ཆུ་ལོག་གོད་ཆག་བྱུང་རྗེས་ཀྱི་བོད་འབྲུག་ཆུ་རྫོང་གི་གནས་སྟངས།         

རྒྱ་ནག་གཞུང་གིས་ཕྱི་ལོ་༢༠༢༡ ཟླ་ ༨ ནས་ ཕྱི་ལོ ༢༠༢༢ ཟླ ༡༢ པའི་བར་དུ་འབྲུག་ཆུའི་ཁྱིམ་ཚང་ ༣༡༠༧ དང་མི་གྲངས་ ༡༢༣༦༠ ལྷག་ལན་ཀྲོའུ་གྲོང་ཁྱེར་མཁར་གསར་ཁུལ་གྱི་གནས་སྤོ་མི་མང་གཏན་སྡོད་ཁུལ་(兰州新区承接移民搬迁安置区)ཟེར་བར་སྤོ་རུ་བཅུག་འདུག

ད་ལྟ་རྒྱ་ནག་གཞུང་གིས་བཅད་བགོས་བྱས་པའི་ཀན་ལྷོ་བོད་རིགས་རང་སྐྱོང་ཁུལ་གྱི་ཤར་ཕྱོགས་སུ་ཆགས་པའི་བོད་འབྲུག་ཆུ་རྫོང་ནི། ཁུལ་དེའི་ཤར་ལྷོའི་མཚམས་ཀྱི་འབྲུག་དཀར་གཙང་པོའི་འབབ་རྒྱུད་དུ་ཆགས་ཤིང་། གནས་དེའི་གནམ་གཤིས་དྲོད་གྲང་སྙོམས་པས་དུས་བཞིར་ལོ་ཏོག་སྨིན་ཞིང་རྩི་ཤིང་ནགས་ཚལ་གྱིས་བརྒྱན་པ་ཞིག་ཡིན་འདུག་ལ། གནས་དེར་ཐུན་མོང་མ་ཡིན་པའི་བོད་ཀྱི་ཡུལ་སྲོལ་གོམས་གཤིས་དང་ཆ་ལུགས་ཡོད་པ་སོགས་བོད་བཙན་པོའི་དུས་སྐབས་ཀྱི་བཤད་རྒྱུན་མང་པོ་ཡོད་པ་མ་ཟད། ཕྱི་ལོ་ ༡༦༩༧ ལོར་ཇོ་ཏོ་ཚུལ་ཁྲིམས་ཡོན་ཏན་གྱིས་བཞེངས་བའི་ཨོང་གསུམ་དགོན་དགའ་ལྡན་ཆོས་འཕེལ་གླིང་ཞེས་པ་ཕྱག་བཏབ་པ་སོགས་ནང་པའི་བསྟན་པ་རབ་ཏུ་དར་བའི་གནས་ཤིག་དང་། འབྲུག་ཆུ་གཙང་པོའི་བཞུར་རྒྱུན་གྱི་བོན་གྱི་གནའ་རབས་ཡིག་ཆ་འཚོལ་སྡུད་བྱེད་སའི་རྫོང་ཁག་གསུམ་གྱི་ནང་ནས་གཙོ་བོ་ཞིག་ཀྱང་ཡིན་འདུག

གནའ་བོའི་དུས་སུ་འབྲུག་ཆུ་དེ་བོད་ཀྱི་ས་ཆ་བསྙོན་མེད་ཅིག་ཡིན་ནའང་། ད་ལྟའི་ཆར་མི་རིགས་དུ་མ་མཉམ་སྲེས་བྱས་ཏེ་ཡུལ་དེའི་བོད་རིགས་རྣམས་ཀྱི་བོད་སྐད་བོད་ཡིག་གི་གནས་ཚད་ཧ་ཅང་ཉམས་དམས་སུ་ཕྱིན་ཡོད་འདུག དེའང་རྒྱ་ནག་གཞུང་གི་ཕྱི་ལོ་༢༠༡༠ ལོའི་གྲངས་བཤེར་ལྟར་ན། རྫོང་དེར་ཁྱོན་མི་གྲངས་ ༡༣༤༡༨༨ ཡོད་པ་དང་། དེའི་ནང་བོད་རིགས་ ༤༤༡༧༥ དང་། རྒྱ་རིགས་ ༨༩༨༤༢ ཏེ། སྤྱིའི་མི་གྲངས་ཀྱི་བརྒྱ་ཆ་ ༦༦།༩༥ ཟིན་ཡོད་འདུག་ལ། རྫོང་དེར་ཡུལ་ཚོ་ ༢༠ དང་གྲོང་བརྡལ་ ༢། སྲིད་འཛིན་སྡེ་བ་ཟེར་བ་ ༢༡༠ ཡོད་པར་བཤད།

ད་དུང་ཕྱི་ལོ་ ༢༠༡༠ ཟླ་ ༨ ཚེས་ ༨ ཀྱི་དགོང་མོའི་ཆུ་ཚོད་ ༡༡ ཙམ་གྱི་ཐོག བོད་འབྲུག་ཆུ་རྫོང་ཐོག་ལ་གློ་བུར་དུ་ཆུ་ལོག་དང་རི་ཉིལ་བྱུང་སྟེ། གྲོང་སྡེ་གཉིས་གཙོ་བོར་གྱུར་བའི་རྫོང་སློབ་ཆུང་དང་པོ་དང་། རྫོང་ཉེན་རྟོག་ཁང་། རྫོང་བརྡ་འཕྲིན་ལས་ཁུངས་སོགས་སུ་གནོད་སྐྱོན་ཆེན་པོ་ཐེབས་ཏེ། རྒྱ་ནག་གཞུང་ཕྱོགས་ནས་སྐབས་དེར་མི་གྲངས་ ༡༠༠༠ ལྷག་རྐྱེན་འདས་སུ་ཕྱིན་སྐོར་བསྒྲགས་ཡོད་ཀྱང་། ས་གནས་མི་མང་གིས་ཉུང་མཐར་མི་གྲངས་ ༨༠༠༠ ལས་བརྒལ་བ་རྐྱེན་འདས་སུ་ཕྱིན་ཡོད་པའི་ཚོད་དཔག་བྱས་ཡོད་པ་རེད། དེ་བཞིན་ཕྱི་ལོ་ ༢༠༢༠ ཟླ་ ༨ ནང་ཡང་ཁུལ་དེར་བསྟུད་མར་དྲག་ཆར་བབས་པར་བརྟེན། འབྲུག་ཆུ་རྫོང་ཁོངས་ཀྱི་གྲོང་ཚོ་ ༡༧༦ གི་དུད་ཚང་ཆིག་ཁྲི་ལྔ་སྟོང་ལྷག་ལ་གནོད་འཚེ་ཐེབས་པའི་གནས་ཚུལ་ཐོན་ཡོད་པ་རེད། ཡུལ་དེར་སྔ་གཞུག་ཏུ་ཏུ་རང་བྱུང་གོད་ཆག་བྱུང་རྗེས། རྒྱ་ནག་གཞུང་གིས་རང་བྱུང་གནོད་འཚེ་ལས་ཡོལ་བ་དང་བསྐྱར་སྐྲུན་གྱི་མིང་ཐོག་ནས་ཕྱི་ལོ་ ༢༠༢༡ ལོར་ཟླ་༨ ནས་ལོ་གསུམ་ནང་འབྲུག་ཆུ་རྫོང་ཁོངས་ཀྱི་མི་མང་རྣམས་ལན་ཀྲོའུ་གྲོང་ཁྱེར་གྱི་ལྷོ་ཕྱོགས་ཆིན་ཝང་ཁྲོན་ ( 秦王川）ཟེར་བའི་ས་ཁུལ་གྱི་མཁར་གསར་གནས་སྤོ་མི་མང་གཏན་སྡོད་ཁུལ་ཟེར་བར་སྤོ་རུ་བཅུག་འདུག

ཕྱི་ལོ ༢༠༢༢ ཟླ ༡༢ ཚེས་ ༢༣ ཉིན་འབྲུག་ཆུ་རྫོང་གི་ལོ་དེའི་ཡུལ་མི་གནས་སྤོར་ཐེངས་བཅུ་པ་སྟེ་ཁྱིམ་ཚང་ ༤༢༣ དང་མི་གྲངས་ ༡༧༦༥  སྡེབ་གཅིག་ལ་ལན་ཀྲུའུ་གྲོང་ཁྱེར་གྱི་མཁར་གསར་ཁུལ་དེར་གནས་སྤོ་རུ་བཅུག་འདུག་ལ། རྒྱ་ནག་ཤིན་ཧྭ་གསར་ཁང་གི་དེ་འབྲེལ་གནས་ཚུལ་ལྟར་ན། ཐེངས་འདིའི་གནས་སྤོ་བ་རྣམས་འབྲུག་ཆུ་རྫོང་ཁོངས་ཀྱི་གྲོང་བརྡལ་ ༦ དང་། སྡེ་བ་ ༡༤ ནས་ཡོང་བ་ཞིག་ཡིན་འདུག་ཅིང་། ཕྱི་ལོ་ ༢༠༢༡ ནས་ད་ལྟ་བར་འབྲུག་ཆུའི་ཡུལ་མི་རྣམས་སྔ་གཞུག་ཏུ་ཐེངས་ ༡༦ ནང་དབོར་འདྲེན་བྱས་ཏེ་ཁྱོན་ཁྱིམ་ཚང་ ༣༡༠༧ དང་མི་གྲངས་ ༡༢༣༦༠ ལྷག་གནས་སྤོ་རུ་བཅུག་ཟིན་འདུག

འདི་གའི་གསར་འགོད་པས་ད་ལྟ་ཁེ་ན་ཌའི་ནང་གནས་སྡོད་བྱེད་བཞིན་པའི་སྤྱི་ཚོགས་རིག་པའི་འབུམ་རམས་པ་སློབ་དཔོན་རྒྱལ་ལོ་ལགས་སུ་དེའི་སྐོར་བཅར་འདྲི་ཞུས་སྐབས་ཁོང་གིས། འབྲུག་ཆུར་ས་རུད་བརྒྱབ་སྟེ་ཁོར་ཡུག་ལ་གནོད་སྐྱོན་ཐེབས་ནས་སྡོད་ས་ཡག་པོ་མེད་སྐོར་བཤད་དེ། བོད་མི་འབོར་ཆེན་ལན་ཀྲོའུ་གནམ་ཐང་འགྲམ་གྱི་ཀྲུང་ཁྲོན་(中川) ཟེར་བའི་བྱེ་ཐང་དུ་གནས་སྤོ་བྱེད་དུ་བཅུག་སྟེ་ཁང་པ་ཐབས་ཆག་རེའི་ནང་དུ་བཞག་ཡོད་པ་དང་། གནས་སྤོ་བྱས་པའི་བོད་མི་རྣམས་ཀྱིས་ས་གནས་དེར་རྒྱ་མི་ལྟར་འཚོ་བ་སྐྱེལ་བཞིན་ཡོད་པ་རེད། ས་གནས་ལ་སློབ་གྲྭ་བཙུགས་ཡོད་ཀྱང་བོད་ཡིག་གི་སློབ་ཚན་གཅིག་ཀྱང་ཡོད་པ་མ་རེད། རྒྱ་ནག་གཞུང་གིས་ས་ཆ་ཞིག་ལ་ས་ཡོམ་སོགས་ཀྱི་གོད་ཆག་བྱུང་ན་དེ་གོ་སྐབས་སུ་བཟུང་ཏེ་འཆར་གཞི་གསར་པ་ཞིག་བཟོས་ནས། ས་དེ་གའི་མི་མང་གི་ལོ་རྒྱུས་འབྱུང་ཁུངས་དང་བཅས་པ་གཞི་རྩ་མེད་པ་བཟོས་ཏེ་སླར་གསོ་བྱེད་མི་ཐུབ་པའི་ལས་ཀ་བྱེད་ཀྱི་འདུག ཅེས་བརྗོད་བྱུང་།

ལན་ཀྲུའུ་རུ་གནས་སྤོ་རུ་བཅུག་པའི་མི་མང་གི་འཚོ་གནས་སྐོར་ལ་ཁོང་གིས། ལོ་རྒན་པ་རྣམས་ཀྱིས་ཕ་ཡུལ་དྲན་ཏེ་སེམས་ཁམས་ལ་དཀའ་ངལ་ཡོང་གི་ཡོད་འདུག ང་ཚོའི་གཏམ་དཔེར་ཕ་ཡུལ་གད་པ་ཡིན་རུང་སྐྱིད་ཟེར་བ་བཞིན། ས་ཆ་རྒྱུས་མེད་ཅིག་ཏུ་བསླེབས་ན་ཕ་ཡུལ་དྲན་པའི་དཀའ་ངལ་ཡོང་གི་ཡོད་འདུག། བྱིས་པ་རྣམས་སློབ་གྲྭར་ཕྱིན་ཏེ་རྒྱ་མིའི་གོམས་གཤིས་སུ་འགྱུར་མུས་རེད། སྤྱིར་བཏང་གནས་སྤོ་མི་མང་གི་འཚོ་བ་བསྐྱལ་སྟངས་དང་ཡོང་སྒོ་འཚོལ་སྟངས་ཀྱི་ཐད་ཚང་མར་གསལ་ཁ་མི་འདུག་ཀྱང་། ཁ་ཅིག་གིས་རླངས་འཁོར་བཟོ་བ་དང་ས་འཁུར་རྡོ་ལས་བྱེད་པ་མ་གཏོགས། ཕ་ཡུལ་དུ་ཡོད་སྐབས་ལྟ་བུའི་འཚོ་བ་འབྱོར་ཕྱུག་ལྡན་པ་ཞིག་ཡོད་པ་མ་རེད། ཅེས་བརྗོད་བྱུང་།

ཕྱི་ལོ་ ༢༠༡༡ ལོར་བོད་མིའི་སྒྲིག་འཛུགས་བཀའ་དྲུང་ཡིག་ཚང་དྲུང་ཆེ་ལས་འཕར་ཟུར་བ་བུ་རྫོང་ལྷ་མོ་ཚང་ཚེ་རིང་དབང་ཕྱུག་ལགས་ཀྱིས་འབྲུག་ཆུའི་རྒྱུད་དུ་ཆུ་རུད་ཚབས་ཆེན་བྱུང་བའི་རྒྱུ་རྐྱེན་སྐོར་ལ་དཔྱད་རྩོམ་ཞིག་སྤེལ་ཡོད་པའི་ནང་དུ། ད་རེས་ཀྱི་ཆུ་རུད་ཀྱི་འཇིག་པ་ཡོང་བའི་རྒྱུ་རྐྱེན་གཙོ་བོ་དེ་རེད། འབྲུག་ཆུ་རྫོང་ལ་མི་འབོར་བསྡོམས་ཆིག་འབུམ་གསུམ་ཁྲི་ལྷག་ལས་མེད་ཀྱང་། དེ་ལ་ལྟོས་པའི་པེ་ལུང་གཙང་པོ་སྐེད་རིམ་གསར་སྤེལ་དང་། འབྲུག་ཆུ་རྫོང་ཁོངས་ཆུ་ཤུགས་གློག་ཁང་གི་རྣམ་གྲངས་མིག་སྔར་ ༤༠ ལྷག་ཡོད་ཅིང་། འཛུགས་སྐུན་བྱས་ཟིན་པའི་འབར་ཁམས་ཆུ་ཤུགས་གློག་ཁང་ ༡༥ ཙམ་ཡོད། ད་དུང་སྟག་ཚང་བྲག་རིར་ཆུ་ཤུགས་གློག་ཁང་ ༡༤ འཛུགས་སྐྲུན་བྱེད་བཞིན་པ་རེད། དཔལ་འབྱོར་འཕེལ་རྒྱས་རྗེས་ལུས་ཐེབས་པའི་ས་ཁུལ་དུ་ནུས་ཤུགས་གང་ཡོད་ཀྱིས་གསར་འཕེལ་གྱི་ལས་གཞི་སྤེལ་ནས་རྣམ་པར་འགྱུར་བ་གཏོང་ཐབས་བྱེད་ཀྱི་ཡོད། ལྷག་པར་དུ་ས་གནས་དཔོན་རིགས་ཀྱིས་གསར་འཕེལ་གྱི་ལས་གཞི་སྤེལ་བ་བརྒྱུད་རང་གི་བྱས་རྗེས་ངོམ་ཆེད། ག་དུས་ཡིན་ནའང་རང་གི་མིག་སྔའི་ཁེ་ཕན་ལ་ལྟ་བ་ལས་མི་མང་གི་རྒྱང་རིང་གི་ཁེ་ཕན་ལ་བསམ་ཞིབ་བྱས་མེད། ཆུ་ཤུགས་གློག་ཁང་རྒྱག་རྒྱུར་ཆུའི་མཐོ་ཚད་སྤར་དགོས་པས། དེ་ལྟར་བྱས་ཚེ་རྒྱུག་ཆུའི་གཡས་གཡོན་གྱི་རི་འདབས་ས་འདྲུད་ཤོར་བ་དང་ཆུ་རུད་ཆགས་ཉེན་ཡོད། ཆུ་ཤུགས་གློག་ཁང་བརྒྱབ་ནས་བསྔོགས་པའི་ས་རྡོ་རྣམས་རི་གཤོང་གི་ས་སྟོང་བརྒྱངས་པ་དེས་ས་འདྲུད་དང་ཆུ་ལོག་རྒྱག་རྒྱུའི་སྔོན་འགྲོའི་ས་སོབ་སོབ་བཟོས་པའི་ཆ་རྐྱེན་བསྐྲུན་པ་རེད། ཅེས་བརྗོད་འདུག

འབྲུག་ཆུ་རྫོང་གི་རང་བྱུང་ཉེན་ཁའི་སྐོར་ལ་ཁོང་གིས། གནོད་འཚེ་ཕོག་པའི་འབྲུག་ཆུ་རྫོང་ནི་རྒྱ་ནག་གི་ཁྱབ་ཚད་ཆེ་བའི་གཙང་ཆུའི་འབྱུང་རྩར་ཐུག་ཡོད། པེ་ལུང་གཙང་པོ་ནི་ཅ་ལིན་གཙང་པོའི་ཡ་གྱལ་ཞིག་རེད། ཅ་ལིན་གཙང་པོ་ནི་འབྲི་ཆུའི་ཡ་གྱལ་ཞིག་རེད། གཙང་ཆུའི་འབྱུང་རྩ་ནི་རྒྱ་ནག་གི་ཆུའི་མཆོད་རྟེན་ལྟ་བུ་ཡིན་ལ། རྒྱ་ནག་གི་སྣོད་བཅུད་ཁོར་ཡུག་གཏོར་བཤིག་ཚབས་ཆེ་ཤོས་ཀྱི་ས་ཁུལ་ཞིག་ཀྱང་རེད། འབྲུག་ཆུ་རྫོང་ལ་ཆུ་རུད་ཀྱི་འཇིག་པ་བྱུང་བ་དེ་གཙང་ཆུའི་འགྲམ་དུ་གསར་སྤེལ་བྱ་ཐལ་དྲགས་པ་དང་། གྲོང་ཁྱེར་གྱི་བཀོད་པ་ནོར་འཁྲུལ་བྱས་པར་བརྟེན་ནས་བྱུང་བ་རེད། དེའི་ངོ་བོ་ནི་གཙང་ཆུའི་འབྱུང་སའི་ས་ཁུལ་གྱི་ཁོར་ཡུག་ལ་གནོད་འཚེ་ཚབས་ཆེན་བཏང་བའི་ངན་འབྲས་ཤིག་རེད། ཅེས་བརྗོད་འདུག

དེ་ཡང་ཕྱི་ལོ་ ༢༠༡༠ ཟླ་ ༨ པའི་འབྲུག་ཆུར་ཆུ་ལོག་ས་རུད་ཀྱི་གནོད་འཚེ་ཚབས་བྱུང་སྐབས། བོད་མི་མང་སྤྱི་འཐུས་ལྷན་ཚོགས་ཀྱིས་འབྲུག་ཆུའི་མི་མང་ལ་ཐུགས་གསོ་གནང་བའི་ནང་། མདོ་སྨད་འབྲུག་ཆུ་ས་ཁུལ་ནི་བོད་ཁུལ་དུ་ནགས་ཚལ་རྒྱ་ཁྱོན་ཆེ་ཤོས་ཀྱི་ས་གནས་ཤིག་ཡིན་ཞིང་། ལོ་རྒྱུས་ཐོག་ཆུ་ལོག་བྱུང་བའི་གནས་ཚུལ་མཐོང་ཐོས་དཀའ་ཡང་། རྒྱ་ནག་གིས་བོད་དབང་བསྒྱུར་བྱས་པའི་རྗེས་སུ་ནགས་ཚལ་སྨྱོན་ཧམ་ལྟར་གཅོད་འབྲེག་བྱས་པའི་དབང་གིས་བོད་ཀྱི་སྐྱེ་ཁམས་ཁོར་ཡུག་ལ་གནོད་སྐྱོན་ཤིན་ཏུ་ཚབས་ཆེན་ཐེབས་ཡོད་པ་མ་ཟད། ཤིང་ནགས་བཅད་ཟིན་མཚམས་གཙོ་བོ་གཏེར་ཁ་སྔོག་འདོན་དང་། ཆུ་གློག་གསར་རྒྱག་བཅས་སྐྱེ་ཁམས་ཁོར་ཡུག་ལ་སྲུང་སྐྱོབ་ཀྱི་འཆར་གཞི་གང་ཡང་མེད་པའི་ལས་གྲྭ་འབོར་ཆེན་སྤེལ་བཞིན་པ་སོགས་ནི་ད་ཐེངས་ཆུ་ལོག་ཚབས་ཆེན་ཡོང་བའི་རྐྱེན་རྩ་གཙོ་བོ་ཡིན། ཞེས་གསུངས་འདུག

གསར་འགོད་པ། བྱམས་པ་ཚེ་རིང་།