བོད་གཞིས་ཀ་རྩེ་གྲོང་ཁྱེར་གྱི་གངས་རི་ཟ་ཁང་ཞེས་པའི་ནང་ལས་ཀ་བྱེད་བཞིན་པའི་རང་ལོ་ ༢༣ ཅན་གྱི་དབྱངས་མཚོ་ལགས་ཀྱིས་ཕྱི་ཕྱོགས་སུ་པར་རིས་སོགས་བརྒྱུད་སྐུར་བྱས་པའི་ཉེས་མིང་འོག་འཛིན་བཟུང་བྱས་ཡོད་འདུག
བོད་ཀྱི་ལོ་སར་དང་གསུམ་བཅུའི་དུས་དྲན་སོགས་སུ་རྒྱ་ནག་གཞུང་གིས་བོད་ཁུལ་དུ་སྔར་ལས་དམ་དྲག་དང་ཞིབ་བཤེར་རིགས་བྱེད་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༢ ཉིན་གྱི་ཞོགས་པ་བོད་ནང་གི་ཆུ་ཚོད་ ༨ ཡས་མས་ཤིག་ལ། བོད་རང་སྐྱོང་ལྗོངས་ཟེར་བའི་རྣམ་གླིང་རྫོང་རྒྱ་མཚོ་ཡུལ་ཚོ་ནས་ཡིན་པའི་བོད་པའི་བུད་མེད་དབྱངས་མཚོ་ཞེས་པ་ཞིག་འཛིན་བཟུང་བྱས་ཏེ་ས་གནས་ཀྱི་ཉེན་རྟོག་ཁང་དུ་བཀག་ཉར་བྱས་འདུག
མིང་བརྗོད་འདོད་མེད་པའི་འབྲེལ་ཡོད་བོད་མི་ཞིག་གིས་འདི་གའི་གསར་འགོད་པར། ས་གནས་ཉེན་རྟོག་པས་བུད་མེད་དབྱངས་མཚོ་ལགས་ཀྱི་ཁ་པར་ནང་དུ་སྔོག་བཤེར་བྱེད་སྐབས་ཕྱི་ཕྱོགས་སུ་པར་རིས་སོགས་བརྒྱུད་སྐུར་བྱས་ཡོད་པའི་ཉེས་མིང་གཡོགས་ཡོད་པ་དང་། ད་ལྟའི་ཆར་ཁོང་མོའི་ནང་མི་ཚོས་འབྲེལ་གཏུག་སོགས་བྱེད་ཆོག་གི་མེད་སྐོར་དང་། ཁོང་མོས་གཞིས་ཀ་རྩེ་གྲོང་ཁྱེར་དུ་ཟ་ཁང་ཞིག་ནང་ལས་ཀ་བྱེད་བཞིན་ཡོད་སྐོར་བརྗོད་བྱུང་།
དབྱངས་མཚོ་ལགས་རང་ལོ་ ༢༣ ཡིན་ཞིང་། ཆུང་དུས་ནས་པ་ལགས་འདས་གྲོངས་སུ་ཕྱིན་ཡོད་པས་སློབ་གྲྭར་འགྲོ་མྱོང་མེད་པ་དང་། ཁྱིམ་དུ་ཨ་མ་དང་སློབ་གྲྭར་འགྲོ་བཞིན་པའི་ལོ་ ༧ ཅན་ཀྱི་གཅུང་པོ་ཞིག་ཡོད་འདུག
