ཁ་སང་༧གོང་ས་མཆོག་གིས་༧སྐུའི་གཅེན་པོ་སྟག་འཚེར་སྐུ་ཕྲེང་དྲུག་པ་ཐུབ་བསྟན་འཇིགས་མེད་ནོར་བུ་མཆོག་གི་ཡང་སྲིད་མཆོག་སྤྲུལ་རིན་པོ་ཆེ་བསྟན་འཛིན་ཡོན་ཏན་རྒྱ་མཚོ་མཆོག་ལ་མཇལ་ཁ་དང་བཀའ་སློབ་སྩལ།
ཁ་སང་ཕྱི་ཚེས་ ༢༣ ཉིན༧གོང་ས་རྒྱལ་བ་རིན་པོ་ཆེ་མཆོག་གིས་བཞུགས་སྒར་ཕོ་བྲང་གི་མཇལ་འཕྲང་ཁང་དུ་༸སྐུའི་གཅེན་པོ་སྟག་འཚེར་སྐུ་ཕྲེང་དྲུག་པ་ཐུབ་བསྟན་འཇིགས་མེད་ནོར་བུ་མཆོག་གི་ཡང་སྲིད་མཆོག་སྤྲུལ་རིན་པོ་ཆེ་བསྟན་འཛིན་ཡོན་ཏན་རྒྱ་མཚོ་མཆོག་དང་ཁོང་གི་སྐུ་མཆེད་ཁ་ཤས། དེ་བཞིན་སྟག་འཚེར་རིན་པོ་ཆེ་སྐུ་གོང་མའི་སློབ་ཕྲུག་ཁག་གཅིག་དང་། ཐའེ་ཝན་ནས་ཕེབས་པའི་སྦྱིན་བདག་ཁག་གཅིག་བཅས་ལ་མཇལ་ཁ་དང་བཀའ་སློབ་སྩལ་ཡོད་པ་རེད།
དེ་ཡང་ཐོག་མར་སྟག་འཚེར་རིན་པོ་ཆེའི་ཡང་སྲིད་མཆོག་གིས་རྟེན་གསུམ་འདེགས་འབུལ་ཞུས་རྗེས་༧གོང་ས་རྒྱལ་བ་རིན་པོ་ཆེ་མཆོག་གིས་བཀའ་སློབ་སྩལ་དོན། སྟག་འཚེར་རིན་པོ་ཆེ་སྐུ་གོང་མ་ངོས་རང་ཕ་ཡུལ་དུ་ཆུང་ཆུང་སྐབས་ནས་དམིགས་བསལ་གྱིས་འབྲེལ་བ་ཡོད་པ་ཞིག་རེད། སྟག་འཚེར་རིན་པོ་ཆེ་བསམ་བློ་ཧ་ཅང་གྲུང་པོ་ཡོད་པ་རེད། རྒྱ་གུང་ཁྲན་གྱི་འོག་ལ་ཚུད་ན་ཁྱོན་ནས་ཡག་པོ་ཡོད་པ་མ་རེད། རྒྱ་གར་ལ་ཕེབས་དགོས་པ་རེད་ཅེས་བཤད་མྱོང་། སྙིང་རྗེ་ཡང་སྲིད་འདི་འདྲ་ཞིག་ཕེབས་ཡོད་པ་རེད། སྟག་འཚེར་རིན་པོ་ཆེ་ང་ཚོ་སྐུ་འབུམ་དགོན་པའི་བླ་མ་གལ་ཆེ་བ་ཞིག་རེད། འདི་གྲྭ་ས་ལ་བསྡད་ནས་འབྲས་སྤུངས་སུ་དཔེ་ཆར་བལྟས་ནས་བསྡད་ཡོད། མ་འོངས་པར་སྐུ་འབུམ་དགོན་པ་གཙོ་བོར་གྱུར་པའི་མདོ་སྨད་ཀྱི་ས་ཆ་ལ་ཕན་ཐོགས་རྒྱ་ཆེན་པོ་བྱེད་ཐུབ་པ་ཞིག་ཏན་ཏན་ཡོང་གི་རེད། དཔེ་ཆ་ཡག་པོ་བལྟ་དགོས་པ་རེད། ཅེས་དང་། དེ་ནས་སྟག་འཚེར་སྐུ་ཕྲེང་བདུན་པ་མཆོག་སྤྲུལ་རིན་པོ་ཆེ་བསྟན་འཛིན་ཡོན་ཏན་རྒྱ་མཚོ་མཆོག་ལ་ཐུབ་དབང་གི་སྐུ་བརྙན་རྟེན་སྐལ་དུ་སྩལ་བ་དང་། སྟག་འཚེར་རིན་པོ་ཆེ་སྐུ་གོང་མ་ང་ཚོའི་སྐུ་མཆེད་རེད། རིན་པོ་ཆེ་བསམ་བློ་ཧ་ཅང་རྒྱ་ཆེན་པོ་གཏོང་ཐུབ་མཁན་ཞིག་རེད། ཅེས་བཀའ་སློབ་སྩལ།
ཡང་དེ་རིང་ཕྱི་ཚེས་ ༢༤ ཉིན་གྱི་སྔ་དྲོར་༧གོང་ས་རྒྱལ་བ་རིན་པོ་ཆེ་མཆོག་གིས་འགྲོ་ཕན་སྨན་རྩིས་ཁང་གི་ལས་བྱེད་དང་སློབ་ཐོན་པ་རྣམས་ལ། ང་ཚོ་བོད་མི་རིགས་ལ་མཚོན་ན་ནང་དོན་རིག་པའི་ཆོས་ཕྱོགས་ཀྱི་ཐོག་ནས་འཛམ་གླིང་ལ་སྐད་གྲགས་ཡོད་པ་ཞིག་ཆགས་བསྡད་ཡོད་པ་དང་། ང་ཚོར་ནང་དོན་རིག་པ་ཞེ་དྲག་སྤུས་དག་པོ་ཞིག་ཡོད་བསྡད་པའི་སྒང་ལ། གསོ་བ་རིག་པ་དེ་ལུས་པོའི་བདེ་ཐང་སྒང་ལ་ཕན་ཐོགས་བྱེད་ཐུབ་པ་ཡོད་པས། བོད་མི་རིགས་ཀྱི་རིག་གཞུང་དེ་དངོས་ནས་ཕན་ཐོགས་ཡོད་བསྡད་པ་ཞིག་ཡིན་པས། དེ་ལ་ཁྱེད་རང་ཚོས་དོ་སྣང་དང་ཁ་ཐུག་གིས་ནད་པ་ལ་ཕན་ཐོགས་ཙམ་མ་ཡིན་པར། བོད་ཀྱི་གསོ་བ་རིག་པར་བདག་གཅེས་ཀྱི་བསམ་བློ་དགོས་ཞེས་བཀའ་སློབ་སྩལ།
དཔལ་ལྡན་དགའ་ལྡན་ཕོ་བྲང་གི་དྲ་རྒྱ་ནས་བླངས།
