༧གོང་ས་རྒྱལ་བ་རིན་པོ་ཆེ་མཆོག་གིས་ད་ལྟ་བར་དུ་བོད་བསྟན་སྲིད་ཀྱི་དོན་དུ་ཞབས་འདེགས་གང་ཙམ་ཞིག་བསྒྲུབས་ཡོད་པ་དང་ད་དུང་ཡང་ལོ་བཅུ་ཕྲག་གཅིག་གཉིས་རིང་ཏན་ཏན་ཞབས་འདེགས་བསྒྲུབ་ཐུབ་ཀྱི་ཡོད་པ་གསུངས།
དེ་རིང་གནས་མཆོག་རྡོ་རྗེ་གདན་གྱི་དཔལ་ཡུལ་རྣམ་གྲོལ་གླིང་དུ་རྙིང་མའི་ཆོས་བརྒྱུད་འཛིན་པ་ཡོངས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་གནང་སྐབས། ༧གོང་ས་རྒྱལ་བ་རིན་པོ་ཆེ་མཆོག་གིས། ངོས་རང་གིས་བོད་ཀྱི་བསྟན་པ་དང་འགྲོ་བའི་དོན་ལ་ཁ་ཡོད་ལག་ཡོད་ཀྱི་ཕན་ཐོགས་ཕལ་ཆེར་བྱེད་ཐུབ་ཀྱི་འདུག དེ་སྔ་སངས་རྒྱས་བསྟན་པ་གོ་ཐོས་མེད་སའི་ལུང་པ་ཚོར་ཡང་སངས་རྒྱས་ཀྱི་ཆོས་ལ་དོ་སྣང་གསར་པ་བསླེབས་ཡོད། མདོར་ན་ཡེ་ཤུའི་ཆོས་པའི་ནང་ལའང་སོ་སོའི་ལྟ་གྲུབ་མི་འདྲ་བ་རེད་དེ། བྱམས་པ་དང་བརྩེ་བ། བཟོད་པ་སོགས་ཀྱི་ཐོག་ལ་དགའ་མོས་ཞེ་དྲགས་བྱེད་ཀྱི་འདུག དེར་བརྟེན་ངོས་རང་གིས་བོད་གངས་ཅན་གྱི་བསྟན་པ་དང་འགྲོ་བའི་དོན་ཙམ་མ་ཡིན་པར། འཛམ་བུ་གླིང་འདིའི་སྒང་གི་གཉུག་མར་གནས་པ་དང་བློ་གཟུ་བོར་གནས་པའི་ཆོས་དད་མེད་མཁན་རྣམས་ཀྱིས་ཀྱང་། དངོས་གནས་དྲང་གནས་ཀྱིས་ངོས་ལ་དགའ་པོ་བྱེད་ཀྱི་འདུག་པས། ངོས་རང་ལ་ཆ་བཞག་ནའང་འཛམ་བུ་གླིང་འདིའི་སྒང་གི་མི་མང་པོར་སེམས་དགའ་པོ་བཟོ་རྒྱུ་དང་། བསླབ་བྱ་གཙོ་བོ་དེ་སེམས་བཟང་པོ་བྱ་རྒྱུ་འཆད་དུས། མི་མང་པོ་ལ་ཕན་ཐོགས་ཡོང་གི་འདུག ངོས་རང་ལའང་ཡེ་ཤུའི་ཆོས་པའི་ནང་ལ་ངོ་ཤེས་པ་མང་པོ་ཞིག་ཡོད། སོ་སོའི་ཆོས་ཀྱི་ལྟ་གྲུབ་ཀྱི་གནས་ཚུལ་ཁག་ཁག་རེད། དེ་ངོས་ནས་རྩོད་པ་རྒྱག་གི་མ་རེད་ལ། རྩོད་པ་བརྒྱག་དགོས་དོན་ཡང་ཡོད་མ་རེད། གང་ལྟར་སེམས་བཟང་པོ་བྱ་རྒྱུ་དང་། ཉམས་ཐག་གི་མི་རྣམས་ལ་ཞབས་འདེགས་བསྒྲུབ་རྒྱུ་དེའི་གྲས་ལ་དངོས་གནས་དྲང་གནས་ཡེ་ཤུའི་ཆོས་པ་དེ་ཚོའི་གྲས་ཧ་ལས་པ་ཡག་པོ་རེད་གདའ། དེ་སྔ་དགའ་ལྡན་ཕོ་བྲང་གི་གཞུང་གི་མཛད་སྒོ་ལ་ལྷ་སར་ཡོད་པའི་ཁ་ཆེ་ཚོ་འཆར་ཅན་ཡོང་གི་རེད། ངོས་རང་ཆུང་ཆུང་སྐབས་སུ་ཁ་ཆེ་ཚོ་མཇལ་གར་ཡོང་དུས་ས་ལམ་ཟེར་གྱི་ཡོད་པས། ངོས་རང་ལའང་ཆུང་ཆུང་ནས་དེ་གོམས་བསྡད་ཡོད། གང་ལྟར་ངོས་རང་གི་མི་ཚེ་འདིར་ཆོས་སྡེ་འདྲ་མི་འདྲ་མང་པོ་ཞིག་གིས་དགའ་པོ་བྱས་བསྡད་ཡོད། ཆོས་དད་མེད་མཁན་གྱི་ཚན་རིག་པ་སོགས་ཀྱིས་ཀྱང་ངོས་རང་ལ་དགའ་པོ་ཞེ་དྲགས་བྱེད་ཀྱི་འདུག ཅེས་གསུངས་སོང་།
༧གོང་ས་མཆོག་གིས། བོད་གངས་ཅན་ལྗོངས་ལ་སོ་སོའི་ལས་དང་སྨོན་ལམ་གྱི་ཐུན་མོང་མ་ཡིན་པའི་འབྲེལ་བ་ཡོད་བསྡད་པ་ཞིག་ཡིན་དུས། ངོས་རང་གིས་བོད་གངས་ཅན་གྱི་ལྗོངས་ཀྱི་བསྟན་པ་དང་འགྲོ་བའི་དོན་ལ་དངོས་གནས་དྲང་གནས་དངོས་དང་བརྒྱུད་པའི་ཐོག་ནས་ཞབས་འདེགས་ངེས་ཅན་ཞིག་བསྒྲུབ་ཐུབ་ཀྱི་ཡོད་པ་རེད། བོད་གངས་ཅན་པ་ཚོས་ངོས་རང་ལ་དགའ་མོས་དང་དད་པ། ཞེན་ཁོག་ཞེ་དྲགས་བྱེད་ཀྱི་འདུག བོད་ཆོལ་ཁ་གསུམ་གྱི་བོད་རིགས་གཙོ་བོ་གྱུར་བའི་ཧི་མ་ཡའི་རི་རྒྱུད་ཀྱི་བོད་རིགས་དེ་དག་ཚང་མས་ངོས་རང་ལ་གུས་པ་དང་བརྩེ་བ་ཤུགས་ཆེན་པོ་ཡོད་བསྡད་པ་ཞིག་རེད། ངོས་རང་གིས་དེ་དག་མཐོང་དུས་ངོས་རང་གི་རྨི་ལམ་དུ་ལོ་བརྒྱ་ཕྲག་ལྷག་བསྡད་རྒྱུའི་ཚད་མ་ཞིག་ཡོང་གི་འདུག་ལ། ངོས་རང་གིས་ཡུན་རིང་པོ་ཞིག་འཚོ་བསམ་པའི་སེམས་ཤུགས་སྐྱེད་བསྡད་ཀྱི་ཡོད། ད་ལྟ་ཆ་བཞག་ན་གཟུགས་པོ་ཡག་ཐག་ཆོད་ཡོད། ཨེམ་ཆི་ཚོས་ལྟ་དུས་གཟུགས་པོ་ཡག་པོ་ཞེ་དྲགས་འདུག་ཟེར། གོམ་པ་སྤོས་ནས་ཕར་ཚུར་འགྲོ་དུས་པུས་མོ་ཧྲག་ཙམ་བྱེད་པ་ལས་གཞན་དག་ག་གལ་ཡོད་མ་རེད། ངོས་རང་གིས་ད་ལྟ་བར་དུ་བོད་བསྟན་སྲིད་ཀྱི་དོན་དུ་ཞབས་འདེགས་གང་ཙམ་ཞིག་བསྒྲུབས་ཡོད་པ་རེད་ལ། ངོས་རང་གིས་ད་དུང་ཡང་ལོ་བཅུ་ཕྲག་གཅིག་གཉིས་རིང་ཏན་ཏན་ཞབས་འདེགས་བསྒྲུབ་ཐུབ་ཀྱི་རེད། བྱས་ཙང་ཁྱེད་རང་ཚོ་ཚང་མ་ཐུགས་བློ་བདེ་པོ་བྱས་ནས་བཞུགས་རོགས་གནང་། ཞེས་གསུངས་སོང་།
ཡང་༧མགོན་པོ་གང་ཉིད་ཀྱིས། ལོ་བརྒྱ་ཕྲག་ཁ་ཤས་ཀྱི་རིང་ལ་ངོས་རང་གིས་འཛམ་བུ་གླིང་འདིའི་སྒང་གི་རིས་སུ་མ་ཆད་པའི་བསྟན་པ་སྤྱི་དང་ལྷག་པར་བོད་གངས་ཅན་གྱི་ལྗོངས་ཀྱི་ས་དགེ་བཀའ་རྙིང་རིས་སུ་མ་ཆད་པའི་ཆོས་བརྒྱུད་དེ་དག་མི་ཉམས་གསོ་བཅོས་ཉམས་པ་གོང་འཕེལ་ཡག་པོ་ཡོང་ཐུབ་རྒྱུ་ཞིག་དང་། དེ་རིང་ཁ་སང་འཛམ་བུ་གླིང་འགྱུར་བ་ཞེ་དྲགས་འགྲོ་བསྡད་ཀྱི་འདུག ངོས་རང་གི་མི་ཚེའི་ནང་གི་དཀའ་ངལ་ཆེན་པོ་མྱོང་བའི་ལེའུ་དེ་རྫོགས་འགྲོ་ཡི་ཡོད་པའི་ཟོལ་འདྲ་བོ་ཞིག་འདུག ཅེས་དང་། ད་དངོས་ཡོད་ཀྱི་གནས་སྟངས་ཇེ་གསལ་ཇེ་གསལ་ཕྱིན་པའི་སྐབས་འདིར་བོད་ཀྱི་བདེན་མཐའ་སེལ་ཡོང་རྒྱུ་ཞིག་ཆགས་ཡོང་གི་འདུག ངོས་རང་གིས་བོད་ཀྱི་བདེན་མཐའ་སེལ་ཟེར་ནས་རང་བཙན་སྐད་ཆ་བཤད་ཀྱི་ཡོད་པ་མ་རེད། གང་ལྟར་བོད་ཀྱི་ཆོས་དང་རིག་གཞུང་འདི་བོད་རང་གིས་བདག་པོ་གཙང་མ་ཞིག་བརྒྱབ་ཐུག་པའི་རང་སྐྱོང་མིང་དོན་མཚུངས་པ་དེ་འདྲ་ཞིག་གི་ཐོག་ནས། རྒྱ་ཧོར་བོད་གསུམ་ཚང་མར་ངོས་རང་གིས་བསྟན་པའི་ཞབས་འདེགས་བསྒྲུབ་བསམ་པ་ཞིག་གི་སེམས་ཤུགས་སྐྱེད་བསྡད་ཀྱི་ཡོད། ངོས་རང་གིས་བསམ་བློ་གུ་དོག་པོ་གཏོང་གི་མེད། རྒྱ་ཆེ་ས་ནས་བསམ་བློ་བཏང་ནས་འགྲོ་བསྡད་དུས། ངོས་རང་མི་ཚེ་རིང་པོར་བསྡད་ནས་བོད་གངས་ཅན་པ་གཙོ་བོར་གྱུར་བའི་ཧི་མ་ཡ་ལའི་རི་རྒྱུད་དང་། འཛམ་བུ་གླིང་གི་མི་ཚང་མར་སེམས་ཀྱི་ཞི་བདེ་ཡོང་བར་འབད་བརྩོན་བྱས་བསྡད་ཡོད། ངོས་རང་གིས་གོ་མཚོན་གང་ཡང་མེད་པར་འཛམ་གླིང་ཞི་བདེ་ཡོང་བར་སྨོན་ལམ་རྒྱག་གི་ཡོད་ལ། ཕལ་ཆེར་འགྲུབ་རྒྱུའི་ཟོལ་ཞིག་འདུག ཅེས་གསུངས་སོང་།
༧གོང་ས་རྒྱལ་བ་རིན་པོ་ཆེ་མཆོག་གིས། དེ་རིང་ཚེ་མཆོག་དང་འབྲེལ་བའི་ཐོག་ནས་བརྟན་བཞུགས་གནང་བ་རེད། དེས་སྐུ་གེགས་ཀྱི་བར་ཆད་ཞི་ནས་ཚེ་རིང་དུ་གནས་རྒྱུར་ཏན་ཏན་ཕན་ཐོགས་ཡོད་པ་རེད། ཁྱེད་རང་ཚོས་ཀྱང་གཙོ་བོ་དད་པ་དང་དམ་ཚིག་གཡོ་བ་མེད་པ་བྱས་ནས་གནང་གི་ཡོད་པ་རེད། དེ་འདྲ་ཡིན་དུས་ཐུགས་རྗེ་ཆེ་ཞུ་རྒྱུ་ཡིན། ང་ཚོ་བོད་པ་གཙོ་བོར་གྱུར་བའི་ངོས་རང་ལ་དགའ་མོས་བྱེད་མཁན་རྣམས་ཀྱིས། ངོས་རང་ལ་དགའ་མོས་ཇི་ཙམ་ཡོད་པ་དེའི་ཚོད་ཀྱིས་སོ་སོའི་མི་ཚེ་བཟང་པོ་ཞིག་ལས། ཕྲག་དོག་དང་། ང་རྒྱལ། འགྲན་སེམས་ཀྱི་ཐོག་ནས་ཕྱིན་པ་ཡིན་ན། ངོས་རང་དགའ་མོས་བྱས་པའི་དོན་དག་ཚང་གི་མེད། དངོས་གནས་དྲང་གནས་བྱམས་པ་དང་བརྩེ་བ་ཡི་ཐོག་ནས་མི་ཚེ་སྐྱེལ་ན། ངོས་རང་ལ་དགའ་མོས་བྱས་པ་མིང་དོན་མཚུངས་པ་ཞིག་ཡོང་གི་ཡོད། ཅེས་དང་། དེ་བཞིན་༧མགོན་པོ་གང་ཉིད་ཀྱིས། རིམ་པས་ང་ཚོས་རྒྱ་གར་ས་ཁུལ་ཁག་ལ་ཚོགས་པ་ནང་བཞིན་བོད་གངས་ཅན་གྱི་ལྷ་ལྡན་གཙུག་ལག་ཁང་གི་ཉེ་འདབས། རྩེ་ཕོ་བྲང་གི་མདུན་གྱི་བཞུགས་ཁྲི་གླིང་ག་ཟེར་ནས་རྒྱ་ཆེན་པོ་ཞིག་ཡོད། དེར་ང་ཚོ་རུག་རུག་བྱས། ཁྱེད་རང་ཚོས་ཀྱང་བརྟན་བཞུགས་ཀྱི་ཚེ་མཆོག་དེ་འདྲ་གསུངས། ངོས་རང་གིས་སྨོན་ལམ་ཡག་པོ་ཞིག་བརྒྱབ་པའི་དུས་ཚོད་བཟང་པོ་ཞིག་ཕལ་ཆེར་ཡོང་རྒྱུའི་རེ་བ་ཡོད་པའི་ཟོལ་ཞིག་འདུག ངོས་རང་ཡང་སེམས་ཤུགས་སྐྱེད་བསྡད་ཡོད། ཁྱེད་རང་ཚོ་ཚང་མས་སྙིང་སྟོབས་ཡར་སྐྱེད་ནས་ཧུར་ཐག་འབད་ཐག་གནང་ཤོག་ཨ། ཞེས་གསུངས་སོང་།
གསར་འགོད་པ། དཔལ་ལྡན།
