དེ་རིང་སྐབས་བཅུ་བདུན་པའི་སྤྱི་འཐུས་ལྷན་ཚོགས་ཀྱི་ཚོགས་དུས་ལྔ་པ་དབུ་འཛུགས་ཞུས་པའི་ཐོག་གཞུང་འབྲེལ་མྱ་ངན་རྗེས་དྲན་གྱི་གྲོས་ཆོད་གཅིག་དང་བོད་ནང་གི་ཛ་དྲག་གནས་སྟངས་ཐོག་གྲོས་ཆོད་བདུན་བཅས་བཏོན་གནང་སོང་།
དེ་རིང་ཕྱི་ཚེས་ ༡༥ ཉིན་གྱི་ཕྱི་དྲོའི་ཆུ་ཚོད་ ༡།༣༠ སྟེང་བོད་མིའི་སྒྲིག་འཛུགས་ཀྱི་ལྟེ་གནས་གངས་སྐྱིད་སྤྱི་འཐུས་ཚོགས་ཁང་དུ་བོད་མི་མང་སྤྱི་འཐུས་སྐབས་ ༡༧ པའི་གྲོས་ཚོགས་ཚོགས་དུས་ ༥ པ་དབུ་འཛུགས་གནང་ཡོད་པ་དང་། དབུ་འཛུགས་ཚོགས་ཐོག་ཏུ་བོད་མི་མང་སྤྱི་འཐུས་ཟུར་པ་བདུད་འདུལ་སྤྲུལ་སྐུ་བློ་བཟང་ཐུབ་བསྟན་མཆོག་ཕྱི་ལོ་ ༢༠༢༢ ཟླ་ ༡༠ ཚེས་ ༡༤ ཉིན་དགུང་གྲངས་ ༨༥ ཐོག་ཧུབ་ལི་རུ་དགོངས་པ་རྫོགས་ཡོད་པར་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གཅིག་དང་། བོད་ནང་གི་ཛ་དྲག་གནས་སྟངས་ཐོག་གྲོས་ཆོད་དོན་ཚན་བདུན་བཅས་བཏོན་གནང་སོང་བ་མ་ཟད། སྲིད་སྐྱོང་སྤེན་པ་ཚེ་རིང་མཆོག་གིས་སྔོན་རྩིས་འགོད་འབུལ་སྐོར་གྱི་གསུང་བཤད་གནང་ཞིང་། སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་ཚོགས་གཙོ་སྤྱི་འཐུས་དབུ་དཀར་ཚང་གཡུ་སྒྲོན་ལགས་ཀྱིས་ཚོགས་ཆུང་གི་སྙན་ཐོ་སྒྲོག་སྦྱངས་བཅས་གནང་བའི་ཐོག སང་ཉིན་ནས་སྤྱི་ཡོངས་བགྲོ་གླེང་བྱ་གཏན་ཁེལ་བ་དང་། སྤྱི་འཐུས་དབང་འདུས་རྡོ་རྗེ་ལགས་ཀྱིས་ཉིན་གྲངས་བཞིའི་རིང་དགོངས་པ་ཞུས་པ་མ་གཏོགས་གཞན་སྤྱི་འཐུས་ཚང་མ་ལྷན་འཛོམས་ཀྱི་ཐོག་ནས་འབྱུང་འགྱུར་ཉིན་གྲངས་ ༡༠ རིང་རྩིས་ལོ་ ༢༠༢༣ དང་༢༠༢༤ ཡི་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་སྔོན་རྩིས་ཐོག་བགྲོ་གླེང་དང་གཏན་འབེབ་བྱ་རྒྱུ་ཡིན་པ་རེད།
དཔལ་འབྱོར་བཀའ་བློན་དང་སྲིད་སྐྱོང་གཅིག་ལྕོགས་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༣ དང་ ༢༠༢༤ ཡི་སྔོན་རྩིས་འཆར་འབུལ་ཧིན་སྒོར་ས་ཡ་ ༣༠༣༤།༠༡ བཀའ་འཁྲོལ་ཞུས་ཡོད་སྐོར་གསུངས་སོང་ལ། སྔོན་རྩིས་ཚོད་དཔག་འཆར་རྩིས་ཚོགས་ཆུང་གིས་རྩིས་ལོ་འདིའི་ནང་སྔ་ལོ་ལས་སྔོན་རྩིས་མ་དངུལ་ཧིན་སྒོར་ས་ཡ་ ༤༩༡།༨༠ དང་བརྒྱ་ཆ་ ༡༩།༣༥ འཕར་ཡོད་ཀྱང་། བོད་མི་མང་སྤྱི་འཐུས་ལྷན་ཚོགས་ཀྱི་སྔོན་རྩིས་ཚོད་དཔག་འཆར་རྩིས་ཚོགས་ཆུང་ནས་སྤར་གཅོག་གང་ཡང་གནང་མི་འདུག
རྩིས་ལོ་ ༢༠༢༣ དང་ ༢༠༢༤ ལོའི་སྔོན་རྩིས་འཆར་འབུལ་ནང་། བཀའ་དྲུང་ཡིག་ཚང་གི་ཆབ་སྲིད་ཀྱི་འགྲོ་གྲོན་ཚུད་པའི་ཆབ་སྲིད་དང་འབྲེལ་བའི་འགྲོ་གྲོན་ཁྱོན་ས་ཡ་ ༦༠༣།༧༢ (༡༩།༩༠%) དང་། འཛིན་སྐྱོང་དང་འབྲེལ་བའི་འགྲོ་གྲོན་ས་ཡ་ ༣༧༨།༥༩ (༡༢།༤༨%)། སྤྱི་ཚོགས་དང་འབྲེལ་བའི་འགྲོ་གྲོན་ས་ཡ་ ༢༠༥༡།༧༠ (༦༧།༦༢%) བཅས་ཀྱི་སྡེ་ཁག་གསུམ་དུ་བཀར་ཏེ་རྩིས་བསྐོར་ཞུས་ཡོད་འདུག དེ་བཞིན་ད་ལན་འཛིན་སྐྱོང་བཀའ་ཤག་ནས་རྩིས་ལོ་ ༢༠༢༣ དང་ ༢༠༢༤ དང་། རྩིས་ལོ་ ༢༠༢༤ དང་ ༢༠༢༥། རྩིས་ལོ་ ༢༠༢༥ དང་ ༢༠༢༦། རྩིས་ལོ་ ༢༠༢༦ དང་ ༢༠༢༧ བཅས་སོ་སོར་ཆ་བགོས་འཆར་འགོད་ཟིན་ཡོད་པ་མ་ཟད། རྩིས་ལོ་རྗེས་མར་ཕྱི་རྒྱལ་རོགས་ཚོགས་ཁག་གི་ཚོགས་འདུ་ཞིག་ཀྱང་བསྐོང་ཚོགས་གནང་འཆར་ཡོད་འདུག
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གྲོས་ཚོགས་དབུ་འཛུགས་ཀྱི་གསུང་བཤད་སྤེལ་དོན། དེ་རིང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༥ པ་ཚོགས་པའི་དུས་ཚོད་ཆགས་བསྡད་ཡོད། དེ་རིང་ཤིན་ཏུ་དུས་ཚོད་བཟང་པོ་ཞིག་དང་༧གོང་ས་མཆོག་གི་༧སྐུའི་བླ་གཟའ་ཆགས་བསྡད་ཡོད། དེ་རིང་སྔ་དྲོ་བོད་མིའི་སྒྲིག་འཛུགས་ཀྱི་གོ་སྒྲིག་འོག་བོད་ཀྱི་ལྷ་མི་ཡོངས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུ་བའི་སྐལ་བཟང་གོ་སྐབས་བྱུང་ཡོད་པ་དང་། བོད་མི་ཚང་མས་༧གོང་ས་མཆོག་གི་གསེར་ཞལ་མཇལ་རྒྱུ་བྱུང་བ་དང་། ༧གོང་ས་མཆོག་གི་བཀའ་སློབ་ཕེབས་པ་གཞིར་བཟུང་བོད་མི་རིགས་དང་། བོད་ཀྱི་ཆོས་དང་རིག་གཞུང་། དེ་བཞིན་རྒྱ་བལ་འབྲུག་གསུམ་ནང་གི་སངས་རྒྱས་ཀྱི་བསྟན་པ་རིན་པོ་ཆེ་དང་། བོད་མིའི་ཆབ་སྲིད་ཀྱི་དཀའ་ངལ་སེལ་སླད། ༧གོང་ས་མཆོག་གི་སྐུ་ཚེ་ཡུན་རིང་འཚོ་བཞུགས་གནང་བའི་ཞལ་བཞེས་གནང་བའི་སྐལ་བཟང་གོ་སྐབས་ཤར་བ། བོད་ཕྱི་ནང་གཉིས་ཙམ་མ་ཟད། བོད་དང་འབྲེལ་བའི་ཕྱིའི་རྒྱལ་ཁབ་མང་པོ་ཞིག་ལ་ཆབ་སྲིད་དང་། ཆོས་དང་རིག་གཞུང་གི་ཐོག་ནས་ཕན་པ་རྒྱ་ཆེན་པོ་སྒྲུབ་ཐུབ་པ་དང་། ༧གོང་ས་མཆོག་གིས་ཐུགས་རེ་གནས་བ་དེ་བོད་དང་ཆོས་དང་རིག་གཞུང་གཅིག་པའི་མི་རིགས་ཚང་མའི་དགོངས་པ་སྒྲིབ་སྦྱོང་བྱེད་ཐུབ་གལ་ཆེན་པོ་ཞེ་དྲགས་ཆགས་བསྡད་ཡོད། ༧གོང་ས་མཆོག་མིའི་ཚུལ་དུ་ཕེབས་ནས་ཕྱི་ལོ་བརྩིས་ན་དགུང་ལོ་ ༨༨ ་དང་། བོད་ལོའི་དགུང་ལོ་ ༨༩ ཕེབས་ཡོད། སྐྱེས་བུ་ཐ་མལ་བ་ཡིན་ན་རང་བཞིན་མིའི་བྱ་བ་བྱེད་མ་ཐུབ་པ་ཞིག་ཡོང་གི་ཡོད་ཀྱང་། ༧གོང་ས་མཆོག་ནི་དམིགས་བསལ་ཆོས་དང་རིག་གཞུང་གི་ཐོག་ནས་འཕགས་མཆོག་སྤྱན་རས་གཟིགས་ཀྱི་རྣམ་སྤྲུལ་དང་། སྐུ་ཤ་རློན་པ་ལས་སྤྲུལ་བ་ཞིག་ཡིན་པས། ད་ལྟ་ཡིན་ནའང་ཐུགས་འཆར་རྒྱ་ཆེན་པོ་ཞིག་དང་། མཛད་འཕྲིན་རྒྱ་ཆེ་རུ་འགྲོ་བ། དེ་བཞིན་༧གོང་ས་མཆོག་གི་མཛད་པ་ཐུགས་སྨོན་གནང་མཁན་བོད་པ་གཅིག་པོ་ཙམ་མིན་པར། རྒྱལ་སྤྱིའི་མི་འབོར་ཁྱོན་ཐེར་འབུམ་བརྒྱད་ཙམ་གྱིས་དོ་སྣང་བྱེད་སའི་གཞི་ཆགས་ཡོད། ༧གོང་ས་མཆོག་གི་ཐུགས་ཀྱི་དགོངས་གཞི་གང་ཡོད་པ་དེ་འགྲུབ་ཐུབ་པ་དང་། ཡུན་རིང་འཚོ་བཞུགས་ཐུབ་པར་བོད་ཆོལ་ཁ་གསུམ་དམ་ཚིག་རྡོག་རྩ་གཅིག་སྒྲིལ་བྱེད་དགོས། རྒྱལ་བ་དགྱེས་པའི་མཆོད་སྤྲིན་གལ་ཆེ་བ་གཅིག་དེ་རེད་བསམ་གྱི་འདུག བོད་མིའི་སྒྲིག་འཛུགས་ཀྱི་འགན་ཁུར་ནས་ཚང་མས་འཕྱར་གྲུ་མཉམ་འདེགས་བྱེད་དགོས་པ་གལ་ཆེན་པོ་ཆགས་ཡོད། དེ་རིང་འདིར་ཡོད་པ་ཚང་མ་གནད་ཡོད་རྐྱང་རྐྱང་ཡིན་དུས། དེའི་ཐོག་ལ་མུ་མཐུད་དུ་འགན་འཁུར་བཞེས་དགོས་པ་གལ་ཆེན་པོ་རེད། ཅེས་གསུངས་སོང་།
ཡང་ཁོང་གིས། ང་ཚོ་ནི་བཙན་བྱོལ་གྱི་གནས་སྟངས་ཞིག་ཆགས་བསྡད་ཡོད། མིའི་ལུང་པར་སྡོད་བཞིན་པའི་མི་རིགས་ཞིག་ཆགས་ཡོད། ང་ཚོའི་ཕ་ཡུལ་ལ་ཕར་རྒྱབ་ཏུ་ལྷག་བསྡད་ཡོད། ང་ཚོ་བོད་ཀྱི་མི་འབོར་མང་ཤོས་བོད་ནང་དུ་བསྡད་ཡོད་ཅིང་། བོད་ནང་གི་བོད་མི་ཚོས་༧གོང་ས་མཆོག་དང་། བཙན་བྱོལ་བོད་མིའི་སྒྲིག་འཛུགས་ལ་རེ་བ་ཆེན་པོ་གནང་བཞིན་ཡོད། ༧གོང་ས་མཆོག་གི་ཐུགས་རེ་དང་བཙན་བྱོལ་བོད་མིའི་སྒྲིག་འཛུགས། དེ་བཞིན་བཙན་བྱོལ་དུ་ཡོད་པའི་བོད་མི་སུ་ཡིན་ཡང་བོད་ནང་གི་བོད་མིའི་སྙིང་སྟོབས་དང་། ལྷག་བསམ། ཆོད་སེམས་ནི་རི་ལྟ་བུ་ཞིག་ལ་ངོས་འཛིན་ཞུ་བཞིན་ཡོད་པ་རེད། བོད་གཞིས་བྱེས་གཉིས་ཀྱི་མཛའ་བརྩེ་འགྲུབ་ཐུབ་པར་ང་ཚོ་ཚང་མས་དགོངས་པ་བཞེས་དགོས་པ་གཅིག་དང་། ལྷག་པར་དུ་རྒྱ་ནག་གཞུང་གིས་སྲིད་ཇུས་བཟུང་བའི་ཐོག་ནས་བོད་ནང་དུ་ཛ་དྲག་གི་གནས་སྟངས་མུ་མཐུད་དུ་ལྷག་བསྡད་ཡོད། བོད་པའི་ཆོས་དང་། རིག་གཞུང་། གོམས་གཤིས་སོགས་སྣོད་བཅུད་ཚང་མར་ཛ་དྲག་དང་དངངས་འཚབ་ཆེ་རུ་འགྲོ་བའི་གནས་སྟངས་སུ་ཆགས་བསྡད་ཡོད། རྒྱ་ནག་གཞུང་གིས་ཡར་རྒྱས་གཏོང་བཞིན་ཡོད་ཅེས་ལས་འཆར་མང་པོ་བྱེད་བཞིན་ཡོད་པ་རེད། ཆབ་སྲིད་སྲིད་ཇུས་རིམ་པ་མང་པོ་སྤེལ་བཞིན་ཡོད་པ་རེད། མདོར་བསྡུས་ན་རྒྱ་གཞུང་གི་སྲིད་ཇུས་དེའི་ཐོག་ནས་བོད་མི་རིགས་ཀྱི་སྐད་ཡིག་རིག་གཞུང་རྩ་མེད་བཟོ་བཞིན་པ་གསལ་བོ་རེད། དེང་སང་རྒྱལ་སྤྱིའི་ཐོག་ནས་ཆབ་སྲིད་གནས་སྟངས་ལ་འགྱུར་བ་ཆེན་པོ་འགྲོ་བཞིན་ཡོད་པས། རྒྱ་ནག་ནང་དུའང་ཆབ་སྲིད་ཀྱི་འགྱུར་བ་འགྲོ་བཞིན་ཡོད། ད་ལྟའི་ཆར་ཞི་ཅིན་ཕིན་གྱིས་ལས་ཡུན་ཐེངས་གསུམ་པ་མགོ་བཙུགས་ཟིན་པ་རེད། རྒྱ་ནག་གི་མགོ་ཁྲིད་ཚོར་སྙིང་སྟོབས་དང་། ཆོད་སེམས་གསར་བ་ཞིག་ཡོད་པའི་ཐོག་ནས་བོད་ནང་གི་གནས་སྟངས་ཐད་༧གོང་ས་མཆོག་དགོངས་པ་བཞིན་བོད་རྒྱའི་དཀའ་རྙོག་སེལ་ཐུབ་པ་ཡིན་ན་བོད་རྒྱ་མི་རིགས་གཉིས་ཀྱི་དཀའ་ངལ་སེལ་བར་གལ་ཆེན་པོ་རེད། ཅེས་གསུངས་སོང་།
གསར་འགོད་པ། བྱམས་པ་ཚེ་རིང་། དཔལ་ལྡན།
