འཛམ་གླིང་རྒྱལ་ཁབ་ཉེར་བདུན་གྱིས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་གཏོང་གི་ཡོད་པར་སྐྱོན་བརྗོད་དང་སྦྲགས། དམིགས་བསལ་བོད་ནང་གི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་གི་གནས་སྟངས་སོགས་ཀྱི་ཐད་བློ་འཚབ་ཡོད་སྐོར་བརྗོད་འདུག
ད་ལྟ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༥༡ པ་དེ་ཟླ་འདིའི་ཕྱི་ཚེས་ ༧ ནས་ཟླ་ ༡༠ པའི་ཚེས་ ༡༢ བར་འཚོག་བཞིན་ཡོད་ཅིང་། ཨ་རི་གཙོ་བྱས་པའི་ཡུ་རོབ་མཉམ་འབྲེལ་མཐུན་ཚོགས་དང་འཇར་མན་ནེ། ཌན་མཱག་སོགས་རྒྱལ་ཚོགས་ཀྱི་འཐུས་མི་རྒྱལ་ཁབ་ ༢༧ གྱིས། འགྲོ་བ་མིའི་ཐོབ་ཐང་གི་ལྷན་ཚོགས་དེའི་སྟེང་དུ། རྒྱ་ནག་གཞུང་གིས་བོད་ནང་གཙོས་པའི་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པར་སེམས་འཚབ་ཡོད་པའི་གྲོས་གཞི་བཏོན་ཡོད་པ་མ་ཟད། རྒྱ་ནག་གཞུང་གིས་རྒྱལ་ཁབ་དང་རྒྱལ་སྤྱིའི་ཁྲིམས་ཀྱི་འགན་འཁྲི་གཞིར་བཟུང་བོད་ནང་གཙོ་བྱས་པའི་མི་ཚང་མའི་གཞི་རྩའི་རང་དབང་ཁག་དང་འགྲོ་བ་མིའི་ཐོབ་ཐང་ལ་གུས་བརྩི་དང་སྲུང་སྐྱོབ་བྱེད་པ། མངོན་འགྱུར་ཡོང་བ་བཅས་བྱེད་དགོས་པ་ནན་སྐུལ་བྱས་ཡོད་འདུག
རྒྱལ་ཁབ་དེ་དག་གི་བརྗོད་དོན་གཙོ་བོ་ནི། རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་གཏོང་བཞིན་ཡོད་པ་དང་། དམིགས་བསལ་བོད་ཀྱི་ཐུན་མོང་མ་ཡིན་པའི་ཆོས་དང་སྐད་ཡིག རིག་གཞུང་གི་ངོ་བོ་བཅས་ལ་དྲག་གནོན་ཚབས་ཆེན་གཏོང་གི་ཡོད་པར་བློ་འཚབ་ཡོད་ཅིང་། རྒྱ་ནག་གཞུང་གིས་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་དང་དམིགས་བསལ་སྨྲ་བརྗོད་རང་དབང་སོགས་ལ་བརྩི་བཀུར་བྱས་ཏེ། རྒྱལ་སྤྱིའི་ཁྲིམས་ཀྱི་འགན་དང་དུ་ལེན་དགོས་པ། ཤིན་ཅང་ཁུལ་གྱི་འགྲོ་བ་མིའི་ཐོབ་ཐང་ལ་རྡོག་རོལ་བཏང་སྟེ། འགྲོ་བ་མིའི་ཀུན་སྤྱོད་དང་འགལ་བའི་ནག་ཉེས་བསགས་ཡོད་པའི་སྐྱོན་བརྗོད་སོགས་ཡིན་འདུག
ཡང་རྒྱ་ནག་གཞུང་ཕྱོགས་ཀྱིས་བསྒྲགས་པའི་གནས་ཚུལ་ལྟར་ན། འཚོག་བཞིན་པའི་རྒྱལ་ཚོགས་ཀྱི་ལྷན་ཚོགས་དེའི་སྟེང་དུ་འཛམ་གླིང་རྒྱལ་ཁབ་ ༦༨ ཀྱིས་ཡུ་གུར་མི་རིགས་རང་སྐྱོང་ཁུལ་དང་ཧོང་ཀོང་དམིགས་བསལ་འཛིན་སྐྱོང་ས་ཁུལ། བོད་རང་སྐྱོང་ལྗོངས་བཅས་ཀྱི་གནད་དོན་ཁག་ནི་རྒྱ་ནག་གི་ནང་སྲིད་ཡིན་པས། འགྲོ་བ་མིའི་ཐོབ་ཐང་ཆབ་སྲིད་ཀྱི་ངོ་བོར་བསྒྱུར་ན་མི་འགྲིག་ཅེས་ཐུན་མོང་བསྒྲགས་གཏམ་སྤེལ་ཡོད་ཟེར་ལ། བསྒྲགས་གཏམ་དེ་ནི་པ་ཀི་སི་ཐན་གྱིས་རྒྱལ་ཁབ་ ༦༨ ཀྱི་ཚབ་བྱས་ཏེ་སྒྲོག་སྤྱངས་བྱས་ཡོད་པ་དང་། ད་དུང་རྒྱ་ནག་དམར་ཤོག་ཚོགས་པའི་མགྲིན་ཚབ་པ་ཝང་ཝིན་པིན་གྱིས། ནུབ་ཕྱོགས་རྒྱལ་ཁབ་ཉུང་ཤས་ཤིག་གིས་འགྲོ་བ་མིའི་ཐོབ་ཐང་གི་མིང་འོག་ནས་རྒྱ་ནག་ལ་མིང་རྗེས་བཟོ་བའི་ཆབ་སྲིད་ཀྱི་དམིགས་ཡུལ་ཕམ་ཟིན་པ་ཡིན། དམིགས་བསལ་ཨ་རིའི་ནང་མི་མང་གི་འཚོ་གནས་དང་འཕྲོད་བསྟེན། ངལ་རྩོལ་བཅས་ཀྱི་ཐོབ་ཐང་ལ་རྡོག་རོལ་གཏོང་གི་ཡོད་པ་དང་། མེ་མདའི་དྲག་སྤྱོད་དང་ཏོག་དབྱིབས་གཉན་རིམས་ལ་གདོང་ལེན་བྱེད་མ་ཐུབ་པ། མི་ཚོང་རྒྱག་པ་དང་བཙན་དབང་ངལ་རྩོལ་བྱེད་དུ་འཇུག་པ་སོགས་ཀྱི་ཁྲིམས་འགལ་བྱས་ཡོད་ཅེས་ཨ་རིའི་མིང་ཆེད་དུ་བཏོན་ནས་ལན་འདེབས་བྱས་འདུག
ཁ་སང་ཕྱི་ཚེས་ ༢༩ ཉིན་གྱི་བོད་མིའི་སྒྲིག་འཛུགས་ཀྱི་གནས་ཚུལ་ལྟར་ན། ད་ལྟ་འཚོག་བཞིན་པའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་དེའི་སྟེང་དུ། བོད་མིའི་སྒྲིག་འཛུགས་སུད་སི་སྐུ་ཚབ་དོན་གཅོད་ལས་ཁུངས་ཀྱི་རྒྱལ་ཚོགས་ནང་བོད་དོན་ཞུ་གཏུག་གནང་མཁན་ལས་བྱེད་སྐལ་ལྡན་མཚོ་མོ་ལགས་དང་བོད་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ལས་འཆར་དོ་དམ་པ་རྒན་པ་བསྟན་འཛིན་ཟླ་བ་ལགས་གཉིས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་གཙོས་པའི་ད་ལྟ་རྒྱ་ནག་གཞུང་གིས་ཏོག་དབྱིབས་གཉན་རིམས་དང་འབྲེལ་ནས་བོད་ནང་དྲག་གནོན་བྱེད་བཞིན་པའི་གནས་སྟངས་སོགས་ཀྱི་སྐོར་ལ་བསྒྲགས་གཏམ་སྒྲོག་སྦྱངས་བྱས་ཡོད་ཅིང་། བོད་མིའི་སྒྲིག་འཛུགས་ཀྱི་དང་བླངས་བོད་དོན་ཞུ་གཏུག་ལས་འགུལ་ཚན་པའི་གོ་སྒྲིག་འོག བཞུགས་སྒར་ཁུལ་དང་ཡུ་རོབ་ཀྱི་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་དང་གཞོན་སྐྱེས་བཅས་ལས་གྲུབ་པའི་སྡེ་ཚན་དེས། རྒྱལ་ཚོགས་ནང་བོད་དོན་ཞུ་གཏུག་བྱེད་ཕྱོགས་ཀྱི་ཟབ་སྦྱོང་གྲུབ་པ་དང་བསྟུན་རྒྱལ་ཚོགས་ལ་བོད་དོན་ཞུ་གཏུག་གི་ཞུ་ཡིག་ཅིག་ཀྱང་ཕུལ་ཡོད་འདུག
ཡང་ཟླ་འདིའི་ཕྱི་ཚེས་ ༢༣ ཉིན་སུད་སི་དང་ལིག་ཏེན་སིཊཡན་བོད་རིགས་མི་མང་ནས་བོད་ནང་གི་འགྲོ་བ་མིའི་ཐོང་ཐང་ཇེ་ཞན་ཇེ་སྡུག་ཏུ་འགྲོ་བཞིན་པའི་གནས་སྟངས་དང་འབྲེལ། སུད་སི་ཇེ་ནི་ཝའེ་རྒྱལ་སྤྱིའི་འགྲོབ་མིའི་ཐོབ་ཐང་གི་ལས་ཁུངས་ (Palais Wilson) ཀྱི་མདུན་ཐང་དུ་ངོ་རྒོལ་གྱི་ལས་འགུལ་སྤེལ་ཞིག་ཀྱང་སྤེལ་ཡོད།
གསར་འགོད་པ། སྐལ་བཟང་སྦྱིན་པ།
