ཉི་ཧོང་ནང་པའི་མཐུན་ཚོགས་ཀྱིས་རྒྱ་ནག་གཞུང་ལ་༧གོང་ས་མཆོག་གི་ཡང་སྲིད་ཐད་ཇུས་གཏོགས་བྱེད་པའི་དབང་ཆ་མེད་པ་མ་ཟད། དེ་ནི་འཛམ་གླིང་གི་ཆོས་ལུགས་སྤྱི་དང་ལྷག་པར་དུ་ནང་པ་རྣམས་ལ་མཐོང་ཆུང་ཁྱད་གསོད་བྱས་ཡིན་པའི་སྐྱོན་བརྗོད་ནན་མོ་བྱས་འདུག
ཉེ་ལམ་ཉི་ཧོང་ནང་པའི་ལྷན་ཚོགས་ངོས་ནས་རྒྱ་ནག་གཞུང་གིས་བོད་ཀྱི་བླ་སྤྲུལ་ཡང་སྲིད་ངོས་འཛིན་གནང་ཕྱོགས་དང་འབྲེལ་ནས། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ངོས་འཛིན་ཐད་ལ་ཐེ་ཇུས་བྱེད་བཞིན་ཡོད་པར་སྐྱོན་བརྗོད་ཀྱི་བསྒྲགས་གཏམ་སྤེལ་ཡོད་ཡོད་པ་ལྟར། ཁ་སང་ཕྱི་ཚེས་ ༢༤ ཉིན་ཉི་ཧོང་ནང་པའི་ལྷན་ཚོགས་ (Japan Buddhist Conference for World Federation) ཀྱི་སྐུ་ཚབ་དྲུང་ཆེ་མི་ཛུ་ཏ་ནི་ཨི་ཀན་ (Mizutani Eikan) ལགས་དང་ཨི་ཏོ་ཨི་ནིན་ (Itoh Einin) ལགས་རྣམ་གཉིས་ཆེད་དུ་ཉི་ཧོང་སྐུ་ཚབ་དོན་ཁང་དུ་ཕེབས་ཏེ་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་དང་ཐུག་འཕྲད་ཀྱིས། རྒྱ་ནག་གཞུང་གིས་༧གོང་ས་མཆོག་གི་སྐུའི་ཡང་སྲིད་ངོས་འཛིན་ཐད་ཐེ་གཏོགས་བྱེད་བཞིན་པར་ངོ་རྒོལ་ཡོད་པའི་བསྒྲགས་གཏམ་ཞིག་ཕུལ་ཡོད་འདུག
དེ་འབྲེལ་བོད་མིའི་སྒྲིག་འཛུགས་ཀྱི་དབྱིན་ཡིག་དྲ་རྒྱའི་སྟེང་སྤེལ་བའི་གནས་ཚུལ་ནང་། ཉི་ཧོང་ནང་པའི་ལྷན་ཚོགས་ཀྱི་ཚོགས་མི་རྣམས་ཀྱིས། ཆོས་དད་མེད་པའི་རྒྱ་ནག་དམར་ཤོག་སྲིད་གཞུང་ལ་བོད་ཀྱི་ཆོས་ལུགས་ཀྱི་གནད་དོན་ཐོག་ཐེ་ཇུས་བྱེད་པའི་དབང་ཆ་མེད་པ་དང་། རྒྱ་ནག་གཞུང་གི་བྱེད་ཕྱོགས་དེ་ནི་འཛམ་གླིང་གི་ཆོས་ལུགས་ཡོངས་དང་ལྷག་པར་དུ་ནང་པ་རྣམས་ལ་མཐོང་ཆུང་ཁྱད་གསོད་བྱེད་བཞིན་ཡོད་པ་མ་ཟད། རྒྱ་ནག་གཞུང་གིས་བོད་མི་རྣམས་ལ་ཆོས་དད་རང་དབང་སྤྲོད་དགོས་པ་དང་། ༧གོང་ས་མཆོག་གི་སྐུའི་ཡང་སྲིད་ངོས་འཛིན་བྱེད་པའི་འགན་དབང་དེ་བོད་མི་རྣམས་ལ་ཡོད་པ། ད་དུང་རྒྱ་ནག་གིས་༧སྐུའི་ཡང་སྲིད་ངོས་འཛིན་གནང་ཕྱོགས་ཐད་ཐེ་གཏོགས་བྱེད་མཚམས་འཇོག་དགོས་པའི་སྐུལ་མ་གཏོང་གི་ཡོད་པ་སོགས་ཀྱི་བསྒྲགས་གཏམ་སྤེལ་ཡོད་སྐོར་བརྗོད་སོགས་བརྗོད་འདུག་ལ། ད་དུང་ཉི་ཧོང་གི་དགེ་འདུན་པ་དང་མི་མང་གིས་༧གོང་ས་རྒྱལ་བ་རིན་པོ་ཆེ་མཆོག་དང་བོད་ཀྱི་ནང་པ་སངས་རྒྱས་པའི་ཆོས་ལུགས་ལ་རྩི་མཐོང་ཧ་ཅང་ཆེན་པོ་ཡོད་པར་བརྟེན། ཉི་ཧོང་མི་མང་གིས་རྒྱ་ནག་གཞུང་གིས་བདམས་པའི་ཏཱ་ལའི་བླ་མར་དུས་ནམ་ཡང་ངོས་འཛིན་བྱ་རྒྱུ་མིན། ཞེས་བརྗོད་ཡོད་འདུག
ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས། ཉི་ཧོང་ནང་པའི་ལྷན་ཚོགས་ཀྱི་ཚོགས་མི་རྣམས་ཀྱིས་རྒྱ་ནག་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ཀྱི་གནད་དོན་ཐོག་ལ་ཐེ་ཇུས་བྱེད་སྲིད་པར་སེམས་འཚབ་དང་འབྲེལ་ནས། རྒྱ་ནག་གཞུང་གིས་དེའི་ཐོག་ལ་ཐེ་ཇུས་བྱ་རྒྱུ་མེད་པའི་འབོད་སྐུལ་ཞུས་པར་ཐུགས་རྗེ་ཆེ་ཞུས་པ་དང་། དེ་ལ་བརྟེན་ནས་འཛམ་གླིང་གིས་རྒྱ་ནག་གི་མགོ་ཁྲིད་དང་རྒྱ་གཞུང་གི་བྱེད་ཕྱོགས་ལ་དོ་སྣང་བྱེད་བཞིན་པའི་ཉེན་བརྡ་གཏོང་བ་དང་། ཆོས་ཚོགས་གཞན་རྣམས་ཀྱིས་ཀྱང་དེ་ལྟར་ཐག་གཅོད་གནང་བར་སྐུལ་མ་ཐེབས་ངེས་རེད། ཅེས་བརྗོད་ཡོད་འདུག
འདི་ལོའི་ཕྱི་ཟླ་ ༡ པོའི་ནང་སེངྒ་ལའི་གནད་ཡོད་མི་སྣ་མང་པོ་ཞིག་གནས་མཆོག་རྡོ་རྗེ་གདན་དུ་ཕེབས་ཏེ། ༧གོང་ས་རྒྱལ་བ་རིན་པོ་ཆེ་མཆོག་དང་མཇལ་འཕྲད་ཀྱིས་༧གོང་ས་མཆོག་སེངྒ་ལའི་རྒྱལ་ཁབ་ཏུ་གདན་འདྲེན་ཞུས་ཡོད་པར་བརྟེན། ཟླ་འདིའི་ཕྱི་ཚེས་ ༡༧ ཉིན་རྒྱ་ནག་གཞུང་གིས་སེངྒ་ལའི་ནང་པའི་གནད་ཡོད་མི་སྣ་ཁག་ཅིག་༧གོང་ས་རྒྱལ་བ་རིན་པོ་ཆེ་མཆོག་དང་ཐུག་འཕྲད་གནང་ཡོད་པར་སེམས་འཚབ་དང་། ༧མགོན་པོ་གང་ཉིད་མཆོག་སེངྒ་ལའི་རྒྱལ་ཁབ་ཏུ་ཆིབས་སྒྱུར་བསྐྱང་འཆར་ཡོད་པར་ངོ་རྒོལ་ཡོད་པའི་བསྒྲགས་གཏམ་སྤེལ་ཡོད་པ་མ་ཟད། ད་དུང་རྒྱ་ནག་གཞུང་གིས་སེངྒ་ལའི་རྒྱལ་ཁབ་ལ་ཆབ་དཔལ་གཉིས་ཀྱི་ཐོག་ནས་གནོན་ཤུགས་སྤྲད་དང་སྤྲོད་མུས་ཡིན་འདུག
གསར་འགོད་པ། བསྟན་འཛིན་ཕུར་བུ།
