ཨ་རིའི་རྒྱ་ནག་ལས་དོན་ཚོགས་ཆུང་གིས་རྒྱལ་སྤྱིའི་ཁྲིམས་ལུགས་གཞིར་བཟུང་བོད་མིའི་རང་ཐག་རང་གཅོད་དང་༧གོང་ས་མཆོག་གི་ཐུགས་རེ་བཞིན་གྲོས་མོལ་གྱི་ལམ་ནས་བོད་རྒྱའི་དཀའ་རྙོག་སེལ་བར་ཨ་རིའི་གཞུང་ནས་རྒྱབ་སྐྱོར་གནང་དགོས་པའི་འབོད་སྐུལ་ཞུས་འདུག
ཉེ་ལམ་ཕྱི་ཚེས་ ༡༦ ཉིན་ཨ་རིའི་གྲོས་ཚོགས་གོང་འོག་གི་རྒྱ་ནག་ལས་དོན་ཚོགས་ཆུང་ (Congressional-Executive Commission on China) གིས་ཨ་རིའི་གྲོས་ཚོགས་ལ་ཕྱི་ལོ་ ༢༠༢༢ ལོའི་རྒྱ་ནག་སྐོར་གྱི་ལོ་འཁོར་སྙན་ཐོ་ཞིག་འབུལ་ལམ་ཞུས་ཏེ། ཨ་རིའི་གཞུང་གིས་བོད་རྒྱའི་དཀའ་རྙོག་གྲོས་མོལ་གྱི་ལམ་ནས་སེལ་བར་རྒྱབ་སྐྱོར་དང་རྒྱ་ནག་ལ་གནོན་ཤུགས་སྤྲོད་དགོས་སྐོར་བརྗོད་ཡོད་འདུག
ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་རྒྱ་ནག་སྐོར་གྱི་སྙན་ཐོའི་ནང་བོད་དོན་སྐོར་འཁོད་པའི་ནང་། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རེ་བཞིན་གྲོས་མོལ་གྱི་ལམ་ནས་བོད་རྒྱའི་དཀའ་རྙོག་སེལ་ཐབས་བྱ་རྒྱུའི་ཐད་ལ་རྒྱ་ནག་གཞུང་གིས་མུ་མཐུད་ནས་ཁ་ཡ་བྱེད་ཀྱི་མེད་པ་དང་། བོད་ཀྱི་ལོ་རྒྱུས་དང་འབྲེལ་བའི་གནས་ཚུལ་རྫུན་མ་མུ་མཐུད་ཁྱབ་སྤེལ་གཏོང་གི་ཡོད་པར་བརྟེན། ཨ་རིའི་གཞུང་དང་གྲོས་ཚོགས་གཉིས་ནས་གྲོས་མོལ་གྱི་སྲིད་ཇུས་གོང་སྤེལ་དང་དེའི་ནུས་ཤུགས་ཆེ་རུ་གཏོང་སླད། རྒྱལ་སྤྱིའི་ཁྲིམས་ལུགས་ལྟར་བོད་མི་མང་གི་རང་ཐག་རང་གཅོད་ཀྱི་ཐོབ་ཐང་གཞིར་བཟུང་བའི་ཐོག་ནས་བོད་རྒྱ་གྲོས་མོལ་བྱ་རྒྱུ་ངེས་བརྟན་བཟོ་དགོས་པ་དང་། རྒྱ་གཞུང་གིས་བོད་དང་འབྲེལ་བའི་གནས་ཚུལ་རྫུན་བསྒྲགས་བྱེད་བཞིན་ཡོད་པ་ལ་ཐབས་ལམ་ཡོད་རྒུ་བཏོན་ནས་ཡ་ལན་སློག་དགོས་སྐོར་སོགས་བརྗོད་འདུག
ད་ལན་གྱི་སྙན་ཐོ་དང་འབྲེལ་ནས་རྒྱ་ནག་ལས་དོན་ཚོགས་ཆུང་གི་ཚོགས་གཙོའི་ལས་རོགས་གྲོས་ཚོགས་འོག་མའི་འཐུས་མི་སྐུ་ཞབས་ཇེམ་མེག་གྷ་ཝན་ (James McGovern) ལགས་ཀྱིས། ཚོགས་ཆུང་གི་ངོས་ནས་རྒྱ་ནག་གཞུང་གིས་བོད་མི་དང་ཡུ་གུར། དེ་བཞིན་ཧོང་ཀོང་བ་སོགས་ཀྱི་འགྲོ་བ་མིའི་ཐོབ་ཐང་རྩིེས་མེད་རྡོག་རོལ་ཚབས་ཆེན་གཏོང་མུས་ཡིན་པའི་གནད་དོན་ལ་ལྟ་རྟོག་བྱེད་མུས་ཡིན་པ་དང་། ངས་གྲོས་ཚོགས་འཐུས་མི་དང་འགན་ཡོད་ལྷན་ཁང་ (Executive Branch) གི་ཚོགས་མི་རྣམས་ཀྱིས། ང་ཚོས་བཏོན་པའི་བསམ་འཆར་ཁག་ལག་ལེན་བྱས་ཏེ་རྒྱ་ནག་གཞུང་ལ་འགན་འཁུར་བྱེད་དུ་འཇུག་དགོས་པ་དང་། དམིགས་བསལ་འཛམ་གླིང་ཡོངས་ཁྱབ་ཀྱི་འགྲོ་བ་མིའི་ཐོབ་ཐང་དང་ཁྲིམས་ཀྱི་དབང་སྒྱུར་སོགས་གོང་སྤེལ་གཏོང་དགོས་གལ་ཆེན་ཡིན། ཞེས་བརྗོད་འདུག
ད་ལན་གྱི་ལོ་འཁོར་སྙན་ཐོའི་ནང་། རྒྱ་གཞུང་གིས་རྒྱལ་ཁབ་ཕྱི་ནང་གཉིས་སུ་ཐུན་མོང་མ་ཡིན་པའི་འགྲོ་བ་མིའི་ཐོབ་ཐང་རྩིས་མེད་བཏང་བ་དང་། ལོ་ངོ་ ༦༠ ལྷག་གི་གོང་ནས་རྒྱ་གཞུང་གིས་བོད་བཙན་འཛུལ་བྱས་པ་ནས་བཟུང་། བོད་ནང་ཆོས་དད་རང་མོས་དང་སྨྲ་བརྗོད་ཀྱི་རང་དབང་། སྐད་ཡིག་བཀོལ་སྤྱོད་ཀྱི་རང་དབང་སོགས་བརྩི་མེད་གཏོང་གི་ཡོད་པར་བརྟེན། འདས་པའི་ལོ་ཤས་ནང་བོད་མི་ ༣ གྱིས་རང་ལུས་མེར་བསྲེགས་བཏང་ཡོད་སྐོར་དང་། རྒྱ་གཞུང་གིས་གཞི་རིམ་སློབ་གྲྭ་ནས་བོད་ཀྱི་སྐད་ཡིག་རྩ་མེད་གཏོང་སླད། བོད་ནང་གི་ས་ཁུལ་ཁག་དང་གཏན་སྡོད་སློབ་གྲྭར་རྒྱ་སྐད་བཀོལ་སྤྱོད་མི་བྱེད་ཐབས་མེད་བཟོས་ཤིང་། དམིགས་བསལ་གྱིས་བོད་ཀྱི་སྐད་ཡིག་དང་ཆོས་ལུགས་ཀྱི་ལྟེ་བའི་དགོན་སྡེ་ཁག་དང་ས་ཁུལ་གྱི་སློབ་གྲྭ་སོགས་བོད་མི་རིགས་ལ་གལ་གནད་ཆེ་བའི་རིགས་སྒོ་བརྒྱབ་ཡོད་སྐོར་སོགས་བརྗོད་འདུག་ལ། ཚོགས་ཆུང་གིས། ཨ་རིའི་གྲོས་ཚོགས་འཐུས་མི་རྣམས་ཀྱིས་རྒྱ་ནག་གཞུང་དང་ལྷན་དུ་རྒྱའི་བཙོན་ཁང་དུ་ཡོད་པའི་ཤེས་སྟོབས་ཅན་དང་སྒྱུ་རྩལ་བ། ས་གནས་ཀྱི་མགོ་ཁྲིད་སོགས་བཙོན་འཇུག་དང་དམ་དྲག་བྱས་ཡོད་པའི་སྐོར་གླེང་སློང་བྱ་དགོས་པའི་སྐུལ་མ་ཡང་བཏང་འདུག
ཐེངས་འདིར་ཨ་རིའི་རྒྱ་ནག་ལས་དོན་ཚོགས་ཆུང་ནང་། ཨ་རིའི་གཞུང་གིས་བསྐོ་གཞག་བྱས་པའི་བོད་དོན་དམིགས་བསལ་འབྲེལ་མཐུད་པ་ལྕམ་ཨུ་ཛི་ར་ཛེ་ཡ་ (Uzra Zeya) ལགས་ཚུད་པའི་ཨ་རིའི་གྲོས་ཚོགས་གོང་མའི་འཐུས་མི་ ༩ དང་། ཨ་རིའི་གྲོས་ཚོགས་འོག་མའི་འཐུས་མི་ ༩། སྲིད་འཛིན་བྷའེ་ཌན་འཛིན་སྐྱོང་གི་འགན་འཛིན་ ༥ བཅས་ཁྱོན་ཨ་རིའི་གནད་ཡོད་མི་སྣ་ ༢༤ ཡོད་ཅིང་། ཚོགས་ཆུང་དེས་རྒྱ་ནག་ནང་འགྲོ་བ་མིའི་ཐོབ་ཐང་དང་ཁྲིམས་ལུགས་ཀྱི་དབང་སྒྱུར་ཇི་ཙམ་ཡར་རྒྱས་ཡོང་གི་ཡོད་མེད་ཐོག་ཞིབ་འཇུག་བྱས་ཡོད་པ་རེད།
འདི་ལོའི་ཕྱི་ཟླ་ ༦ ཚེས་ ༢༤ ཉིན་ཨ་རིའི་གྲོས་ཚོགས་གོང་འོག་གི་རྒྱ་ནག་ལས་དོན་ཚོགས་ཆུང་(Congressional Executive commission on China) གིས་བོད་ཀྱི་དཀའ་རྙོག་སེལ་བའི་འགག་རྩ་ཞེས་པའི་བརྗོད་གཞིའི་ཐོག་ཉན་ཞིབ་ཅིག་འཚོགས་ཡོད་ཅིང་། ཉན་ཞིབ་ཐོག་ཚོགས་ཆུང་གི་ཚོགས་གཙོའི་ལས་རོགས་གྲོས་ཚོགས་འོག་མའི་འཐུས་མི་སྐུ་ཞབས་ཇེམ་མེག་གྷ་ཝན་ལགས་ཀྱིས་མི་རིང་བར་ཨ་རིའི་གྲོས་ཚོགས་ནང་བོད་རྒྱ་གྲོས་མོལ་ཡོང་ཐབས་ཀྱི་ཁྲིམས་འཆར་ཞིག་གདོན་འཆར་ཡོད་སྐོར་གསུངས་པ་ལྟར། འདི་ལོའི་ཕྱི་ཟླ་ ༧ ཚེས་ ༡༣ ཉིན་ཨ་རིའི་གྲོས་ཚོགས་འོག་མའི་ནང་། ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཇེམ་མེག་གྷ་ཝན་ལགས་དང་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་མཱ་ཡི་ཀེལ་མེག་ཁོལ་ལགས་ཀྱིས་བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་གསར་པ་བཏོན་ཡོད་པ་དང་། བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་དེའི་ནང་གཙོ་བོ་ཨ་རིའི་གཞུང་གིས་རྒྱལ་སྤྱིའི་ཁྲིམས་དོན་འོག་བོད་མི་རྣམས་ལ་རང་ཐག་རང་གཅོད་ཀྱི་ཐོབ་ཐང་དང་། བོད་རྒྱའི་དཀའ་རྙོག་སེལ་ཐབས་སུ་རྒྱབ་སྐྱོར་ཤུགས་ཆེ་གནང་དགོས་སྐོར་དང་། རྒྱ་ནག་གཞུང་གིས་རྒྱལ་སྤྱིའི་སྟེང་བོད་ཀྱི་ལོ་རྒྱུས་དང་བོད་དོན་སྐོར་གྱི་གནས་ཚུལ་འཁྱོག་བཤད་བྱས་དང་བྱེད་མུས་ཡིན་པར་བརྟེན། དེའི་ཁ་གཏད་དུ་ཨ་རིའི་བོད་དོན་དམིགས་བསལ་འབྲེལ་མཐུད་པའི་ངོས་ནས་ཨ་རིའི་གཞུང་གི་བསྒྲགས་གཏམ་དང་གཞུང་འབྲེལ་ཡིག་ཆ་ཁག་གི་ནང་བོད་ཀྱི་དངོས་ཡོད་གནས་ཚུལ་འཁོད་དགོས་པ་མ་ཟད། ཨ་རིའི་གྲོས་ཚོགས་ལ་བོད་རྒྱའི་གྲོས་མོལ་དང་འབྲེལ་བའི་ལོ་འཁོར་སྙན་ཐོ་འབུལ་དགོས་སྐོར་སོགས་བཀོད་འདུག
གསར་འགོད་པ། བསྟན་འཛིན་ཕུར་བུ།
