རྩོམ་པ་པོ་ཟངས་དཀར་འཇམ་དབྱངས་ལགས་ལ་ལོ་བཞིའི་ཁྲིམས་ཐག་བཅད།

རྒྱ་ནག་གཞུང་གིས་བོད་རྔ་བ་ཁུལ་ཁྱུང་ཆུ་རྫོང་ཁོངས་ནས་ཡིན་པའི་རྩོམ་པ་པོ་དང་སྐད་སྒྱུར་བ་ཟངས་དཀར་འཇམ་དབྱངས་ལགས་སུ་རྒྱལ་ཁབ་ཁ་བྲལ་གཏོང་བའི་བྱ་སྤྱོད་སྤེལ་ཡོད་ལུགས་ཀྱི་ཉེས་མིང་གཡོགས་ཏེ་ལོ་བཞི་ཡི་བཙོན་འཇུག་ཁྲིམས་ཐག་བཅད་ཡོད་འདུག

རྩོམ་པ་པོ་ཁོང་གི་འབྲེལ་ཡོད་ཅིག་ནས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ལོ ༢༠༢༠ ཟླ ༦ ཚེས ༤ ཉིན་གྱི་དགོང་མོར། རྒྱ་ནག་གཞུང་གིས་གློ་བུར་དུ་རྩོམ་པ་པོ་ཟངས་དཀར་མྱི་ལྡང་ངམ་ཟངས་དཀར་འཇམ་དབྱངས་ལགས་འཛིན་བཟུང་བཙན་འཁྲིད་བྱས་ཡོད་པ་དང་། དེ་ནས་བཟུང་ཁོང་གང་དུ་ཡོད་མེད་དང་གནས་སྟངས་ག་རེ་ཆགས་ཡོད་སོགས་ཅི་ཡང་གོ་ཐོས་མེད་པར་གྱུར་ཡོད་ཀྱང་། ཉེ་སྔོན་ཁོང་ལ་སྐད་འཕྲིན་སོགས་སུ་དཀྲོག་གཏམ་སྤེལ་བ་དང་རྒྱལ་ཁབ་ཁ་བྲལ་གཏོང་ཐབས་ཀྱི་བྱ་སྤྱོད་སྤེལ་བའི་ཉེས་མིང་འོག་ལོ་བཞི་ཡི་བཙོན་འཇུག་ཁྲིམས་ཐག་བཅད་ཟིན་ཡོད་པའི་གནས་ཚུལ་ཤེས་རྟོགས་བྱུང་འདུག

རྒྱ་གཞུང་ཉེན་རྟོག་ཁང་ནས་རྩོམ་པ་པོ་ཁོང་འཛིན་བཟུང་བྱས་པའི་གནས་ཚུལ་སུ་གང་ལའང་བཤད་མི་ཆོག་པ་དང་། གལ་ཏེ་སྐད་ཆ་ཕྱི་ལ་ཁྱབ་ན་འབྲེལ་ཡོད་ཚོར་ཉེས་ཆད་གཅད་རྒྱུ་ཡིན་པའི་ཉེས་བརྡ་བཏང་སྟེ་གསང་བའི་ཐོག་ནས་ཁྲིམས་ཐག་བཅད་ཡོད་ལུགས་འགྲེལ་བརྗོད་གནང་བྱུང་ལ། ད་ལྟ་རྩོམ་པ་པོ་ཁོང་སི་ཁྲོན་མེན་ཡཱང་བཙོན་ཁང་དུ་བཅུག་ཡོད་འདུག་ལ། ཁྲིམས་ཁང་གང་ནས་ག་དུས་ཁྲིམས་ཐག་བཅད་པ། ད་ལྟའི་སྐུ་གཟུགས་གནས་སྟངས་ག་འདྲ་ཡོད་སོགས་གང་ཡང་གསལ་ཁ་མི་འདུག

གནས་ཚུལ་མཁོ་སྤྲོད་པས། རྒྱ་ནག་གཞུང་གིས་ཁོང་འཛིན་བཟུང་བྱ་དགོས་དོན་གཙོ་བོའི་ཐད་གསལ་ཁ་མེད་ཀྱང་། ཕྱི་ལོ་ ༢༠༢༠ ཟླ་ ༣ པའིི་ནང་རྒྱ་ནག་གཞུང་གིས་ཁྱུང་ཆུ་རྫོང་ཁོངས་ཀྱི་སློབ་གྲྭ་ཁག་གི་ནང་བོད་ཡིག་སློབ་མཚམས་བཞག་སྟེ། རྒྱ་སྒྱུར་སློབ་གསོ་སྤེལ་རྒྱུ་ཡིན་པའི་བཙན་བཀའ་བཏང་སྟེ་རིམ་གྱིས་ལག་བསྟར་བྱེད་མགོ་བཙུགས་པར་བརྟེན། ཕྱི་ལོ་ ༢༠༢༠ ཟླ་ ༥ ཚེས་ ༢༥ ཉིན་རྩོམ་པ་པོ་ཟངས་དཀར་འཇམ་དབྱངས་ལགས་ཀྱིས། བོད་སྐད་བོད་ཡིག་སྦྱང་བརྩོན་བྱ་རྒྱུ་ནི་བོད་མི་རྣམས་ཀྱི་འགན་འཁྲི་ཡིན་པའི་ཁར། རྒྱལ་ཁབ་ཀྱི་ཁྲིམས་སྒྲིག་དང་མཐུན་གྱི་ཡོད་སྐོར་གྱི་རྩོམ་ཡིག་ཅིག་བྲིས་ཏེ་དྲ་ལམ་དུ་སྤེལ་ཡོད་པའི་རྐྱེན་གྱིས་ཉེས་འཛུགས་བྱས་པ་ཞིག་ཡིན་པའི་ཚོད་དཔག་བྱེད་ཀྱིན་ཡོད་སྐོར་འགྲེལ་བརྗོད་གནང་བྱུང་།

ཕྱི་ལོ ༡༩༩༨ ལོར་ཁོང་རྒྱ་གར་དུ་ཡོང་ནས་དབྱིན་ཡིག་སྦྱང་ཞོར་དུ། བག་གསར་བོད་ཡིག་ཚགས་པར་གྱི་རྩོམ་སྒྲིག་པའི་འགན་འཁུར་ཡོད་པ་དང་། ཕྱི་ལོ   ༢༠༠༢ ཡས་མས་སུ་ཕ་ཡུལ་དུ་ལོག་སྟེ་ཨ་རིའི་རོགས་ཚོགས་ཁག་ཅིག་ཅིག་ཚུད་པའི་ཕྱི་རྒྱལ་གྱི་ཡུལ་སྐོར་བ་ཚོར་སྐད་སྒྱུར་གྱི་ལས་ཀ་བྱས། ཕྱི་ལོ་ ༢༠༡༩ ལོའི་ཟླ་མཇུག་ཏུ་ཨ་རིར་ཐོངས་མཆན་རག་ཡོད་ཀྱང་ཏོག་དབྱིབས་ནད་ཡམས་ཀྱིས་འགྲོ་ཐུབ་མེད་འདུག  ཁོང་གིས་དེ་སྔོན་བོད་ནང་འཕག་འཚག་རྒོད་པའི་ལྕེ་ཞེས་པ་ཞིག་བརྩམས་ཡོད་འདུག་ལ། དེ་བཞིན་སྦྲང་ཆར་སོགས་ཀྱི་ཐོག་རྩོམ་ཡིག་མང་པོ་སྤེལ་མྱོང་ཡོད་འདུག

ད་ལྟ་རང་ལོ ༤༧ ཡིན་པའི་རྩོམ་པ་པོ་ཟངས་དཀར་འཇམ་དབྱངས་ལགས་ནི་རྔ་བ་ཁུལ་ཁྱུང་མཆུ་རྫོང་གི་ཟངས་དཀར་སྟོད་མར་ཕ་བསོད་ནམས་མགོན་པོ་དང་མ་ཀརྨ་སྒྲོན་གཉིས་ཀྱི་བུར་སྐྱེས་ཤིང་། ཁོང་དང་ཁོང་གི་བཟའ་ཟླ་ལྷ་མོ་མཚོ་གཉིས་ལ་ཕྲུ་གུ་གཉིས་ཡོད་འདུག

རྩོམ་པ་པོ་ཁོང་གིས་བྲིས་པའི་སྐད་ཡིག་སྐོར་གྱི་རྩོམ་ཞིག ངའི་ཕ་སྐད་ཕ་ཡིག

 གསར་འགོད་པ། དཔལ་ལྡན།