ཨ་རིའི་གྲོས་ཚོགས་གོང་མའི་སྐུ་ཚབ་ཚོགས་ཆུང་ཞིག་དྷ་སར་ཕེབས། 

ཨ་རིའི་གྲོས་ཚོགས་གོང་མའི་སྐུ་ཚབ་ཚོགས་ཆུང་ཞིག་དྷ་སར་ཕེབས་ནས་སྲིད་སྐྱོང་སྤེན་པ་ཚེ་རིང་མཆོག་སོགས་དང་མཇལ་འཕྲད་གནང་།

ཁ་སང་ཕྱི་ཚེས ༡༢ ཉིན་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས་ཀྱིས་འཁྲིད་པའི་ཨ་རིའི་གྲོས་ཚོགས་གོང་མའི་འཐུས་མི་བྷན་ཁར་ཌིན་ (Ben Cardin) ལགས་ཀྱི་ཕྱི་སྲིད་སློབ་སྟོན་པ་རྒན་པ་ཊོམ་མི་ལི་ཡ་ (Tom Melia) ལགས་དང་། ཨ་རིའི་གྲོས་ཚོགས་གོང་མའི་གྲོས་ཚོགས་འཐུས་མི་མེ་ཊི་རོམ་ནེ་(Mitt Romney) ལགས་ཀྱི་རྒྱལ་སྲུང་སློབ་སྟོན་པ་མེ་གན་རེ་སི་ (Megan Reiss) ལགས། ཨ་རིའི་གྲོས་ཚོགས་གོང་མའི་གྲོས་ཚོགས་འཐུས་མི་ཇོ་ནི་ཨན་སི་ཊི་(Joni Ernst) ་ལགས་ཀྱི་ཕྱི་སྲིད་ཕྱག་རོགས་ཨེ་ཌམ་ཀོ་ཛི་ལོ་སི་ཀི་(Adam Kozloski) ལགས་བཅས་ལས་གྲུབ་པའི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་སར་ཕེབས་ནས་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་རྣམ་གཉིས་ལ་མཇལ་འཕྲད་གནང་ཡོད་འདུག

དེ་རིང་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་པའི་ཚོགས་མི་ཁག་གིས། དྷ་སྟེང་བོད་ཁྱིམ་དུ་གཟིགས་སྐྱོར་ལ་ཕེབས་ནས། སློབ་གྲྭའི་ཁོར་ཡུག་སོགས་ལ་གཟིགས་ཞིབ་ནན་མོ་གནང་ཡོད་པ་མ་ཟད། སློབ་གྲྭའི་དེའི་ཤེས་ཡོན་འགན་འཛིན་འབྲུག་ཚེ་རིང་ལགས་སོགས་དང་མཇལ་འཕྲད་གནང་སྟེ་བོད་ཁྱིམ་སློབ་གྲྭའི་སྐོར་ལ་གླེང་སློང་གནང་ཡོད་འདུག

དེ་བཞིན། བོད་མིའི་སྒྲིག་འཛུགས་ཀྱི་ཕྱི་འབྲེལ་ལས་ཁུངས་དང་ཨོ་གླིང་སྐུ་ཚབ་དོན་ཁང་གཉིས་ཀྱི་གོ་སྒྲིག་འོག འདི་ལོའི་ཕྱི་ཟླ་ ༤ ཚེས་ ༡༧ ནས་ ༢༠ བར་ཨོ་གླིང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་གྱི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་རམ་ས་ལར་ཕེབས་འཆར་ཡོད་འདུག་ལ། ད་ལྟའི་ཆར་ངེས་གཏན་མེད་ཀྱང་ཐེངས་འདིའི་སྐུ་ཚབ་ཚོགས་ཆུང་གི་གཟིགས་སྐོར་ནང་བོད་དོན་རྒྱབ་སྐྱོར་བ་འཐུས་མི་ ༥ ཡས་མས་ཕེབས་ཀྱི་ཡོད་འདུག་ལ། ཟླ་འདིའི་བདུན་ཕྲག་རྗེས་མའི་ཉིན་ལྔའི་རིང་ཧྥ་རན་སིའི་གྲོས་ཚོགས་འཐུས་མི་བཞི་ལས་གྲུབ་པའི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་སའི་ཁུལ་དུ་འཚམས་གཟིགས་ཕེབས་འཆར་ཡོད་ཅིང་། ཐེངས་འདིའི་སྐུ་ཚབ་ཚོགས་ཆུང་དུ་ཧྥ་རན་སིའི་གྲོས་ཚོགས་གོང་མའི་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་ཇེ་ཁེ་ལིན་(Jacqueline Eustache-Brinio) ལགས་དང་། གྲོས་ཚོགས་གོང་མའི་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་མི་ལྕམ་ཨེལ་སི་ཇོ་སེ་ཧྥི་ (Else Joseph)ལགས། གྲོས་ཚོགས་གོང་མའི་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་མི་རི་ཌི་མན་( Rietmann) ལགས་སོགས་ཕེབས་ཀྱི་ཡོད་འདུག

གཞན་ཡང་། འཛམ་གླིང་རྒྱལ་ཁབ་ ༢༠ ཡི་ཕྱི་སྲིད་བློན་ཆེན་རྣམས་རྒྱ་གར་གྱི་རྒྱལ་ས་ལྡི་ལིར་འཛོམས་ཡོད་པའི་གོ་སྐབས་དང་བསྟུན། འདི་ལོའི་ཕྱི་ཟླ་ ༢ ཚེས་ ༢༨ ཉིན་དབུས་བོད་མིའི་སྒྲིག་འཛུགས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། ལྡི་ལི་སྐུ་ཚབ་དོན་གཅོད་སྤྱི་ཟུར་བློ་བཟང་ཤཱསྟྲི་ལགས་དང་དྲུང་ཆེ་དོན་གྲུབ་རྒྱལ་པོ་ལགས་བཅས་ཀྱིས། ཅེག་སྤྱི་མཐུན་རྒྱལ་ཁབ་ཀྱི་ཕྱི་སྲིད་བློན་ཆེན་སྐུ་ཞབས་ཇན་ལི་བྷ་སི་ཀེ་ (Jan Lipavský) མཆོག་དང་ཟུར་མཇལ་གནང་སྟེ། ཅེག་སྤྱི་མཐུན་རྒྱལ་ཁབ་ཀྱིས་མུ་མཐུད་དུ་བོད་མི་ནང་གི་འགྲོ་བ་མིའི་ཐོབ་ཐང་སོགས་ཀྱི་ཐད་ལ་རྒྱབ་སྐྱོར་དང་། གཞིས་བཞུགས་བོད་མི་རྣམས་ཀྱི་འགྲོ་འདུག་གི་རང་དབང་གཙོས་བོད་ནང་གི་འགྲོ་བ་མིའི་ཐོབ་ཐང་སྐོར་ལ་གླེང་སློང་སོགས་གནང་ཡོད་འདུག

གསར་འགོད་པ། དཔལ་ལྡན།