༧རྒྱལ་དབང་སྐུ་ཕྲེང་བཅུ་
དེ་རིང་༧རྒྱལ་དབང་སྐུ་ཕྲེང་བཅུ་
ཐོག་མར་འགྲོ་ཕན་སྨན་རྩིས་ཁང་གི་སྤྱི་ཁྱབ་འགན་འཛིན་ཐུབ་བསྟན་ཚེ་རིང་ལགས་ཀྱིས། སྨན་རྩིས་ཁང་གི་ལོ་རྒྱུས་ངོ་སྤྲོད་དང་འབྲེལ། ད་ལྟའི་ཆར་སྨན་རྩིས་ཁང་ལ་ཁྱོན་ལས་བྱེད་ ༦༤༡ ཡོད་པའི་ནང་ནས་སྨན་པ་ ༡༤༨ དང་སྐར་རྩིས་པ་ ༣༡། རྒྱ་བལ་གཉིས་སུ་ཡན་ལག་སྨན་ཁང་ཁྱོན་ ༦༣ ཡོད་པ་རྣམས་ཀྱིས་ལོ་ལྟར་སྨན་སྦྱིན་ཆེད་ཧིན་སྒོར་ས་ཡ་ ༥༠ མིན་ཙམ་གཏོང་གི་ཡོད་པ་དང་། འདས་ལོའི་ཕྱི་ཟླ་ ༡ ཚེས་ ༣༡ བར་དུ་ཧིན་སྒོར་ ༢,༨༠,༠༥,༥༩༠།༠༠ འབབ་ཀྱི་སྨན་སྦྱིན་བཏང་བ་མ་ཟད། ནད་པ་ཁྱོན་ ༥,༤༠,༥༧༠ ལ་བརྟག་དཔྱད་གཟིགས་སྐྱོང་གནང་ཡོད་སྐོར་དང་། བསླབ་པ་མཐར་སོན་དང་རྒྱུད་གསུམ་ངག་རྒྱུགས་འབུལ་མཁན་གྱི་ཕྱག་འཁྱེར་བཞེས་མཁན་སྐབས་ཉི་ཤུ་བའི་སྨན་པ་རྣམས་དང་། ཞབས་ལོ་ཉི་ཤུ་དང་སུམ་ཅུ་ལོན་པའི་གཟེངས་རྟགས་ཕྱག་འཁྱེར་བཞེས་མཁན་ལས་བྱེད་རྣམས་ལ་འཚམས་འདྲི་ཞུ་རྒྱུ་དང་། ལོ་འདིར་ཆོད་གན་ལས་བྱེད་ཀྱི་དུས་ཡུན་ཕར་འགྱངས་མི་ཐུབ་པ་དང་། སྨན་སློབ་སྐབས་ཉི་ཤུ་དང་རྩིས་སློབ་སྐབས་བཅུ་གཅིག་པ་ནས་བཟུང་ལས་ཀའི་ས་མིག་ཐོན་ན་འདེམས་རྒྱུགས་ལམ་ནས་མ་གཏོགས་ལས་བྱེད་དུ་འཇུག་བཞེས་མི་ཐུབ་པའི་གསལ་བསྒྲགས་སྤེལ་དགོས་བྱུང་བ་ནི། སྐབས་བབས་མི་རྒྱུ་གཉིས་ཀྱི་གནས་སྟངས་དབང་གིས་ཡིན་སྐོར་སོགས་བརྗོད་སོང་།
ད་དུང་ཁོང་གིས། སྐབས་ཉི་ཤུའི་སྨན་པའི་ཁྲོད་ནས་སྒེར་གྱི་སྨན་ཁང་བཟུང་མཁན་ཡོད་ཚེ་འགྲོ་ཕན་སྨན་རྩིས་ཁང་ནས་སྨན་དང་རིན་ཆེན་རིལ་བུ། ཐོན་དངོས་བཅས་ཀྱི་ཐོག་ལ་ (Classified rate) ནས་བརྒྱ་ཆ་ཉི་ཤུ་ཙམ་གྱི་ཆག་ཡང་ཐོག་ཉོ་ཚོང་བྱ་རྒྱུ་དང་། འགྲོ་ལུགས་ལྟར་དགོས་ངེས་ཀྱི་གན་རྒྱ་འཇོག་རྒྱུ། དམའ་མཐའི་ཚད་གཞི་བཟོ་རྒྱུ་རིགས་བྱེད་པའི་ཐོག་ནས་ཉོ་ཚོང་བྱ་རྒྱུ་ཡིན་སྐོར་དང་། ད་ལྟའི་ཆར་སྨན་རྩིས་ཁང་གི་སྨན་པ་བཞི་ཀཱ་ཛཱག་ཀི་སི་ཐན་དུ་བསྐྱོད་པའི་གོ་སྐབས་ཐོབ་ཀྱི་ཡོད་པ་དང་། ཕྱི་ནང་སྡེ་ཚོགས་གཞན་ནས་སྨན་པའི་དགོས་མཁོ་ཞུ་མཁན་བྱུང་ཚེ་གོ་སྐབས་སྤྲོད་རྒྱུ་ཡིན་སྐོར་དང་། ད་བར་ཁོང་ནས་དུས་ཡུན་ལོ་གཅིག་རིང་འཛིན་སྐྱོང་གི་བྱེད་སྒོ་ཁག་ལ་འགྱུར་བཅོས་ཆེ་འབྲིང་ཆུང་གསུམ་གཏོང་སྐབས། ཚང་མས་གཙི་སྲུང་མཉམ་རུབ་གང་ལེགས་གནང་བ་དང་། ལོ་འདིར་བསྒྲུབ་དགོས་པའི་ལས་དོན་གལ་ཆེན་གཉིས་ནི། སྨན་རྩིས་ཁང་གི་ལས་བྱེད་ལས་ཟུར་རྣམས་ནས་རྗེས་ལོར་༧རྒྱལ་དབང་ཐམས་ཅན་མཁྱེན་པར་བརྟན་བཞུགས་བསྟར་འབུལ་ཞུ་རྒྱུ་དང་། དགའ་ལྡན་ཕོ་བྲང་ནས་ལམ་སྟོན་དང་ས་ཆ་གསོལ་བསྩལ་བྱུང་ཚེ་གནས་མཆོག་རྡོ་རྗེ་གདན་དུ་ཏཱ་ལའི་བླ་མ་གནའ་བོའི་བོད་དང་རྒྱ་གར་རིག་གཞུང་གི་བསྟི་གནས་ཁོངས་སུ་སྨན་རྩིས་ཁང་གི་ཡན་ལག་གམ་བསྟི་གནས་ཤིག་འཛུགས་སྐྲུན་བྱ་རྒྱུ་དེ་ཡིན་སྐོར་སོགས་བརྗོད་སོང་།
དེ་ནས་དམིགས་བསལ་སྐུ་མགྲོན་ཀངྒ་ར་ཨ་ཡུ་ཤི་ལས་ཁུངས་ཀྱི་ངེས་སྟོན་པ་གཞོན་པ་སྨན་པ་ཨ་ནིལ་ཀུ་མར་ (Dr. Anil Kumar Garg Ji) ལགས་ཀྱིས། སྨན་རྩིས་ཁང་བསྐྱར་འཛུགས་བྱུང་ནས་ལོ་ངོ་ ༦༢ འཁོར་བའི་དུས་དྲན་ལ་སྨན་རྩིས་ཁང་གི་ལས་སློབ་ཡོངས་ལ་འཚམས་འདྲི་ཞུ་བ་དང་། རྒྱ་གར་གཞུང་གིས་གསོ་བ་རིག་པ་ལ་ཆེ་མཐོང་སྤྲོད་ཀྱི་ཡོད་པ་དང་། ད་ལྟའི་ཆར་འཛམ་གླིང་གི་རྒྱལ་ཁབ་མང་པོ་ཞིག་གིས་སྨན་རྩིས་ཁང་ལ་ཆེ་མཐོང་སྤྲོད་ཀྱིན་ཡོད་པ་དང་། ཉི་ཧོང་སོགས་ཕྱིའི་རྒྱལ་ཁབ་ཀྱི་མི་མང་པོས་གསོ་བ་རིག་པ་སྦྱོང་འདོད་བྱེད་ཀྱི་ཡོད་སྐོར། ད་བར་སྨན་རྩིས་ཁང་གི་སྨན་བཅོས་ཐབས་ལམ་བརྒྱུད་མི་མང་པོའི་འཕྲོད་བསྟེན་ཐོག་ཕན་ཐོགས་ཆེན་པོ་བྱུང་ཡོད་པ་དང་། སྨན་རྩིས་ཁང་གི་ཕྱག་ལས་གནང་ཕྱོགས་ལ་ཡིད་སྨོན་སྐྱེ་ཡི་ཡོད་སྐོར་སོགས་བརྗོད་སོང་།
སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་ཆེ་ཟླ་བ་ཚུལ་ཁྲིམས་ལགས་ཀྱིས། འགྲོ་ཕན་སྨན་རྩིས་ཁང་ནི་བཙན་བྱོལ་སྤྱི་ཚོགས་ནང་ཕན་ཐོགས་བསྒྲུབ་ཐུབ་མཁན་གྱི་ཚོགས་པ་གལ་ཆེན་པོ་ཞིག་ཆགས་ཀྱི་ཡོད་པ་དང་། དེར་བརྟེན་ཚོགས་པ་འདིའི་ནང་གི་རྩིས་ཉར་སྟངས་དང་། འཛིན་སྐྱོང་གི་ལས་དོན་སོགས་ཚགས་ཚུད་བྱུང་མེད་ཚེ། ཚོགས་པ་ཉམས་རྒུད་འགྲོ་ཉེན་ཆེ་བས། ལས་དོན་ཚགས་ཚུད་དགོས་པ་དང་། ཚོགས་པ་འདིའི་ནང་ལས་དོན་ཆེ་འབྲིང་ཆུང་གསུམ་གང་འདྲ་ཞིག་གནང་གི་ཡོད་རུང་། ཁྲིམས་དང་སྒྲིག་གཞི་ཚད་ལྡན་འཁྱེར་དགོས་གལ་ཆེན་པོ་ཡིན་སྐོར་དང་། འགྲོ་ཕན་སྨན་རྩིས་ཁང་གི་མ་འོངས་ལས་དོན་བྱེད་ཕྱོགས་ཐོག་མི་མང་གི་བདེ་དོན་དང་ཚོང་གཉིས་ཀྱི་ཐོག་ལ་ལྟ་དགོས་གལ་ཆེན་པོ་ཡིན་པ་དང་། ཏོག་དབྱིབས་གཉན་རིམས་སྐབས་མི་མང་པོའི་ཚེ་སྲོག་ལ་དཀའ་ངལ་འཕྲད་དུས་དང་འདས་པའི་ལོ་གསུམ་གྱི་ནང་ན་རྩིས་ཁང་གིས་མི་མང་ཉམ་ཐག་དང་ཏོག་ནད་ཅན་སོགས་ལ་རོགས་རམ་ཧ་ཅང་གི་ལེགས་པོ་གནང་བར་བཀའ་དྲིན་ཆེན་པོ་ཡིན་སྐོར་དང་། ནད་པ་རྣམས་ལ་སྨན་བཅོས་དང་བརྟག་དཔྱད་བྱེད་སྐབས། བཀའ་མོལ་གནང་སྟངས་ཀྱི་ཐོག་ལ་ཡིད་གཟབ་གནང་རྒྱུ་གལ་ཆེན་པོ་ཡིན་སྐོར་སོགས་འགྲེལ་བརྗོད་གནང་སོང་།
