ཕྱི་ཟླ ༡༠ ཚེས ༢༦ ནས་བཟུང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་གྱི་ཨུ་ཌར་ཁན་དང་། བྷི་ཧར། ཨ རུ་ན་ཅལ། མེ་གྷ་ལ་ཡ། ན་ག་ལེན་ཌ་མངའ་སྡེ་བཅས་ཀྱི་ནང་དུ་གཞུང་འབྲེལ་འཚམས་གཟིགས་ཕྱོགས་ཕེབས་གནང་བཞིན་ཡོད་པ་ལྟར། དེ་རིང་ཕྱི་ཚེས་ ༢ ཉིན་གྱི་སྔ་དྲོའི་ཆུ་ཚོད་༩།༣༠ སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་བྱང་ཤར་ཏི་ཛུ་དར་རྒྱས་གླིང་བོད་པའི་གཞིས་ཆགས་སུ་ཕེབས་ཏེ། དེ་གའི་ལྷ་དགོན་བྱང་ཆུབ་ཆོས་གླིང་དང་ས་གནས་མགོ་འཛིན་ལས་ཁུངས། སྨན་རྩིས་ཁང་། འཕྲོད་བསྟེན་ཁང་། བུ་བཅོལ་ཁང་། རྒན་གསོ་ཁང་སོགས་སུ་འཚམས་གཟིགས་གནང་ཡོད་ཅིང་། ཉིན་རྒྱབ་ནས་བཟུང་སཾ་བྷོ་ཊ་སློབ་གྲྭ་དང་མེའོ་ཆོས་འཕེལ་གླིང་། ཀྲུ་ཀྲིང་། བསྟན་འཛིན་སྒང་། འབུམ་སྡེ་ལ། རྟ་དབང་སོགས་ཀྱི་ནང་དུ་འཚམས་གཟིགས་གནང་རྒྱུ་ཡིན་འདུག
དེ་ཡང་ཕྱི་ཟླ ༡༠ ཚེས ༢༧ ཉིན་དཔལ་ས་སྐྱ་མཐོ་སློབ་དབུ་བརྙེས་ནས་མི་ལོ་༥༠ འཁོར་བའི་དུས་དྲན་དང་བསྟུན་ནས་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་ལ་ས་སྐྱའི་ལྷ་སྡེ་མི་སྡེ་ཡོངས་ཀྱིས་བརྟན་བཞུགས་བསྟར་འབུལ་ཞུས་ཡོད་པ་དང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་།བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག རྒྱ་གར་གྲོས་ཚོགས་འཐུས་མི་འཇམ་དབྱངས་ཚེ་རིང་རྣམ་རྒྱལ་མཆོག ཆོས་རིག་དྲུང་ཆེ་འཆི་མེད་ཚེ་དབྱངས་ལགས། བོད་མི་མང་སྤྱི་འཐུས་ཁག་ཅིག བཀའ་ཟུར་ཁག་ཅིག དེ་བཞིན་ཚོགས་པ་ཁག་གི་སྐུ་ཚབ་དང་སེར་སྐྱ་མི་མང་བཅས་མཉམ་འཛོམས་གནང་ཡོད་འདུག
དེ་བཞིན་ཕྱི་ཟླ་༡༠ ཚེས་ ༢༨ ཉིན་གྱི་ས་སྐྱའི་མཐོ་སློབ་ཀྱི་མཛད་སྒོའི་ཐོག་སྲིད་སྐྱོང་མཆོག་གིས།༧གོང་ས་རྒྱལ་བ་རིན་པོ་ཆེ་མཆོག་དང་། ༧ས་སྐྱ་གོང་མ་རིན་པོ་མཆོག་གི་དབུས་བསྟན་བདག་བླ་ཆེན་རྣམ་པས་སྐུ་ལས་བསྐྱོན་པ་བརྟེན་ནས་བོད་བརྒྱུད་ནང་བསྟན་རྒྱ་གར་ནང་མ་ཉམས་གོང་འཕེལ་བྱུང་ཡོད་པ་དང་། ཧི་མ་ཡ་ལའི་རི་རྒྱུད་ཀྱི་འཛིན་སྐྱོང་སྤེལ་གསུམ་བྱེད་བཞིན་ཡོད་པར་མུ་མཐུད་དུ་གནང་དགོས་སྐོར་དང་། རྒྱ་ནག་གཞུང་གིས་རྒྱུད་གཅིག་ལམ་གཅིག་གི་སྲིད་ཇུས་སྤེལ་ནས་གྲངས་ཉུང་མི་རིགས་ཀྱི་སྐད་ཡིག་དང་རིག་གཞུང་རྩ་གཏོར་བཏང་དང་གཏོང་བཞིན་ཡོད་པར། བཙན་བྱོལ་དང་ཧི་མ་ལ་ཡའི་རི་རྒྱུད་ཀྱིས་ཕན་ཚུན་རོགས་འདེགས་བྱས་ནས་སྲུང་སྐྱོབ་གང་ལེགས་བྱེད་དགོས་སྐོར་གསུངས་ཡོད་འདུག ཉིན་རྒྱབ་སྲིད་སྐྱོང་མཆོག་སེ་ལ་ཀུ་བོད་ཁྱིམ་སློབ་གྲྭར་འཚམས་གཟིགས་ཕེབས་ཡོད་པ་དང་། སྐབས་དེར་སྲིད་སྐྱོང་མཆོག་གིས་བཙན་བྱོལ་སློབ་གྲྭ་ཁག་ནང་གི་སློབ་ཕྲུག་གི་གྲངས་འབོར་གནས་སྟངས་དང་། བོད་ནང་རྒྱ་ནག་གིས་བོད་ཐོག་སྤེལ་བཞིན་པའི་རྒྱ་བསྒྱུར་གྱི་ཤེས་ཡོན་སྲིད་ཇུས་ལག་བསྟར་བྱེད་ཕྱོགས། དེ་བཞིན་བཙན་བྱོལ་ནང་དུ་བོད་དོན་ཤེས་པའི་ཐོག་ནས་བོད་ཀྱི་ལོ་རྒྱུས་ཀྱི་གལ་གནད་སྐོར་གྱི་གསུང་བཤད་དང་དྲི་བ་དྲིས་ལན་གནང་ཡོད་འདུག
ད་དུང་ཉིན་དེའི་རྒྱབ་ཏུ་རྒྱ་གར་དབུས་གཞུང་ཤེས་ཡོན་ལྷན་ཚོགས་ནས་སྡེ་ར་ལྡུན་དུ་རྟེན་གཞི་བྱས་པའི་དཔལ་༧འབྲི་གུང་རྡོ་རྗེ་དབྱིངས་ཀྱི་འབྲིང་རིམ་སློབ་གྲྭ་དེ་ལ་དྭགས་མཚན་ཉིད་སློབ་གཉེར་ཁང་གི་ཁོངས་གཏོགས་སློབ་གཉེར་ཁང་ཚད་ལྡན་ཡིན་པའི་ཆོག་མཆན་སྩལ་བའི་དབུ་འབྱེད་མཛད་སྒོ་འཚོགས་ཡོད་ཅིང་། མཛད་སྒོའི་ཐོག་སྲིད་སྐྱོང་མཆོག་སྤེན་པ་ཚེ་རིང་མཆོག་དང་། རྒྱ་གར་དབུས་རིག་གཞུང་དང་ཕྱི་འབྲེལ་བློན་ཆེན་གཞོན་པ་ལྕམ་མི་ནཱག་ཤི་ལེ་ཀི་(Minakshi Lekhi)མཆོག རྒྱ་གར་གྲོས་ཚོགས་འཐུས་མི་འཇམ་དབྱངས་ཚེ་རིང་རྣམ་རྒྱལ་ལགས་བཅས་ཚོགས་བཅར་གནང་ཡོད་འདུག
ཕྱི་ཟླ་ ༡༠ ཚེས ༢༩ ཉིན་སྲིད་སྐྱོང་མཆོག་མ་སུ་རི་བོད་ཕྲུག་ཁྱིམ་སྡེ་སློབ་གྲྭར་འཚམས་གཟིགས་ཕེབས་ཡོད་པ་དང་། སྐབས་དེར་བཀའ་ཟུར་འབྲོང་ཆུང་དངོས་གྲུབ་ལགས་དང་། ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས། སྡེ་ར་ལྡུན་ས་གནས་མགོ་འཛིན། མ་སུ་རི་བོད་ཕྲུག་ཁྱིམ་སྡེའི་འགན་འཛིན་ལྷན་ཚོགས་ཀྱི་ཚོགས་མི་བཅས་ལྷན་བཅར་གནང་ཡོད་འདུག་ལ། སློབ་གྲྭར་གཟིགས་ཞིབ་གནང་རྗེས། སློབ་གྲྭའི་ཚོགས་ཁང་དུ་དགེ་ལས་སློབ་མ་ཡོངས་ལ་༧གོང་ས་མཆོག་གི་བཀའ་དགོངས་ལག་ལེན་བསྟར་དགོས་པའི་གལ་གནད་སྐོར་སོགས་གསུང་བཤད་གནང་འདུག
ཉིན་དེའི་རྒྱབ་ཏུ་སྲིད་སྐྱོང་མཆོག་མ་སུ་རི་བོད་ཕྲུག་ཁྱིམ་སྡེའི་འགན་འཛིན་ལྷན་ཚོགས་ཐེངས་༤༦ པའི་ཚོགས་འདུར་མཉམ་ཞུགས་གནང་ཡོད་པ་དང་། དེའི་རྗེས་སུ་སྃ་བྷོ་ཊ་གཏན་སློབ་ཏུ་འཚམས་གཟིགས་གནང་ནས་དགེ་སློབ་ཡོངས་ལ་༧གོང་ས་མཆོག་གི་བཙན་བྱོལ་གྱི་བཞུགས་ཡུལ་ཐོག་མའི་ལོ་རྒྱུས་དང་སྦྱར་ནས་མི་རབས་རྒན་པའི་དཀའ་ལས་བརྒྱབ་སྟེ་མི་རབས་གསར་པར་བསྐྲུན་པའི་བཙན་བྱོལ་སྤྱི་ཚོགས་སྐོར་གསུང་བཤད་དང་དྲི་བ་དྲི་ལན་གནང་ཡོད་འདུག
ཕྱི་ཟླ ༡༠ ཚེས་ ༣༠ ཉིན་མ་སུ་བོད་ཁྱིམ་དབུ་བརྙེས་ནས་ལོ་ངོ་ ༦༠ འཁོར་བར་དགའ་སྟོན་མཛད་སྒོ་ཚོགས་ཡོད་པ་དང་། མཛད་སྒོའི་ཐོག་༧སྐྱབས་མགོན་༧གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བཀའ་ཟུར་འབྲོང་ཆུང་དངོས་གྲུབ་ལགས། ཨུ་ཊར་ཁན་མངའ་སྡེའི་སྤྱི་ཁྱབ་དྲུང་ཆེ་ཟུར་པ་བྷ་ཤཱི་ཀུ་མར་ལགས། སྡེ་ར་ལྡུན་ས་གནས་མགོ་འཛིན་དོན་གྲུབ་རྒྱལ་པོ་ལགས།མ་སུ་རི་བོད་ཕྲུག་ཁྱིམ་སྡེའི་འགན་འཛིན་ལྷན་ཚོགས་ཀྱི་ཚོགས་མི་སོགས་འདུ་འཛོམས་བྱུང་ཡོད་འདུག
ཕྱི་ཟླ ༡༡ ཚེས ༡ ཉིན་རྒྱ་གར་བྷི་ཧར་མངའ་སྡེའི་རྒྱལ་པོའི་ཁབ་(Rajgir)དུ་འཕགས་བོད་མཛའ་འབྲེལ་ཚོགས་པའི་རྒྱལ་ཡོངས་ཚོགས་ཆེན་ཐེངས་ ༩ པ་འཚོག་བཞིན་པའི་ཚོགས་འདུའི་ཉིན་གཉིས་པར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཚོགས་བཅར་བ་ཡོངས་ལ་གསུང་བཤད་དང་དྲི་བ་དྲིས་ལན་གནང་ཡོད་འདུག ཉིན་རྒྱབ་སྲིད་སྐྱོང་མཆོག་རྒྱ་གར་བྱང་ཤར་ཁུལ་བོད་མིིའི་གཞིས་ཆགས་ཁག་ཏུ་གཞུང་འབྲེལ་ཕྱོགས་ཕེབས་གནང་ཡོད་འདུག
བྱམས་པ་ཚེ་རིང་།
