༧གོང་ས་མཆོག་གིས་འཛམ་གླིང་ནང་ཞི་བདེ་དང་འཚེ་མེད་ཞི་བ། བྱམས་སྙིང་རྗེ་སོགས་ཀྱི་མཛད་འཕྲིན་རླབས་ཆེན་བསྐྱངས་པའི་ངོས་འཛིན་འོག་གྷན་དྷི་མན་ཌ་ལ་གསེར་གྱི་གཟེངས་རྟགས་ཐོག་མ་དེ་འབུལ་བཞེས་མཛད་སོང་།
དེ་རིང་སྔ་དྲོའི་ཆུ་ཚོད་ ༩།༣༠ ཙམ་གྱི་སྟེང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། བདག་ཉིད་ཆེན་པོ་གྷན་དྷི་མཆོག་དང་ནལ་སན་མན་ཌ་ལ་མཆོག་རྣམ་གཉིས་ཀྱི་མཚན་ཐོག་ཏུ་བཙུགས་པའི་རྒྱ་གར་གྱི་ཐེབས་རྩ་ཁང་ཞིག་གིས། ཧི་མ་ཅལ་མངའ་སྡེའི་སྲིད་སྐྱོང་སྐུ་ཞབས་རཱ་ཇི་ཌ་རཱ་ཨར་ལེག་ལགས་བརྒྱུད་ནས་༧གོང་ས་རྒྱལ་བ་རིན་པོ་ཆེ་མཆོག་ལ་ཕྱི་ལོ་ ༢༠༡༩ ལོའི་གྷན་དྷི་མན་ཌ་ལའི་གཟེངས་རྟགས་ཐོག་མ་དེ་འབུལ་བཞེས་མཛད་པ་དང་བསྟུན། ༧གོང་ས་མཆོག་གིས་ཧི་མ་ཅལ་མངའ་སྡེའི་སྲིད་སྐྱོང་མཆོག་གི་དབུས་པའི་ཧི་ཅལ་མངའ་སྡེའི་གནད་ཡོད་མི་སྣ་ཁག་དང་བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམས་གཙོས་སྲི་ཞུའི་ལས་བྱེད་ཁག་ཅིག་དང་བཞུགས་སྒར་ཁུལ་དང་ཕྱོགས་མཐའ་ཁག་ནས་ཕེབས་པའི་དད་ལྡན་སེར་སྐྱ་མི་མང་བཅས་ལ་བཀའ་སློབ་སྩལ་གནང་སོང་།
སྐབས་དེར་༧མགོན་པོ་གང་ཉིད་མཆོག་གིས། དེ་རིང་འདིར་ཉམས་དོགས་ས་ནས་ཞུས་ན། ང་ཚོ་ཚང་མར་ཆོས་དད་ཡོད་བསྡད་པ་དང་ལས་རྒྱུ་འབྲས་སྲུང་བ། སེམས་བཟང་པོ་ཡོད་ཚེ་རང་གཞན་གཉིས་ལའང་ཕན་ཐོགས་ཡོང་གི་རེད། དེ་ཡང་ཆོས་ཕྱོགས་ནས་བསམ་བློ་ཡོད་པ་ཡོང་གི་རེད། འོན་ཀྱང་། ཆོས་ཕྱོགས་ཀྱི་བསམ་བློ་གང་ཡང་མེད་པར་སྤྱིར་བཏང་གི་མི་ཞིག་འདུ་ཤེས་ཀྱི་དབང་དུ་བཏང་ན། དུད་འགྲོ་ཚོར་ཆོས་མེད་ཀྱང་སེམས་བཟང་དང་གཅིག་གིས་གཅིག་ལ་རོགས་བྱ་རྒྱུར་དགའ་པོ་བྱེད་ཀྱི་འདུག དེར་བརྟེན། དེ་རིང་ང་ཚོ་འདིར་འཛོམས་པ་ཚོར་ཕྱོགས་གཅིག་ནས་ཆོས་དད་ཡོད་པ་དང་། གཉིས་ནས་ང་ཚོ་འཛམ་གླིང་འདིའི་སྒང་འཚོ་གནས་དགོས་པའི་མི་གཅིག་གྱུར་ཆགས་ཡོད། སྔ་མོ་འཛམ་གླིང་འདིའི་སྒང་སོ་སོའི་ལུང་པ་དང་མི་རིགས་གླེང་ནས་འཐབ་རྩོད་བྱེད་པ་དང་གསོད་རེས་བྱས་ནས་བསྡད་པ་རེད། དེ་ལ་སྙིང་པོ་ཁྱོན་ནས་མེད་པ་དང་རང་མེད་མིར་མེད་བཟོ་བའི་རྒྱུ་ཆགས་བསྡད་ཡོད། དཔེར་ན་ངོས་ཀྱི་མི་ཚེ་སྟོད་ལ་ཆ་བཞག་ན། གཅིག་གིས་གཅིག་ལ་དབང་ཡོད་དང་ཐུབ་ཚོད། ཕྲག་དོག་སོགས་བྱས་ནས་རང་རྒྱལ་གཞན་ཕམ་གྱི་བསམ་བློ་བཏང་དུས། མཐར་ཐུག་རང་གཞན་གཉིས་ལའང་གྱོང་གུད་རག་པ་ལས་གཞན་གང་ཡང་མེད་པ་རེད།
ད་འཛམ་གླིང་འདིའི་སྒང་ཉམས་མྱོང་གསར་པ་མི་གཅིག་གྱུར་གྱི་འདུ་ཤེས་བཟུང་ནས། མི་ཚང་མས་བདེ་སྐྱིད་འདོད་ཅིང་སྡུག་བསྔལ་མི་འདོད་པ་གཅིག་གྱུར་ཡིན་སྟབས། དེ་རང་གི་ཐོག་ནས་ང་རང་ཚོ་ཚང་མས་གཅིག་གིས་གཅིག་ལ་ཕན་ཐོགས་བྱ་རྒྱུ་ལས། གཅིག་གིས་གཅིག་ལ་འགྲན་བསྡུར་དང་བརྣག་སེམས་དང་གནོད་སེམས་བཅིང་ན་ཕན་ཐོགས་མེད། ངོས་ནས་ནམ་རྒྱུན་འདི་ལྟར་ཤོད་ཀྱི་ཡོད། འཛམ་གླིང་གི་མི་ཐེར་འབུམ་བདུན་ནས་བརྒྱད་ཡོད་པ་ཚང་མ་སྐྱིད་ན་སྐྱིད་མཉམ་དང་སྡུག་ན་སྡུག་མཉམ་ཆགས་ཡོད་པ་མ་གཏོགས། སོ་སོའི་བྱེ་བྲག་པ་ཞིག་གི་བདེ་སྐྱིད་དང་རང་རྒྱལ་གཞན་ཕམ་གྱི་བསམ་བློ་གཏང་ན་དངོས་ཡོད་གནས་ཚུལ་ལ་རན་གྱི་མེད། དེ་རིང་ངོས་ནས་འདིར་ཞུ་རྒྱུ་ནི། ཁྱེད་རང་ཚོ་འདིར་ཡོད་པའི་གྲོགས་པོ་རྣམས་ཆ་བཞག་ན། མི་གཅིག་གྱུར་གྱི་འདུ་ཤེས་ཐོག་ནས་ཡོང་གི་ཡོད་པ་མ་གཏོགས་མི་རིགས་མི་འདྲ་བ་དང་ཆོས་ལུགས་ཀྱི་སྐད་ཆ་ང་ཚོས་བརྗོད་ཀྱི་མེད། ང་ཚོ་ཚང་མས་མི་གཅིག་གྱུར་གྱི་འདུ་ཤེས་བཟུང་ནས་གཅིག་གིས་གཅིག་ལ་བརྩེ་བ་དང་དགའ་མོས་བྱས་ནས་ཡོང་གི་ཡོད།
དེ་རིང་ཁ་སང་དངོས་ཡོད་གནས་ཚུལ་ཐོག་ཚན་རིག་པ་ཚོས་ཀྱང་བརྗོད་ཀྱི་ཡོད། འཛམ་གླིང་གི་ཚ་དྲོད་རིམ་བཞིན་ཆེ་རུ་འགྲོ་ཡི་ཡོད། ང་ཚོའི་གསུང་རབ་ནང་དུའང་སྐལ་བ་མེ་འཇིག ཆུ་འཇིག རླུང་འཇིག་ཅེས་ནས་གསུངས་ཡོད། ད་ལྟའི་སྐལ་བ་འདི་སྐལ་བ་མེ་འཇིག་གི་སྒང་དུ་བསླེབ་ཀྱི་ཡོད་པ་དང་འཛམ་གླིང་གི་ཚ་དྲོད་ཆེ་རུ་འགྲོ་བཞིན་པ་ཚན་རིག་པ་ཚོས་བརྗོད་ཀྱི་འདུག དེར་བརྟེན། འཛམ་གླིང་འདི་རིམ་བཞིན་སྐལ་བ་མེ་འཇིག་གི་སྒང་དུ་སླེབས་ཏེ་མེད་པར་ཆགས་ཡོང་དུས། ང་ཚོ་ཚང་མ་མི་གཅིག་གྱུར་ཡིན་པའི་འདུ་ཤེས་ཀྱི་ཐོག་ནས་གཅིག་ཕན་གཅིག་གྲོགས་བྱ་རྒྱུ་གལ་ཆེན་པོ་རེད་མ་གཏོགས། ང་ཚོའི་རྒྱལ་ཁབ་དང་མི་རིགས། ཆོས་ལུགས་བཤད་པའི་དུས་ཚོད་མེད། དེར་བརྟེན། མི་གཅིག་གྱུར་གྱི་འདུ་ཤེས་ཐོག་ནས་ང་ཚོས་ཕན་ཚུན་གཅིག་གིས་གཅིག་ལ་རོགས་པ་དང་བརྩེ་བ་སྤྲོད་རྒྱུ་གལ་ཆེན་པོ་ཞེ་དྲགས་རེད།
རྒྱ་གར་གྱི་གནའ་བོའི་རིག་གཞུང་དུ་ཡོད་པའི་འཚེ་མེད་ཞི་བ་དང་སྙིང་རྗེ་དེ་དཔེ་གལ་ཆེན་པོ་རེད་འདུག གཅིག་གིས་གཅིག་ལ་འཚེ་བ་མི་བྱེད་པར་འཆམ་མཐུན་བྱེད་པ་དང་འཆམ་མཐུན་ཡོང་བའི་རྩ་བ་ནི་མི་གཅིག་གྱུར་གྱི་འདུ་ཤེས་ཐོག་ནས་གཅིག་གིས་གཅིག་ལ་བརྩེ་བ་བྱེད་དགོས། ཚ་དྲོད་རྐྱེན་གྱིས་རིམ་བཞིན་འཛམ་གླིང་འདི་སྐལ་བ་མེ་འཇུག་གི་མཚམས་ལ་གང་འཚམ་ཡོང་གི་ཡོད། འོན་ཀྱང་། དེའི་རིང་ལ་ང་ཚོ་གཅིག་གིས་གཅིག་ལ་འཆམ་པོ་དང་རོགས་བྱེད་དགོས། རྒྱ་གར་གྱི་ལོ་སྟོང་ཕྲག་རིང་གི་འཚེ་མེད་ཞི་བ་དང་སྙིང་རྗེ་དེ་གལ་ཆེན་པོ་ཞེ་དྲགས་རེད། ངོས་རང་ལ་ཆ་བཞག་ན་ཉིན་རེ་བཞིན་དུ་སྒོམ་བརྒྱབ་ཡོང་དུས། སྙིང་རྗེ་བསམ་བློ་གཏོང་གི་ཡོད་པ་དང་དེ་ལ་བརྟེན་ནས་འཚེ་བ་མེད་པ་དེ་རང་ཤུགས་ཀྱིས་ཡོང་གི་འདུག དཔེ་གལ་ཆེན་པོ་རེད་འདུག དེ་ཆོས་ལུགས་དང་སྐྱེས་པ་ཕྱི་མའི་སྐད་ཆ་མ་རེད། ཚེ་ཐོག་འདིའི་རིང་ཉིན་རེ་བཞིན་དུ་སེམས་སྐྱིད་པ་དང་གུ་ཡངས་པ་ཡོང་བར་སྙིང་རྗེའི་བློ་དེ་ཞེ་དྲགས་གལ་ཆེན་ཡིན། སེམས་ཀྱི་ཞི་བདེའང་དེའི་ཐོག་ནས་ཡོང་གི་ཡོད་པ་དང་ཞི་བདེ་ཡོད་ཚེ་བསམ་བློ་རང་བཞིན་གྱིས་རྒྱ་ཇེ་ཆེར་ཕྱིན་པ་ལ་བརྟེན་ནས་འཚེ་བ་ཞི་བའང་ཡོང་གི་ཡོད། ཅེས་གསུངས།
གྷན་དྷི་མན་ཌ་ལ་གཟེངས་རྟགས་གོ་སྒྲིག་ཚོགས་ཆུང་གིས། ༧གོང་ས་མཆོག་ལ་གཟེངས་རྟགས་དེ་ཐོག་མར་ཕུལ་དོན་ནི། ༧གོང་ས་མཆོག་ནི་འཛམ་གླིང་ནང་དབུ་འཁྲིད་མང་བོ་ཡོད་པའི་ཁྲོད་ནས་གྷན་དྷི་དང་མན་ཌ་ལ་རྣམ་གཉིས་ཀྱི་འཚེ་མེད་ཞི་བའི་ལམ་དུ་ཕེབས་ནས། མི་རབས་གསར་པ་རྣམས་ལ་ཞི་བདེ་དང་འཚེ་མེད་ཞི་བ་དང་བྱམས་སྙིང་རྗེའི་ལམ་སྟོན་མཁན་ཞིག་ཡིན་པར་མ་ཟད། ༧མགོན་པོ་ཁོང་གིས་བོད་དེ་ཞི་བདེའི་བསྟི་གནས་ཤིག་ཏུ་བསྒྱུར་བ་དང་། མི་མང་གི་གཞི་རྩའི་ཐོབ་ཐང་དང་དམངས་གཙོའི་རང་དབང་ལ་གུས་བཀུར་མཛད་བཞིན་པ། དེ་བཞིན་བོད་ཀྱི་ཁོར་ཡུག་སྲུང་སྐྱོབ་དང་སླར་གསོ། འཛམ་གླིང་ཡོངས་སུ་འཚེ་མེད་ཞི་བ་དང་ཆོས་ལུགས་མཐུན་སྒྲིལ་དགོས་གལ་ཆེ་བའི་བཀའ་སློབ་སྩལ་དང་སྩལ་མུས་ཡིན་པ་སོགས་ལ་བརྟེན་ནས་གཟེངས་རྟགས་དེ་ཕུལ་ཡོད་སྐོར་བརྗོད་སོང་།
གསར་འགོད་པ། སྐལ་བཟང་སྦྱིན་པ།
