རྒྱ་ནག་ནང་ཏོག་དབྱིབས་ནད་པའི་གྲངས་འབོར་ཇེ་མང་དུ་འགྲོ་ཡི་ཡོད་པ་དང་བསྟུན་རྒྱ་ནག་གཞུང་གིས་ཐེམ་སྤང་བཀག་རྒྱ་བསྡམས་པའི་གནས་སྟངས་འོག་མི་མང་ཡར་ལངས་བྱས་ཏེ་ངོ་རྒོལ་བྱེད་བཞིན་འདུག
དེ་རིང་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁེ་ཉིན་ཕྱི་ཚེས་ ༢༣ ཉིན་ནས་དེ་རིང་བར་རྒྱ་ནག་ཀྲང་ཀྲུའུ་ (Zhengzhou) གྲོང་ཁྱེར་དུ་ཡོད་པའི་འཛམ་གླིང་གི་ཀུ་ཤུ་རྟགས་ཅན་གྱི་ཁ་པར་བཟོ་སྐྲུན་ཁང་ཆེ་ཤོས་ཀྱི་ལས་མི་རྣམས་ཀྱིས་ཀུ་ཤུ་ཁ་པར་བཟོ་སྐྲུན་ཁང་དེས། ལས་མི་རྣམས་ཀྱི་གན་རྒྱ་སྣང་མེད་དུ་བཞག་པ་དང་ལས་མིར་ཐོབ་ཐང་མ་སྤྲད་པ། ལས་མི་གསར་བསྡུ་བྱ་རྒྱུ་ཡིན་པ་སོགས་ཀྱི་གནད་དོན་གླེང་སློང་བྱས་ཏེ་ངོ་རྒོལ་བྱེད་སྐབས། རྒྱ་ནག་ཉེན་རྟོག་པས་ཐེམ་སྤང་བཀག་རྒྱའི་གནས་སྟངས་ལ་གཞིགས་ནས་ཐེ་གཏོགས་བྱས་ཏེ། མི་མང་དང་ཉེན་རྟོག་པའི་བར་གདོང་ཐུག་དྲག་པོ་བྱུང་ནས། མི་རེ་གཉིས་ཤིག་ལ་རྨས་སྐྱོན་ཚབས་ཆེན་ཐེབས་པའི་བརྙན་རིས་སོགས་དྲ་ལམ་ཁག་ཏུ་མཐོང་རྒྱུ་འདུག དེ་བཞིན་ཟླ་འདིའི་ཕྱི་ཚེས་ ༡༨ ཉིན་ནས་བཟུང་རྒྱ་ནག་གཞུང་གིས་གྲོང་ཁྱེར་ཀྲང་ཀྲུའུ (Zhengzhou) ཡི་མི་གྲངས་ས་ཡ་ ༦ ལྷག་ཐེམ་སྤང་བཀག་རྒྱའི་འོག་ཏུ་བཅུག་ཡོད་འདུག
རྒྱ་ནག་གི་ཀུ་ཤུ་ཁ་པར་བཟོ་སྐྲུན་ཁང་དེས། ལས་མི་ཁག་ཅིག་གིས་གླ་ཕོགས་ཐད་ཐེ་ཚོམ་འདུག འོན་ཀྱང་། ང་ཚོས་གན་རྒྱ་གཞིར་བཟུང་གླ་ཕོགས་སྤྲོད་ངེས་ཡིན། མི་ཁག་ཅིག་གིས་ལས་མི་གསར་བསྡུ་དང་ལས་མི་གསར་པ་རྣམས་ཏོག་དབྱིབས་འགོས་ཡོད་པའི་ནད་པ་དང་ལྷན་དུ་སྡོད་ཁང་གཅིག་གི་ནང་སྡོད་བཅུག་གི་ཡོད་པ་སོགས་ཀྱི་དཀྲོག་གཏམ་སྤེལ་བཞིན་འདུག ང་ཚོས་ས་གནས་གཞུང་དང་མཉམ་འབྲེལ་གྱིས་ལས་མི་གསར་པ་རྣམས་སྡོད་ཁང་དུ་མ་འབྱོར་གོང་ནས་སྡོད་ཁང་གཙང་སེལ་བྱས་ཟིན་ཡོད། ཅེས་འགྲེལ་བརྗོད་བྱས་ཡོད་ཀྱང་། ཟླ་སྔོན་མའི་ཏོག་དབྱིབས་བཀག་རྒྱའི་སྐབས་ཀུ་ཤུ་ཁ་པར་བཟོ་སྐྲུན་ཁང་དེའི་ལས་མི་ཁག་ཅིག་མཐུན་རྐྱེན་དང་འགན་སྲུང་ཡག་པོ་མེད་སྐོར་བརྗོད་ནས་བཟོ་གྲྭའི་རྩིག་གྱང་ལས་བརྒལ་ཏེ་བྲོས་ཡོད་པའི་གནས་ཚུལ་སོགས་བྱུང་ཡོད།
ཡང་དེ་རིང་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཉེ་ལམ་རྒྱ་ནག་རྒྱལ་ས་པེ་ཅིན་ཚུད་པའི་གྲོང་ཁྱེར་ཆེ་ཁག་ནང་ཏོག་དབྱིབས་རིམས་ནད་ཁྱབ་གདལ་ཤུགས་ཆེན་བྱུང་ཡོད་ཅིང་། ཁ་སང་རེས་གཟའ་ལྷག་པ་གཅིག་པུར་རྒྱ་ནག་རྒྱལ་ཡོངས་སུ་རིམས་ནད་འགོས་པའི་མི་གྲངས་ ༣༡༥༢༧ བྱུང་སྟེ། དེ་ནི་རྒྱ་ནག་ནང་ཏོག་དབྱིས་རིམས་ནད་འགོས་པའི་མི་གྲངས་ཆེས་མང་ཤོས་སུ་གྱུར་འདུག ད་ལྟ་རྒྱ་ནག་གི་ཏོག་དབྱིབས་གཙང་སེལ་གྱི་སྲིད་ཇུས་འོག་ཏུ་མི་གྲངས་ཐེར་འབུམ་ ༡།༤ ལྷག་ཐེམ་སྤང་བཀག་རྒྱར་བཞག་ཡོད་འདུག་ལ། ཉེ་ལམ་པེ་ཅིན་དུའང་ཟླ་བ་༡ ཙམ་གྱི་རྗེས་སུ་རིམས་ནད་རྐྱེན་གྱིས་མི་ཞིག་འདས་གྲོངས་སུ་གྱུར་ཡོད་སྟབས། རྒྱལ་ས་པེ་ཅིན་ཁུལ་གྱི་རྫོང་ཁག་མང་པོ་ཞིག་ཏུ་རིམས་ནད་འགོག་སྲུང་ནན་མོ་བྱེད་ཀྱིན་ཡོད་འདུག
རྒྱ་ནག་གཞུང་གི་ཏོག་དབྱིབས་རིམས་ནད་གཙང་སེལ་གྱི་སྲིད་ཇུས་ཞེས་པའི་གཡོ་ཇུས་ཀྱི་འོག་ནས། ད་ལྟ་རྒྱ་ནག་ལྷོ་ཕྱོགས་ཁུལ་གྱི་ཀཱང་ཀྲོའུ་ ( Guangzhou) གྲོང་ཁྱེར་དུ་ས་གནས་གཞན་ནས་ཡོང་བའི་ལས་ཀ་བ་མི་གྲངས་ ༡༠༠ ལྷག་གི་འཚོ་གནས་ལ་དོ་ཕོག་ཆེན་པོ་བྱུང་ནས། རང་ཁྱིམ་དུ་ལོག་མ་ཐུབ་པར་སྲང་ལམ་དུ་ལུས་ཡོད་ཅིང་། དེ་དག་མང་ཆེ་བ་རྒྱ་ནག་ཧི་པེ་ ( Hubei) ཞིང་ཆེན་གྱི་ཏོག་དབྱིབས་རིམས་ནད་ཀྱི་ཟུར་བཀག་ཁང་ནས་ཕྱིར་མངགས་ཡོད་ཀྱང་། རྒྱ་ནག་གཞུང་གི་ཏོག་དབྱིབས་རིམས་ནད་ལྟ་སྲུང་མི་སྣ་དག་གིས། ཁུལ་དེར་ད་དུང་རིམས་ནད་མཆེད་མུས་ཡིན་པའི་ས་གནས་གཅིག་ནས་གཞན་དུ་བགྲོད་པར་འགོག་སྲུང་བྱེད་ཀྱི་ཡོད་ཚུལ་བརྗོད་དེ། ལས་མི་དག་རང་རང་གི་གྲོང་གསེབ་ཏུ་མངག་མེད་པའི་ཁར། སྲང་ལམ་དུ་གནས་སྡོད་བྱེད་མཁན་རྣམས་ལའང་ཟས་གོས་གནས་མལ་སོགས་ཀྱི་རོགས་རམ་གང་ཡང་བྱེད་ཀྱི་མེད་པ་རེད།
རྒྱ་ནག་གཞུང་གིས་རིམས་ནད་འགོག་སྲུང་གཅིག་པུར་ཁ་གཡར་བ་ལས། མི་མང་གི་བདེ་སྡུག་ལ་སེམས་ངལ་གང་ཡང་བྱེད་ཀྱི་མེད་པ་ལྟར། ཉེ་ལམ་རྒྱ་ནག་གི་གྲོང་ཁྱེར་ཆེ་ཁག་ཏུ་ཁང་གླ་སྟེར་མ་ཐུབ་ནས། སྲང་ལམ་དུ་ལུས་པའི་ལས་མི་མང་པོ་ཞིག་གིས། སྲང་ལམ་དང་། ཟམ་པའི་འོག་སོགས་སུ་འགྱིག་ཤོག་གི་གུར་ཕུབ་ནས་འཚོ་ཐབས་བྱེད་ཀྱི་ཡོད་འདུག་ལ། ཉེ་ལམ་རྒྱ་ནག་གི་ཀཱང་ཀྲོའུ་ ( Guangzhou) གྲོང་ཁྱེར་དུ་ཆར་པ་ཤུགས་ཆེན་བབས་ཏེ། སྲང་ལམ་དུ་ལུས་པའི་ལས་མི་རྣམས་ལ་དཀའ་ངལ་འཕྲད་མུས་ཡིན་པས། ཁུལ་དེར་གནས་སྡོད་རྒྱ་ནག་ཕྱུག་བདག་ཁག་ཅིག་གིས་སྲང་ལམ་དུ་ལུས་པའི་མི་རྣམས་མཉམ་གཅིག་ཏུ་བསྡུས་ནས། ཟས་གོས་དང་ཁ་རས་སོགས་ཀྱི་རོགས་འདེགས་བྱས་ཡོད་ཀྱང་། རྒྱ་ནག་གཞུང་ཕྱོགས་ཀྱི་མི་སྣས་སྲང་ལམ་དུ་ལུས་པའི་མི་མང་མཉམ་དུ་བསྡུས་ན། རིམས་ནད་ཁྱབ་གདལ་ཆེ་ཉེན་བསྙད་ནས། ཕྱུག་བདག་དང་ཟ་ཁང་བདག་པོ་སོགས་ཀྱིས་ཁོང་ཚོར་རོགས་འདེགས་བྱ་རྒྱུ་མཚམས་འཇོག་བྱ་དགོས་པའི་ཉེན་བརྡའང་བཏང་ཡོད་འདུག
རྒྱ་ནག་གཞུང་གིས་རྒྱ་ནག་གི་གྲོང་ཁྱེར་ཆེ་ཁག་ཏུ་བཀག་རྒྱ་ཡུན་རིང་བསྡམས་ཡོད་སྟབས། རྒྱ་ནང་གི་མི་མང་གི་ལུས་སེམས་གཉིས་སུ་དཀའ་ངལ་ཆེན་པོ་འཕྲད་དེ། ཟླ་འདིའི་ཕྱི་ཚེས་ ༡༤ ཉིན་རྒྱ་ནག་ཀོང་ཏུང་(Guangdong) ཞིང་ཆེན་གྱི་ཀཱང་ཀྲོའུ་ ( Guangzhou) གྲོང་ཁྱེར་དུ་རྒྱ་ནག་གཞུང་གིས་ལས་མེད་དུ་གྱུར་བའི་མི་མང་རྣམས་རང་རང་གི་གྲོང་གསེབ་ཏུ་མངག་གཏོང་དང་ཏོག་དབྱིབས་ཀྱི་བཀག་རྒྱ་དཀྲོལ་དགོས་པའི་ངོ་རྒོལ་བྱས་ཡོད་པ་མ་ཟད། ས་གནས་གཞུང་གིས་ཆེད་འཛུགས་བྱས་པའི་ལྕགས་ར་སོགས་གཏོར་སྐྱོན་བཏང་བའི་གནས་ཚུལ་བྱུང་ཡོད།
རྒྱལ་སྤྱིའི་ཏོག་དབྱིབས་ཞིབ་བཤེར་བྱེད་ས་(World Meter) ལྟར་ན། འདས་པའི་ཆུ་ཚོད་ ༢༤ རིང་རྒྱ་ནག་རྒྱལ་ཡོངས་སུ་ཏོག་དབྱིབས་རིམས་ནད་འགོས་པའི་མི་གྲངས ༤༠༡༠ དང་མི་གྲངས་ ༡ ལས་འདས་གྲོངས་སུ་འགྱུར་མེད་ཀྱང་། རྒྱ་ནག་གཞུང་གིས་ད་ལྟའང་ཏོག་དབྱིས་གཙང་སེལ་གྱི་སྲིད་ཇུས་ལག་བསྟར་བྱས་ཏེ། མི་མང་གི་འཚོ་གནས་ལ་དོ་ཕོག་ཆེན་པོ་བཟོས་ཡོད་པ་མ་ཟད། རྒྱ་ནག་གཞུང་གི་དཔལ་འབྱོར་ལའང་གྱོང་གུད་ཚབས་ཆེན་ཐེབས་མུས་ཡིན་འདུག
གསར་འགོད་པ། དཔལ་ལྡན།
