ཡོ་ཁུ་རེན་གྱི་སྲིད་འཛིན་རྫི་ལན་སི་ཀེ་ལགས་དང་མི་མང་ནས་ཨུ་རུ་སུའི་བཙན་འཛུལ་ལ་གདོང་ལེན་བྱས་པ་དང་འཛམ་གླིང་མི་མང་གི་ཡིད་སེམས་བཀུག་པ་སོགས་ཀྱི་ངོས་འཛིན་འོག ཕྱི་ལོ་ ༢༠༢༢ ལོའི་འཛམ་གླིང་གི་ཆེས་ཤུགས་རྐྱེན་ཆེ་བའི་མི་སྣའི་མཚན་སྙན་ཐོབ།
རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་ཨ་རིའི་དུས་བབ་དུས་དེབ་ (Times Magazine) ཀྱིས། ཕྱི་ལོ་ ༢༠༢༢ ལོའི་དུས་དེབ་དེའི་འཛམ་གླིང་ནང་ཆེས་ཤུགས་རྐྱེན་ཆེ་བའི་མི་སྣ་འདེམས་སྒྲིག་གི་འོས་མིའི་ནང་། དཀྱིལ་ཤར་ཡུལ་གྲུའི་རྒྱལ་ཁབ་ཨེ་རན་གྱི་བུད་མེད་གྱེན་ལངས་ཆེན་མོ་དང་ཨ་རིའི་ཆེས་མཐོའི་ཁྲིམས་ཁང་སོགས་ཚུད་ཡོད་ཀྱང་། དུས་བབ་དུས་དེབ་ཀྱི་ཕྱི་ལོ་ ༢༠༢༢ ལོའི་ཆེས་ཤུགས་རྐྱེན་ཆེ་བའི་མི་སྣའི་མཚན་སྙན་དེ་ཡོ་ཁུ་རེན་གྱི་སྲིད་འཛིན་རྫི་ལན་སི་ཀེ་དང་མི་མང་གི་སྙིང་སྟོབས་ལ་ཐོབ་པ་ཡོངས་བསྒྲགས་བྱས་འདུག
ཨ་རིའི་དུས་བབ་དུས་དེབ་ཀྱི་དྲ་རྒྱའི་སྟེང་། སྲིད་འཛིན་རྫི་ལན་སི་ཀེ་ཡིས་ནུས་ཤུགས་ཡོད་རྒུ་བཏོན་ནས་འཛམ་གླིང་མི་མང་གི་ལུས་སེམས་གཉིས་ཡོ་ཁུ་རེན་གྱི་ཐོག་ཕྱོགས་སུ་བཅུག་ཡོད། དེ་ནི་ཁོས་དོ་སྣང་ཞེས་པ་ནི་གོ་ལ་འདིའི་ཆེས་རིན་ཐང་བྲལ་བའི་དཔལ་འབྱོར་དང་ཡོད་ཚད་ཀྱི་ཡོད་ཚད་ཡིན་པ་ཤེས་པས་རེད་ལ། ཁོས་གོ་ལའི་ཁྲོམ་རྭར་དབང་བསྒྱུར་བ་རེད། ཁོས་གཏམ་བཤད་སྤེལ་སྐབས་མཚམས་མཚམས་སུ་དོན་དག་མེད་ཅིང་ལན་རེར་ཟུར་ཟ་སོགས་བརྗོད་ཀྱང་། ག་དུས་ཡིན་ཡང་ཐད་ཀར་དོན་དངོས་བརྗོད་ཀྱི་ཡོད། དཔེར་ན། ང་ཚོས་ཡོ་ཁུ་རེན་སྐྱོབ་པ་ནི་དམངས་གཙོ་བསྐྱབས་པ་ཡིན། ཞེས་པ་ལྟ་བུ་རེད། ཅེས་དང་། སྲིད་འཛིན་རྫི་ལན་སི་ཀེ་ཡིས། སྙིང་སྟོབས་དང་འཇིགས་སྐྲག་ཁྲོད་མི་མང་གི་ཚོར་བ་དཀྲིགས་པ་དང་རྒྱལ་ཁབ་ཁག་མཉམ་དུ་བསྡུས་ནས་རང་དབང་སྲུང་སྐྱོབ་བྱས་པ་དང་ལྷན་དུ། འཛམ་གླིང་ལ་དམངས་གཙོ་དང་ཞི་བདེ་ནི་ཇི་འདྲའི་སྒུལ་སླ་བ་ཞིག་ཡིན་པའི་དྲན་གསོ་ཡང་བཏང་ཡོད་པས། སྲིད་འཛིན་རྫི་ལན་སི་ཀེ་དང་ཡོ་ཁུ་རེན་གྱི་མི་མང་ལ་ཕྱི་ལོ་ ༢༠༢༢ ལོའི་འཛམ་གླིང་གི་ཆེས་ཤུགས་རྐྱེན་ཆེ་བའི་མི་སྣའི་མཚན་སྙན་ཐོབ་པ་ཡིན་སྐོར་སོགས་བརྗོད་འདུག
དུས་བབ་དུས་དེབ་ཀྱིས། འདི་ལོའི་འདེམས་ཀ་དེ་ནི་ཧ་ཅང་གསལ་བ་ཞིག་ཡིན། ཡོ་ཁུ་རེན་གྱི་དམག་འཁྲུག་ཁྲོད་རེ་བ་དང་འཇིགས་སྣང་གང་གིས་ཁེངས་ནའང་། སྲིད་འཛིན་རྫི་ལན་སུ་ཀེ་འདས་པའི་ལོ་བཅུ་ཕྲག་འགའི་རིང་ང་ཚོས་མཐོང་མ་མྱོང་ཞིང་དཔའ་ངར་ལྡན་པའི་ལམ་དུ་བསྐྱོད་ཡོད། ཕྱི་ལོ་ ༢༠༢༡ ཟླ་ ༢ ཚེས་ ༢༤ ཉིན་ཨུ་རུ་སུས་ཡོ་ཁུ་རེན་ཐོག་མེ་སྒྱོགས་འཕེན་མགོ་བརྩམས་པ་དང་རྫི་ལན་སི་ཀེ་བྲོས་བྱོལ་དུ་མི་འགྲོ་བར། ཕྱི་ཚེས་ ༢༥ ཉིན་ཁོང་གིས་སྣེ་འཁྲིད་པའི་གཞུང་དང་མི་མང་དགྲའི་ཁ་གཏད་དུ་ལངས་ཡོད་པ་ནས་རྒྱལ་སྤྱིའི་སྲིད་གཞུང་ཁག་གི་གྲོས་ཚོགས་དང་འཛམ་གླིང་དངུལ་ཁང་། ཨ་རིའི་རོལ་དབྱངས་སྒྱུ་རྩལ་གཟེངས་རྟགས་ (Grammy Award) ཀྱི་མཛད་སྒོ་སོགས་གང་སར་ཁོང་མཐོང་རྒྱུ་ཡོད། ཕྱོགས་འགལ་གྱི་འགྲེལ་བརྗོད་བྱེད་བཞིན་པའི་འཛམ་གླིང་འདི་ཡོ་ཁུ་རེན་གྱི་གནད་དོན་ཐོག་ཕྱོགས་གཅིག་ཏུ་སྤུངས་ཡོད་ལ། དབང་ཆ་གཅིག་སྡུད་རིང་ལུགས་ཀྱི་རྒྱལ་ཁབ་བྱང་ཀོ་རི་ཡ་དང་སི་རེ་ཡ། ཨེར་ཊུ་རེ་ཡ་དང་བྷེ་ལ་རོ་སི་བཅས་ཕུད་པའི་རྒྱལ་ཚོགས་ཀྱི་འཐུས་མི་རྒྱལ་ཁབ་ ༡༤༡ གིས་ཨུ་རུ་སུའི་བཙན་འཛུལ་ལ་ངོ་རྒོལ་དང་སྐྱོན་བརྗོད་བྱས་ཡོད་པ་མ་ཟད། རྒྱལ་སྤྱིའི་བཟོ་གྲ་ཆེ་གྲས་ཁག་ཨུ་རུ་སུ་ནས་ཕྱིར་འཐེན་གྱིས་ཌོ་ལར་ཐེར་འབུམ་མང་པོ་བློས་གཏོང་དང་འབྲེལ། ཡོ་ཁུ་རེན་ལ་དཔལ་འབྱོར་དང་དངོས་ཆས། མི་ཆ། དམག་ཤུགས་སོགས་ཀྱི་ཐོག་ནས་རོགས་འདེགས་བྱས་ཡོད། ཅེས་བརྗོད་འདུག
ཡང་ཡོ་ཁུ་རེན་གྱི་མི་མང་གི་སྐོར་ནས། ཡོ་ཁུ་རེན་གྱི་མི་མང་གི་སྙིང་སྟོབས་ནི་ཕྱི་དང་ནང་གཉིས་ཀྱི་མི་སྒེར་བ་མང་པོས་བསྐྲུན་པ་ཞིག་ཡིན། མི་མང་པོ་ཞིག་གིས་གཡུལ་སའི་རྒྱབ་ནས་འཐབ་འཛིང་བྱས་ཡོད་པ་སྟེ། ཡོ་ཁུ་རེན་གྱི་ཆེས་གྲགས་ཆེ་བའི་མ་བྱན་ཆེན་མོ་ (Ievgen Klopotenko) ཡིས་རྒྱལ་ས་(Lviv) ནང་མི་མང་སྟོང་ཕྲག་མང་པོར་རིན་མེད་ཟས་སྦྱིན་བཏང་ཡོད། སྐབས་དེར་ཁོས། གལ་སྲིད་ཁྱེད་ལ་(borsch) སྐྱུར་ཐང་འཐུང་བའི་གོ་སྐབས་རག་གི་ཡོད་ཚེ། དེ་ནི་ཁྱེད་རང་གསོན་པོ་ཡིན་པའི་རྟགས་རེད། ཅེས་བརྗོད་ཡོད་པ་དང་། ཡང་སི་པེན་གྱི་མ་བྱན་ཆེན་མོ་ (Jose Andres) ཡིས་རང་ཉིད་ཀྱི་འཛམ་གླིང་དབུས་ཐབ་ཚང་ཞེས་པ་བརྒྱུད་མི་མང་ས་ཡ་ ༡༨༠ ལྷག་ལ་རིན་མེད་ཟས་སྦྱིན་བཏང་ཡོད། སྨན་པ་ཌའེ་ཝི་ཌི་(Dr. David Nott) ཐེངས་མང་རིང་ཡོ་ཁུ་རེན་དུ་བསྐྱོད་དེ་དམག་འཁྲུག་ཁྲོད་རྨས་སྐྱོན་ཕོག་པའི་ནད་པ་རྣམས་བཅོས་པ་དང་། ཡོ་ཁུ་རེན་གྱི་དམག་གི་སྨན་པ་ཡོ་ལེ་ཡ་ (Yulia Paievska) ཡིས་ཉིན་དང་མཚན་བསྟུན་ནས་དམག་འཁྲུག་ཁྲོད་རྨས་སྐྱོན་ཕོག་པའི་མི་སེར་དང་དམག་མི་མང་པོར་སྨན་བཅོས་བྱས་མཐར། ཨུ་རུ་སུའི་དམག་གིས་བཟུང་སྟེ་ཟླ་གསུམ་གྱི་རྗེས་ཀློད་གྲོལ་ཐོབ། གསར་འགོད་པ་མང་པོ་ཞིག་གིས་རང་ཉིད་ཀྱི་ཚེ་སྲོག་ལ་མ་འཛེམས་པར་གཡུལ་སར་བསྐྱོད་དེ་ཡོ་ཁུ་རེན་གྱི་གནས་སྟངས་ངོ་མ་འཛམ་གླིང་མི་མང་ལ་གསལ་བཤད་བྱས་ཡོད། ཅེས་བརྗོད་འདུག
གཞན་ཡང་། དུས་བབ་དུས་དེབ་ཀྱི་གཟེངས་རྟགས་ཁྲོད། ཨི་རན་གྱི་བུད་མེད་གསར་བརྗེ་གྱེན་ལངས་ཆེན་མོར་ཕྱི་ལོ་ ༢༠༢༢ དཔའ་སྟོབས་ཀྱི་མཚན་སྙན་ཐོབ་ཡོད་པ་དང་། ལྷོ་ཀོ་རི་ཡའི་མཉམ་འབྲེལ་སྒྱུ་རྩལ་རུ་ཁག་ (Blackpink) ལ་ཕྱི་ལོ་ ༢༠༢༢ ལོའི་རོལ་གར་སྤྲོ་ཚོགས་ཀྱི་གཟེངས་རྟགས་དང་། ཨ་རིའི་ཨར་ལས་འཆར་འགོད་པ་སྐུ་ཞབས་རོ་བྷིན་སན་ (Gragory Robinson) ལགས་སུ་འདི་ལོའི་གསར་བཏོད་པའི་མཚན་སྙན། མ་ལི་ཞི་ཡའི་གློག་བརྙན་འཁྲབ་མཁན་གྲགས་ཅན་མཱ་ཁཱེལ་ལེ་ཡུའོ་ (Michelle Yeoh) ལགས་སུ་ཕྱི་ལོ་ ༢༠༢༢ ལོའི་ཚབ་མཚོན་མི་སྣའི་གཟེངས་རྟགས། དེ་བཞིན་ཨ་རིའི་བྱུག་འཕེན་སྤོ་ལོ་རྩེད་མཁན་ཨཱ་རོན་ (Aaron Judge) ལགས་སུ་ཕྱི་ལོ་ ༢༠༢༢ ལོའི་ཆེས་ཕུལ་བྱུང་གི་ལུས་རྩལ་བའི་མཚན་སྙན་བཅས་ཐོབ་ཡོད་པ་བསྒྲགས་འདུག
གསར་འགོད་པ། སྐལ་བཟང་སྦྱིན་པ།
