༧གོང་ས་མཆོག་སེངྒ་ལའི་ནང་གདན་འདྲེན་ཞུས་པར་རྒྱ་ནག་གཞུང་གིས་སེངྒ་ལའི་ནང་ཚོགས་དང་གཞུང་གཉིས་ལ་གནོད་ཤུགས་སྤྲོད་ཀྱི་ཡོད་པ་རེད།
དེ་རིང་རྒྱལ་སྤྱིའི་ (The Deplomat) གསར་ཁང་གི་དྲ་རྒྱའི་སྟེང་གསར་ཁང་དེའི་ལྷོ་ཨེ་ཤ་ཡའི་རྩོམ་སྒྲིག་མ་ལྕམ་སོའུ་དྷ་ (Sudha Ramachandran) ལགས་ཀྱིས་དཔྱད་རྩོམ་ཞིག་སྤེལ་ཏེ། རྒྱ་ནག་གཞུང་གིས་༧གོང་ས་མཆོག་སེངྒ་ལར་ཕེབས་རྒྱུའི་ཐད་སེམས་འཚབ་བྱེད་བཞིན་ཡོད་པ་མ་ཟད། སེངྒ་ལར་ཡོད་པའི་རྒྱ་ནག་གཞུང་ཚབ་པ་ཧོའུ་ཝི་ (Hu Wei) ཟེར་བས་ཐད་ཀར་སངྒེ་ལའི་ནང་པའི་མགོ་ཁྲིད་ཁག་དང་ཐུག་འཕྲད་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་སེངྒ་ལར་ཕེབས་རྒྱུ་བཀག་སྡོམ་བྱ་དགོས་པའི་འཇིགས་སྐུལ་བྱས་ཡོད་སྐོར་སོགས་བརྗོད་འདུག
རྩོམ་ཡིག་དེའི་ནང་། ཉེ་ལམ་རྒྱ་ནག་གཞུང་ཚབ་པ་ཧོའུ་ཝི་ཟེར་བས་ཆེད་དུ་སེངྒ་ལའི་གྲོང་ཁྱེར་ (Colombo) ནས་དབུས་གྲོང་ཁྱེར་ (Kandy) ནང་གི་ནང་པའི་དབུ་བླ་མཐོ་ཤོས་ (Thibbatuwawe Sri Siddhartha Sumangala Thero) ལགས་དང་ཐུག་འཕྲད་བྱས་ཏེ། ༧གོང་ས་མཆོག་ནི་གྲྭ་བ་དཀྱུས་མ་ཞིག་མ་ཡིན་པར་ཁ་བྲལ་རིང་ལུགས་པ་དང་། བོད་རང་བཙན་ཁྱབ་བསྒྲགས་བྱེད་མཁན་ཞིག་ཡིན་པའི་སྐྱོན་བརྗོད་དང་སྦྲགས། སེངྒ་ལའི་གཞུང་གིས་༧གོང་ས་མཆོག་རྒྱལ་ཁབ་དེའི་ནང་གདན་འདྲེན་མི་ཞུ་བ་དང་། རྒྱ་ནག་དང་སེངྒ་ལའི་ལོ་རྒྱུས་ཀྱི་འབྲེལ་ལམ་སྲུང་སྐྱོབ་བྱེད་པ་ལས་གཏོར་སྐྱོན་གཏོང་མི་ཉན་པའི་འཇིགས་སྐུལ་བྱས་ཡོད་སྐོར་བརྗོད་འདུག
ཡང་སེངྒ་ལའི་ནང་གི་རྒྱ་ནག་གཞུང་ཚབ་ཁང་གི་དྲ་ཐོག་ཏུ། རྒྱ་ནག་གཞུང་གིས་སེངྒ་ལར་རྒྱབ་སྐྱོར་མུ་མཐུད་བྱ་རྒྱུའི་མཚོན་པའི་འདས་པའི་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་སྐབས་དང་། ད་ལྟའི་དཔལ་འབྱོར་ཉམས་རྒུད་ཀྱི་དཀའ་ངལ་ཐོག་རོགས་སྐྱོར་བྱེད་མུས་ཡིན་པས། ༧གོང་ས་མཆོག་སེངྒ་ལའི་ནང་གདན་ཞུ་གནང་རྒྱུ་མཚམས་འཇོག་དགོས་པའི་སྐུལ་མ་བཏང་ཡོད། ཅེས་བརྗོད་འདུག་པ་དང་། འདས་ལོའི་ཕྱི་ཟླ་ ༡༢ ཚེས་ ༢༩ ནས་ ༣༡ བར་༧གོང་ས་རྒྱལ་བ་རིན་པོ་ཆེ་མཆོག་གི་གནས་མཆོག་རྡོ་རྗེ་གདན་གྱི་གསུང་ཆོས་སྐབས། སེངྒ་ལའི་ནང་པའི་གནད་ཡོད་དབུ་ཁྲིད་ཁག་ཅིག་གིས་༧གོང་ས་མཆོག་ལ་མཇལ་བཅར་ཞུས་པ་དང་བསྟུན། ༧མགོན་པོ་གང་ཉིད་མཆོག་སེངྒ་ལའི་རྒྱལ་ཁབ་ཏུ་ཕེབས་པའི་གསོལ་འདེབས་ཞུས་ཡོད་ཅིང་། དེ་ལ་བརྟེན་ནས་རྒྱ་ནག་གཞུང་གིས་སེངྒ་ལའི་ནང་པའི་དབུ་ཁྲིད་ཚོར་གནོད་ཤུགས་སྤྲོད་མགོ་བརྩམས་པ་ཞིག་ཡིན་འདུག
རྩོམ་ཡིག་ནང་རྒྱ་ནག་གི་སྐད་ཆ་དེ་དག་གིས། གལ་སྲིད་སེངྒ་ལའི་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་གདན་འདྲེན་ཞུ་རྒྱུ་ཕྱིར་འཐེན་མ་བྱས་ཚེ། སེངྒ་ལའི་གཞུང་ལ་བུ་ལོན་གྱི་ཐོག་ནས་གནོད་ཤུགས་སྤྲད་རྒྱུ་ཡིན་པའི་ཉེན་བརྡ་བཏང་བ་མངོན་ཡོད་པ་དང་། ༧གོང་ས་མཆོག་འཛམ་གླིང་ས་ཕྱོགས་གང་དུ་ཕེབས་ཀྱང་རྒྱ་ནག་གཞུང་གིས་དགག་བྱ་འདོན་གྱི་ཡོད་པ་ལས། དཔེར་ན་རྒྱ་གར་ལྟ་བུ་ཡིན་ན། ༧གོང་ས་མཆོག་ཨ་རུ་ན་ཅལ་མངའ་སྡེའི་ནང་ཕེབས་སྐབས། དུས་རྒྱུན་དུ་རྒྱ་ནག་གཞུང་གིས་ངོ་རྒོལ་བསྒྲགས་གཏམ་སྤེལ་གྱི་ཡོད་པ་རེད་ལ། ཕྱི་ལོ་ ༢༠༡༦ ལོར་དམིགས་བསལ་༧གོང་ས་མཆོག་ནང་པའི་རྒྱལ་ཁབ་སོག་པོར་ཕེབས་རྗེས། རྒྱ་ནག་གཞུང་གིས་ཚོང་འབྲེལ་གྱི་ཐོག་ནས་སོག་པོའི་དཔལ་འབྱོར་འཕེལ་རྒྱས་ལ་འགོག་རྐྱེན་བཟོས་ཡོད་སྐོར་ཡང་བརྗོད་འདུག
ཕྱི་ལོ་ ༢༠༡༥ ལོར་སེངྒ་ལའི་ནང་པའི་དབུ་ཁྲིད་ཁག་ཅིག་གིས་རྒྱ་གར་གྱི་རྒྱལ་ས་ལྡི་ལི་རུ་༧གོང་ས་མཆོག་ལ་མཇལ་བཅར་ཞུས་ཏེ་གདན་ཞུ་གནང་ཡོད་སྟབས། ལོ་དེར་རྒྱ་ནག་གཞུང་གིས་སེངྒ་ལའི་ནང་སྲིད་ཐོག་ཇུས་གཏོགས་བྱས་ཏེ། རྒྱ་ནག་གི་མཐུན་ཕྱོགས་སྲིད་དོན་ཚོགས་པར་འོས་བསྡུའི་རྒྱལ་ཁ་ཐོབ་ཡོད་པ་མ་ཟད། སྐབས་དེར་སེངྒ་ལའི་ཕྱི་སྲིད་ལྷན་ཁང་གིས་༧གོང་ས་མཆོག་གལ་ཆེན་པོ་རེད། འོན་ཀྱང་སེངྒ་ལ་དང་རྒྱ་ནག་གི་འབྲེལ་ལམ་དེ་བས་ཀྱང་གལ་ཆེན་ཡིན་པས། ནང་པའི་རྗེས་འབྲངས་པ་ཚོས་༧ཁོང་གདན་ཞུ་བྱས་ཆོག་ཀྱང་ཐོངས་མཆན་རག་ཁག་པོ་ཡིན་ཚུལ་འགྲེལ་བརྗོད་བྱས་ཡོད་པ་རེད།
ད་ལྟའི་ཆར་དགའ་ལྡན་ཕོ་བྲང་གི་དྲ་རྒྱའི་སྟེང་༧གོང་ས་རྒྱལ་བ་རིན་པོ་ཆེ་མཆོག་སེངྒ་ལའི་ནང་ཕེབས་འཆར་ཡོད་སྐོར་གྱི་གནས་ཚུལ་གཅིག་ཀྱང་བཀོད་མི་འདུག་པ་མ་ཟད། བོད་མིའི་སྒྲིག་འཛུགས་ཀྱི་འབྲེལ་ཡོད་མི་སྣ་ཁག་ཅིག་གིས་ད་ལྟ་༧གོང་ས་མཆོག་སེངྒ་ལའི་ནང་ཕེབས་འཆར་མེད་སྐོར་བརྗོད་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
