བོད་མིའི་སྒྲིག་འཛུགས་ཀྱིས་ལྕམ་སྐུ་ནེན་སི་པི་ལོ་སི་མཆོག་ལ་གཞུང་འབྲེལ་གྱི་ཐོག་ནས་ཐུགས་རྗེ་ཆེ་ཞུའི་མཛད་སྒོ་ཞིག་འཚོག་འཆར་ཡོད་འདུག
དེ་རིང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༥ པའི་ལས་ཉིན་བཞི་པའི་ཚོགས་ཐུན་དང་པོའི་སྟེང་། ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་བ་ལྕམ་སྐུ་ནེན་སི་པེ་ལོ་སི་ ( Nancy Pelosi) མཆོག་ལ་གཞུང་འབྲེལ་ཐུགས་རྗེ་ཆེ་ཞུ་བའི་གྲོས་ཆོད་དོན་ཚན་གསུམ་སྤྱི་མོས་ཀྱི་ཐོག་ནས་གཏན་འབེབས་བྱུང་སོང་བ་དང་། སྐབས་དེར་སྤྱི་འཐུས་བསྟན་འཛིན་འཇིགས་མེད་ལགས་ཀྱིས། ལྕམ་སྐུ་པེ་ལོ་སི་མཆོག་ནི་རྒྱུན་དུ་བོད་དོན་ཐོག་ལ་དུས་ཡུན་རིང་པོར་རྒྱབ་སྐྱོར་གནང་མཁན་གྱི་ཆེ་མཐོ་མི་སྣ་གཙོ་གྲས་ཤིག་ཡིན་ལ། དེ་སྔ་བོད་ནང་དུ་ཕེབས་ནས་བོད་ནང་གི་བོད་མི་རྣམས་ཀྱི་དངོས་ཡོད་ཀྱི་གནས་སྟངས་ལ་གཟིགས་ཞིབ་ནན་མོ་གནང་ཡོད་པ་མ་ཟད། ཕྱི་ལོ ༢༠༠༨ ལོར་བོད་ནང་དུ་ས་བྱི་ཞི་རྒོལ་ཆེན་མོ་ལངས་ཏེ་རྒྱ་ནག་གཞུང་གིས་བོད་ནང་གི་བོད་མི་མང་དག་དམར་གསོད་གཏོང་སྐབས་ཀྱང་། རྒྱ་གར་དུ་ཕེབས་ནས་༧གོང་ས་རྒྱལ་བ་རིན་པོ་ཆེ་མཆོག་གིས་དབུས། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པར་མཇལ་འཕྲད་གནང་ནས། གཞིས་བྱེས་གཉིས་ཀྱི་བོད་མི་རྣམས་ལ་གདུང་སེམས་མཉམ་སྐྱེད་ཞུས་ཡོད། ཁོང་ཉིད་ཨ་རིའི་གྲོས་ཚོགས་ཀྱི་ཆེ་མཐོའི་མི་སྣ་ཞིག་རེད་དེ། སྐུ་སྒེར་གྱི་ཁེ་ཕན་སོགས་ལ་ཅི་ཡང་མི་དམིགས་པར་ཁ་ཞེ་གཉིས་མེད་ཀྱིས་བོད་དོན་རྒྱབ་སྐྱོར་དང་རོགས་འདེགས་ཚད་མཐོ་བོ་གནང་ཡོད་པ་མ་ཟད། འདས་ལོར་ཨ་རིར་འཚོགས་པའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་གྱི་དབུ་འབྱེད་མཛད་སྒོར་ཕེབས་ནས་བཀའ་སློབ་ཟབ་རྒྱས་གནང་ཡོད་པས། ད་ལན་གྱི་གཞུང་འབྲེལ་ཐུགས་རྗེ་ཆེ་ཞུའི་གྲོས་ཆོད་དེ་ཁོང་མོར་འོས་འཚམས་ཡིན་སྐོར་སོགས་གསུངས་སོང་།
ཡང་སྤྱི་འཐུས་ཁག་ཅིག་གིས། ཕྱི་ལོ་ ༡༩༨༧ ལོར་ལྕམ་སྐུ་པེ་ལོ་སི་མཆོག་གིས་༧གོང་ས་རྒྱལ་བ་རིན་པོ་མཆོག་ལ་ཊོམ་ལན་ཊོས་(Tom Lantos) སུ་མཇལ་ཁ་ཐོག་མར་ཞུས་པ་ནས་བཟུང་། འདས་པའི་མི་ལོ་སོ་ལྔ་ལྷག་གི་རིང་མངོན་ལྐོག་རྒྱབ་མདུན་མེད་པར་ཨ་རིའི་གྲོས་ཚོགས་དང་གསར་ལམ་ཁག་སོགས་གོ་སྐབས་རག་ཚོད་ལ། ༧གོང་ས་རྒྱལ་བ་རིན་པོ་ཆེ་མཆོག་གི་བླ་ན་མེད་པའི་མཛད་རྗེས་སོགས་ལ་བསྔགས་བརྗོད་དང་ཡི་རངས་གནང་ཡོད་པ་མ་ཟད། རྒྱ་ནག་གཞུང་གིས་བོད་ནང་དུ་མནར་གཅོད་གཏོང་མུས་ཡིན་པའི་སྡུག་རྩུབ་ཅན་གྱི་སྲིད་ཇུས་སོགས་ལ་མཐའ་གཅིག་ཏུ་ངོ་རྒོལ་གནང་ནས། བོད་དང་བོད་མིའི་བདེན་པའི་འཐབ་རྩོད་ལ་ཁ་ཞེ་གཉིས་མེད་ཀྱིས་རྒྱབ་སྐྱོར་གནང་དང་གནང་མུས་ཡིན་པའི་ཁར། ཨ་རིའི་བོད་དོན་ཐད་ལ་བཟུང་བའི་སྲིད་ཇུས་མང་པོ་ཞིག་ཏུ་ཁོང་གིས་རྒྱབ་སྐྱོར་དང་གླེང་སློང་ཤུགས་ཆེན་གནང་ཡོད་པ་མ་ཟད། ད་ལྟ་ཨ་རིའི་གྲོས་ཚོགས་སུ་ལག་བསྟར་བྱེད་མུས་ཡིན་པའི་ཕྱི་ལོ་ ༢༠༢༠ ལོའི་བོད་ཀྱི་སྲིད་ཇུས་དང་རྒྱབ་སྐྱོར་གྱི་ཁྲིམས་ཡིག་སོགས་ཀྱི་ཐད་ལ་སྐུ་ངལ་ཚད་མེད་སྐྱོན་ཡོད་སྐོར་དང་། ཁོང་མོ་ནི་ཨ་རིའི་མང་གཙོའི་ལམ་ལུགས་ལ་སྲུང་སྐྱོབ་དང་། བུད་མེད་ཀྱི་ཐོབ་ཐང་། བུད་མེད་ཀྱི་རྩུབ་སྤྱོད་རིགས་ལ་འགོག་སྡོམ་གནང་མཁན་ཞིག་ཡིན་པའི་ཁར། བོད་དང་། ཐའེ་ཝན། ཡུ་གུར་སོགས་ཀྱི་འགྲོ་བ་མིའི་ཐོབ་ཐང་སོགས་ལ་ཐུགས་ཁུར་དང་བདེན་པའི་འཐབ་རྩོད་ལ་རྒྱབ་སྐྱོར་གནང་མཁན་ཞིག་ཡིན་པས། བོད་མིའི་སྒྲིག་འཛུགས་ཀྱིས་ཁོང་ཉིད་ཆེད་དུ་བཞུགས་སྒར་དྷ་སར་གདན་དྲངས་ནས། གཞུང་འབྲེལ་གྱི་ཐུགས་རྗེ་ཆེ་ཞུའི་མཛད་སྒོ་ཟབ་རྒྱས་ཤིག་འཚོག་ཐུབ་ན་དགེ་མཚན་ཆེ་སྐོར་སོགས་གསུངས་སོང་།
བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། ཕྱི་ལོ་ ༢༠༠༨ ལོར་ལྕམ་པེ་ལོ་སི་མཆོག་ཨ་རིའི་གྲོས་ཚོགས་ཀྱི་ཚོགས་གཙོ་ཡིན་པའི་སྐབས་སུ། བོད་ནང་གི་བོད་མི་རྣམས་ལ་གདུང་སེམས་མཉམ་སྐྱེད་དང་རྒྱ་ནག་གཞུང་གི་དྲང་བདེན་མིན་པའི་ཁྲིམས་སྒྲིག་ལ་ངོ་རྒོལ་སོགས་ཀྱི་སླད། དབུས་བོད་མིའི་སྒྲིག་འཛུགས་སུ་ཆེད་ཕེབས་གནང་བ་སོགས་འདས་པའི་མི་ལོ་མང་པོ་ཞིག་གི་རིང་བོད་དང་བོད་ཀྱི་བདེན་པའི་འཐབ་རྩོད་ལ་རྒྱབ་སྐྱོར་གནང་བ་དང་། དེ་བཞིན་རྒྱ་གར་གཙོས་བོད་མིར་ཆབ་སྲིད་ཀྱི་ཐོག་ནས་རྒྱབ་སྐྱོར་དང་རོགས་འདེགས་གནང་མཁན་ཡོངས་ལ་ཐུགས་རྗེ་ཆེ་ཞུས་པ་དང་སྦྲགས། བོད་ཀྱི་གནད་དོན་དེ་ཨ་རིའི་ཕྱི་འབྲེལ་ལས་དོན་ལ་ངོས་འཛིན་བྱས་ནས། ཨ་རིའི་ཕྱི་ལོ་ ༢༠༠༢ ལོར་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་བྱས་ཏེ། བོད་དོན་དམིགས་བསལ་འབྲེལ་མཐུད་པ་བསྐོ་གཞག་བྱས་པ་སོགས་བོད་མིར་རྒྱབ་སྐྱོར་ཚད་མཐོ་བ་གནང་ཡོད་པས། ད་ལན་གྱི་གོ་སྐབས་འདི་བརྒྱུད་ནས། ཨ་རིའི་གྲོས་ཚོགས་གོང་འོག་གཉིས་ཀྱི་བོད་དོན་རྒྱབ་སྐྱོར་གནང་བར་བསྔགས་བརྗོད་ཡི་རངས་ཡོད་སྐོར་སོགས་གསུངས་སོང་།
སྲིད་སྐྱོང་སྤེན་པ་ཚེ་རིང་མཆོག་གིས། ཕྱི་ལོ་ ༡༩༨༧ ལོར་ལྕམ་སྐུ་པེ་ལོ་སི་མཆོག་ཨ་རིའི་གྲོས་ཚོགས་ནང་གསར་པ་ཕེབས་ཚར་ཙམ་ཡིན་ཡང་། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་ཏེ། ༧གོང་ས་རྒྱལ་བ་རིན་པོ་ཆེ་མཆོག་གི་རྗེས་འཇུག་པ་ལྟ་བུ་ཞིག་ཏུ་གྱུར་ཏེ། ༧གོང་ས་རྒྱལ་བ་རིན་པོ་ཆེ་མཆོག་གི་དགོངས་པ་དང་། ལམ་སྟོན་སོགས་ལ་དཔེ་བླངས་ནས་ཁོང་མོའི་ཆབ་སྲིད་ཀྱི་ལས་དོན་ལའང་ཁེ་ཕན་བླ་མེད་བྱུང་ཡོད་པ་དང་། ཕྱི་ལོ་ ༡༩༨༧ ལོར་༧གོང་ས་མཆོག་གིས་ཨ་རིའི་གྲོས་ཚོགས་སུ་ཞི་བའི་དོན་ཚན་ལྔ་གསལ་བསྒྲགས་བསྐྱངས་པ་ནས། ཨ་རིའི་གྲོས་ཚོགས་སོགས་སུ་བོད་དོན་ཐད་དམིགས་བསལ་གོ་རྟོགས་དང་དོ་སྣང་གསར་པ་ཞིག་བསླེབས་ཐུབ་པར་བྱུང་ཡོད་ཅིང་། ཨ་རིའི་གནད་ཡོད་མི་སྣ་དེ་དག་གི་རྒྱབ་སྐྱོར་སོགས་ཀྱི་འོག་ནས་༧གོང་ས་མཆོག་དང་ཨ་རིའི་སྲིད་འཛིན་ཇོ་ཇི་བྷུ་ཤི་མཆོག་དང་མཇལ་འཕྲད། དེ་བཞིན་བོད་མི་ ༡༠༠༠ ལྷག་ཨ་རིར་གནས་སྤོར་བྱེད་ཐུབ་པ་བྱུང་། དེ་བཞིན་ཨ་རིའི་བོད་དོན་ཐད་ཀྱི་ཁྲིམས་འཆར་དང་རོགས་འདེགས་སོགས་དང་། ༧གོང་ས་མཆོག་ལ་ཕུལ་བའི་ཨ་རིའི་གསེར་གྱི་གཟེངས་རྟགས་སོགས་སུའང་ལྕམ་སྐུ་མཆོག་གིས་ཆ་ཤས་ཆེན་པོ་བླངས་ཡོད་པ་མ་ཟད། ཁོང་ཉིད་ཀྱིས་ཨ་རིའི་གྲོས་ཚོགས་ཀྱི་འགན་ཁུར་བ་ནས་བཟུང་བོད་དོན་ལ་སྔར་ལས་ལྷག་པའི་རྒྱབ་སྐྱོར་གནང་བས། བཀའ་ཤག་གིས་ཁོང་གིས་བོད་མི་ཚུད་པའི་མི་མང་རྣམས་ལ་རྒྱབ་སྐྱོར་ཚད་ལྡན་གནང་བ་ལ་ཡི་རངས་དང་བསྔགས་བརྗོད་ཀྱི་སླད། བཞུགས་སྒར་དུ་ཐུགས་རྗེ་ཆེ་ཞུའི་མཛད་སྒོ་ཞིག་འཚོག་རྒྱུར་ཡིག་ངག་གཉིས་ཀྱི་ཐོག་ནས་བརྡ་ལན་ཕུལ་ཡོད་སྐོར་སོགས་གསུངས་སོང་།
ལྕམ་སྐུ་པེ་ལོ་སི་མཆོག་ལ་ཐུགས་རྗེ་ཆེ་ཞུའི་གྲོས་ཆོད་ཁྲོད། ལྕམ་སྐུ་ནེན་སི་པི་ལོ་སི་(Nancy Pelosi) མཆོག་ཨ་རིའི་ལོ་རྒྱུས་སུ་གྲོས་ཚོགས་ཀྱི་ཚོགས་གཙོ་གནང་མཁན་བུད་མེད་ཐོག་མ་དང་ད་བར་བུད་མེད་ཀྱི་ཚོགས་གཙོ་གནང་མཁན་ཁོང་ལས་བྱུང་མྱོང་མེད། མང་གཙོ་དང་། རྩ་ཁྲིམས་སྲུང་སྐྱོབ། བྱིས་པའི་ཐོབ་ཐང་། གནམ་གཤིས་དང་ཁོར་ཡུག སྨྲ་བརྗོད་རང་དབང་གི་གླེང་སྟེགས་མེད་པ་བཅས་ཀྱི་མགྲིན་ཚབ་པ་གནང་མཁན་གྲོས་ཚོགས་ཀྱི་འཐུས་མི་སྙན་གྲགས་ཅན་ཞིག་ཡིན་པ་མ་ཟད། ལོ་ངོ་བཅུ་ཕྲག་མང་པོའི་རིང་བོད་དོན་ཐོག་རྒྱབ་སྐྱོར་གནང་མཁན་དང་། བོད་ཀྱི་བློས་ཐུབ་ཀྱི་གྲོགས་པོ་རླབས་ཆེན་ཞིག་ཡིན་པར་ངོས་འཛིན་ཞུ་རྒྱུ། དེ་བཞིན་བོད་ཀྱི་ཁྱིམ་མཚེས་རྒྱལ་ཁབ་རྒྱ་ནག་དམར་གཞུང་གིས་བོད་ས་བཙན་བཟུང་བྱས་ཏེ་བོད་ནང་གདུག་རྩུབ་ཆེ་བའི་སྲིད་བྱུས་རིམ་པ་ལག་བསྟར་བྱས་དང་བྱེད་བཞིན་པའི་ཛ་དྲག་གི་གནས་སྟངས་ལ་ཨ་རིའི་གྲོས་ཚོགས་འོག་མའི་ཚོགས་གཙོའི་ཐུགས་འགན་བཞེས་བཞིན་པའི་སྐབས་ལྷག་བསམ་དང་སྙིང་སྟོབས་ཆེན་པོས་བོད་རྒྱ་ཞི་མོལ་ལམ་ནས་དངོས་ཡོད་དཀའ་ངལ་རྣམས་སེལ་ཏེ་བོད་ནང་ཆོས་དད་རང་དབང་དང༌། འགྲོ་བ་མིའི་ཐོབ་ཐང་སོགས་ལ་རྩིས་མེད་རྡོག་རོལ་བཏང་དང་གཏོང་བཞིན་པར་རྒྱ་གཞུང་ལ་སྐྱོན་བརྗོད་དང་། དམ་དྲག་ཤུགས་ཆེ་བྱེད་བཞིན་པ་རྣམས་མཚམས་འཇོག་དགོས་པའི་གཞེན་བསྐུལ་ཡང་ཡང་གནང་བ་དང་། དེ་བཞིན་ཁོང་གིས་འགན་འཁུར་ཆེ་བཞེས་ཀྱིས་ཨ་རིའི་ཆབ་སྲིད་ཚོགས་པ་གཉིས་ནས་རྒྱབ་སྐྱོར་གྱིས་ཨ་རིའི་གྲོས་ཚོགས་ནང་བོད་དོན་དང་འབྲེལ་བའི་ཁྲིམས་ཡིག་གཏན་འབེབས་བྱུང་བ་ཁག་ནི་བོད་ཀྱི་བདེན་པའི་འཐབ་རྩོད་ཐོག་རེ་བ་དང་སྤོབས་པ་སྦྱིན་པར་མཛད་པའི་ཧ་ཅང་རིན་ཐང་ལྡན་པའི་བྱས་རྗེས་བཞག་ཡོད། ཅེས་དང་། ལྕམ་སྐུ་མཆོག་ནས་བོད་ཀྱི་བདེན་པའི་འཐབ་རྩོད་ལ་སྔ་ཕྱི་བར་གསུམ་དུ་ཞལ་ཞེ་གཉིས་མེད་ཀྱིས་རྒྱབ་སྐྱོར་ཤུགས་ཆེན་གནང་བར་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་སྙིང་ཐག་པ་ནས་བཀའ་དྲིན་བླ་མེད་དུ་ཆེ་ཞེས་ཞུ་བ་དང་སྦྲགས། སླད་མར་ལྕམ་སྐུ་མཆོག་སྐུ་ཁམས་གསལ་ཞིང་སྐུ་ཚེ་རིང་བ། རླབས་ཆེན་གྱི་ཐུགས་འདུན་མཐའ་དག་གེགས་མེད་ལྷུན་གྱིས་འགྲུབ་པ་དང་། བོད་དོན་ལ་རྒྱབ་སྐྱོར་མུ་མཐུད་གནང་རྒྱུའི་ཡིད་ཆེས་དང་བཅས་ཐུགས་རྗེ་ཆེ་ཞུའི་སྤྱི་མོས་གྲོས་ཆོད་དུ། ཞེས་འཁོད་ཡོད་འདུག
གསར་འགོད་པ། བྱམས་པ་ཚེ་རིང་། དཔལ་ལྡན།
