ཕྱི་ལོ ༢༠༢༢ ལོར་རྒྱ་ནག་ནང་བྱིས་པའི་སྐྱེས་གྲངས་ཉུང་དུ་ཕྱིན་ཏེ་རྒྱ་ནག་གི་མི་ལོ ༦༠ ལྷག་གི་བྱིས་པ་སྐྱེས་གྲངས་ཆེས་ཉུང་ཤོས་སུ་གྱུར་ཡོད་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། རྒྱ་ནག་གཞུང་གིས་ཕྱི་ལོ་ ༢༠༡༦ ལོ་ནས་ཕྲུ་གུ་གཉིས་སྐྱེས་ཆོག་པའི་སྲིད་ཇུས་ལག་བསྟར་བྱས་ཏེ། རྒྱ་ནག་གི་བྱིས་པའི་སྐྱེས་ཚད་གོང་མཐོར་གཏོང་བའི་དམིགས་ཡུལ་བཅངས་ཡོད་ཀྱང་། འདས་པའི་ལོ་ཤས་རིང་རྒྱ་ནག་ནང་བྱིས་པ་སྐྱེ་མཁན་ཇེ་ཉུང་དུ་འགྲོ་མུས་ཡིན་པ་ལྟར། ཕྱི་ལོ་ ༢༠༢༢ ལོར་རྒྱ་ནག་ནང་བྱིས་པའི་སྐྱེས་གྲངས་ཉུང་དུ་ཕྱིན་པ་དང་འདས་གྲོངས་སུ་གྱུར་བའི་མི་འབོར་མང་དུ་ཕྱིན་པར་བརྟེན། འདས་ལོ་ནི་རྒྱ་ནག་གི་མི་ལོ་ ༦༠ རིང་གི་བྱིས་པ་སྐྱེས་གྲངས་ཆེས་ཉུང་ཤོས་སུ་གྱུར་ཡོད་པ་མ་ཟད། དེས་འཛམ་གླིང་གི་མི་འབོར་མང་ཤོས་སུ་རྩི་བའི་རྒྱ་ནག་གི་མི་འབོར་འཕེལ་འགྲིབ་ཐད་དོ་ཕོག་ཆེན་པོ་བཟོ་སྲིད་པའི་ཚོད་དཔག་བྱེད་ཀྱིན་འདུག
རྒྱ་ནག་གི་མི་འབོར་ཞིབ་བཤེར་ལས་ཁུངས་ ( The National Bureau of Statistics ) ཀྱིས་ཕྱི་ལོ་ ༢༠༢༢ ལོའི་རྒྱ་ནག་གི་མི་འབོར་ཞིབ་བཤེར་གྱི་སྙན་ཐོ་གསལ་བསྒྲགས་བྱས་པའི་ནང་། འདས་ལོར་རྒྱ་ནག་ཏུ་མི་གྲངས་ཐེར་འབུམ ༡།༤༡༡༨ ལས་མེད་པས། ཕྱི་ལོ ༢༠༢༡ དང་བསྡུར་ན་འདས་ལོ་གཅིག་པུར་རྒྱ་ནག་ནང་མི་གྲངས་ ༨༥༠༠༠༠ ཉུང་དུ་ཕྱིན་ཡོད་འདུག་ལ། འདས་ལོར་རྒྱ་ནག་ནང་བྱིས་པ་ས་ཡ་ ༩།༩༨ ཙམ་ལས་སྐྱེས་མེད་ཅིང་། ཕྱི་ལོ ༢༠༢༡ ལོ་དང་བསྡུར་ན་རྒྱ་ནག་ཏུ་བྱིས་པ་སྐྱེས་ཚད་ཀྱི་བརྒྱ་ཆ་ ༩།༨ མར་ཆག་འདུག་པས། ཕྱི་ལོ་ ༡༩༦༡ ནས་ཕྲུ་གུ་སྐྱེས་པའི་གྲངས་ཚད་དམའ་ཤོས་སུ་གྱུར་བ་དང་། དེ་བཞིན་རྒྱ་ནག་རྒྱལ་ཡོངས་ཀྱི་བུད་མེད་གྲངས་ ༡༠༠༠ རེའི་བྱིས་པ་སྐྱེས་ཚད་ཀྱི་བརྒྱ་ཆ་ ༦།༧༧ ལ་མར་ཆག་ཡོད་པ་དང་། འདས་ལོར་རྒྱ་ནག་ནང་རང་ལོ་ ༦༥ དང་དེའི་ཡན་གྱི་མི་གྲངས་ཀྱིས་རྒྱ
ཡང་ཕྱི་ལོ ༢༠༢༢ ལོར་རྒྱ་ནག་གི་མི་གྲངས་ ༡༠༠༠ ཁྲོད་འདས་གྲོངས་སུ་གྱུར་བའི་བརྒྱ་ཆ་ ༧།༣༧ ཟིན་ཡོད་པས། ཕྱི་ལོ་ ༢༠༢༡ དང་བསྡུར་ན་འདས་ལོར་རྒྱ་ནག་ཏུ་འདས་གྲོངས་སུ་གྱུར་བའི་མི་གྲངས་བརྒྱ་ཆ་ ༠།༡༩ མཐོ་རུ་ཕྱིན་འདུག་པས། དེ་ནི་ཕྱི་ལོ ༡༩༧༦ རྗེས་ཀྱི་རྒྱ་ནག་ཏུ་འདས་གྲོངས་སུ་ཕྱིན་པའི་མི་གྲངས་མང་ཤོས་སུ་གྱུར་ཡོད་པ་རེད་ལ། རྒྱ་ནག་གི་མི་འབོར་ཞིབ་བཤེར་དེའི་ཁྲོད་ཞིང་ཆེན་ ༣༡ དང་རང་སྐྱོང་ས་ཚིགས་སོགས་ཀྱི་མི་རྣམས་ཚུད་ཡོད་ཅིང་། རྒྱ་ནག་ནང་བུད་མེད་བྱིས་པ་སྐྱེ་མཁན་ཉུང་ཉུང་ཡིན་སྟབས་འདས་པའི་ལོ་ཤས་རིང་རྒྱ་ནག་ནང་བྱིས་པ་སྐྱེས་ཚད་ཧ་ཅང་དམའ་རུ་ཕྱིན་ཡོད་སྟབས། ཕྱི་ལོ་ ༢༠༢༡ ལོར་རྒྱ་ནག་དབུས་ཆབ་སྲིད་རྒྱུན་ལས་ལྷན་ཚོགས་ཀྱི་ཚོགས་ཆེན་ཐོག་འཆར་ལྡན་བུ་སྐྱེས་སྲིད་ཇུས་ལ་འགྱུར་བ་བཏང་སྟེ་ཕྲུ་གུ་གསུམ་རེ་སྐྱེ་ཆོག་པ་བཟོས་ཡོད་འདུག
རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་གྱི་གནས་ཚུལ་ནང་། མཉམ་འབྲེལ་རྒྱལ་ཚོགས་ཀྱིས་ཕྱི་ལོ་ ༢༠༥༠ ལོར་རྒྱ་ནག་གི་མི་གྲངས་ཐེར་འབུམ་ ༡།༣༡༣ དང་ཕྱི་ལོ་ ༢༡༠༠ ལོར་མི་འབོར་ས་ཡ་ ༨༠༠༠ ལ་མར་ཟག་སྲིད་པའི་ཚོད་དཔག་ཀྱང་བྱས་འདུག་ལ། ཕྱི་ལོ་ ༢༠༡༦ ལོར་རྒྱ་ནག་གི་བྱིས་པ་སྐྱེ་འཕེལ་ཉུང་དྲགས་པས་རྒྱ་ནག་གཞུང་གིས་བྱིས་པ་གཉིས་སྐྱེ་ཆོག་པའི་སྲིད་ཇུས་ཤིག་གཏན་འབེབ་བྱས་ཡོད་ཅིང་། དེ་ནི་རྒྱ་ནག་ནང་རྒས་འཁོགས་ཆགས་བཞིན་པའི་མི་འབོར་ཉིན་རེ་བཞིན་འཕེལ་བ་དང་། ལས་ཀ་བྱེད་མཁན་གྱི་དར་མའི་མི་འབོར་ཉིན་རེ་བཞིན་ཇེ་ཉུང་དུ་འགྲོ་ཡི་ཡོད་པར་བརྟེན། ཕྱི་ལོ ༢༠༡༧ ལོར་ཕྲུ་གུ་གཉིས་སྐྱེ་མཁན་ལ་བྱ་དགའ་སྤྲོད་པའི་སྲིད་ཇུས་གཏན་འབེབ་ལག་བསྟར་བྱས་ཏེ། རྒྱལ་ཁབ་ཀྱི་མི་འབོར་རྒན་གཞོན་དོ་མཉམ་ཡོང་གི་མེད་པའི་དཀའ་ངལ་སེལ་ཐབས་བྱས་ཡོད་སྐོར་བརྗོད་འདུག
སྤྱིར་རྒྱ་ནག་གཞུང་གིས་ཕྱི་ལོ་ ༡༩༧༩ ལོར་རྒྱ་ནག་གི་མི་འབོར་འཕེལ་རྒྱས་ཉུང་དུ་གཏོང་ཆེད་ཕྲུ་གུ་གཅིག་སྐྱེ་ཆོག་པའི་འཆར་ལྡན་བུ་སྐྱེས་ཀྱི་སྲིད་ཇུས་ལག་བསྟར་བྱས་ཏེ། སྲིད་ཇུས་དེ་དང་འགལ་མཁན་རྣམས་ལ་ཉེས་ཆད་བཏང་བ་དང་ལས་ཀ་མེད་པ་བཟོས་པ། དེ་བཞིན་བཙན་གྱིས་མངལ་ཤོར་དུ་བཅུག་པ་སོགས་ཀྱི་གནད་དོན་མང་པོ་བྱུང་བར་བརྟེན། རྒྱལ་སྤྱིའི་ཐོག་ནས་རྒྱ་ནག་གཞུང་ལ་སྐྱོན་བརྗོད་ཤུགས་ཆེན་བྱས་ཡོད་པ་དང་། རྒྱ་ནག་ནང་ངལ་རྩོལ་བའི་ནུས་ཤུགས་ཉམས་ཞན་དུ་གྱུར་བ་དང་། རྒན་མང་གཞོན་ཉུང་གི་དཀའ་ངལ་རིམ་གྱིས་འཕྲད་དེ། ཕྱི་ལོ་ ༢༠༡༦ ལོར་འཆར་ལྡན་བུ་སྐྱེས་སྲིད་ཇུས་ལ་འགྱུར་བ་བཏང་སྟེ་ཕྲུ་གུ་གཉིས་སྐྱེས་ཆོག་པའི་སྲིད་ཇུས་ལག་བསྟར་བྱས་ཡོད་འདུག
གསར་འགོད་པ། དཔལ་ལྡན།
རྒྱ་ནག་ལ་སྡུག་ཅོང་རེད།
རྩོམ་སྒྲིག་པའམ་གསར་འགོད་པ་ལགས། མི་འབོར་འཕེལ་རྒྱས་ཀྱི་དཀའ་ངལ་འཕེལ་འགྲིབ་ཀྱི་དཀའ་ངལ་ཨེ་ཡིན་ནམ་ལགས།