ཏོག་དབྱིབས་ནད་ཡམས་ཀྱིས་འདས་གྲོངས་སུ་ཕྱིན་པ་རྣམས་ཀྱི་ཆེད་དུ་མ་ཎི་རྡོ་བརྐོས་ཚོགས་པ་བཙུགས་རྐྱེན་བོད་མི་གཉིས་འཛིན་བཟུང་བྱས་ཏེ་གར་ཡོད་ཆ་མེད་དུ་གྱུར།
ཟླ་འདིའི་ཕྱི་ཚེས་ ༤ ཉིན་འདི་ག་བོད་ཀྱི་དུས་བབ་གསར་ཁང་ལ་བོད་ནས་གནས་ཚུལ་མཁོ་སྤྲོད་གནང་བ་ལྟར་ན། བོད་རང་སྐྱོང་ལྗོངས་ཟེར་བའི་འདམ་གཞུང་རྫོང་ཁོངས་ནས་ཡིན་པའི་བོད་མི་ཡི་དམ་དང་ཁོང་གི་གྲོགས་པོ་ཞིག་འཛིན་བཟུང་བྱས་ཏེ་ཟླ་གཉིས་ཙམ་འགྲོ་བཞིན་ཡོད་ཀྱང་། ད་ལྟའང་གང་དུ་བཀག་ཉར་བྱེད་བཞིན་ཡོད་མེད་ཤེས་རྟོགས་མ་ཐུབ་པར་ལྷག་འདུག
ཕྱི་ལོ་༢༠༢༢་ལོར་ཏོག་དབྱིབས་ནད་ཡམས་རྐྱེན་ཀྱིས་ས་གནས་བོད་མི་མང་པོ་ཞིག་འདས་གྲོངས་སུ་གྱུར་ཡོད་པར་བརྟེན། ས་གནས་བོད་མི་ཡི་དམ་ཞེས་པ་ཞིག་གིས་རྡོ་བརྐོས་ཚོགས་པ་ཞིག་གསར་འཛུགས་བྱས་ཏེ། ད་ལྟ་བར་དུ་མ་ཎི་དང་ཡིག་བརྒྱ་སྒྲོན་མ་སོགས་གང་ཙམ་གྲུབ་ཡོད་པ་དང་། ས་གནས་བོད་མི་དང་ས་གནས་གཞན་མང་པོ་ནས་ཁོང་ལ་བསྟོད་བསྔགས་དང་།མཉམ་རུབ་བྱེད་མཁན་མང་དུ་སོང་ནས་ད་ལྟ་ཚོགས་པ་དེའི་ནང་དུ་བོད་མི་༤༠༠ལྷག་ཡོད་འདུག
འདི་ལོའི་ཕྱི་ཟླ་དང་པོའི་ནང་འདམ་གཞུང་རྫོང་དང་གསེར་ལམ་ས་གནས་ཉེན་རྟོག་པ་ཡོང་སྟེ། གོང་རིམ་ལ་ཡར་ཞུ་མ་བྱས་པར་གང་འདོད་ཚོགས་པ་གསར་འཛུགས་བྱས་ནས་རང་འདོད་ངང་དངུལ་བསྡུ་ལེན་སོགས་བྱས་ནས་ཁྲིམས་སྒྲིག་དང་འགལ་ཡོད་པའི་ཉེས་མིང་འོག ཚོགས་པ་འཛུགས་མཁན་ཡི་དམ་ལགས་དང་ཁོང་གི་གྲོགས་པོ་ཞིག་འཛིན་གཟུང་བྱས་ཡོད་འདུག ཡིན་ནའང་། ཁོང་གི་གྲོགས་པོ་དེའི་མིང་དང་ལོ་རྒྱུས་སོགས་ཉིན་ཤས་རིང་རྩད་གཅོད་བཏང་ཡང་རག་མ་སོང་།
ཡི་དམ་ལགས་རང་ལོ་༥༠་ཡས་མས་ཤིག་ཡིན་པ་དང་ནམ་རྒྱུན་ཆོས་ཕྱོགས་ཀྱི་བྱེད་སྒོ་རིགས་ལ་ཧ་ཅང་དགའ་བོ་ཡོད་མཁན་ཞིག་ཡིན་སྟབས། ཕྱི་ལོ་༢༠༡༡ལོར་ཁོང་གི་ཨ་མ་འདས་གྲོངས་སུ་ཕྱིན་ཡོད་སྟབས། རྒྱུ་དངོས་ཡོད་ཚད་ལྷ་སའི་རྨེ་རུ་དགོན་གསར་དུ་ཕུལ་ཏེ། ཁོ་རང་སྤུན་མཆེད་མཉམ་དུ་བསྡད་ཡོད་འདུག
