རྫ་སེར་ཤུལ་རྫོང་ནས་བོད་མི་གཉིས་འཛིན་བཟུང་བྱས།

རྫ་སེར་ཤུལ་རྫོང་ཁོངས་ནས་ཡིན་པའི་བོད་མི་རིན་ཆེན་དར་རྒྱས་དང་ཁོང་ཚང་གི་མག་པ་ནམ་མཁའ་གཉིས་རྫོང་ཐོག་ཏུ་བཟའ་བཅའ་ཉོ་རུ་ཕྱིན་ཏེ་ཕྱིར་ནང་དུ་ལོག་པའི་ལམ་བར་དུ་ཉེན་རྟོག་པས་འདྲི་རྩད་མང་པོ་བྱས་རྗེས་ཉེན་རྟོག་ཁང་དུ་བཙན་འཁྲིད་བྱས་ཡོད་འདུག

དེ་རིང་འདི་གར་བོད་ནས་གནས་ཚུལ་འབྱོར་བ་ལྟར་ན། ཁ་སང་ཕྱི་ཚེས་ ༡༠ ཉིན་ཟི་ཁྲོན་ཞིང་ཆེན་དཀར་མཛེས་ཁུལ་སེར་ཤུལ་རྫོང་ནས་ཡིན་པའི་བོད་མི་རིན་ཆེན་དར་རྒྱས་དང་ཁོང་གི་སྲིང་མོའི་ཁྱོ་ག་ནམ་མཁའ་གཉིས་སེར་ཤུལ་རྫོང་ཐོག་ཏུ་བཟའ་བཅའ་ཉོ་བར་ཕྱིན་ནས་ཕྱིར་ལོག་སྐབས། ལམ་བར་དུ་ཉེན་རྟོག་པས་བཀག་སྟེ་གང་དུ་ཕྱིན་པ་དང་། མི་སུ་ལ་ཐུག་ཡོད་མེད་སོགས་འདྲི་རྩད་བྱས་ཡོད་པ་དང་། ཁོང་གཉིས་ནས་བཟའ་བཅའ་རྫོགས་སོང་བས་རྫོང་ཐོག་ཏུ་ཉོ་བར་ཕྱིན་པ་དང་། དེ་ནས་རྒྱ་མིའི་ཟ་ཁང་ཞིག་ཏུ་ཟ་མ་ཟོས་རྗེས་ལམ་སང་ཕྱིར་ནང་དུ་ལོག་འགྲོ་ཡི་ཡོད་ལུགས་འགྲེལ་བརྗོད་བྱས་ཡོད་ཀྱང་། འགྲོ་སྐྱོད་བྱེད་པར་ཆོག་མཆན་ཞུས་མེད་སྐོར་སོགས་བརྗོད་དེ་ལག་ལྕགས་བརྒྱབ་ནས་རྫོང་ཉེན་རྟོག་ཁང་དུ་བཙན་འཁྲིད་བྱས་ཡོད་འདུག

གནས་ཚུལ་མཁོ་སྤྲོད་པས་བརྗོད་པ་ལྟར་ན། ཉེ་བའི་དུས་ཡུན་ཟླ་ ༢ ལྷག་རིང་རྫ་སེར་ཤུལ་རྫོང་ཁོངས་སུ་ཏོག་དབྱིབས་གཉན་རིམས་འགོས་ཁྱབ་རྐྱེན་གྱིས་མི་མང་ཡར་མར་འགྲོ་འོང་བྱེད་མི་ཆོག་པ་དང་། མ་འགྲོ་ཐབས་མེད་ཀྱི་གནས་ཚུལ་བྱུང་ཚེ་ས་གནས་འབྲེལ་ཡོད་ལས་ཁུངས་ནས་ཆོག་མཆན་ལེན་དགོས་ཀྱི་ཡོད་འདུག གལ་སྲིད་སྲིད་གཞུང་གི་ཆོག་མཆན་མེད་པར་འགྲོ་འོང་བྱས་ཚེ། སྲིད་གཞུང་ནས་གཏན་འབེབ་བྱས་པའི་བཀའ་དང་འགལ་ཡོད་སྐོར་བརྗོད་དེ་ཉེས་ཆད་གཅོད་ཀྱི་ཡོད་འདུག

ཁོང་གཉིས་བཙན་འཁྲིད་བྱས་རྗེས། ནང་མི་སྤུན་མཆེད་ཚོར་གནས་ཚུལ་གང་ཡང་འགྲེལ་བརྗོད་བྱས་མེད་འདུག་ལ། ངོ་ཐུག་ཏུའང་འཇུག་གི་མེད་འདུག ཁོང་གཉིས་ནི་སེར་ཤུལ་རྫོང་དར་དམར་རུ་ཁག་དང་པོ་ཟེར་བ་ནས་ཡིན་ཞིང་། རིན་ཆེན་དར་རྒྱས་ལགས་ཀྱིཤུལ་དུ་ཕ་མ་རྒན་རྒོན་གཉིས་དང་། ཁོང་རང་གི་བཟའ་ཟླ་ལྷ་མོ་དང་ཕྲུ་གུ་གསུམ་ཡོད་འདུག དེ་བཞིན་ཁོང་གི་སྲིང་མོ་དང་མག་པ་ནམ་མཁའ་གཉིས་ལ་ཟླ་ཤས་ལོན་པའི་བྱིས་པ་ཆུང་ཆུང་ཞིག་ཡོད་འདུག

ཞི་ཅིན་ཕིང་གིས་སྣེ་འཁྲིད་པའི་རྒྱ་ནག་གཞུང་གི་ཏོག་དབྱིབས་གཉན་རིམས་གཙང་སེལ་གྱི་སྲིད་ཇུས་ཚུལ་བཞིན་སྔོན་འགོག་དང་སྨན་བཅོས་ཐུབ་ཀྱི་མེད་པར་བརྟེན། འདི་ལོའི་ཕྱི་ཟླ་ ༨ ཙམ་ནས་བཟུང་དབུས་གཙང་ཁུལ་གཙོ་བོར་གྱུར་བའི་མདོ་སྟོད་སྨད་ཀྱི་ས་ཁུལ་མང་པོར་ཏོག་དབྱིབས་གཉན་རིམས་ཁྱབ་གདལ་དུ་ཕྱིན་ཡོད་པ་དང་བསྟུན། རྒྱ་ནག་གཞུང་ཕྱོགས་ནས་ས་གནས་སོ་སོར་ཐེམ་སྤང་བཀའ་རྒྱ་བསྒྲགས་ཏེ་ཟླ་གཉིས་འགྲོ་བཞིན་ཡོད་པ་དང་། དུས་ཡུན་དེའི་རིང་ས་གནས་མི་མང་ལ་སྨན་བཅོས་དང་འཚོ་བའི་མཐུན་རྐྱེན་ཞན་པའི་ཐོག བཙན་དབང་རྩུབ་སྤྱོད་ཀྱི་ཐོག་ནས་བཀག་སྡོམ་ཟུར་འཇོག་བྱེད་བཞིན་ཡོད་པའི་རྐྱེན་གྱིས་བོད་མི་ཁག་ཅིག་རང་ཤི་བརྒྱབ་པའི་གནས་ཚུལ་ཐོན་ཡོད་ལ། དེ་བཞིན་བཀག་སྡོམ་སྐབས་གོང་རིམ་གྱི་བཀའ་དང་འགལ་ཏེ་ཡར་མར་འགྲོ་འོང་བྱས་པའི་ཉེས་མིང་འོག མི་མང་འཛིན་བཟུང་བཀག་ཉར་བྱས་པ་དང་རྒྱ་སྒོར་ ༥༠༠ རེ་ཡིས་ཉེས་ཆད་བཅད་ཡོད་པའི་གནས་ཚུལ་བསྟུད་མར་གཞུང་ཕྱོགས་ནས་བརྒྱུད་ལམ་དུ་བསྒྲགས་ཡོད་པ་རེད། འོན་ཀྱང་། ད་ལྟ་བར་དུ་ཏོག་དབྱིབས་གཉན་རིམས་རྐྱེན་གྱིས་བོད་མི་ག་ཚོད་ཅིག་དུས་མིན་རྐྱེན་འདས་སུ་ཕྱིན་ཡོད་མེད་རྒྱ་ནག་གཞུང་ཕྱོགས་ནས་ཕྱིར་བསྒྲགས་བྱས་མེད་པ་རེད།