ཁྲིམས་ཞིབ་པའི་འོས་ཆོས་དང་འབྲེལ་བའི་བཀའ་ཤག་གི་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་ལག་བསྟར་གཏན་འབེབས་གནང་ཐུབ་མ་སོང་།
དེ་རིང་གྲོས་ཚོགས་ཚོགས་དུས་ལྔ་པའི་ལས་ཉིན་བརྒྱད་པའི་ཉིན། བོད་མིའི་སྒྲིག་འཛུགས་བཀའ་ཤག་གི་གཞུང་འབྲེལ་བཅའ་ཁྲིམས་བསྐྱར་བཅོས་སུ་བསྣམས་ཕེབས་པའི་ཁྲིམས་འཆར་ཡིག་ཆ་ཨང་༡༩་པ་དེར་རྩ་འབོར་གྱི་གསུམ་ཆ་གཉིས་ཡན་གྱི་རྒྱབ་སྐྱོར་མ་ཐོབ་པར་ཟགས་སོང་། དེ་བཞིན་བོད་མི་མང་སྤྱི་འཐུས་ཀྱི་རྒྱུན་ལས་ནས་བསྣམས་ཕེབས་པའི་སྲིད་སྐྱོང་དང་བཀའ་བློན་རྣམ་པའི་ལས་ཁུར་དམ་འཇོག་གི་བཅའ་ཁྲིམས་བསྐྱར་བཅོས་ཁྲིམས་འཆར་ཡིག་ཆ་ཨང་༢༠་པ་དེར་བཟོ་བཅོས་ཀྱི་ཁྲིམས་འཆར་ཁུར་ཡོང་སྟེ་བཟོ་བཅོས་ཁྲིམས་འཆར་ཐོག་མང་མོས་གནང་སོང་ཡང་གཏན་འབེབ་ཐུབ་མ་སོང་།
ཁྲིམས་འཆར་ཟགས་རྗེས། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། བཀའ་ཤག་གིས་བཏོན་པའི་གཞུང་འབྲེལ་བསྐྱར་བཅོས་ཡིག་ཆ་ཨང་ ༡༩ པར་དགོངས་པ་རྒྱ་ཆེར་གཏོང་མ་ཐུབ་པར་བློ་ཕམ་ཡོད་ཅིང་། བོད་མི་མང་སྤྱི་འཐུས་ལྷན་ཚོགས་ཀྱིས་བོད་ཀྱི་སྤྱི་ཚོགས་ཁྲོད་ཀྱི་གནད་དོན་དག་མཁྱེན་རྟོགས་ཡོད་པའི་འོས་འགན་ཐོག་ཁྲིམས་བཟོ་དགོས་པ་གལ་ཆེ་བ་མ་ཟད། འདས་ཟིན་པའི་ལས་དོན་ཕྱིར་ལྡོག་བྱེད་མི་ཐུབ་པའི་དཀའ་ངལ་མུ་མཐུད་དུ་དྲངས་སྟེ། མ་འོངས་པའི་ལམ་ཁ་མདུན་སྐྱོད་བྱེད་མི་ཐུབ་པའི་ཁོར་ཡུག་ཅིག་ནང་དུ་ལྷུང་བའི་སེམས་ཚོར་སྤྲད་སོང་། སྤྱི་འཐུས་ཡོོངས་ཀྱིས་བསམ་བློའི་ཁ་ཕྱོགས་ལམ་བུ་གཅིག་ཏུ་བསྐྱོད་ཚེ། བོད་མིའི་སྒྲིག་འཛུགས་སྲ་བརྟན་བྱེད་ཕྱོགས་ཀྱི་ནུས་ཤུགས་མཉམ་སྤུངས་བྱེད་ཐུབ་པ་དང་། སྤྱི་ཚོགས་ནང་དུ་ཡང་སྲིད་འབྱུང་བཞིན་པའི་བསམ་ཕྱོགས་མི་གཅིག་པའི་རིགས་ལ་ཕན་ཐོགས་ཆེན་པོ་ཡོད་ཀྱང། གནད་དོན་ལ་གོ་བ་ལེན་སྟངས་དང་རྒྱུ་མཚན་འདྲེན་སྟངས་སྣ་ཚོགས་ཀྱི་དབང་དུ་ཤོར་སོང་། དེ་བཞིན་བཀའ་ཤག་གི་ངོས་ནས་བོད་མིའི་སྒྲིག་འཛུགས་ཀྱི་དམངས་གཙོ་ཀ་བ་གསུམ་ཁྲིམས་མཐུན་གྱི་ལས་དོན་བྱེད་ཕྱོགས་བཟུང་ནས་ཤར་བསྐྱོད་བྱེད་བཞིན་ཡོད་ལ། མ་འོངས་བའི་ཁྲིམས་ཞིབ་པ་གནད་དོན་གལ་ཆེན་དུ་བཟུང་ནས་ཁྲིམས་འཆར་དུ་འཁོད་པའི་ཐབས་ལམ་ཡོད་པ་ལས། མི་སོ་སོའི་ཁེ་ཕན་སྒྲུབ་ཆེད་དུ་གྲོས་ཚོགས་ཀྱི་སྒྲིག་གཞི་ལ་གཏན་ནས་མི་འཚམ་པ་ཞིག་རེད། བཀའ་ཤག་གིས་གནད་དོན་གང་ཞིག་གི་ཐོག་ཏུ་བསམ་ཞིབ་བྱས་ཏེ། འགྲེལ་བརྗོད་བྱས་ཀྱང་དོན་ཕན་བྱུང་བའི་ངོས་ལེན་ཅི་ཡང་བྱུང་གི་མེད་རྐྱེན། མ་འོངས་བར་མང་གཙོ་ཀ་བ་གསུམ་ལས་ཁྲིམས་ཞིབ་པ་དགོས་ཀྱི་མེད་པའི་དོགས་སློང་རང་བཞིན་གྱི་ཡོང་གི་ཡོད་སྐོར་གསུངས་སོང་།
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། སྤྱི་འཐུས་རྣམ་པས་གྲོས་ཚོགས་སུ་བཅའ་ཁྲིམས་བསྐྱར་བཅོས་ཡིག་ཆ་ཨང་ ༡༩ དང་ཨང་ ༢༠ གཉིས་ལ་བགྲོ་གླེང་མང་པོ་བྱས་ཡོད་པ་དང་། ཁྲིམས་བཟོ་ལས་དོན་གྱི་སྐབས་སུ་བབ་བརླིང་བརྟན་གསུམ་གྱི་བསམ་བློ་བཏང་ཚེ་ཕྱོགས་ཡོངས་སུ་ཕན་ཐོགས་ཡོད་ཀྱང་། བགྲོ་གླེང་ལ་ཆ་ཤས་ལེན་ཕྱོགས་ཀྱི་ཐོག་ནས་བསམ་ཚུལ་མང་པོ་སླེབས་པས། ཉིན་བཅུའི་གྲོས་ཚོགས་དུས་ཡུན་ལས་འདང་ངེས་ཞིག་མ་རེད། དེ་བཞིན་བཀའ་ཤག་དང་སྤྱི་འཐུས་ཀྱི་བཅའ་ཁྲིམས་བསྐྱར་བཟོ་ཁྲིམས་འཆར་བསྣམས་ཡོད་པ་དེར། ཚོགས་གཙོ་གཞོན་གཉིས་ཀྱིས་བསམ་འཆར་སོགས་གང་ཡང་བཏོན་མེད་པ་མ་ཟད། གྲོས་ཚོགས་ཀྱི་ནང་དུ་བགྲོ་གླེང་བྱས་ཏེ་གཏན་འབེབས་བྱས་པའི་ཡིག་ཆ་རྣམས་ཁྲིམས་མཐུན་ཡིན་པར་ར་སྤྲོད་བྱེད་ཀྱི་ཡོད་ཀྱང་། བགྲོ་གླེང་གི་ཆ་ཤས་ལེན་པའི་སྐབས་སུ་འདས་ཟིན་པའི་གནད་དོན་ཞིག་གླེང་སློང་བྱས་པར་ཕན་འབྲས་ཅི་ཡང་མེད་པས། སྐབས་བབ་ཀྱི་ལས་དོན་བྱེད་ཕྱོགས་ཀྱི་ནང་དོན་ངེས་པར་དུ་གཞི་རྩ་འཛིན་དགོས་སྐོར་གསུངས་སོང་།
གཞུང་འབྲེལ་བཅའ་ཁྲིམས་བསྐྱར་བཅོས་ཁྲིམས་འཆར་ཡིག་ཆ་ཨང་ ༡༩ པའི་ནང་། རང་ལོ་ཞེ་ལྔ་ཧྲིལ་པོ་ལོན་པ་ཡན། རྒྱལ་ཁབ་གཞན་གྱི་ཁྲིམས་ཁང་ཞིག་ཏུ་ལོ་ལྔའི་རིང་ཁྲིམས་དཔོན་གྱི་ལས་ཁུར་བྱས་མྱོང་བའམ། ཡང་ན་བཙན་བྱོལ་བོད་མིའི་ཁྲིམས་ཞིབ་ཁང་འོག་མ་ཞིག་ཏུ་ཁྲིམས་ཞིབ་པའི་ལས་འཁུར་ལོ་བཅུ་རིང་བྱས་མྱོང་བའམ། རྒྱལ་ཁབ་གཞན་གྱི་ཁྲིམས་ཁང་དུ་ཉུང་མཐར་ལོ་བཅོ་ལྔའི་རིང་ཁྲིམས་རྩོད་པའི་ལས་ཀ་བྱས་མྱོང་བའམ། ཁྲིམས་ལུགས་ཐོག་ཉེ་བའི་གཙུག་ལག་རབ་འབྱམས་པའི་ལག་ཁྱེར་ཡོད་ཁར་བཙན་བྱོལ་བོད་མིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པའི་ལས་ཁུར་ལོ་ངོ་ཉི་ཤུའི་རིང་བླངས་མྱོང་བའམ། ལས་བྱེད་པ་དྲུང་འཕར་ཡན་དང་། མཛད་གཙོ་ལས་ཟུར་གྱི་ཁོངས་ནས་བོད་མིའི་སྒྲིག་འཛུགས་ནང་ལས་ཁུར་ལོ་ངོ་ཉེར་ལྔ་ལྷག་རིང་བླངས་མྱོང་ཡོད་པ་ཞིག་དགོས་པ་ཡིན། ཞེས་འཁོད་ཡོད་འདུག
དེ་བཞིན་གཞུང་འབྲེལ་བཅའ་ཁྲིམས་བསྐྱར་བཅོས་ཁྲིམས་འཆར་ཡིག་ཆ་ཨང་ ༢༠ པའི་ནང་། སྲིད་སྐྱོང་དང་། བཀའ་བློན་རྣམ་པའི་ལས་འཁུར་དམ་འཇོག འདེམས་ཐོན་སྲིད་སྐྱོང་དང༌། བཀའ་བློན་རྣམ་པ་བཅས་ལས་འཁུར་དུ་མ་ཞུགས་གོང་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་མདུན་དུ་ཁྲིམས་ལུགས་སུ་གཏན་འབེབས་བྱས་པའི་ཚིག་གཞི་ལྟར་ལས་འཁུར་དང་གསང་རྒྱའི་དམ་བཅའམ། ཁས་ལེན་ཞུ་དགོས། ཁྲིམས་ཞིབ་པ་ཆེ་བ་མེད་ཚེ་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གི་སྐུ་པར་དང་མ་ཎི་བཀའ་འབུམ་མདུན་ཁྲིམས་ལུགས་སུ་གཏན་འབེབས་བྱས་པའི་ཚིག་གཞི་ལྟར་ལས་འཁུར་དང་གསང་རྒྱའི་དམ་བཅའམ། ཁས་ལེན་ཞུ་དགོས། ཞེས་གསལ་ཡོད་འདུག
དེ་བཞིན་བཀའ་ཤག་གི་མཉམ་ལས་དང་བཟོ་ཚོང་སྡེ་ཚན་གང་ཞིག་ལོ་རང་བཀག་རྩིས་གསལ་གཙང་ཁེ་གསལ་གྱི་ཡོད་རུང་། ལོ་སྔོན་མ་རྣམས་སུ་སྡེ་ཚན་མ་ལག་དང་བཅས་པའི་ཕྱོགས་བསྡོམས་རྩིས་གསལ་དུ་སྡེབ་གསོག་གྱོང་གུན་ཡོད་རིགས་ཁ་གསབ་མ་ཟིན་པར་ལོ་འཁོར་གཙང་ཁེའི་བརྒྱ་ཆ་༡༥ འབུལ་མི་དགོས་པ་དེ་ཕྱིར་བསྡུ་ཡི་བསྐྱར་བཅོས་ཁྲིམས་འཆར་གཏན་འབེབས་ཐུབ་མ་སོང།
གསར་འགོད་པ། བྱམས་པ་ཚེ་རིང་། དཔལ་ལྡན།
