ཟླ་འདིའི་ཕྱི་ཚེས་ ༢༠ ཉིན་ནས་ཕྱི་ཟླ་ ༡༢ ཚེས་ ༡༨ བར་ཉིན་གྲངས་ ༢༨ རིང་དཀྱིལ་ཤར་ཨེ་ཤ་ཡའི་མཚོ་གླིང་ཁཱ་ཌར་རྒྱལ་ཁབ་ཏུ་འཛམ་གླིང་གསེར་གྱི་བུམ་པ་རྟགས་མའི་རྐང་རྩེད་སྤོ་ལོའི་འགྲན་བསྡུར་དངོས་སུ་མགོ་ཚུགས་ཡོད་པ་དང་། ཐེངས་འདིའི་འགྲན་བསྡུར་ནང་དུ་འཛམ་གླིང་གི་རྒྱལ་ཁབ་ ༣༢ ཡི་རྐང་སྤོལ་རུ་ཁག་མཉམ་ཞུགས་གནང་བྱས་ཏེ། འགྲན་བསྡུར་བྱེད་བཞིན་པ་དང་བསྟུན། ད་ལོའི་འཛམ་གླིང་གསེར་གྱི་བུམ་པ་རྟགས་མའི་རྐང་རྩེད་སྤོ་ལའི་འགྲན་བསྡུར་ཁྲོད་བསམ་ཡུལ་ལས་འདས་པའི་གནད་དོན་ཁག་ཅིག་བྱུང་ཡོད།
ཐེངས་འདིའི་རྩེད་འགྲན་གྱི་ཉིན་གཉིས་པའི་རྐང་སྤོལ་རྩེད་འགྲན་ཨི་གྷི་ལན་ཌི་དང་ཨི་རན་བར་དབུ་འཛུགས་བྱེད་པའི་སྐབས་སུ་ཨི་རན་རྒྱལ་ཁབ་ཀྱི་རྩེད་འགྲན་པ་རྣམས་ཀྱིས་རང་ཉིད་ཀྱི་རྒྱལ་ཁབ་ཀྱི་རྒྱལ་གླུ་སྐྱོར་མེད་པ་དང་། སེམས་ཚོར་གྱི་རྣམ་འགྱུར་ཅི་ཡང་མེད་པའི་ཐོག་ནས་ངོ་རྒོལ་བྱས་ཡོད་པ་མ་ཟད། ཨི་རན་གྱི་ལྟད་མོ་བ་ཚོའི་ལག་ཏུ་ཨི་རན་གྱི་རང་དབང་གི་ཆེད་དུ་དང་། བུད་མེད། ཚེ་སྲོག རང་དབང་། ཨི་རན་གྱི་སྲིད་གཞུང་འགྱུར་བ་གཏོང་དགོས་ཞེས་པ་སོགས་ཀྱི་བསྒྲགས་ཡིག་འཕྱར་ནས་ཨི་རན་གཞུང་ལ་ངོ་རྒོལ་བྱས་འདུག
ཁ་སང་རྩེད་འགྲན་གྱི་ཉིན་གསུམ་པའི་དགོང་མོར། འཇར་མན་དང་ཉི་ཧོང་བར་རྩེད་འགྲན་བྱས་ཡོད་ཅིང་། རྩེད་འགྲན་མགོ་འཛུགས་མ་བྱེད་གོང་དུ་རྩེད་འགྲན་པ་ཡོངས་མཉམ་པར་བརྒྱབ་པའི་སྐབས་སུ། འཇར་མན་གྱི་རྩེད་འགྲན་པ་བཅུ་གཅིག་པོས་ལག་པ་གཡས་པའི་ཁ་བཀག་ནས་པར་བརྒྱབ་ཡོད་སྟབས། དེ་ནི་འདི་ལོའི་རྐང་སྤོལ་རྩེད་འགྲན་ཁྲོད་ཀྱི་གླེང་གཞི་ཆེན་པོ་ཞིག་འགྱུར་བཞིན་འདུག་ལ། འདི་ལོའི་ཀོ་ཊར་གྱི་རྩེད་འགྲན་ཁྲོད་འཇར་མན་དང་། དབྱིན་ཡུལ། ནེ་ཏར་ལན་ཌི། ཝེལ་སི། (Wales) སྦེལ་འཇམ། ཌེན་མག སུད་སི་སོགས་ཀྱི་རུ་ཁག་རྣམས་ལ་བརྩེ་བ་གཅིག ( onelove) ཞེས་པའི་དཔུང་བཏགས་གྱོན་རྩིས་ཡོད་པ་རྐང་སྤོལ་རྩེད་འགྲན་གོ་སྒྲིག་ཚོགས་པས་བཀག་སྡོམ་བྱས་ཡོད་ཅིང་། བརྩེ་བ་གཅིག ( onelove) ཞེས་པ་ནི་རང་དབང་དང་འདྲ་མཉམ་གྱི་གནས་སྟངས་ཆེས་ཞན་པའི་རྒྱལ་ཁབ་ཁག་ཏུ་གནས་སྡོད་བྱེད་མུས་ཡིན་པའི་མི་མང་དང་། ཁྲིམས་མཐུན་གྱི་མཚན་མཐུན་དགའ་རོགས། མཚན་མཐུན་མ་ནིང་མོ་ལོག་(LGBT) སོགས་མི་སྒེར་གྱི་གཞི་རྩའི་རང་དབང་ལ་བརྩི་འཇོག་བྱ་དགོས་པའི་ཞུ་འབོད་ཀྱི་ལས་འགུལ་ཞིག་ཡིན་པ་རེད་ལ། འཇར་མན་གྱི་རྐང་སྤོལ་རུ་ཁག་གིས་ཁ་འགེབས་དོན་ནི་རྐང་སྤོལ་རྩེད་འགྲན་གོ་སྒྲིག་ཚོགས་པར་ངོ་རྒོལ་བྱེད་བཞིན་ཡོད་པ་མཚོན་གྱི་ཡོད་འདུག
ཕྱི་ལོ་ ༢༠༢༢ ལོའི་འཛམ་གླིང་གསེར་གྱི་བུམ་པ་རྟགས་མའི་རྐང་རྩེད་སྤོ་ལོའི་འགྲན་བསྡུར་ནང་དུ་རྒྱ་ཆེ་བའི་ལྟད་མོ་བ་རྣམས་ཡ་མཚར་བའི་སེམས་ཚོར་ཞིག་སྤྲད་ཡོད་པ་ནི། འཛམ་གླིང་རྐང་སྤོལ་འགྲན་བསྡུར་ཁྲོད་སྐད་གྲགས་ཆེས་ཆེར་ཡོད་པའི་ཨ་ཇན་ཌེ་ན་དང་འཇར་མན་གྱི་རྩེད་འགྲན་རྣམས་རྩེད་ཐེངས་དང་པོར་ཕམ་ཁ་བྱུང་བ་རེད། ཕམ་ཁ་བྱུང་བར་སེམས་ཚོར་ཆེན་པོ་བྱུང་དོན་ཡང་ནམ་རྒྱུན་རྩེད་འགྲན་ཁྲོད་རེ་བ་བྱེད་ཀྱི་མེད་པའི་ཨེ་ཤ་ཡའི་ཉི་ཧོང་རྩེད་འགྲན་པ་དང་སོ་དྷའེ་ཨ་རབ་བྷིན་གྱི་རྩེད་འགྲན་པ་གཉིས་ལ་རྒྱལ་ཁ་ཐོབ་ཡོད་པས་རེད་འདུག ཉི་ཧོང་གི་ལྟད་མོ་བ་ཚོས་རྩེད་འགྲན་མཇུག་བསྒྲིལ་བ་དང་རྩེད་འགྲན་ར་བའི་ནང་གཙང་སྦྲ་བྱས་པར་རྒྱལ་སྤྱིའི་སྤྱི་ཚོགས་ཀྱིས་གླེང་སློང་དང་མིག་དཔེ་ལྟ་ཡུལ་ཞིག་ཏུ་གྱུར་ཡོད་པ་མ་ཟད། རྒྱལ་སྤྱིའི་རྐང་སྤོལ་རྩེད་འགྲན་ཁྲོད་ཉི་ཧོང་གི་རྩེད་འགྲན་པ་རྣམས་ལ་རྐང་སྤོལ་རྩེད་འགྲན་གྱི་སྒྲིག་གཞི་ཆེས་ལེགས་པར་སྲུང་མཁན་གྱི་མཚན་སྙན་ཞིག་ཀྱང་བཏགས་ཡོད་པ་རེད།
འཛམ་གླིང་གསེར་གྱི་བུམ་པ་རྟགས་མའི་རྐང་རྩེད་སྤོ་ལའི་འགྲན་ཚོགས་དེ་ནི་ཕྱི་ལོ ༡༩༣༠ ལོར་ལྷོ་ཨ་མེ་རི་ཁའི་རྒྱལ་ཁབ་ཡུ་རུ་གྷེ་ ( Uruguay ) རུ་ཐོག་མའི་ས་བོན་འབུས། དེ་ནས་བཟུང་ལོ་བཞི་རེའི་མཚམས་སུ་ལོ་ལྟར་རྩེད་འགྲན་དེ་བསྡུ་འཆར་ཡོད་ཀྱང་། འཛམ་གླིང་དམག་ཆེན་གཉིས་པའི་རྐྱེན་གྱིས་ཕྱི་ལོ ༡༩༤༢ དང་ ༡༩༤༦ གཉིས་སུ་རྩེད་འགྲན་བསྡུ་ཐུབ་མེད་པ་རེད། ཕྱི་ལོ ༡༩༥༠ ལོར་ལྷོ་མེ་རི་ཁའི་བྷི་རཱ་ཛིལ ( Brazil ) གྱིས་རྩེད་འགྲན་གོ་སྒྲིག་བྱས་རྗེས། ད་བར་ལོ་བཞི་རེའི་མཚམས་སུ་གཅིག་ཀྱང་མ་ཆད་པར་བསྟུད་མར་བསྡུས་ཡོད། ཡུ་རོབ་ཀྱི་རྒྱལ་ཁབ་ཧྥ་རན་སི ( france ) དང་འཇར་མན་(Germany ) ཨི་ཊ་ལི (Italy ) བཅས་ཀྱིས་ཐེངས་གཉིས་རེར་རྩེད་འགྲན་གོ་སྒྲིག་བྱས་འདུག དེ་བཞིན་སི་པེན( Spain ) དང་དབྱིན་ཡུལ། ཨར་འཇན་ཊི་ན་( Argentina ) སོགས་ཀྱིས་ཐེངས་གཅིག་རེར་གོ་སྒྲིག་བྱས་འདུག ལྷག་པར་དུ་ཕྱི་ལོ་ ༢༠༠༢ ལོའི་རྩེད་འགྲན་དེ་ཉི་ཧོང་དང་ལྷོ་ཀོ་རི་ཡར་འཚོགས་ཡོད་ཅིང་། དེ་ནི་ཨེ་ཤ་ཡའི་ནང་དུ་རྒྱལ་སྤྱིའི་སྐྱེས་པའི་རྐང་སྤོལ་འགྲན་ཚོགས་བསྡུ་ཐེངས་དང་པོར་གྱུར་ཡོད་འདུག་ལ། ད་ལོར་ཡང་བསྐྱར་རྩེད་འགྲན་ཐེངས་ ༢༢ པ་དེ་ཨེ་ཤ་ཡའི་ཁཱ་ཊར་རྒྱལ་ཁབ་ཏུ་འཚོག་བཞིན་ཡོད་ཅིང་། འདི་ནི་ཨེ་ཤ་ཡའི་ནང་བསྡུ་ཐེངས་གཉིས་པ་ཡིན་པ་རེད།
བྱམས་པ་ཚེ་རིང་།
