བོད་ནང་དུ་རྒྱ་རིགས་ལས་བྱེད་ཇེ་མང་དང་བོད་རིགས་ལས་བྱེད་ཇེ་ཉུང་དུ་འགྲོ་བཞིན་ཡོད་པ་ལྟར་ཟླ་འདིའི་ཕྱི་ཚེས་ ༣ ཉིན་བོད་ཆུ་ཤུར་རྫོང་ཉེན་རྟོག་ཁང་སོགས་སུ་ལས་ཀ་བྱེད་བཞིན་པའི་བོད་རིགས་ལས་བྱེད་བཞི་ཡིས་རྩ་དགོངས་ཞུས་ཡོད་འདུག
འདི་གར་བོད་ནས་ཁུངས་ལྡན་གནས་ཚུལ་མཁོ་སྤྲོད་བྱས་པ་ལྟར་ན། ཟླ་འདིའི་ཕྱི་ཚེས་ ༣ ཉིན་བོད་རང་སྐྱོང་ལྗོངས་ཟེར་བའི་ཁོངས་སུ་ཡོད་པའི་ཆུ་ཤུར་རྫོང་ཉེན་རྟོག་ཁང་གི་བོད་རིགས་ལས་བྱེད་ཉི་མ་དང་ཀརྨ་མཚོ་མོ་གཉིས་ཀྱིས་རྩ་དགོངས་ཞུས་ཡོད་པ་དང་། དེ་བཞིན་ཆུ་ཤུར་རྫོང་ཡུལ་ཤོག་ ༣ པའི་མགོ་འཁྲིད་དཔལ་གྲགས་དང་། ཁོའི་ལས་རོགས་ཡི་དམ་རྡོ་རྗེ་གཉིས་ཀྱིས་ཀྱང་ཉིན་དེར་ལས་གནས་ནས་རྩ་དགོངས་ཞུས་ཡོད་འདུག
འདི་གའི་གནས་ཚུལ་མཁོ་སྤྲོད་པས། རྒྱ་ནག་གཞུང་གིས་བོད་རིགས་གཞོན་སྐྱེས་རྣམས་མཐའ་མཚམས་དམག་སྡེ་དང་ཉེན་རྟོག་ཁང་། ཆབ་སྲིད་སློབ་གསོ། ཁྲིམས་སྒྲིག་དྲིལ་བསྒྲགས་སོགས་ཀྱི་ལས་རིགས་ནང་དམིགས་བསལ་དང་དྭང་བླངས་ཞབས་ཕྱི་བ་སོགས་ཀྱི་མིང་བཏགས་ཏེ། གོང་རིམ་གྱི་བཀའ་བཀོད་འོག་མི་མང་གི་འགྲོ་འདུག་ལ་སོ་ལྟ་ཞིབ་འཇུག་དང་། འཛིན་བཟུང་འདྲི་རྩད་སོགས་བྱས་ཏེ་མདུན་མཆོང་གི་ལས་འགན་སྒྲུབ་དགོས་ཀྱི་ཡོད་པ་དང་། ས་གནས་མང་ཚོགས་ཀྱིས་ལས་བྱེད་དེ་རིགས་ལ་ལྟ་སྟངས་ཡག་པོ་མེད་པ་མ་ཟད། འཁོན་ལན་སློག་པ་སོགས་ཀྱི་དཀའ་རྙོག་ཡོང་བཞིན་པའི་རྐྱེན་གྱིས་བོད་མི་བཞི་དེས་ལས་འགན་ལྗིད་པོ་དང་གནོན་ཤུགས་དེ་དག་མ་བཟོད་པར་རྩ་དགོངས་ཞུས་ཡོད་པའི་ཚོད་དཔག་བྱེད་བཞིན་ཡོད་སྐོར་བརྗོད་བྱུང་།
ཡང་གནས་ཚུལ་མཁོ་སྤྲོད་པས། ཉེ་བའི་ལོ་ཤས་ནས་བོད་ཁུལ་དུ་རྒྱ་རིགས་ན་གཞོན་ལས་བྱེད་ཧ་ཅང་མང་པོ་བསླེབས་ཀྱི་ཡོད་པ་དང་། སྔར་ཡོད་ཀྱི་ས་གནས་བོད་རིགས་ལས་བྱེད་མང་པོ་རྩུབ་ས་དང་ཉེན་ཁ་ཆེ་བའི་ལས་དོན་རིགས་ལ་རྒྱབ་འདེད་གཏོང་གི་ཡོད་པར་བརྟེན། དེང་སང་ས་གནས་དེའི་བོད་རིགས་ལས་བྱེད་ནང་སྲིད་གཞུང་གི་བྱ་བ་གཡུགས་ཏེ་སྒེར་གྱི་ཚོང་ལས་གཉེར་མཁན་ཇེ་མང་དུ་འགྲོ་བཞིན་ཡོད་སྐོར་དང་། གལ་ཏེ་གོང་རིམ་གྱི་བཀའ་བཀོད་དང་བཙན་སྐུལ་ཇི་བཞིན་དུ་མ་སྒྲུབ་པ་ཡིན་ན། ཏང་དང་རྒྱལ་ཁབ་ལ་བློ་སེམས་མ་དཀར་བ་དང་རྒྱལ་ཁབ་ཀྱི་ཁྲིམས་སྒྲིག་དང་འགལ་བའི་ནག་ཉེས་བཙུགས་ཏེ། ཉེས་ཆད་ནན་མོ་གཅོད་ཀྱི་ཡོད་སྐོར་བརྗོད་བྱུང་།
བོད་མི་ཉི་མ་ཡིས་ཆུ་ཤུར་རྫོང་ཉེན་རྟོག་ཁང་དུ་ལས་ཀ་བྱས་ཏེ་ལོ་ ༩ ཙམ་དང་། ཀརྨ་མཚོ་མོས་ལོ་ ༤ ལྷག་རིང་ལས་ཀ་བྱས་ཡོད་འདུག
