ཟླ་འདིའི་ཕྱི་ཚེས་ ༢ ཉིན་རྒྱལ་སྤྱིའི་བོད་དོན་ལས་འགུལ་ཁང་གིས་ཕྱི་ལོ་ ༢༠༢༢ ལོའི་ལོ་འཁོར་སྙན་ཐོ་ཞིག་བཏོན་པའི་ནང་རྒྱལ་སྤྱིའི་གསར་འགོད་པ་སོགས་ཕྱི་མི་བོད་ནང་དུ་འགྲོ་བར་དམིགས་བསལ་གྱི་ཆོག་མཆན་ལེན་པའམ་ཡང་ན་རྒྱ་ནག་ཕྱི་སྲིད་ལས་ཁུངས་ཀྱིས་གོ་སྒྲིག་བྱས་པའི་གསར་འགོད་པའི་ཕྱོགས་སྐྱོད་ནང་མཉམ་ཞུགས་བྱེད་དགོས་ཀྱི་ཡོད་པས་བོད་ནང་དུ་དམིགས་བསལ་གྱིས་དམ་དྲག་ཆེན་པོ་བྱེད་བཞིན་ཡོད་སྐོར་བཀོད་འདུག
ཟླ་འདིའི་ཕྱི་ཚེས་ ༡ ཉིན་ཧོང་ཀོང་ནང་ཡོད་པའི་རྒྱལ་སྤྱིའི་གསར་འགོད་མཐུན་ཚོགས་ (Foreign Correspondent Club of China) ཀྱིས་ཕྱི་ལོ་ ༢༠༢༢ ལོའི་རྒྱ་ནག་ནང་གི་གསར་འགོད་རང་དབང་གི་ལོ་འཁོར་སྙན་ཐོ་བཏོན་ཡོད་པའི་ནང་། རྒྱ་ནག་དང་ཧོང་ཀོང་ནང་གསར་འགོད་ལས་དོན་གཉེར་བཞིན་པའི་གསར་ཁང་དང་གསར་འགོད་པ་ ༡༠༠ ལྷག་ལ་དཔྱད་ཞིབ་བྱས་པ་བརྒྱུད། རྒྱ་ནག་དང་བོད་ནང་དུ་རྒྱལ་སྤྱིའི་ཚད་གཞི་ལྡན་པའི་གསར་འགོད་རང་དབང་ལག་བསྟར་བྱེད་ཀྱི་མེད་པ་དང་། རྒྱ་ནག་གཞུང་གིས་གསར་འགོད་པ་མང་པོ་བཙན་འབུད་གཏོང་བ་དང་། ད་ལྟ་ལས་དོན་གཉེར་བཞིན་པའི་གསར་འགོད་པ་རྣམས་ལ་ཏོག་དབྱིབས་གཙང་སེལ་གྱི་སྲིད་ཇུས་ལག་བསྟར་འོག་དམ་དྲག་ཆེན་པོ་བྱས་རྐྱེན་ལས་དོན་མཚམས་འཇོག་བྱས་པ་སོགས་རྒྱ་ནག་ནང་དུ་ཕྱི་མི་བསྐྱོད་པར་དམ་དྲག་ཤུགས་ཆེན་བྱེད་ཀྱི་ཡོད་པ་གསལ་སྟོན་བྱས་འདུག
དེའི་ཐད་ཨ་རིར་རྟེན་གཞི་བྱས་ཡོད་པའི་རྒྱལ་སྤྱིའི་བོད་དོན་ལས་འགུལ་ཁང་གིས། རྒྱ་ནག་གཞུང་གིས་བོད་ནང་གི་དངོས་ཡོད་གནས་སྟངས་སྦས་ཐབས་སུ་ཕྱིའི་གསར་འགོད་པ་སུ་ལའང་ཁུལ་དེར་བསྐྱོད་རྒྱུར་ཆོག་མཆན་སྤྲོད་ཀྱི་མེད་པ་མ་ཟད། འདས་ལོར་རྒྱ་ནག་གི་དཔོན་རིགས་ཚོས་རྒྱལ་སྤྱིའི་གསར་འགོད་པ་རྣམས་བོད་ནང་དུ་བསྐྱོད་པར་ཆོག་མཆན་སྤྲད་མེད་པར་བརྟེན། ཕྱིའི་གསར་འགོད་པ་རྣམས་ཀྱིས་བོད་ནང་གི་དངོས་ཡོད་གནས་སྟངས་ཁྱབ་སྤེལ་གནང་རྒྱུར་མུ་མཐུད་དུ་འབད་བརྩོན་གནང་དགོས་པའི་འབོད་སྐུལ་ཞུས་འདུག དེ་བཞིན་རྒྱ་ནག་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚབ་དང་ལྷན་དུ་ཞི་བའི་གྲོས་མོལ་གྱི་ལམ་ནས་བོད་རྒྱའི་དཀའ་རྙོག་སེལ་དགོས། དེ་ལྟར་བྱས་ཚེ་རྒྱ་ནག་གཞུང་གིས་བོད་ཀྱི་གནད་དོན་རྒྱལ་སྤྱིའི་སྤྱི་ཚོགས་ཀྱི་ཁྲོད་དུ་སྦེད་དགོས་དོན་མེད་པ་རེད། ཅེས་ནན་བརྗོད་གནང་འདུག
དེ་རིང་རྒྱ་ནག་གཞུང་ཕྱོགས་ནས་སྙན་ཐོ་དེའི་སྐོར་ལ་རྒོལ་གཏམ་བསྒྲགས་པའི་ནང་། ཚོགས་པ་དེའི་དྲ་རྒྱའི་སྟེང་ཕྱི་
ཡང་ཧོང་ཀོང་ནང་གི་རྒྱལ་སྤྱིའི་གསར་འགོད་མཐུན་ཚོགས་ཀྱི་སྙན་ཐོ་དེའི་ནང་། ད་ལྟའི་ཆར་རྒྱ་ནག་ནང་ཏོག་དབྱིབས་གཙང་སེལ་གྱི་སྲིད་ཇུས་ལག་བསྟར་དང་འབྲེལ་ནས་དམ་དྲག་ལྷོད་དུ་ཕྱིན་ཡོད་ཀྱང་། རྒྱ་ནག་གཞུང་གིས་ཕྱིའི་གསར་འགོད་པ་དང་དེ་དག་གི་རྒྱ་རིགས་ལས་རོགས་སོགས་ལ་དྲ་ཐོག་གི་བྱ་ར་དང་འཇིགས་སྐུལ་བྱས་ཏེ་གསར་འགོད་རང་དབང་ལ་འགོག་རྐྱེན་བཟོ་བཞིན་པའི་དཀའ་ངལ་མུ་མཐུད་དུ་འཕྲད་བཞིན་འདུག དེ་ཡང་མཐུན་ཚོགས་ཀྱི་དཔྱད་ཞིབ་ནང་མཉམ་ཞུགས་བྱས་པའི་ཕྱིའི་གསར་འགོད་པ་གསུམ་ནས་འདས་ལོར་བོད་རང་སྐྱོང་ལྗོངས་ཟེར་བའི་ནང་བསྐྱོད་ཆོག་པའི་ཆོག་མཆན་ཞུས་ཡོད་ཀྱང་། རྒྱ་ནག་གཞུང་གིས་གསར་འགོད་པ་དེ་དག་ལ་ཆོག་མཆན་སྤྲད་མི་འདུག བོད་ཀྱི་ས་ཁུལ་གཅིག་པོར་ཕྱིའི་གསར་འགོད་པ་ཚུད་པའི་ཕྱི་མི་རྣམས་འགྲོ་འོང་བྱེད་པར་དམིགས་བསལ་གྱི་ཆོག་མཆན་ཞུ་དགོས་ཀྱི་ཡོད་པ་རེད། ཅེས་དང་། རྒྱལ་སྤྱིའི་གསར་འགོད་པ་རྣམས་བོད་ནང་དུ་འགྲོ་འོང་བྱེད་པར་དམིགས་བསལ་ཆོག་མཆན་ཞུ་དགོས་པ་དང། ཡང་ན་རྒྱ་ནག་གི་ཕྱི་སྲིད་ལས་ཁུངས་ཀྱིས་གོ་སྒྲིག་བྱས་པའི་གསར་འགོད་ཕྱོགས་སྐྱོད་ནང་མཉམ་ཞུགས་བྱ་དགོས་ཀྱི་ཡོད། ཅེས་བཀོད་འདུག
ད་དུང་སྙན་ཐོ་དེའི་ནང་། འདས་ལོར་རྒྱ་ནག་ཉེན་རྟོག་པས་བོད་ཀྱི་ཟི་ཁྲོན་ཞིང་ཆེན་དུ་ཕྱི་རྒྱལ་གྱི་གསར་འགོད་པ་ཞིག་བསྐྱོད་པར་དམ་དྲག་ཤུགས་ཆེན་བྱས་ཡོད་པའི་སྐོར་ལ་གསར་འགོད་པ་དེས། རྒྱ་ནག་གི་ཉེན་རྟོག་པ་དང་ས་གནས་དཔོན་རིགས་ཀྱིས་ང་རང་བོད་ཀྱི་ཟི་ཁྲོན་ཞིང་ཆེན་དུ་བསྐྱོད་པར་བཀག་སྡོམ་དང་དོ་དམ་བྱས་སོང་། ང་རང་ལ་འདས་པའི་ཉིན་གསུམ་རིང་གི་ཏོག་དབྱིབས་ནད་རྟགས་ཐོན་མེད་པའི་གྲུབ་འབྲས་གསུམ་ཡོད་ཀྱང་། ས་གནས་དཔོན་རིགས་ཀྱིས་ཏོག་དབྱིབས་གཙང་སེལ་སླད་ཕྱི་མི་ཡོང་ཆོག་གི་མེད་ཚུལ་བརྗོད་དེ་བཙན་གྱིས་མཁའ་ལམ་བརྒྱུད་ཁྲིན་ཏུའུ་ (Chengdu) གྲོང་ཁྱེར་དུ་གཏོང་ཐབས་བྱས་སོང་། ཕྱིས་སུ་གནམ་གྲུ་འཕུར་སྐྱོད་བྱེད་མ་ཐུབ་ནའང་ཆུ་ཚོད་ ༡༡ ཙམ་གྱི་རིང་རླངས་འཁོར་ནང་བཞག་སྟེ་ཐད་ཀར་ཁྲིན་ཏུའུ་གྲོང་ཁྱེར་དུ་བཏང་སོང་། ཞེས་བརྗོད་འདུག
རྒྱ་ནག་གཞུང་གིས་བོད་ནང་དུ་ཕྱིའི་གསར་འགོད་པ་དང་ཕྱི་འབྲེལ་མི་སྣ། ཡུལ་སྐོར་སྤྲོ་འཆམ་པ་སོགས་རང་དབང་ངང་བསྐྱོད་རྒྱུར་དམ་དྲག་ཆེན་པོ་བྱེད་བཞིན་ཡོད་པ་མ་ཟད། རྒྱལ་སྤྱིའི་སྐྱོན་བརྗོད་ལ་གཡོལ་ཆེད་དང་རྒྱལ་སྤྱིའི་ཐོག་འཁྱོག་བརྗོད་དྲིལ་བསྒྲགས་རིགས་ཡོང་སླད་རྒྱ་ནག་གཞུང་ཕྱོགས་ནས་གྲ་སྒྲིག་དང་ལམ་འཁྲིད་ཆ་ཚང་བྱས་པའི་ཐོག་ནས་ཕྱི་འབྲེལ་མི་སྣ་སོགས་བོད་ནང་ལྟ་སྐོར་ལ་འཁྲིད་ཀྱི་ཡོད་པ་རེད། ཡིན་ནའང་། བོད་ནང་དུ་རང་དབང་ནང་འགྲོ་སྐྱོད་མི་ཆོག་པའི་དམ་དྲག་མུ་མཐུད་ལག་བསྟར་བྱེད་བཞིན་པའི་རྐྱེན་གྱིས། ཕྱི་ལོ་ ༢༠༡༨ ལོར་ཨ་རིའི་གཞུང་གིས་བོད་ནང་འགྲོ་འོང་འདྲ་མཉམ་གྱི་ཁྲིམས་གཞི་གཏན་འབེབ་བྱས་པའི་ནང་། ཨ་རིའི་ནང་རྒྱ་ནག་གི་མི་སེར་ལ་འགྲོ་འོང་སོགས་ཀྱི་ཐོབ་ཐང་ཡོད་པ་ལྟར། བོད་ནང་དུ་ཨ་རིའི་གསར་འགོད་པ་དང་ཕྱི་འབྲེལ་མི་སྣ། དེ་བཞིན་ཨ་རིའི་མི་སེར་དཀྱུས་མ་རྣམས་ལ་འགྲོ་འོང་གི་ཐོབ་ཐང་སྤྲོད་དགོས་སྐོར་གསལ་ཡོད་པ་རེད། ཡིན་ནའང་། རྒྱ་ནག་གཞུང་གིས་ཁྲིམས་གཞི་དེར་བརྩི་བཀུར་མ་བྱས་པའི་རྐྱེན་གྱིས་ཕྱི་ལོ་ ༢༠༢༠ ཨ་རིའི་ཕྱི་སྲིད་ལས་ཁུངས་ཀྱིས་ཨ་རིའི་ནང་རྒྱ་ནག་གི་དཔོན་རིགས་རྣམས་ལ་ཆོངས་མཆན་ཐད་བཀག་སྡོམ་བྱེད་མགོ་བཙུགས་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
