༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་ཞབས་སུག་ཝིན་ཌར་སིང་སུ་ཀུའུ་མཆོག་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་དུ་འདེམས་ཐོན་བྱུང་བར་འཚམས་འདྲི་དང་སྦྲགས་མི་མང་གི་རེ་འདོད་ཇི་བཞིན་ཕྱག་ལས་ལམ་ལྷོང་ཡོང་བའི་ཐུགས་སྨོན་མཛད་འདུག
HH The Dalai Lama and Himachal pradesh CM Sukhvinder Singh Sukhu
ཟླ་འདིའི་ཕྱི་ཚེས ༩ ཉིན་རྒྱ་གར་ཧི་མ་ཅལ་མངའ་སྡེའི་འོས་བསྡུའི་ཁྲོད། སྤྱི་ཁྱབ་བློན་ཆེན་ཇའེ་རམ་ཐ་ཀོར་མཆོག་གི་བྷི་ཇི་ཕི་(BJP)སྲིད་དོན་ཚོགས་པར་གཞུང་འཛིན་འོས་བསྡུའི་ཁྲོད་ཕམ་ཁ་བྱུང་སྟེ། རྒྱ་གར་ཀོང་རི་སི་སྲིད་དོན་ཚོགས་པར་རྒྱལ་ཁ་ཐོབ་ཡོད་པའི་གསལ་བསྒྲགས་བྱས་ཡོད་པ་ལྟར། ཁ་སང་ཕྱི་ཚེས ༡༡ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་གསར་པ་སུག་ཝིན་ཌར་སིང་སུ་ཀུའུ་(Sukhvinder Singh Sukhu ) མཆོག་ལ་འཚམས་འདྲིའི་གསུང་འཕྲིན་སྩལ།
དེ་ཡང་འཚམས་འདྲིའི་གསུང་འཕྲིན་ནང་། རྒྱ་གར་ནི་ངོས་རང་མི་ལོ་ ༦༢ ལྷག་གནས་སྡོད་བྱ་ཡུལ་གྱི་གཞིས་ཁྱིམ་དུ་གྱུར་ཡོད་ཅིང་། ངོས་རང་གི་དུས་ཚོད་མང་ཆེ་བ་དྷ་རམ་སར་གནས་སྡོད་བྱས་ནས་སྐྱིད་པོ་བྱུང་ལ། ངས་ཁྱེད་ཉིད་ང་ཚོའི་མངའ་སྡེ་འདིའི་སྤྱིི་ཁྱབ་བློན་ཆེན་དུ་ངོས་འཛིན་བྱེད་ཀྱི་ཡོད། ཧི་མ་ཅལ་མངའ་སྡེའི་མི་མང་གིས་མི་ལོ་འདི་དག་རིང་ངོས་དང་ངོས་ཀྱི་རྗེས་འབྲངས་བོད་མི་རྣམས་ལ་མཛའ་བརྩེ་དང་མཐུན་རྐྱེན་སྦྱོར་བར་ཡི་རང་བྱེད་ཀྱིན་ཡོད། ངོས་རང་ཕྱི་ལོ་ ༡༩༦༠ ལོར་མེག་གྷན་དུ་འབྱོར་བ་ནས་ད་བར་དྷ་ས་ནི་མངའ་སྡེ་འདིའི་ས་གནས་གཞན་དང་མཚུངས་བར་འཕེལ་རྒྱས་དང་ཡར་རྒྱས་ཆེན་པོ་བྱུང་ཡོད་པ་རེད། ཅེས་གསུངས་འདུག
ཡང་༧མགོན་པོ་གང་ཉིད་ཀྱིས། ངོས་རང་ལ་ཧི་མ་ཅལ་མངའ་སྡེའི་གནས་བབ་ཞན་པའི་སྤྱི་ཚོགས་གཙོས་བྱས་པའི་མི་མང་རྣམས་མུ་མཐུད་ཡར་རྒྱས་འགྲོ་རྒྱུར་གདེང་ཚོད་ཆེན་པོ་ཡོད་ལ། ངོས་རང་གིས་མངའ་སྡེ་མི་མང་ཡོངས་ཀྱི་རེ་བ་དང་མངོན་འདོད་བསྒྲུབ་ཅིང་ལམ་ལྷོང་ཡོང་བའི་སྨོན་འདུན་ཞུ་ཡི་ཡོད། ཅེས་གསུངས་འདུག
དེ་རིང་སྔ་དྲོར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་སྤྱི་ཁྱབ་བློན་ཆེན་མཆོག་ལ་འཚམས་འདྲི་གནང་བའི་ནང་། སྐུ་ཞབས་སུག་ཝིན་ཌར་སིང་སུ་ཀུའུ་མཆོག་ནས་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་སྐབས་ ༡༥ པའི་ཐུགས་འགན་བཞེས་པར་སེམས་གཏིང་ནས་འཚམས་འདྲི་ཞུ་རྒྱུ་དང་། ཁོང་གི་དབུ་འཁྲིད་འོག་མུ་མཐུད་མངའ་སྡེ་ཡར་རྒྱས་སུ་འགྲོ་བཞིན་པ་མཐོང་ཐུབ་པའི་ཡིད་ཆེས་ཡོད་སྐོར་གསུངས་འདུག
ཡང་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས། རྒྱ་གར་གཞུང་མང་གཉིས་དང་། ལྷག་པར་དུ་ཧི་མ་ཅལ་མངའ་སྡེའི་གཞུང་མང་གཉིས་ནས་འདས་པའི་ལོ་ངོ་དྲུག་ཅུ་ལྷག་གི་རིང་བོད་ཀྱི་འཐབ་རྩོད་དང་། བོད་མི་རྣམས་ལ་མཐུན་འགྱུར་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞུ་རྒྱུ་ཡིན། ཧི་མ་ཅལ་མངའ་སྡེ་ནི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བཞུགས་གནས་དང་། བོད་མིའི་སྒྲིག་འཛུགས་ཀྱི་བསྟི་གནས། དེ་བཞིན་བོད་མི་མང་པོ་ཞིག་གི་གནས་ཡུལ་ཆགས་ཀྱི་ཡོད་པས། ང་ཚོར་ཤིན་ཏུ་ནས་བཀའ་དྲིན་ཆེན་པོ་ཡིན། སྐུ་ཉིད་ཀྱིས་དབུ་ཁྲིད་པའི་མངའ་སྡེའི་གཞུང་ནས་བོད་ཀྱི་འཐབ་རྩོད་དང་། བོད་མི་རྣམས་ལ་མུ་མཐུད་རྒྱབ་སྐྱོར་གནང་རྒྱུའི་ཡིད་ཆེས་དང་རེ་བ་ཆེན་པོ་ཡོད། སྐུ་ཉིད་ལ་སླར་ཡང་དགའ་བསུའི་འཚམས་འདྲི་ཞུ་རྒྱུ་དང་། སྐུ་ཉིད་ནས་མངའ་སྡེའི་མི་མང་གི་མངོན་འདོད་འགྲུབ་རྒྱུ་སོགས་ལས་དོན་མཐའ་དག་ལམ་ལྷོངས་དང་ལྡན་པ་ཡོང་བའི་སྨོན་འདུན་ཞུ་རྒྱུ་ཡིན། ཞེས་གསུངས་འདུག
ད་ལྟ་དགུང་ལོ་ ༥༨ ཡིན་པའི་སྐུ་ཞབས་སུག་ཝིན་ཌར་སིང་སུ་ཀུའུ་མཆོག་ནི་ཧི་མ་ཅལ་མངའ་སྡེའི་ཧེ་མིར་པུར་(Hamirpur)རྫོང་ཁོངས་ཀྱི་ནཱ་ཊུན་(Nadaun)གྲོང་ཚོ་ནས་ཡིན་ཞིང་། ཧི་མ་ཅལ་མངའ་སྡེ་གཙུག་ལག་སློབ་ཆེན་ནས་ཁྲིམས་ལུགས་རིག་པའི་ཐོག་སློབ་གཉེར་གནང་ཡོད་འདུག ཕྱིས་སུ་ཧེ་མིར་པུར་གྲོང་སྡེའི་གྲོས་ཚོགས་འཐུས་མི་ཐེངས་ ༤ གནང་མྱོང་བ་མ་ཟད། ཕྱི་ལོ ༢༠༡༣ ནས་ ༢༠༡༩ བར་ཧི་མ་ཅལ་མངའ་སྡེའི་ཀོང་རི་སི་སྲིད་དོན་ཚོགས་པའི་ཚོགས་གཙོ་སོགས་གནང་མྱོང་ཡོད་འདུག
གསར་འགོད་པ། དཔལ་ལྡན།
