རྒྱ་གར་པན་ཇབ་ཀྱི་མི་རྒྱུད་ཡིན་པ་ཨ་རིའི་མཉམ་འབྲེལ་རྒྱལ་ཚོགས་ཀྱི་སྐུ་ཚབ་ཟུར་པ་ལྕམ་སྐུ་ནི་ཀི་ཧེ་ལི་ལགས་ཕྱི་ལོ་ ༢༠༢༤ ལོའི་སྤྱི་མཐུན་ཚོགས་པའི་སྲིད་འཛིན་འོས་མིར་ལངས་བ་ཡོངས་ཁྱབ་གསལ་བསྒྲགས་གནང་འདུག
ཁ་སང་ཕྱི་ཚེས་ ༡༤ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན་རང་ལོ་ ༥༡ ཡིན་པའི་ཨ་རིའི་ལྷོ་ཁེ་རོ་ལི་ན་ (South Carolina) མངའ་སྡེའི་སྤྱི་ཁྱབ་ཟུར་པ་དང་། རྒྱ་གར་གྱི་མི་རྒྱུད་ཡིན་པ་ལྕམ་སྐུ་ནི་ཀི་ཧེ་ལི་ (Nikki Haley) ལགས་ཀྱིས་ཁོང་མོ་ཕྱི་ལོ་ ༢༠༢༤ ལོའི་སྤྱི་མཐུན་ཚོགས་པའི་ཨ་རིའི་སྲིད་འཛིན་གྱི་འོས་མིར་ལངས་བ་ཡོངས་བསྒྲགས་གནང་འདུག་ལ། འདས་ལོར་ཨ་རིའི་སྲིད་འཛིན་ ༤༥ པ་ཊོམ་ཕུ་ལགས་ཀྱིས་ཁོང་ཕྱི་ལོ་ ༢༠༢༤ ལོའི་སྤྱི་མཐུན་ཚོགས་པའི་སྲིད་འཛིན་འོས་མིར་ལངས་བ་གསལ་བསྒྲགས་གནང་ཟིན་ཡོད་སྟབས། མ་འོངས་པར་སྤྱི་མཐུན་ཚོགས་པའི་སྲིད་འཛིན་འོས་མིའི་བར་འགྲན་རྩོད་བྱ་དགོས་པ་དང་། མཐའ་མའི་རྒྱལ་ཁ་ཐོབ་མཁན་གྱི་འོས་མི་དེ་ཕྱི་ལོ་ ༢༠༢༤ ཟླ་ ༡༡ པའི་ནང་གི་རྒྱལ་ཡོངས་འོས་བསྡུ་ཆེན་མོའི་ཁྲོད་སྲིད་དོན་ཚོགས་པ་ཁག་གི་སྲིད་འཛིན་འོས་མི་དང་ལྷན་དུ་རྩོད་ལེན་གནང་དགོས་ཀྱི་ཡོད་པ་རེད།
ལྕམ་སྐུ་ནི་ཀི་ཧེ་ལི་ལགས་ཀྱིས་བརྙན་ལམ་བརྒྱུད་དེའི་སྐོར་གཏམ་བཤད་ཐུང་ཐུང་ཅིག་གནང་བའི་ནང་། ཁོང་མོ་རྒྱ་གར་ནས་གནས་སྤོ་བྱས་པའི་ཁྱིམ་ཚང་ཞིག་གི་བྱིས་པ་ཡིན་ལ། ད་ལྟ་ནི་མི་རབས་གསར་པས་སྣེ་འཁྲིད་དེ་འགན་འཁུར་ལེན་པའི་དུས་ཚོད་ཅིག་ཡིན་ལ། རྒྱལ་ཁབ་ཀྱི་མཐའ་མཚམས་སྲུང་སྐྱོབ་དང་། སོ་སོའི་རྒྱལ་ཁབ་ལ་ཞེན་ཁོག དེ་བཞིན་རྒྱལ་ཁབ་ཀྱི་ནུས་སྟོབས་གོང་སྤེལ་དང་སྲ་བརྟན་དུ་གཏོང་རྒྱུའི་ཐད་ལ་བསམ་བློ་གསར་པ་དགོས་སྐོར་སོགས་བརྗོད་འདུག
ཡང་ཁོང་མོས། ང་རང་རྒྱ་གར་ནས་གནས་སྤོ་བྱས་པའི་བུ་མོ་སྤོབས་པ་དང་ལྡན་པ་ཞིག་ཡིན། ང་རང་མི་རིགས་ནག་པོ་མིན་ལ་མི་རིགས་དཀར་པོའང་མིན། ང་གཞན་དང་མི་འདྲ་བ་ཞིག་ཡིན། འོན་ཀྱང་ངའི་ཨ་མ་ལགས་ཀྱིས་ཉིན་ལྟར་ངའི་ལས་འགན་ནི་ཁྱད་པར་དང་དབྱེ་བ་ལ་མི་ལྟ་བར་མཚུངས་པའི་ཆ་ལ་ལྟ་དགོས་སྐོར་དང་། ང་དང་ངའི་སྤུན་མཆེད་རྣམས་ཨ་རིའི་ནང་གནས་སྡོད་བྱེད་ཐུབ་པ་ནི་བསོད་ནམས་ཆེན་པོ་རེད་ཅེས་རྗོད་ཀྱི་འདུག་ལ། མི་ཁག་ཅིག་གིས་འདས་པའི་ལོ་རྒྱུས་ལ་བལྟས་ནས་ཨ་རིའི་གཞི་རྩའི་ལམ་ལུགས་སྡུག་ཅག་ཡིན་པ་དང་། རང་དབང་སྤྲོད་རྒྱུའི་ཁས་ལེན་བྱས་པ་ལས། དོན་དངོས་སུ་མི་རིགས་དབྱེ་འབྱེད་དང་མི་རིགས་རིང་ལུགས་ཤུགས་ཆེན་ཡོད་པ་རེད། ཅེས་བརྗོད་ཡོད་འདུག
ལྕམ་ནི་ཀི་ཧེ་ལི་ལགས་ཀྱི་ཕ་མ་གཉིས་རྒྱ་གར་པན་ཇབ་མངའ་སྡེ་ནས་ཡིན་ཞིང་། དང་པོ་ཁེ་ན་ཌར་ཕྱིན་པ་དང་། དེ་ནས་ཕྱི་ལོ་ ༡༩༦༠ ལོར་ཨ་རིའི་ནང་གནས་སྤོ་བྱས་ཡོད་འདུག ཕྱི་ལོ་ ༢༠༡༡ ཟླ་ ༡ པོའི་ནང་ཁོང་མོ་ལྷོ་ཁེ་རོ་ལི་ན་མངའ་སྡེའི་སྤྱི་ཁྱབ་ཏུ་འདེམས་ཐོན་བྱུང་ཡོད་པ་དང་། ཁོང་མོ་ནི་མངའ་སྡེ་དེའི་སྤྱི་ཁྱབ་བུད་མེད་ཐོག་མ་དེ་ཆགས་པ་མ་ཟད། མངའ་སྡེ་དེའི་སྤྱི་ཁྱབ་ཐེངས་གཉིས་གནང་། ཨ་རིའི་སྲིད་གཞུང་སྐབས་སྔོན་མ་སྟེ་ཊོམ་ཕུའི་སྐབས་སུ་ལྕམ་ནི་ཀི་ཧེ་ལི་ལགས་ཕྱི་ལོ་ ༢༠༡༧ ཟླ་ ༡ ནས་ཕྱི་ལོ་ ༢༠༡༨ ཟླ་ ༡༢ བར་མཉམ་འབྲེལ་རྒྱལ་ཚོགས་ཀྱི་ཨ་རིའི་གཞུང་ཚབ་ཏུ་བསྐོ་བཞག་བྱུང་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
