པ་པོ། བསམ་བློ་བ། ཁོང་གི་བརྩམས་ཆོས་ལ་དགའ་མོས་བྱེད་མཁན་མང་པོ་ཞིག་གིས་དྲ་ལམ་དུ་ཁོང་གི་པར་བཞག་ནས་མྱ་ངན་ཞུ་བཞིན་འདུག
བོད་ནང་གི་བོད་མི་ཞིག་གིས་ཡིག་ཐོག་ཏུ། དགུང་ལོ་ལྔ་བཅུའི་བདག་པོ། ཁྱེད་རང་གསོན་དུས་གང་བོར་ཡུལ་འདིའི་དཔལ་འབྱོར་གྱི་མཐའ་ན་ཡོད། དབང་ཐོབ་ཀྱི་བཀྱེད་སར་ཡོད། ནག་ཉེས་ཀྱི་ཕ་མཐར་ཡོད། འགྲན་རྩོད་ཀྱི་འབྲོག་ན་ཡོད། མདོར་ན་བསོད་ནམས་དམན་པའི་སྤྱི་ཚོགས་དང་དུས་རབས་འདིའི་ཟུར་ནས་འགྲེངས་ཡོང་བས་ཁེར་རྐྱང་ལ་ཤིན་ཏུ་གོམས་ཡོད། དེ་རིང་འཆི་བའི་ལམ་ནས་ཀྱང་ཁེར་རྐྱང་ངང་ཉམས་རྟོགས་ཁྱད་པར་བའི་དཔའ་གླུ་མགུར་ལ་འཐེན་བཞིན་བཞུད་ཀྱིན་ཡོད་ངེས། རང་རིག་ལྷག་པའི་ལྷ་དང་དབྱེར་མེད་པའི་ངང་ནས་བཞུད་ཐུབ་པའི་བློ་གཏད་ཡོད། ཕྱིར་བོད་དུའང་མ་སྐྱེས་ན་ཆོག སྐུ་ཉིད་ཤེས་རབ་ཀྱི་དཔལ་འབར་ཐོགས་ཏེ་རང་གི་ཞེ་བློ་མ་ཁེངས་པའི་གདུལ་བྱའི་སླད་དུ་གང་ལ་བཞུད་འདོད་ན་གནས་དེར་གཏན་དུ་བཞུད་ཅིག ཅེས་བྲིས་ཡོད་འདུག
ཡང་བོད་མི་ཞིག་གིས། བོད་ཡིག་གི་སྙན་ངག་ཀློག་མཁན་ཞིག་ཡིན་ཕྱིན། གཅན་མེ་སྟག་ཟེར་བའི་སྙན་ངག་པ་འདི་ངོ་མི་ཤེས་མཁན་ཕལ་ཆེར་ཡོད་མི་སྲིད། དེ་ནི་སྙན་ངག་པ་ཁོ་རང་སྙན་ངག་ལ་འཇུག་པའི་རྣམ་དཔྱོད་ཡངས་ཤིང་འཆར་སྒོ་ཕུན་སུམ་ཚོགས་པས་སོ།། སྙན་ངག་གི་ཀློང་ནས་ནར་སོན་ཅིང་སྙན་ངག་གི་ཀློང་ནས་འཆི་ཕོད་པའི་སྐྱེས་བུ་ཁོང་དང་ཁོང་ལྟ་བུ་དག་ལ་མཚོན་ན་སྐྱེ་འཆི་ཞེས་པའི་ཐ་སྙད་འདི་དག་ནི་སྙན་ངག་གཞན་ཞིག་གི་རྩོམ་གདན་བཏིང་ཞིང་རྩོམ་ལུས་བརྗེ་བ་དང་འདྲ། ཁྱེད་ཀྱི་གློ་བུར་བའི་ཕེབས་བཞུད། འདིའི་རྗེས་ཤུལ་དུ་ཨ་ཕའི་མར་སྒྲོན་ལྟ་བུའི་”གསལ་བྱེད་སུམ་ཅུ་བོ་ཇི་ལྟར་བྱ།” ཨ་མའི་པགས་རྩག་ལྟ་བུའི་”བརྡ་སྤྲོད་ཀྱི་ལྭ་བ་འདི་དག་ཇི་ལྟར་བྱ།” ཁྱེད་ཀྱི་ཕེབས་ལམ་བདེ་བར་སྨོན། ཞེས་བྲིས་ཡོད་འདུག
དེང་སྐབས་བོད་ཁམས་ཀྱི་ས་ཕྱོགས་གང་སར་ཉུལ་བའི་ཟིན་འབྲི་མཁན་གྲགས་ཅན་འབྲོག་སྐྱ་བོས། སྙན་ངག་པ་ཞིག་བཞུད་སོང་བས། འཇིག་རྟེན་ལ་འགྱུར་བ་གང་ཡང་འགྲོ་མི་སྲིད། མི་རྣམས་ཀྱིས་ཤིན་ཏུ་ཕངས་བའི་སེམས་ཀྱིས་མྱ་ངན་ཙམ་ཞུས་རྗེས་སླར་ཡང་གཏིང་བརྗེད་དུ་འགྲོ་ངེས་ཡིན། ཡིན་ཡང་། སྙན་ངག་པ་ཞིག་མེད་སོང་བ་ནི་སྐྱེས་ནས་ནར་མ་སོན་པའི་བྱིས་པ་ཞིག་མེད་སོང་བ་དང་འདྲ། ཁྱོད་རང་དུས་གཏན་དུ་རང་ཉིད་ལྟ་བུའི་ནར་སོན་རྒྱུ་མེད་པའི་བྱིས་པ་དག་གི་སེམས་ཁོང་ནས་གསོན་ངེས་ཡིན། འཆི་བའི་རྗེས་སུ། རྣམ་ཤེས་ཟེར་བ་ཞིག་ཡོད་དམ། རྣམ་ཤེས་ལ་ཕ་ཡུལ་ཟེར་བའི་བུད་འགྲོ་ས་ཞིག་ཡོད་དམ། ཅེས་སོགས་བརྗོད་ཡོད་འདུག
གཞན་ཡང་། དེ་རིང་སྙན་ངག་པ་གྲགས་ཅན་གཅན་མེ་སྟག་ལགས་སྙུང་གཞི་ཡི་རྐྱེན་གྱིས་ཟི་ལིང་གྲོང་ཁྱེར་དུ་འདས་གྲོངས་སུ་གྱུར་བའི་གནས་ཚུལ་ཐོན་རྗེས། བོད་ཕྱི་ནང་གཉིས་ཀྱི་སྙན་ངག་པ་དང་། ཡིག་འབྲི་བ་སོགས་ཀྱིས་དྲ་ལམ་དུ་ཁོང་གི་པར་དང་སྙན་ངག་སོགས་སྤེལ་ནས། སྐད་འཕྲིན་གཙོ་བོ་གྱུར་བའི་དྲ་ལམ་ཧྲིལ་པོ་ཁོང་གི་པར་དང་སྙན་ངག་གིས་ཁེངས་ཡོད་འདུག
གཅན་མེ་སྟག་ལགས་ནི ༡༩༧༠ ལོར་མདོ་སྨད་གཅན་ཚ་ས་ཁུལ་གྱི་ལྷ་ས་ཞེས་པའི་གྲོང་ཚོ་རུ་སྐྱེས། ༡༩༨༩ ལོར་མཚོ་སྔོན་ཞིང་ཆེན་མི་རིགས་མཐོ་རིམ་དགེ་འོས་ཆེད་སྦྱོང་སློབ་གྲྭ་ནས་མཐར་ཕྱིན། ཁོང་ལོ་རབས་བརྒྱད་ཅུ་པ་དང་དགུ་བཅུ་པའི་བར་མཚམས་སུ་གསར་རྩོམ་གྱི་ལས་ལ་ཞུགས་པ་ནས་བཟུང་། དུས་དེབ་དང་ཚགས་པར་སྣ་ཚོགས་སྟེང་སྙན་ངག ༣༠༠ ལྷག་དང་ལྷུག་རྩོམ ༥༠ ལྷག གླུ་ཚིག ༢༠ ལྷག་སྤེལ་འདུག ཁོང་གིས་མགོ་ལོག་དང་ཟི་ལིང་སོགས་སུ་བྱ་བ་གཉེར་ཞོར། སྙན་དེབ་《ལྷོ་བཞུད་ཀྱི་ཆུ་འཛིན》སོགས་དང་ལྷུག་རྩོམ་དེབ་《བུ་མོ་གཡུ་ཆུང་ཟླ་བ》སོགས་འགྲེམས་སྤེལ་བྱས་ཡོད་ཅིང་། ཁོང་ལ་ཀྲུང་གོའི་གྲངས་ཉུང་མི་རིགས་རྟ་མཆོག་རྩོམ་རིག་བྱ་དགའ་གཙོས་རྩོམ་རིག་བྱ་དགའ་ཆེ་གྲས་འགའ་ཐོབ་མྱོང་། ཁོང་གི་སྙན་རྩོམ་ཁ་ཤས་དབྱིན་ཇི་དང་ཧྥ་རན་སི། འཇར་མན་དང་ཉི་ཧོང་སོགས་ཀྱི་སྐད་དུའང་བསྒྱུར་ཡོད།
གསར་འགོད་པ། དཔལ་ལྡན།
