༧གོང་ས་རྒྱལ་བ་རིན་པོ་ཆེ་མཆོག་གིས་སྨན་བཟས་ནས་སེམས་ཀྱི་ཞི་བདེ་བསྐྲུན་མི་ཐུབ་པར་བྱམས་བརྩེ་བསྒོམས་ནས་སེམས་ཀྱི་གཏིང་ནས་སེམས་ཅན་ལ་བརྩེ་བའི་བློ་ཞིག་སྐྱེས་དགོས་སྐོར་གསུངས་སོང་།
དེ་རིང་ཕྱི་ཚེས་ ༣ ནས་ ༥ བར་ཉིན་གྲངས་ ༣ རིང་ཐའེ་ཝན་གྱི་དད་ལྡན་མང་ཚོགས་ཀྱིས་ཇི་ལྟར་གསོལ་བ་བཏབ་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་གིས་བཞུགས་སྒར་ཐེག་ཆེན་གཙུག་ལག་ཁང་དུ་དཔལ་ཆོས་ཀྱི་གྲགས་པས་མཛད་པའི་ཚད་མ་རྣམ་འགྲེལ་གྱི་ལེའུ་གཉིས་པའི་གསུང་ཆོས་སྩལ་མགོ་བཙུགས་པ་དང་། སྐབས་དེར༧གོང་ས་མཆོག་གིས། དེ་རིང་ཁ་སང་གི་དུས་ཚོད་ནང་མི་ཕལ་ཆེ་ཕྱིའི་དངོས་པོའི་ཡར་རྒྱས་རྐྱང་རྐྱང་བསམ་བློ་གཏོང་མཁན་མ་གཏོགས། ནང་བསམ་བློ་གང་འདྲ་འགྱུར་བ་གཏོང་དགོས་ཡོད་མེད་བསམ་བློ་གཏོང་མཁན་ཉུང་ཉུང་རེད། སྤྱིར་ཆོས་ལུགས་འདྲ་མི་འདྲ་མང་པོ་ཞིག་ཡོད། ཚང་མས་སེམས་པ་བཟང་པོ་བྱ་དགོས་རྒྱུ་དང་གཞན་ལ་ཕན་བདེ་བསྒྲུབ་རྒྱུ་གསུང་གི་ཡོད། ལྷག་པར་དཔལ་ནཱ་ལེནྡྲ་ནས་བརྒྱུད་པའི་ཆོས་བརྒྱུད་འདིའི་ཆོས་རབ་ཏུ་རྣམ་འབྱེད་ཀྱི་ཤེས་རབ་རྩལ་དུ་བཏོན་ནས། སེམས་མ་འདུལ་བ་དེ་གང་འདྲ་ཡོང་གི་ཡོད་མེད་དང་སེམས་མ་འདུལ་བ་རྣམས་ཡག་པོ་བྱས་ནས་ངོ་འཕྲོད་པ་ཡིན་ན། དེ་འདུལ་བྱེད་ཀྱི་སེམས་ཞི་བདེ་བསྒྲུབ་རྒྱུའི་བསམ་བློའི་འགྲོ་སྟངས་དེ་དག་ལ་དོ་སྣང་བསླེབས་ནས་ཞེ་དྲགས་ཡག་པོ་རེད་འདུག དེ་འདྲ་ཡིན་དུས། སེམས་ཁམས་རིག་པའི་སྐོར་དེ་སངས་རྒྱས་པའི་གཞུང་ནང་དུ་གསལ་པོ་ཞེ་དྲགས་གསུང་གི་འདུག ཅེས་དང་། སྔ་མ་བོད་ལ་ལྷ་བསྒོམ་རྒྱུ་དང་། སྔགས་བགྲང་རྒྱུ་མ་གཏོགས་གཞུང་བལྟ་རྒྱུར་དེ་ཙམ་དོ་སྣང་མེད་པའི་བཟོ་འདྲ་བོ་ཞིག་བྱས་ནས། ཚད་མའི་གཞུང་ནི་མུ་སྟེགས་པའི་འདོད་པ་འགོག་རྒྱུ་ཞིག་མ་གཏོགས། རྣམ་འགྲེལ་བསྒྲུབ་པར་དེ་འདྲ་གལ་ཆེན་ཡིན་པའི་ངོས་འཛིན་ཕལ་ཆེར་མ་ཡོང་བ་ཞིག་བྱུང་བ་རེད། རྗེ་རིན་པོ་ཆེ་ཁོང་ཉིད་ཚད་མ་རྣམ་འགྲེལ་ལ་དམིགས་བསལ་གྱིས་སྦྱོང་བརྡར་གནང་བ་རེད། ཅེས་གསུངས་སོང་།
༧གོང་ས་རྒྱལ་བ་རིན་པོ་ཆེ་མཆོག་གིས། ཚད་མའི་གཞུང་ལ་སྐབས་རེར་སྣང་ཆུང་གཏོང་མཁན་འདྲ་ཡོང་གི་ཡོད་རེད་དེ། དེ་དེ་འདྲ་མ་རེད། གཞི་ལམ་འབྲས་གསུམ་གྱི་རྣམ་གཞག་རིག་པའི་ལམ་ནས་ཡག་པོ་བྱས་ནས་ངོ་འཕྲོད་པ་དང་སེམས་ལ་ངེས་པ་ཐོབ་རྒྱུར་ཚད་མ་རིག་པ་དེ་དཔེ་གལ་ཆེན་པོ་རེད་འདུག རྗེ་རིན་པོ་ཆེས་ཚད་མའི་གཞུང་ལ་སྦྱངས་པ་གནང་ནས་ཐུགས་ཕན་གསོས་པོ་ཞེ་དྲགས་བྱུང་ཞེས་རྟོགས་བརྗོད་འདུན་ལེགས་མའི་ནང་ལ་གསུངས་འདུག དེ་འདྲ་ཡིན་དུས་དེ་རིང་ཁ་སང་བསྟན་པ་མར་གཉའ་ཕྲ་བོ་ཆགས་ཡོད་པའི་ཁ་ཐུག་དེར། ད་གང་ལྟར་ཚད་མ་རིག་པའི་ཐོག་ནས་རྣམ་འགྲེལ་གྱི་ནང་ནས་ཐར་པ་བསྒྲུབ་རྒྱུ་དང་ཐམས་ཅད་མཁྱེན་པའི་གོ་འཕང་བསྒྲུབ་རྒྱུ་དེ་ཚོ་གྲས་དེ། རིག་པས་བསམ་བློ་གཏང་རྒྱུ་ལས། ཞེས་གསུངས་པའི་ཕྱིར་ཞེས་པའི་སྐད་ཆ་དེ་མེད་པར། རིག་པས་བསྒྲུབ་རྒྱུ་དེ་དཔེ་གལ་ཆེན་པོ་རེད་ཤག བཅོམ་ལྡན་འདས་ཁོང་ཉིད་ཀྱིས་བཅོམ་ལྡན་འདས་ཁོང་ཉིད་ཀྱིས་གསུངས་པའི་ཆོས་དེ་ལ་ཁྱེད་རང་ཚོས་ཡིད་ཆེས་བྱས་ནས་བསླབ་དགོས་མ་རེད། ངས་(བཅོམ་ལྡན་འདས་)ལབ་བཞག་པ་དེར་ཁྱེད་རང་ཚོས་རིག་པས་བརྟག་དཔྱད་བྱས་ནས་བརྩད་གཅོད་བྱོས་གདའ། ཞེས་གསུངས་འདུག དེ་འདྲ་ཡིན་དུས་ང་རང་ཚོས་རིག་པའི་ལམ་ནས་དཔྱད་པ་བྱ་རྒྱུ་དེ་ཞེ་དྲགས་གལ་ཆེན་པོ་རེད། ཆོས་ལུགས་མང་ཆེ་བར་ཕལ་ཆེར་དད་པ་དེ་གཙོ་བོ་རེད་དེ། སངས་རྒྱས་པའི་ཆོས་ལུགས་སྤྱི་དང་ལྷག་པར་ནཱ་ལེནྡྲ་ནས་བརྒྱུད་པའི་ཆོས་ལུགས་དེ་ལ་རིག་པས་དཔྱད་པ་བྱ་རྒྱུ་དེ་གཙོ་བོ་བྱས་ནས་གསུང་གི་འདུག་ག དུས་རབས་ཉི་ཤུ་རྩ་གཅིག་པའི་ནང་ལ་ཚན་རིག་ཡར་རྒྱས་ཕྱིན་ཡོད་པའི་ནང་ལ། ཚན་རིག་པ་རྣམ་དཔྱོད་ཅན་བློ་གཟུ་བོར་གནས་པའི་ཐོག་ནས་བརྟག་དཔྱད་བྱེད་མཁན་དེ་ཚོ་གྲས་ཀྱིས་སངས་རྒྱས་པའི་འགྲོ་སྟངས་དེ་ལ་དོ་སྣང་དམིགས་བསལ་བྱེད་ཀྱི་འདུག ལྷག་པར་སེམས་ཁམས་རིག་པའི་སྐོར་ལ་ནང་པའི་གཞུང་དུ་རྒྱས་ཤོས་ཆགས་བསྡད་ཡོད། ཆོས་ལུགས་གཞན་ལ་སེམས་ཁམས་རིག་པའི་སྐོར་དེ་གལ་ཡོད་མ་རེད། ཐ་ན་འཕྲོད་བསྟེན་གྱི་ཐོག་ནས་སེམས་ཁམས་རིག་པ་དེ་ཕན་ཐོགས་ཡོད་པ་རེད་འདུག དེ་འདྲ་ཡིན་དུས་ང་ཚོ་ཆོས་ཁས་ལེན་མཁན་ཡིན་ན་རེད་མི་ལེན་མཁན་ཡིན་ན་རེད། ཚན་རིག་པ་ཁ་ཤས་ཀྱིས་སེམས་ཀྱི་ཞི་བདེ་བྱུང་ན་ལུས་ལའང་ངལ་གསོ་ཐེབས་པ་དང་། སེམས་སུ་དངངས་སྐྲག་དང་ཞེ་སྡང་ཡོང་དུས་སེམས་ཀྱི་ཞི་བདེ་བརླག་འགྲོ་ཡི་རེད། སེམས་ཞི་བདེ་ཡོང་རྒྱུའི་རྒྱུ་རྐྱེན་གཙོ་བོ་དེ་བྱམས་བརྩེ་བསྒོམ་རྒྱུ་ཡིན་པར་དོ་སྣང་བྱེད་ཀྱི་འདུག ཅེས་གསུངས་སོང་།
མགོན་པོ་གང་ཉིད་ཀྱིས། སངས་རྒྱས་པའི་གཞུང་ནས་སེམས་བྱམས་བརྩེ་བསྒོམ་ནས་སེམས་སུ་བགེགས་རྐྱེན་ཞེ་སྡང་ལ་སོགས་དང་འཕྲད་ཡོང་དུས། ཁོ་ལ་ཁ་ཐུག་ཁ་ཐུག་གཉེན་པོ་བསྟེན། གཞན་སྤྱི་ཡོངས་ནས་བྱམས་བརྩེའི་བློ་དེ་སྒོམ་ཡོང་དུས་སེམས་ལ་ཞི་བདེ་རང་བཞིན་གྱིས་ཡོང་བསྡད་ཡ་ཞིག་རེད། སེམས་ལ་ཞི་བདེ་བྱུང་བའི་རྒྱུ་མཚན་ལ་བརྟེན་ནས་ལུས་ཁམས་བདེ་བ། གཉིད་སྐྱིད་པོ་ཡོང་གི་རེད། སེམས་ལ་ཞི་བདེ་མེད་པ་བྱས་ནས་ཁོང་ཁྲོ་ལངས་བ་དང་དངངས་སྐྲག་སྐྱེས་བསྡད་པའི་བཟོ་འདྲ་བོ་བྱས་ན། ཕར་ཨ་ལོག་བརྒྱབ་ཚུར་ཨ་ལོག་བརྒྱབ་ནས་བསྡད་ཀྱི་རེད། སེམས་ལ་ཞི་བདེ་ཡོད་ན་གཉིད་ལྷོད་ལྷོད་བྱས་ནས་ཁུག་རྒྱུ་ཡོང་གི་རེད། གང་ལྟར། འཕྲོད་བསྟེན་གྱི་ཆ་ནས་ཡིན་ན་ཡང་སེམས་ཀྱི་ཞི་བདེ་ཧ་ཅང་གི་གལ་ཆེན་པོ་རེད། ཕྱི་ལོགས་ཀྱི་སྨན་བཟས་ནས་སེམས་ཀྱི་ཞི་བདེ་བཟོ་རྒྱུར་ཕྲན་བུ་ཕན་གྱི་ཡོད། ཡིན་ན་ཡང་། གཙོ་བོའི་གཙོ་བོ་བྱམས་བརྩེ་བསྒོམས་ནས་སེམས་ཀྱི་གཏིང་ནས་སྙིང་ཐག་པ་ནས་སེམས་ཅན་ཐམས་ཅད་ལ་བརྩེ་བའི་བློ་ཞིག་སྐྱེས་པ་ཡིན་ན། རང་བཞིན་གྱི་སེམས་ལྷོད་ལྷོད་ཆགས་རྒྱུ་ཞིག་རེད། ང་རང་ཚོ་ཚང་མས་ཞི་བདེ་ཞི་བདེ་ཟེར་གྱི་ཡོད། ཞི་བདེ་ངོ་མ་དེ་སེམས་པ་བཟང་པོ་བྱས་ནས། དེའི་ཐོག་ནས་སེམས་ལ་ཞི་བདེ་ཡོང་བ་དེ་ཞི་བདེ་ངོ་མ་ཆགས་བསྡད་ཡོད། ང་ཚོ་ཚང་མས་འཛམ་གླིང་ཞི་བདེ་ཁ་གཅིག་གྲགས་ཀྱི་བཤད་ཀྱི་ཡོད། འཛམ་གླིང་ཞི་བདེ་འཆད་ཀྱིན་འཆད་ཀྱིན་ལ་གོ་མཚོན་བཟོ་རྒྱུ་དེ་ཚོ་ནང་འགལ་རེད། སེམས་ཀྱི་ཞི་བདེ་ཡོང་བར་འཚེ་བ་མེད་པ་དེ་རང་ཤུགས་ཀྱིས་ཡོང་བསྡད་ཀྱི་ཡོད། འཚེ་བ་མེད་པའི་ལྟ་སྤྱོད་སྒང་ལ་འགྲོ་བསྡད་དུས། གོ་མཚོན་དང་དམག་ཤུགས་དེ་ཚོའི་གྲས་དེ་འབྲེལ་མེད་ཆགས་ཡོང་གི་ཡོད། ང་རང་ཚོ་འཛམ་བུ་གླིང་འདིའི་སྒང་གི་མི་ཐེར་འབུམ་བདུན་བརྒྱད་ཡོད་པ་དེ་དག་ཚང་མ་བདེ་བ་དོན་དུ་གཉེར་བ་དང་། སྡུག་བསྔལ་མི་འདོད་པ་ཤ་སྟག་རེད། ཆོས་ཡོད་མེད་ཀྱི་སྐད་ཆ་གལ་མ་རེད། སྐྱེས་ཙམ་ཉིད་ནས་བདེ་བ་འདོད་པ་དང་སྡུག་བསྔལ་མི་འདོད་པ་དེ་ཡོད་ལ། སྐྱེས་མ་ཐག་ནས་མ་ཡི་བྱམས་བརྩེས་བསྐྱངས་པ་རེད། ཅེས་གསུངས་སོང་།
ཡང་མགོན་པོ་མཆོག་གིས། ངོས་རང་ཉིན་རེ་བཞིན་ཡར་ལངས་པ་དང་བྱང་ཆུབ་ཀྱི་སེམས་བསམ་བློ་བཏང་གི་ཡོད། སེམས་ལ་ཞེ་དྲགས་ཕན་གྱི་འདུག སེམས་གཏིང་ནས་ཞི་བདེ་ཡོད་པ་དང་ཆབས་ཅིག་སྙིང་སྟོབས་ཤིག་བསླེབས་ཀྱི་འདུག བཀྲ་མི་ཤིས་པའི་ཁ་ཆག་རྣ་རལ་གྱི་གནས་ཚུལ་དེ་འདྲ་ཡོང་བའི་སྐབས་སུ་སྙིང་རྗེ་བསམ་པ་ཞིག་མ་གཏོགས། དེ་ལ་ཁོང་ཁྲོ་ལངས་པ་བཟོ་ཞིག་ཧ་ལམ་ཡོང་གི་མི་འདུག བྱས་ཙང་། སེམས་ཀྱི་ཞི་བདེ་རང་བཞིན་གྱི་ཡོང་བ་དང་ཆབས་ཅིག་སེམས་ཀྱི་སྙིང་སྟོབས་ཀྱང་བསླེབས་ཀྱི་འདུག དཀའ་ངལ་ག་རེ་བྱུང་ན་ཡང་། མིས་བཟོས་པའི་དཀའ་ངལ་རེད། དེ་འདྲ་ཡིན་དུས་མིའི་རང་ཆས་སུ་བརྩེ་བ་ཡོད། དེའི་ཐོག་ནས་ང་ཚོས་དཀའ་ངལ་སེལ་ཐུབ་ཀྱི་རེད་བསམ་པ་ཞིག་དྲན་ཡོང་དུས། རང་བཞིན་གྱིས་སེམས་ལ་ཞི་བདེ་ཡོང་བསྡད་པ་ཞིག་ཡོང་གི་འདུག སྙིང་སྟོབས་ཤིག་ཀྱང་བསླེབས་བསྡད་ཀྱི་འདུག ངོས་རང་གི་ངོ་ཤེས་མང་པོ་ཞིག་ལ་སེམས་ཀྱི་བྱམས་བརྩེ་ཞིག་ཡོད་ན། སེམས་ལ་ཞི་བདེ་ཡོང་རྒྱུ། སེམས་ལྷོད་ལྷོད། དཀའ་ངལ་ག་རེ་བྱུང་ནའང་དེར་ཁོང་ཁྲོ་ལངས་ནས་གདོང་ལེན་བྱ་རྒྱུ་མིན་པ་བྱས། སེམས་ཞི་བའི་ཐོག་ནས་ཡུལ་དེར་ཕན་ཐོགས་བྱ་རྒྱུར་རྟག་པར་ལབ་བསྡད་ཀྱི་ཡོད། ཅེས་གསུངས་སོང་།
གསར་འགོད་པ། དཔལ་ལྡན།
