རྒྱ་ནག་གཞུང་གིས་བསང་ཆུ་རྫོང་གི་རྩྭ་ཐང་རྒྱ་ཁྱོན་སྨི་ཁྲི་ ༡༥༥ ལྷག་གི་ནང་དུ་བོད་མི་ཚོས་ཕྱུགས་ཟོག་འཚོ་མི་ཆོག་པའི་བཙན་བཀའ་བཏང་ཡོད་འདུག
རྒྱ་ནག་གཞུང་གིས་《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩྭ་ཐང་བཅའ་ཁྲིམས་》ཟེར་བར་ཁ་གཡར་ནས་བོད་ནང་གི་རོང་འབྲོག་མང་ཚོགས་ཀྱི་རྩྭ་ཐང་བདག་བཟུང་བྱེད་ཀྱི་ཡོད་པ་ལྟར། རྒྱ་ནག་གཞུང་གིས་ཟླ་འདིའི་ཕྱི་ཚེས་ ༡ ནས་ཕྱི་ལོ ༢༠༢༥ བར་བོད་མདོ་སྨད་བསང་ཆུ་རྫོང་གི་བོད་ཀྱི་རོང་འབྲོག་མང་ཚོགས་ཀྱི་སྨི་ཁྲི་ ༡༥༥ ལྷག་གི་རྩྭ་ཐང་ཁུལ་དུ་ཕྱུགས་ཟོག་འཚོ་མི་ཆོག་སྐོར་གྱི་བཀའ་བསྒྲགས་ནས། བོད་ཀྱི་རོང་འབྲོག་མང་ཚོགས་ཀྱི་རྩྭ་ས་བདག་བཟུང་བྱ་རྒྱུའི་སྲིད་ཇུས་ཤིག་ལག་བསྟར་བྱས་དང་བྱེད་མུས་ཡིན་འདུག
འདི་གའི་གསར་འགོད་པར་གནས་ཚུལ་མཁོ་སྤྲོད་པས། ད་ལྟ་རྒྱ་ནག་གཞུང་གིས་མདོ་སྨད་བསང་ཆུ་རྫོང་ཁོངས་ཀྱི་འབྲོག་པ་རྣམས་ཀྱིས་རྩྭ་ཐང་དུ་ཕྱུགས་ཟོག་འཚོ་མི་ཆོག་པར་བྱས་པ་ནི། རྒྱ་ནག་གཞུང་གིས་བོད་ཀྱི་རོང་འབྲོག་མང་ཚོགས་ཀྱི་རྩྭ་ཐང་བདག་བཟུང་བྱ་རྒྱུའི་གོམ་པ་དང་པོ་དེ་རེད། སྔོན་མ་རྒྱ་ནག་གཞུང་གིས་རྩྭ་རྭ་དེ་དག་ཁྱིམ་ཚང་རེ་རེར་བགོས་བཞག་ཡོད་ཀྱང་། ད་ཆ་རྩྭ་རྭ་དེ་དག་མི་མང་གི་ལག་ནས་ཕྱིར་བླང་རྒྱུའི་འཆར་གཞི་ཡིན་པ་རེད། སྤྱིར་རྩྭ་ས་དེ་དག་མང་ཚོགས་ཀྱི་ལག་ཏུ་སྤྲད་བཞག་པ་ཡིན་ན། མ་འོངས་པའི་སྲིད་ཇུས་དང་ཁ་མཚུངས་ཀྱི་མེད་པ་རེད། གཙོ་བོ་རྒྱ་ནག་གཞུང་གིས་བོད་མིར་དབང་བའི་རྩྭ་ས་དེ་དག་བོད་མིའི་ལག་ནས་བླང་རྒྱུའི་འཆར་གཞི་ཡིན་སྐོར་འགྲེལ་བརྗོད་གནང་སོང་།
ཡང་ཁོང་གིས། སྤྱིར་བསང་ཆུ་ཁུལ་གྱི་རྩྭ་ཐང་དུ་ཕྱུགས་ཟོག་འཚོ་མི་ཆོག་པའི་བསྒྲགས་ཡིག་ཏུ། རྫོང་དཔོན་གྱི་ས་ཡིག་བཀོད་ནས་ཕྱིར་བསྒྲགས་བྱས་པ་ཞིག་རེད་འདུག་པས། དེ་ནི་རྒྱ་ནག་དབུས་གཞུང་གི་བཀའ་ཞིག་ཕལ་ཆེར་རེད་མི་འདུག་པས། བསང་ཆུ་རྫོང་གི་གཞུང་དང་འབྲོག་པ་མང་ཚོགས་ཀྱི་བར་དུ་རྙོག་དྲ་ཞིག་བྱུང་སྲིད་པ་རེད། དེ་བཞིན་བོད་ཀྱི་རོང་འབྲོག་མང་ཚོགས་ཀྱི་རྩྭ་སར་ཕྱུགས་ཟོག་འཚོ་མ་བཅུག་པ་ནི། བོད་མིའི་འཚོ་ཐབས་སོགས་ལ་གནོད་སྐྱོན་ཆེན་པོ་ཐེབས་ཀྱི་ཡོད་པ་མ་ཟད། བོད་ཁུལ་གྱི་ས་གནས་མང་པོ་ཞིག་ཏུ་རྫོང་དཔོན་སོགས་གཞི་རིམ་དཔོན་པོ་མང་པོ་ཞིག་གིས། ཆབ་སྲིད་ཀྱི་གོ་གནས་དང་ཆབ་སྲིད་ཀྱི་ལམ་ནས་བོད་རིགས་མང་ཚོགས་མགོ་གཡོགས་ནས་བོད་མིའི་རྩྭ་ས་སོགས་འཕྲོག་སྟེ། གཞི་རིམ་མགོ་ཁྲིད་སྒེར་གྱི་ཁེ་བཟང་དང་སྒོར་མོ་གསོག་གིན་ཡོད། དེ་ནི་རྒྱ་ནག་གཞི་རིམ་མགོ་ཁྲིད་ཀྱིས་སྒེར་གྱི་ཁེ་ཕན་དང་། ཁྲིམས་མཐུན་ཡིན་པའི་ཟོལ་གྱིས་བོད་མིའི་ལག་ནས་རྩྭ་ས་འཕྲོག་གིན་ཡོད་སྐོར་འགྲེལ་བརྗོད་གནང་སོང་།
ཟླ་འདིའི་ཕྱི་ཚེས ༡༡ ཉིན་ནས་རྒྱ་ནག་གཞུང་གིས་བླ་བྲང་གྲོང་རྡལ་ནས་རྩྭ་ཐང་གི་རྒྱ་ཁྱོན་སྨི་ཁྲི་ ༣ དང་། མདའ་མེད་ཡུལ་ཚོའི་རྩྭ་ཐང་སྨི་ཁྲི་༢། ༨ བང་གུར་ཐང་གྲོང་ཚོའི་རྩྭ་ཐང་སྨི་ཁྲི་༤།༤ མར་ཐང་གྲོང་ཚོའི་རྩྭ་ཐང་སྨི་ཁྲི་༥། ཆུ་སྔོན་ཡུལ་ཚོའི་རྩྭ་ཐང་རྒྱ་ཁྱོན་སྨི་ཁྲི་༤། ༦ ཐང་དཀར་ནང་ཡུལ་ཚོའི་སེམས་ཅན་འཚོ་མི་ཆོག་པའི་རྩྭ་ཐང་རྒྱ་ཁྱོན་སྨི་ཁྲི་༤།༢ དང་། ཙ་ཡུས་ཡུལ་ཚོའི་རྩྭ་ཐང་རྒྱ་ཁྱོན་སྨི་ཁྲི་༧། ༥ གཞན་ཡང་འབོ་ར་གྲོང་ཚོའི་རྩྭ་ཐང་སྨི་ཁྲི་༧། ༥ སྒྱིས་ཚང་ཡུལ་ཚོའི་སྨི་ཁྲི་༧། ༥ ཨ་མཆོག་གྲོང་ཚོའི་སྨི་ཁྲི་༨།༥ ཡར་རི་རྒྱུད་དོན་གཅོད་ཁང་གི་རྩྭ་ཐང་རྒྱ་ཁྱོན་སྨི་ཁྲི་ ༡༠ དང་། ཁོ་ཚེ་གྲོང་ཚོའི་སྨི་ཁྲི་ ༣༧། ༣ བསང་ཁོག་གྲོང་ཚོའི་སྨི་ཁྲི་ ༡༤། ༡༨ རྒན་གྱ་གྲོང་ཚོའི་སྨི་ཁྲི་ ༣༥ དང་། བསང་ཁོག་ལུག་གསོ་ཚད་ཡོད་ཚོང་ལས་ཁང་གིས་སྨི་ཁྲི་ ༣། ༣༢ བཅས་བླ་བྲང་ཁུལ་གྱི་རྩྭ་ཐང་གི་རྒྱ་ཁྱོན་སྨི་ཁྲི་ ༡༥༥ ལ་ཕྱུགས་ཟོག་འཚོ་མི་ཆོག་པའི་བཙན་བཀའ་བཏང་ཡོད་འདུག
གཞན་ཡང་། རྒྱ་ནག་གཞུང་གིས་བཙན་བཟུང་བྱས་པའི་ས་ཆ་དེ་དག་གི་ཐོག་ཏུ་རོང་འབྲོག་མང་ཚོགས་ཀྱིས་ཕྱུགས་ཟོག་འཚོས་ཚེ། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩྭ་ཐང་བཅའ་ཁྲིམས》ཟེར་བ་དང《ཀན་སུའུ་ཞིང་ཆེན་གྱི་རྩྭ་ཐང་ཐོག་ཕྱུགས་འཚོ་མི་ཆོག་པའི་སྲོལ་ཡིག》《ཀན་སུའུ་ཞིང་ཆེན་གྱི་རྩྭ་ཐང་ཐོག་ཕྱུགས་འཚོ་མི་ཆོག་པའི་བྱ་ཐབས》《ཀན་ལྷོ་བོད་རིགས་རང་སྐྱོང་ཁུལ་རྩྭ་ཐང་གི་དོ་དམ་བྱ་ཐབས》ཟེར་བ་བཞིན་ཆད་པ་གཅད་རྒྱུ་ཡིན་པ་མ་ཟད། དུས་ནས་དུས་སུ་རྒྱ་ནག་གཞུང་གིས་ཉུལ་ཞིབ་དང་སོ་ལྟ་བྱ་རྒྱུ་ཡིན་པའི་འཇིགས་སྐུལ་སོགས་ཀྱང་བྱས་ཡོད་འདུག
གསར་འགོད་པ། དཔལ་ལྡན།
