དབྱིན་ཡུལ་གཞུང་གིས་བོད་དོན་ཐོག་རྒྱབ་སྐྱོར་སྔར་ལྷག་གནང་བའི་འབོད་སྐུལ་ཞུས་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་བོད་མི་མང་སྤྱི་འཐུས་ཚོགས་གཙོ་མཆོག་རྣམ་གཉིས་ནས་དབྱིན་ཡུལ་གྱི་སྐབས་ ༥༧ པའི་སྲིད་བློན་རི་ཤེ་སོ་ནཱག་མཆོག་ལ་འཚམས་འདྲི་ཞུས་པ་དང་སྦྲགས་དབྱིན་གཞུང་ནས་བོད་དོན་རྒྱབ་སྐྱོར་སྔར་ལྷག་གནང་བའི་འབོད་སྐུལ་ཞུས་འདུག

ཟླ་འདིའི་ཕྱི་ཚེས་ ༢༥ ཉིན་རྒྱ་གར་མི་རྒྱུད་ཡིན་པའི་སྐུ་ཞབས་རཱི་ཤེ་སོ་ནཱག་(Rishi Sunak )མཆོག་གིས་ཁ་གཏད་མེད་པའི་ཐོག་ནས་དབྱིན་ཡུལ་གྱི་སྐབས་ ༥༧ པའི་སྲིད་བློན་དུ་བསྐོ་གཞག་བྱུང་ཡོད་པ་ལྟར། ཁ་སང་ཕྱི་ཚེས་ ༢༦ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་ནས་སྲིད་བློན་མཆོག་ལ་འཚམས་འདྲི་གནང་འདུག སྲིད་བློན་ཁོང་ནི་ལོ་འདིའི་ནང་གི་དབྱིན་ཡུལ་གྱི་སྲིད་བློན་གསུམ་པ་དེ་ཆགས་ཡོད་པ་རེད།

དེ་ཡང་སྲིད་སྐྱོང་མཆོག་གི་འཚམས་འདྲིའི་ནང་དུ། ངས་བོད་མིའི་སྒྲིག་འཛུགས་དང་བོད་མི་མང་གི་ཚབ་བྱས་ཏེ་སྐུ་ཉིད་དབྱིན་ཡུལ་གྱི་སྲིད་བློན་གསར་པར་འདེམས་ཐོན་བྱུང་བར་རྟེན་འབྲེལ་ཞུ། དབྱིན་བོད་གཉིས་ཀྱི་བར་དུ་ལོ་རྒྱུས་ཀྱི་དུས་ཡུན་རིང་པོའི་མཛའ་འབྲེལ་ཆགས་ཡོད། ཕྱི་ལོ་ ༡༩༦༠ ལོ་ནས་བཟུང་བོད་མི་མང་པོ་དབྱིན་ཡུལ་ནང་དུ་གནས་སྤོ་བྱས་ཏེ་བོད་མིའི་གྲངས་འབོར་ཇེ་མང་དུ་འགྲོ་བཞིན་ཡོད། དབྱིན་ཇིའི་སྲིད་གཞུང་དང་གྲོས་ཚོགས་བོད་དོན་རྒྱབ་སྐྱོར་བ། དབྱིན་ཡུལ་གྱི་ཞི་བདེར་དགའ་བའི་མི་མང་ནས་ཡིད་ཆེས་བརྟན་པོས་བོད་པར་རྒྱབ་སྐྱོར་བྱས་དང་བྱེད་བཞིན་ཡོད། ཅེས་གསུངས་འདུག

ཡང་སྲིད་སྐྱོང་མཆོག་ནས་དབྱིན་ཇིའི་སྲིད་གཞུང་གིས་འགྲོ་བ་མིའི་ཐོབ་ཐང་གོང་སྤེལ་ཆེད་ཕྱི་ལོ་ ༢༠༢༠ ལོར་འཛམ་གླིང་འགྲོ་བ་མིའི་ཐོང་ཐང་སྲུང་སྐྱོབ་ཀྱི་བཅའ་ཁྲིམས་(UK Global Human Rights Sanctions Regime 2020 )གཏན་འབེབ་ལག་བསྟར་གནང་བཞིན་པར་བསྔགས་བརྗོད་དང་། དབྱིན་ཡུལ་གྱིས་བོད་མིར་རྒྱབ་སྐྱོར་མུ་མཐུད་དུ་གོང་འཕེལ་གཏོང་བཞིན་པར་ཐུགས་རྗེ་ཆེ་ཞུ། དེ་བཞིན་སྲིད་བློན་མཆོག་གིས་འབྱུང་འགྱུར་དབྱིན་ཡུལ་གཞུང་དང་མི་མང་གི་དཀའ་ངལ་རྣམས་ལ་གདོང་ལེན་ཕན་ནུས་ལྡན་པ་གནང་ཐུབ་པ་དང་། བོད་ནང་དུ་རྒྱ་ནག་གཞུང་གིས་མི་ལོ་བཅུ་ཕྲག་ཁ་ཤས་རིང་དྲག་གནོན་བྱེད་བཞིན་ཡོད་པར་དྲང་བདེན་གྱི་རྒྱབ་སྐྱོར་མུ་མཐུད་གནང་བའི་འབོད་སྐུལ་ཞུས་འདུག

གཞན་ཡང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། དབྱིན་ཡུལ་གཞུང་དང་མི་མང་གིས་བོད་མིའི་འཚེ་མེད་ཞི་བདེའི་འཐབ་རྩོད་ལ་ཡིད་ཆེས་བརྟན་པོའི་ཐོག་ནས་དུས་རྒྱུན་དུ་རྒྱབ་སྐྱོར་གནང་བཞིན་པར་ཐུགས་རྗེ་ཆེ་ཞུ། ཁྱེད་ཀྱི་བླ་ན་མེད་པའི་རྣམ་དཔྱོད་ཀྱིས་དབྱིན་ཡུལ་མི་མང་གི་རེ་འདོད་ལེགས་འགྲུབ་ཡོང་བ་དང་། ང་ཚོས་ཁྱེད་ཀྱི་ལས་ཡུན་རིང་གཡུར་དུ་ཟ་བའི་གྲུབ་འབྲས་འཐོབ་རྒྱུར་རེ་སྒུག་བྱེད་བཞིན་ཡོད། ཅེས་གསུངས་འདུག

སྐུ་ཞབས་རཱི་ཤེ་སའོ་ནཱག་མཆོག་ནི་ཕྱི་ལོ་ ༡༩༨༠ ལོར་དབྱིན་ཡུལ་གྱི་སའོ་ཐི་ཨམ་ཊོན་ (Southampton) གྲོང་ཁྱེར་ནང་སྐྱེས་ཤིང་། ཁོང་གིས་དབྱིན་ཡུལ་གྱི་ (Hampshire) རྫོང་ཁོངས་གཞི་རིམ་དང་མཐོ་རིམ་སློབ་གཉེར་གནང་རྗེས། ཕྱི་ལོ་ ༢༠༠༡ ལོར་དབྱིན་ཡུལ་གྱི་ཨོ་ཁི་སི་ཧྥོར་ཌི་གཙུག་ལག་སློབ་གྲྭ་ཆེན་མོ་ནས་རིག་པའི་གཞུང་ལུགས་དང་ཆབ་སྲིད། དཔལ་འབྱོར་རིག་པའི་ཐོག་སློབ་མཐར་ཕྱིན། ཕྱི་ལོ་ ༢༠༠༦ ལོར་སི་ཊན་ཧྥོར་ཊི་གཙུག་ལག་སློབ་གཉེར་ཁང་ (Stanford University) ནས་ཚོང་ལས་རིག་པའི་ཐོག་ལ་གཙུག་ལག་འབྱམས་པ་ཐོན། ཕྱི་ལོ་ ༢༠༠༡ ནས་ ༢༠༠༤ བར་ལོ་བཞིའི་རིང་ལ་ (Goldman Sachs) ཟེར་བའི་མ་འཛུགས་དངུལ་ཁང་དུ་ཕྱག་ལས་གནང་། ཕྱི་ལོ་ ༢༠༡༥ ནས་ད་བར་དབྱིན་ཡུལ་གྲོས་ཚོགས་ཀྱི་རྙིང་ཞེན་ཚོགས་པའི་འཐུས་མི་གནང་ཡོད་པ་དང་། ཕྱི་ལོ་ ༢༠༡༩ ནས་ ༢༠༢༠ བར་དུ་དབྱིན་ཡུལ་དཔལ་འབྱོར་ལྷན་ཁང་གི་སྤྱི་ཁྱབ་དྲུང་ཆེ་སོགས་ཀྱི་ཕྱག་ལས་གནང་ཡོད་འདུག

བྱམས་པ་ཚེ་རིང་།