༧གོང་ས་མཆོག་ནས་ཏུར་ཀི་དང་སི་རི་ཡའི་ནང་ས་ཡོམ་བྱུང་བར་ཐུགས་གསོ་མཛད།

༧གོང་ས་རྒྱལ་བ་རིན་པོ་ཆེ་མཆོག་གིས་དཀྱིལ་ཤར་ཨེ་ཤ་ཡའི་རྒྱལ་ཁབ་ཏུར་ཀི་དང་སི་རི་ཡའི་ནང་ས་ཡོམ་ཚད་རིམ་ ༧།༨ ཅན་ཞིག་བརྒྱབ་སྟེ་གནོད་སྐྱོན་ཚབས་ཆེན་བྱུང་བར་ཐུགས་གསོ་དང་སྦྲགས་འཛམ་གླིང་ཟས་རིགས་ལས་གཞིའི་སྤྱི་ཁྱབ་ངེས་སྟོན་པ་ཌཱ་ཝི་ཌི་མུ་ཊོ་བྷ་སི་ལེ་(David Muldrow Beasley)ལ་གསུང་འཕྲིན་ཞིག་བསྩལ་འདུག

དེ་ཡང་༧གོང་ས་མཆོག་གིས་གསུང་འཕྲིན་ནང་། ངོས་ཀྱིས་ཡ་ང་བའི་གོད་ཆག་འདི་ལ་བརྟེན་ནས་ཚེ་སྲོག་ཤོར་མཁན་དང་གནོད་སྐྱོན་འཕོག་མཁན་གྱི་ནང་མི་ཉེ་འབྲེལ་ཡོངས་ལ་སེམས་གསོ་ཞུ་རྒྱུ་ཡིན། དེ་དང་དུས་མཚུངས་སུ་མཉམ་འབྲེལ་རྒྱལ་ཚོགས་ཀྱིས་འབྲེལ་མཐུད་གནང་བའི་འཕྲོད་ལས་པ་མ་ཟད། འཛམ་གླིང་ཁྱོན་ཡོངས་ནས་རྒྱལ་ཁབ་དང་། གཞུང་ཁོངས་མིན་པའི་ཚོགས་པ་མང་པོས་གནོད་ཐེབས་ས་ཁུལ་དུ་ཉེན་སྐྱོབ་དང་ངལ་སེལ་ལས་དོན་སྤེལ་བཞིན་པ་ཤེས་རྟོགས་བྱུང་བས་སེམས་འགུལ་ཆེན་པོ་ཐེབས་བྱུང་། གོད་ཆག་དེ་ལ་བརྟེན་ནས་གནོད་སྐྱོན་འཕོག་མཁན་ཏུར་ཀི་དང་སི་རི་ཡཱ་མི་མང་རྣམས་ལ་གདུང་སེམས་མཉམ་བསྐྱེད་མཚོན་ཆེད་ངོས་ཀྱིས་དགའ་ལྡན་ཕོ་བྲང་ཐེབས་རྩ་ལ་ཉེན་སྐྱོབ་དང་ངལ་སེལ་ལས་དོན་ཆེད་ཞལ་འདེབས་འབུལ་དགོས་པའི་སྐུལ་མ་བཏང་ཡོད། ཅེས་གསུངས་འདུག

ཁ་སང་ཕྱི་ཚེས་ ༦ ཉིན་ཞོགས་པར་དཀྱིལ་ཤར་ཨེ་ཤ་ཡར་ཏུར་ཀི་ཡི་ལྷོ་ཕྱོགས་དང་སི་རི་ཡའི་བྱང་ཕྱོགས་ས་མཚམས་སུ་ཚད་རིམ་ ༧།༨ ཅན་གྱི་ས་ཡོམ་བརྒྱབ་སྟེ། ད་ལྟ་བར་དུ་མི་གྲངས་ ༥༠༠༠ ལྷག་རྐྱེན་འདས་སུ་ཕྱིན་པ་དང་། མི་གྲངས་སྟོང་ཕྲག་མང་པོ་རྨས་སྐྱོན་ཕོག་ཡོད་པ་མ་ཟད། སྡོད་ཁང་ལ་གཏོར་བཤིག་ཐེབས་ཏེ་་གནོད་སྐྱོན་ཚབས་བྱུང་ཡོད་འདུག ཐེངས་འདིའི་ས་ཡོམ་ཐེངས་གཉིས་བརྒྱབ་ཡོད་ཅིང་། ས་ཡོམ་ཐེངས་དང་པོ་ཚད་རིམ་༧།༨ དང་། ས་ཁུལ་གཙོ་བོ་ནི་ཀཱ་ཛིན་ཏི་ཕི་(Gaziantap)ཁུལ་ཡིན་པ་དང་། ས་ཡོམ་ཐེངས་གཉིས་པ་ནི་ས་ཡོམ་ཚད་རིམ་ ༧།༥ ཡིན་འདུག གནོད་ཐེབས་ས་ཁུལ་གཙོ་བོ་ཨེ་ཀི་ནོ་ཛུ་(Ekinoozu ) ཁུལ་ཡིན་འདུག

གསར་འགོད་པ། བྱམས་པ་ཚེ་རིང་།